Si Pangka

Assalaamu alaikum wa rahmatullaahi wa barakatuh.


Sambah dianjuang suok kida kapado sagalo Dunsanak nan mambaco jo manilik isi blog ko. Bukan ambo cadiak pandai Sanak, sakadar mambaco jo mangamakan sagalo nan didapek sajo. Maklum, ambo ko hanyo biduak ketek nan baru sudah, pakakeh nan alun langkok bana. Jikok balayia manapi-napi, bakato tantu di bawah-bawah. Ka tangah takuik dek galombang, ka tapi takuik dek buayo. Umua alun satahun jaguang, darah alun satampuak pinang. Pulang maklum ambo pintokan.
Tapi samantang baitu, takana ambo jo pituah urang tuo-tuo, "kabanaran butuah pambandiang, alua butuah pamatuik, barulah kako dimungkinkan". Makonyo, ambo baranikan diri maadu untuang mangatangahkan juadah nanko. Ambo pabulek alu pangali indak nan labiah dari puntuang, ambo pakuaik hati nurani indak nan labiah dari untuang. Walau ka angok-angok ikan, bogo ka nyawo-nyawo patuang. Pintak ambo kapado Dunsanak pambaco, usah dicacek langkah sumbang, nak jan bungkuak pungguang dek baban, Bundo lah seso manggadangan. Kok barubah lawanan sapo, batuka lawanan ansak, manuruik alua jo patuik. Untuak itu, jo salam di muko, sambah ambo sampaikan.
Sataruihnyo, tantangan badan diri Ambo. Namo ambo Hendri Zalman, "gala mudo" Rajo Ambun, dilahiakan pado 08 April 1981 di Nagari Batubanyak, Kecamatan Lembang Jaya, Kabupaten Solok. Pandidikan dasar formal jo informal (SD jo Surau) di masak di kampuang halaman. Untuak SMP jo SMA, ambo disarahkan urang tuo ka Pesantren Modern Prof. Dr. Hamka di Nagari Pasa Usang, Padang-Pariaman. Salanjuiknyo, barakek jariah urang tuo juo, ambo dibari kasampatan untuak masuak paguruan Tinggi, Jurusan Bahasa dan Budaya Jepang, Universitas Bung Hatta (S1), Padang. Alhamdulillah, baru-baru ko (awal 2012), ambo manamaikkan Magister (S2) dalam bidang Pendidikan Bahasa Jepang di Universitas Pendidikan Indonesia (UPI) Bandung. Jadi, ambo bukanlah Panghulu, Manti, Malin, apo lai Dubalang, hanyo mudo nan bakakak, rapek nan bakapalo, parik paga dalam nagari. Rusuah agamo kok ka rusak, adaik limbago kok ka binaso, parik rantang kok ka taereang.
Di baliak pambalakangan itu,  tantangan pangatahuan Adaik Istiadaik Minangkabau, ambo dapek malalui mangaji di Surau sarato langsuang sacaro pribadi kapado urang tuo-tuo. Karano sifaiknyo indak formal, mako tantangan kaji adaik ko, masih balanjuik hinggo kini. Untuak itu, kapado Basri Malin Bungsu (alm), Wirman Khatib Batuah, Musra Dahrizal Katik Jo Mangkuto, Muhammad Nur (Apak), jo salam di muko sambah ambo sampaikan. Lalu, malalui isi blog ko, raso tarimo kasih nan indak tabilang ambo langsuangkan. Mudah-mudahan, banyak guno pado mudharaiknyo. Jadi pambalajaran untuak ambo, palapang dado sarato palueh wawasan bagi nan mambaco. Untuk baliau guru-guru ambo, jadi "taubatan qablal maut, wa rah matan indal maut, wa magfiratan ba'dal maut". Amin.

Akhianyo, tantangan juadah ambo nan ko, sungguahpun indak manih saroman tabu, mudah-mudahan lai indak tibarau sajo kasadonyo.  Kok lai ado nan boneh, tolonglah naikkan ka ateh rangkiang, kok ampo sansai sajo nan tasuo, campakanlah ka sarok laman.  Di balakang ambo baharok, kok indak ka jadi pamenan dek Sutan-Sutan, atau jadi pahangek lalok dek si Buyuang, bialah jadi rasaki ayam.  Jo salam ambo akhiri pasambahan, assalamu alaikum wa rahmatullahi wa barakatuh.

7 comments:

  1. Sambah kapado Allah, salam kapado Rajo Ambun, ambo datang jo hati nan suci muko nan janiah. Yo sanang hati hati urang tuo, kok banyak nan mudo cando iko. Tabangnyo marandah-randah samo jo padi nan lah boneh dek isinyo. Lah bisa jadi tampek babagi jo bacarito.

    HA. RKM

    ReplyDelete
  2. Salam pak, dari siswi bapak. Assalamualaikum, sehat selalu bapak

    ReplyDelete