Filosofi dalam Tungku Nan 3 (Tigo) Sajarangan (Metafora Sistem Kapamimpinan Masyarakaik Minangkabau)

Jikok kito bacarito tantangan sistem kapamimpinan sosial masyarakaik Minangkabau, mako kito indak bisa lapeh dari istilah “Nan 3 (Tigo)”, yoitu; “Tungku Nan 3 (Tigo) Sajarangan”, “Tali 3 (Tigo) Sapilin”, sarato “Rajo Nan 3 (Tigo) Selo”. Camin dalam dari Nan 3 (Tigo) ko iolah Alua Nan 3 (Tigo), yoitu; alua syarak, alua pamarintahan, jo alua adaik. Camin lua/camin taruihnyo iolah limbago syarak (musajik), limbago pamarintahan (kantua nagari, camaik, dst.), sarato limbago adaik (balai adaik). Urang gadangnyo tantulah pamuko-pamuko dari katigo alua jo limbago nantun, yoitu; pamuko agamo, pamarintah, sarato pamuko-pamuko adaik.

Istilah-istilah di ateh, manuruik ilimu bahaso bisa dimasuakkan kadalam jinih metafora, yoitu panyamoan suatu pakaro/barang jo pakaro atau barang lain. Panyamoan nantun punyo motif tatantu, di antaronyo; untuak mampajaleh mukasuik/amanaik, atau sabaliaknyo untuak manyiraikkan mukasuik karano bahubuangan jo kaidah sopan-santun.

Kato kunci dari sagalo metafora-metafora di ateh iolah; sajarangan, sapilin, saselo. Sajarangan/sapilin/saselo maknyanyo maminteh kapado harmonisasi antaro urang-urang nan barado dalam “tungku nan 3/tali nan 3/rajo nan 3”. Mukasuiknyo, sagalo “nan 3” nantun, saniaik sasangajo, saiyo sakato dalam mamahami jo malewakan kadudukan, pungsi, jo gunonyo nyo masiang-masiang sarato dalam mawujuikkan masyarakaik nan diniaikkan.

Singkek carito, sajarangan/sapilin/saselo mangacu kapado harmonisasi antaro pamuko agamo, pamarintah, jo pamuko adaik dalam mawujuikkkan kahidupan masyarakaik nan baiak. Kutiko ciek sajo dari katigonyo timpang, mako kasaimbangan dalam masyarakaik susah tajadi, aturan susah untuak ditagakkan. Itulah hubuangan metaforanyo jo 3 tungku bagi urang batanak, jikok tungku nan lah senjang, tantu susah kito mamasak. Jadi, filosofi Tungku Nan Tigo Sajarangan iolah kasaimbangan/harmonisasi antaro sistem agamo, sistem adaik, jo sistem pamarintahan.

Di dalam hiduik banagari, filosofi tungku nan tigo sajarangan ko dilambangkan jo limbago agamo (musajik), limbago pamarintahan (kantua nagari), jo limbago adaik (balai adaik). Dari katigo limbago ko, limbago adaik adolah nan paliang kurang mandapek paratian sahinggo banyak balai adaik nan indak bajalan sasuai jo kadudukan sarato pungsinyo.  

Ujuang-ujuangnyo, pamuko adaik (misanyo ampek jinih) sarupo urang nan indak tau jo nan ampek atau ndak professional kecek rang kini kutiko malaluan tugehnyo. Tugeh indak dilaluan dib alai adaik, hasia/data satiok rundiangan, silang sangketo, sarato masalah adaik lainnyo dibaok pulang ka rumah bini. Indak disimpan dibalai adaik, tampek nan samustinyo. Kadudukan sarato pakaro mamak-kamanakan campua-bawua jo kadudukan sarato pakaro bapak-anak/laki-bini. Kutiko tajadi masalah di balakang hari, panungkek nan taniayo karano ndak punyo dalia/data nan kuaik sabagai pagangan dalam manyalasaikan masalah nan tajadi.