Kumpulan Kato Panutuik Pidato Pasambahan

Contoh Kato Panutuik 1 (Pidato Luhak)

Alek           :   Kutiko sumua ka digali – rantiang ka dipatah – nagari ka dihuni – iyo di Pariangan Padang Panjang. Disinan lah duduak Datuak Katumanggungan jo datuak Parpatih Nan Sabatang, mambuek koto jo taratak – sarato luhak nan jo lareh, luhak tigo lareh duo; partamo lareh Koto Piliang – kaduo lareh Bodhi Caniago. Adopun lareh Koto Piliang – kabasaran Datuak Katumanggungan – inyo barasa dari rajo. Lareh Bodi Caniago – kabasaran Datuak Parpatih Nan Sabatang – inyo barasa dari puti – nan samande sabapak indak.
Disabuik luhak nan tigo; partamo luhak Tanah Data; nan bajanjang ka koto rajo – bapintu ka Sungai Patai – badatuak ka Pagaruyuang. Baniniak ka Batu Sangka – bakampuang di Balah Labuah, banamo Dusun Tuo – Sambilan Koto di lua – Duo Baleh Koto di dalam – batabek basawah tangah – sawah gadang si tampang baniah – makanan anak tigo luhak. Dek pandai mamak baragiah – anak buliah – kaminakan ndak usak. Nan kaduo luhak Agam; salilik gunuang Marapi – saedaran gunuang Pasaman – sampai Lado Sulah Mudiak – sahinggo dusun Tungga Hilia. Disabuik luhak Limo Puluah; Dari Sisawuik Sungai Rimbang – hinggo Sikokoh Pinang Tuo – Sialang Balantak Basi, baitu buni nan tadanga, kini disabuik-sabuik juo – tasabuik di dalam adaik – takarang di dalam undang. Ujuang labuah Tanjuang Sungayang – di dalam luhak jo lareh – tujuah koto di dalam – babasa ampek balai – balimo rajo di dalam. Partamo rajo di luhak – kaduo rajo di sandi – katigo rajo di ranah – kaampek rajo di hulu – kalimo rajo di lareh. Nan banamo pamuncak adaik – bajanjang ka koto rajo – bapintu ka Sungai Patai – badatuak ka Batu Sangka – timbalan datuak Mingkudum. Nagari salamek samparono – cukuik jo adaik jo pusako – langkok jo barih jo balabeh – hutang dek kito mamakaikan. Di kami nan sagalo alek, lah kami pakaikan manuruik nan biaso; kok imbau lah kami sahuti – panggia lah kami hadiri – jauah lah kami jalang – dakek lah kami silau – sampai ka rumah tango nanko. Kok tibo kami lah baduduakkan – dinanti jo lapiak nan tabantang janiah – lampu nan tapasang tarang – kok kandak lah kami isi – lah kami bacokan ayat jo fatihah – sarato salawaik jo tahlil. Mudah-mudahan selang nan bapangka – mandapek rahmat dari Allah SWT, kok ado nan mati di hutan jo baluka – jauah nan indak mungkin dijalang – dakek nan ndak mungkin disilau – lapeh juolah baliau tu dari sagalo marobahayo. Jikok rasaki lah kami tarimo – makan lah tibo di nan kanyang – minum lah tibo di nan sajuak. Salanjuiknyo, tantangan kami nan sagalo alek, kalau diumpamokan ka buruang banyak; pueh malayang jo malayok – hinggok di padang ribu-ribu, minum ambun nan satitiek – sarato mamakan buah rumpuik, badan litak paruiklah kanyang – jikok hawuih rasolah pueh – nak tabang kutiko bak kini – manuju pinang nan sabatang – pulang kaasa mulo jadi. Samintaro kaki lai basitumpu – sabalum kapak kadikirai – izin dimintak bakek Angku mah. Sakian Angku.

Contoh Kato Panutuik 2 (Pidato Luhak)

Alek           :   Dari mano titiak pulito – dari bawah telong nan batali – tarang bulan babenko-benko – bacahayo ka tangah padang, dari maa asa niniak kito – dari puncak gunuang marapi – turun ka Galundi nan baselo – iyo Pariangan Padangpanjang. Sirawuik bari bahulu – diasah mangkok bamato – lawuik sajo maso dahulu – balum banamo pulau paco. Di sinan Sirangkak nan badangkang – iyo buayo putiah daguak,di bawah batu hamparan putiah – di bukik patah patigo – atau bukik si Guntang-Guntang – guntang nan tigo jo jurusan. Di bukik nan indak barangin – di lurah nan indak baraia, di sinan bingkuak nan barayun – di bawah labuah si timbago. Dek niniak moyang kito dahulu; dibuek sawah jo ladang – dibangun rumah jo tango – sarato koto jo nagari. Dek lamo musim bajalan – urang batambah rami juo, dibuek adaik dikarang undang – dipiliah atah ciek-ciek – digantuangkan ka tiang panjang, dibuek adaik ampek rupo; nan partamo cupak jo gantang – kaduo ukua jo jangko – katigo suri jo tauladan – kaampek barih jo balabeh. Dibuek undang ampek rupo; partamo undang-undang luhak – kaduo undang-undang lareh – katigo undang-undang Panghulu – kaampek undang-undang rajo, rajo dibari badaulat – panghulu dibari kabasaran. Pado maso kutiko itu, balum barubah pakandangan – balum ba Sintuak Lubuak Aluang – balum ba Tiku Pariaman. Maso badeta – deta upiah, maso bapinggan kayu panarahan – maso mancancang jo malatieh – maso mambuek sawah jo ladang – sarato jo banda buatan. Niniak kito nan mulo-mulo mancancang jo malatiah – bagala datuak Tantejo garhano; Indobiyo namo bapaknyo - Inyiek Kolat namo ibunyo, nan manurang sambia tagak – maatok sambia duduak, jadi pituah sampai kini “kok duduak marawuik ranjau, kok tagak maninjau jarak”. Manuruik tinjauan kami tantangan alek nan duduak, jikok di bukik lah tibo manurun – di lurah lah datang mandaki – lah duduak di ateh rumah tango nanko. Manuruik pituah datuak juo, adaik balukih balimbago – bungka ganok cupak buatan – banamo adaik nan usali – lah patuik undang dikarasi. Jiko diliek kapado alek nanko; kapa lah panuah dek muatan – dandang lah sarek dek panumpang – patuik balayia musim kini – wakatu angin lai salasai. Tapi samantang pun baitu, bakain timpo batanti – batanti ujuang pangkanyo – baa baitu kandak kami – karano putuih kato di pangkanyo. Sakian Angku....  

Contoh Kato Panutuik 3

Alek           :   Sungguahpun Angku surang nan dihadang dek pasambahan – tagah dihimbau nan sakali – di awal kato nan sapatah., rapeklah kapado sagalo selang nan bapangka karajo nan bapokok – khususnyo kapado Angku surang. Adopun sambah nan ka dipulangkan – nan bak gurindam urang minang; Tanjuang Bingkuang jo Saniang Baka – di tangah-tangah koto Sumani – dari ujuang sampai ka pangka – dari tangah lalu ka tapi – wujuiknyo kato buah rundingan – kapado sagalo Angku-Angku. Karano kampuang bapanghuni hamba Allah – nagari barisi umat nabi – langkok jo jangka jo ukuran – sarato barih jo balabeh – hutang di kito mamakaikan. Kalau tapakai nan baitu, tatampuah jalan nan duo; partamo lazim pado syara^’ – kaduo kawi pado adaik. Nan dikatokan lazim pado syara^’; ijab sudah kabua bajawaik – hokum putuih tampek bagantuang – wajib nan indak buliah tingga – sunat lah nyato bafaedah. Dikatokan kawi pado adek; nan bakorong bakampuang – baipa babisan, riang nan samo digalakkan – gamang jawaik manjawaik – panggia nan samo bahadiri – himbau nan samo basahuti. Jikok kami nan sagalo alek, alua nan luruih kami turuik – jalan nan pasa kami tampuah – sampai di rumah tango nanko. Kok tibo kami lah baduduakkan – lampu lah tapasang tarang – lapiak lah tabantang janiah. Salanjuiknyo, titah lah kami junjuang – rasaki lah kami tarimo. Tantangan kandak selang nan bapangka karajo nan bapokok, lah kami kaokan manuruik nan biaso – lah diawali jo fatihah – salawaik jo tahlil – lah dipati pulo jo doa. Mudah-mudahan sagalo amal nan kito karajokan – mandapek pahalo dari tuhan – kalimpahan kapado selang nan bapangka karajo nan bapokok. Baitu juo jo arwah urang tuo-tuo; lapehlah dari azab kubua jo azab narako – sakadudukanlah jo nabi kito Muhammad SAW – dalam sarugo Jannatun Naim. Kamudian tantangan rasaki nan kami tarimo; makan lah tibo di nan kanyang – minum lah tibo di nan sajuak. Ibarek kapa di lautan; gilo dilamun-lamun ombak – ombak mahampeh kiri kanan, namun dek arif juru mudi – tacapai juo tanah tapi, kok kapa lah tibo di labuhan – dandang lah masuak ka kualo, kami nak turun ka daratan – manuju tampek masiang-masiang. Sakian Angku.

Sipangka   :   Sapanjang pituah Datuak tadi dari ujuang sampai ka pangka, itulah kato sabananyo. Tapi samantangpun baitu, tinggalah Datuak jo nan tanang, nak kami ambiak kato jo mufakaik.

Alek           :   Iyo, basaba kami Angku...

Sipangka   :   Mandanga pituah Datuak tadi, tasirok darah di dado – bakumpa karang ka tapi – badan bak raso bayang-bayang. Apo sabaik mangkok baitu; manuruik pituah nan tuo di pangka; alua adaik balabeh barih – Panghulu saundang-undang – adaik Manti samo sakato, di dalam aluran adaik – pakailah bungka jo taraju. Mandanga alek ka pai, baguncang rumah nan gadang – bagarak tiang ka tujuahnyo. Kok pintu lah basantuang arek – kok jajang lah baansak jauh. Kamano Datuak ka lalu.

Alek           :   Koto Rimbang kampuang nan jauah – basimpang jalan ka Tandikek – ka hilia ka Kuraitaji sarato Tiku jo Pariaman – kabasaran Anggun Nan Tongga, kok janjang nan baansak jauh – pintu nan basantuang arek – anak kunci ado di kami – kok dapek ujuang pambarantian – alum diurak inyo lah tangga.

Sipangka   :   Taganglah barih jo balabeh – diukua mangkok dikatam – kama Datuak ka bagageh – disiko awak bamalam.

Alek           :   Nak urang Muaro Paneh – di Solok bakadai kain – tibo di pakan jua bali, sabaiknyo kami ka bagageh – ado janjian jo nan lain – rumik rasonyo mamungkiri.

Sipangka   :   Manuruik kato Datuak tadi, jikok diinok dikanang-kanang, itulah kato sabananyo. Kok sumbahyang lah tibo di wakatu – alek lah tibo di kutiko. Tapi nan marusuah di hati kami; lah iko malamnyo hari – hari malam jalan bakelok – hari hujan jalan kok alia – tagamang kami nan malapeh.

Alek           :   Sapanjang pituah Angku tadi; dipaliang umpamo cincin – dikisa ibarek galang – bantuak lah dimakan siku-siku, jikok luruih lah manahan tiliak – balabeh lah manahan cubo. Tapi samantangpun baitu, dek kami nan sagalo alek; tatkalo langkah ka diayun – kok kalam lah kami sadiokan suluah – kok hujan lah kami sadiokan payuang – alah kok sanang hati Angku.

Sipangka   :   Kok baitu pituah Datuak, nan bak gurindam urang minang; ditarah indak tatarah – lah bak manarah patang sampia – ditabeh iyo nan jadi, ditagah indak tatagah – lah bak managah aia hilia – dilapeh iyo nan jadi. Tapi saketek kami banakan; ditabang batang limau puruik – dilatak di tapi banda – dibaok ka Kinari, Datuak datang karano japuik – kok pulang indak kabaanta – turuik sajolah jalan nan tadi. Sakian Datuak.

Alek           :   Kok indak ka Angku latak di ateh dulang – latakkanlah di ateh cawan, kok indak ka Angku anta sampai pulang – antaan juolah sahinggo jalan.

Sipangka   :   Pado kami latak di ateh cawan – bialah kami latak di ateh dulang, pado kami anta Datuak hinggo jalan – bialah kami silauan dari janjang.

Alek           :   Mandanga pituah Angku, sanang rasonyo dalam hati; Ibarek palak tarangkek baju – ibarek talang tarangkek miang. Tapi samantang pun baitu, tantangan kami nan sagalo alek; banyak rundiang kok banyak nan sasek – banyak kecek kok banyak nan salah, gajah kok tadorong dek gadiangnyo – harimau kok talompek dek balangnyo, tuhan nan basifaik kadim – manusia basifaik gawa, kok ado khilaf jo gawa, sakali gawa baribu ampun, pintak kami kapado Angku

Sipangka   :   Kain santun lembaknyo santun – pandukuang anak si Maulana, samaso alun-baralun – alun balawuik nan bak kini – lawuik salaweh daun marunggai – bumi sagadang tapak kudo. Di ateh kudaraik nan kuaso – mangkok tajadi nagari nan limo; partamo nagari Makkah – kaduo nagari Madinah – katigo pulau Markadas – kaampek pulau Sumatra – kalimo ranah Minangkabau. Dibarilah madek jo timbago – dibari ba adaik jo pusako – dibari basakin tajam, diarak dibaok turun – dari Makkah turun ka Rum – dari Rum turun ka Ajam – turun ka pulau ameh nanko, iyo ka puncak gunuang marapi – turun ka galundi nan baselo – iyo Pariangan Padangpanjang. Pamuncak wakatu itu bagala Datuak Tantejo Garhano; Nan bagombak merah bajangguik putiah – jikok tagak indak manyondak – bajalan indak malenggang – malenggang indak manapeh. Urang arif bijaksana – tembaknyo baalamaik – katonyo bakiasan, kilek baliwuang mahadang kaki – kilek camin mahadang muko – kilek kasai hinggo ka aia – kilek kato hinggo ka hati. Tantangan nan takilek di Datuak tadi; manganai muluik nan tadorong – kato nan talompek – taradok kami selang nan bapangka, manuruik gurindam urang Minang; kalilawa di pulau Rambang – anak ruso mati badabiah – kok gawa dapek ditimbang – kok doso ampun nan labiah, kok ado salah jo gawa dari Datuak nan sagalo alek, lah basamo kami mamaafkan. Sakian Datuak.

Alek           :   Mandanga pituah Angku tadi, lah Angku atok langik jo bicaro – bumi nan indak katirisan, Adaik gunuang lah tumpuan kabuik – di lurah jalo bamain – ka padang marantang tali, banang jo urak nak salasai – nak samo naiak ka antakan, diuji nak samo merah – ditimbang nak samo barek. Manuruik falsafah urang Minangkabau; adopun ulak Tanjuang Bungo – banamo Parik Koto Dalam – dalam daerah pagaruyuang, salingkaran batang Bangkaweh – saedaran gunuang marapi, tungku nan tigo sajarangan – rajo nan tigo naiak nobat; Partamo rajo di Buo – kaduo rajo Sumpua Kudus – katigo rajo Pagaruyuang. Adopun rajo di Buo; mamagang adaik patang pagi – sarato bungka jo taraju – cukuik naraco jo katian – banamo rajo adaik. Adopun rajo Sumpua Kudus; mamagang adaik baiak taguah – pandai bahadist jo badalil – ilmunyo tinggi amalnyo banyak – banamo rajo ibadat. Adopun rajo Pagaruyuang; iyolah rajo saalamnyo, salilik gunuang marapi – saedaran gunuang Pasaman – sampai ka lawuik nan sadidih – Si alang balantak basi – hinggo Sipisok Pisau Hanyuik, nan parila jo pamaaf – hukumnyo adia katonyo bana, sampai ka ulama kito kini – jadi pituah nan baitu – hutang di kito mamakaikan. Jikok di antaro kito dari ujuang sampai ka pangka lah bahimpun rila jo maaf – lah batimbang baso jo basi, nan bak gurindam urang tuo; bakacimpuang ikan di lubuak – takajuik diserak jalo – ikan banamo si Kulari, rila jo maaf kok lah batumbuak – lah batimbang basi jo baso – jo salam sambah disudahi.