Kumpulan Kato Pambukak Pidato Pasambahan

1.   Contoh Kato Pambukak 1

Sipangka   :   Maa Angku/ Datuak......

Alek           :   Manitahlah Angku/ Datuak.........

Sipangka   :   Sambah dipulangkan pado Angku/ Datuak......

Sipangka   :   Kapado Allah

Sipangka   :   Sikaduduak di ateh parik – sarumpun jo bilang-bilang, manolah sagalo Angku-Angku nan duduak balirik – indak ka Ambo atok, indak ka Ambo bilang.
Di atehnyo Niniek jo Mamak, Alim jo Ulama, Pakieh jo Fukaha^’, Gadang nan bakabasaran, Kayo nan bakamoleran. Indak kadisabuikkan namo – atau kadipanggiakan gala – disabuik namo bak raso ndak katantu – dipanggiakan gala bak raso ndak kaabeh. Lah tantu bana namo sagalo angku-angku, bak raso kasalah sabuik ambo jadinyo. Maklum Alim banyak nan kiramaik – Panghulu banyak nan batuah. Malantiang nak manuju tampuak – nak ditantang buah nan kalareh. Yo kapado Angkulah sambah dipulangkan.

2.    Contoh Kato Pambukak 2

Sipangka   :   Taantak puntiang ka hulu – di bawah kiliran taji – asa mulo kato dahulu – tigo limbago nan tajali. Partamo sambah-manyambah – kaduo baso jo basi – katigo siriah jo pinang. Sambah-manyambah dalam adaik – tali-batali undang-undang. Nan tasabuik di muluik manih – nan tapakai di baso baiak – muluik manih talempong kato – baso baiak gulo di bibia – di dalam bungka nan piawai banamo adaik sopan santun. Nyato limbago nan tajali, isinyo adek jo pusako – basamo kito mamakaikan. Sajak barajo nan usali – sampai sakarang kini nanko – adaik pidato disambahkan. Alum sudah janjang lah tagok – lah patah mangkok dikumpa – nak samo dibuhua mati. Falsafah adaik Minangkabau mangatokan: adaik basandi syara^’ – syara^’ basandi kitabullah – syarak mangato – adaik mamakai – bana manuruik syara’ – luruih manuruik adaik – di syara’ babilang lazim, di adaik bakato kawi. Makonyo Panghulu dikatokan saandiko – alim saagamo. Walaupun abih tahun baganti musim, namun nan bana indak buliah dilampaui. Satantang jo itu, ado babarapo pakaro nan kaambo banakan bakek Angku, yaitunyo tantangan badan diri Ambo – nan kamalelokan sapanjang adaik – iyo di dalam alek nanko. Ibaraiknyo biduak kaciak nan baru sudah – pakakeh nan alun langkok bana – kok balayie manapi-napi – bakato dibawah-bawah, ka tangah takuik dek galombang – ka tapi takuik dek buayo – kok barubah lawanan sapo – batuka lawanan ansak. Kalilawa di pulau rambang – anak ruso mati badabieh – kok gawa dapek ditimbang – kok doso ampun nan labieh. Kok ado khilaf jo gawa – sakali gawa baribu ampun. Sakian sambah dipulangkan.

3.    Contoh Kato Pambukak 3

Sipangka   :   Sambah dianjuang kiri kanan – kapado sagalo Datuak-Datuak, Alim Ulama, Cadiak Pandai. Indak basibak jo basisieh – indak bahinggo jo babateh – khususnyo kapado Datuak surang. Sabab ka Datuak sambah dipulangkan; ibaraiknyo badan diri Datuak; kayu gadang nan manangah koto – nan baurek limbago matan – nan babatang sandi andiko – badahan cupak jo gantang – barantiang mungkin jo patuik. Nan badaun rimbun jo adaik – babuah kato nan bana – babungo alua jo patuik. Bakek baselo di ureknyo – tampek basanda di batangnyo. Hari hujan tampek bataduah – hari paneh tampek balinduang. Tampek nan mudo sanda gurau – tampek nan tuo main catua – tampek alim main kitab. Gantungan cupak nan duo; partamo cupak usali, kaduo cupak buatan. Nan dikatokan cupak usali; nan sakundi-kundinyo – nan sabantiang tali bajak – kupang jo ameh langkok pulo – barek nan 12 taia. Dikikih baabih basi – dibasuah baabih aia – ndak lakang karano paneh – ndak lapuak karano hujan. Nan dikatokan cupak buatan; batapuang kapua jo sadah – balilik pinang jo gambia - saiyo mangkoknyo namuah, sapakaik mangkok manjadi. Baatunyo kini, iyolah sapakaik pulo kami nan di pangka – baraso nan ka jadi tumpuan kato iyolah Datuak. Sabab, dek kami Datuak ibarek batu ka bakek duduak – ibarek tunggua ka bakek tagak – umpamo batang bakek basanda. Nak sasuai jo pituah Minang; kato datang dipamole/ pamolah – sambah lalu ditarimo, yo tarimo di Datuak baiak-baiak mah.

4.    Contoh Kato Pambukak 4

Sipangka   :   Sungguahpun Angku surang nan dihadang jo pasambahan – tagah dihimbau nan sakali – disambah pulolah sagalo Angku-Angku dari pangka sampai ka ujuang – dari tangah lalu ka tapi. Diatehnyo Niniek jo Mamak Nan Gadang Basa Batuah – gadang nan sabingka tanah – kabasaran nan salingka aua – tuah malingkuang Minangkabau – ka pai tampek batanyo – ka pulang tampek babarito. Aie janieh sayaknyo landai – mansucikan lahie jo batin – indak  manyimpang pado syara^’ – taguah  bapagang jo adaiknyo. Katupek baok balayia – baok kasampan kalimonyo – takilek ikan di dalam aia – lah tantu jantan batinonyo – baitu Jauhari Datuak kito. Kamudian alim jo ulama – fakiah jo fukaha^’ – nan kamanunjuak maaja ka nan baiak – managah malarang ka nan munkia – camin nan indak namuah kabuik – palito nan indak namuah padam – salamo bukik ditampuah angin – lurah ditampuah aia – ka unduang-unduang ka Madinah – ka payuang panji ka sarugo. Salanjuiknyo, mudo nan bakakak rapek nan bakapalo – parik paga dalam nagari – panjang tasandang di ateh bahu – barek  tanjunjuang di kapalo – ringan tajenjeng nan jo jari – rusuah agamo kok ka rusak – adaik  limbago kok ka binaso – parik rantang kok ka taereng - indak mangana jarieh jo payah – asa nagari lai salamaik. Sasudah itu, urang tuo nan saundang-undang – ka pai tampek batanyo – ka pulang tampek babarito – ka tampek alim main kitab – bakek nan cadiak main undang. Lalu, urang banyak nan saedaran – duduak nan sahamparan – nan saadaik salimbago. Dan di dalam pasambahan ambo juo, Bundokanduang samo di dalam – nan mamacik kunci bunian – Lumbuang Nagari kato adaik. Jo salam sambah disampaikan. 

Baa tu nyo kini, ulangiang nak batumbuakan – kuak padang nak batantangan, yo kapado Angku lah sambah di pulangkan.

Alek           :   Kapado Allah.

Sipangka   :   Adopun sambah nan ka dipulangkan bakek Angku – adolah sasuai jo pituah Angku juo – nan banamo Basa Ampek Balai – Indomo di Saruaso – Tuan Titah di Sungai Tarab – Tuan Kadi di Padang Gantiang – Tuan Gadang di Baitpuah. Nan  mancari kato nan sapakaik – rundiangan nan saiyo – iyo di alam Minangkabau. Bulek nak buliah digolongkan – picak nak buliah dilayangkan. Saiyo mangkoknyo namuah – sapakaik mangkok manjadi. Tantangan itu, iyolah lah sapakaik pulo nan tuo-tuo sabalah pangka taradok badan diri ambo – untuk manjadi kalifah nan kadim wakia nan mutlak. Manyampaikan kato malalukan rundingan – kapado sagalo angku-angku – nan tatumbuak ka bakek diri Angku. Lai kok di lingkuang adaik jo pusako – dilingka barih jo balabeh. Barilah Ambo kato gak sapatah – nak sanang pulo hati nan ko.

Alek           :   Alah sampai tu Angku?

Sipangka   :   Bilang baitu lah sampainyo.

Alek           :   Sapanjang panitahan Datuak tadi – dari pangka sampai ka ujuang – alah tateba ka nan rapek. Elok kato lah dilega buni – elok sirih lah dilega carano. Manolah nan pituah dari datuak – iyolah tantangan diri datuak – nan kamanjadi kalifah nan kadim wakia nan mutlak – manyampaikan kato malalukan rundingan – nan tatumbuak ka badan diri ambo – alahkah manuruik alua jo patuik. Bana baitu Angku?

Sipangka   :   Bana tu Angku.

Alek           :   Samantang pun baitu – nan bak pituah datuak juo; badeta hitam batatak – bacawek salillik pinggang – baserong si bugih lamo, nan lai tampek mamintak – nan kayo tampek batenggang – nan tuo tampek batanyo. Karano kami lai duduak jo nan tuo – sabalah Angku sakutiko. Ibaraik urang mamanciang; duduak tamanuang tapi aie – gilo dilamun-lamun ombak – kayie putuih palampuang anyuik. Samintaro tangan ka kumparan, saba manunggu malah Angku.

Sipangka   :   Iyo basaba Ambo Angku.

Alek           :   Maa baliau Angku......

Sipangka   :   Manitahlah Angku........

Alek           :   Sapanjang panitahan Angku tadi, – tantangan badan diri angku – nan kamalelokan sapanjang adaik – di dalam alek jamuan nanko.  Alah kami paiyo patidokan jo baliau nan tuo sabalah kaujuang ko, apo nan pituah baliau: Alah taracak di kudonyo, alah taimbau dinamonyo – lah bak cincin lakek di jari – lah bak ukia lakek di papan. Baa salanjuiknyo, dek hari lai baiek kutiko lai elok – sadang wakatu angin tanang - kapa lah datang dari lawuik – musuah datang padang disintak – samo baniaik kaduonyo. Kok ado niaik di selang nan bapangka karajo nan bapoko.k – laiakanlah kutiko bak kini – buni nak samo kito danga – rupo nak samo kito liaik. Sakian, sambah dipulangkan bakek Angku.

Sipangka   :   Lah sampai tu Angku?

Alek           :   Bilang baitu lah sampainyo

Sipangka   :   Dikatokanlah dapek kami kato nan sapatah – aia nan satitiak – sifaik pituah dari datuak, lah sanang pulo hati kami. Nan kajadi isi pasambahan kami; tarupo alah manjadi adaik – elok lah jadi pakaian. Manolah nan tarupo dihadapan kami selang nan bapangka karajo nan bapokok; lah tibo pulo api jo kumayan. Sungguahpun putuih gayuang dibalabeh – putuih kato dipangkanyo, karano adaik mamareso – pusako patitiah – jambatan rundiang musyawarah – bana dicari sampai dapek. Yo barilah kami kato gak sapatah Datuak, nak sanang pulo hati kami. Sakian sambah dipulangkan.

Alek           :   Manuruik pituah Angku tadi, jikok diinok dikanang-kanang – ditilik mungkin jo patuik; lah manih bak umpamo pisang – lamak bak santan jo tangguli – bak manisan aia tabu. Kok lah sampai api jo kumayan, ambiak api panggang kumayan – bakawualah Angku agak panjang – saru nak sampai pado Allah – kami nak dapek kalimpahannyo. Sakian sambah dipulangkan.

Sipangka   :   Dikatokanlah dapek izin dari Datuak, kato sapatah patando suci – muluik sabuah patando izin, lah sanang pulo hati kami. Nan kajadi pakawuran kami ateh namo selang nan bapangka karajo nan bapokok – di hari nan sahari tadi – di malam nan samalam nanko, iyolah ado duo tigo pakaro.