Kumpulan Isi/Batang Tubuah Pidato Pasambahan Adaik

1.   Pidato Pasambahan Janang (Alek Jamuan)

Sipangka   :   Maa Angku…, sambah dipulangkan bakek Angku.

Alek           :   Kapado Allah.

Sipangka   :   Sungguahpun Angku surang nan disabuik namo dipanggiakan gala – rapeklah ka sagalo sidang mujilih nan ado - nan tahampa di ateh lantai – nan tasungkuik di bawah atok, nan balirik salingka dindiang, ketek indak ka disabuikkan namo – gadang indak ka dipanggiakan gala. Namun, tembak nak baalamaik, iyo ka bakek Angkulah Ambo mamulangkan sambah.

Alek           :   Kapado kito basamo.

Sipangka   :   Adopun sambah nan kadipulangkan bakek Angku; alah sabarih jamba nan tahidang – dari pangka sampai ka ujuang – dari tangah lalu ka tapi – nan manjamba ka ruang gadang. Manuruik kato si Rajo Janang; ibaraik basukek rasolah panuah – umpamo babilang rasolah cukuik. Tapi samantangpun baitu, kok ado lirik nan talampau – kok ado kurang nan ka ditukuak – senteang nan ka dibilai. Layangkanlah dek Angku pandangan ka nan jauh – tukuikkanlah ka nan ampiang – samintaro Janang lai tagak juo. Bak pituah Angku juo; tuan Katik mangarang bandua – takarang di banang bulang – sungguahpun cukuik dari dapua – tibo di ujuang antah kurang. Sakian Angku...

Alek           :   Sapanjang panitahan Angku tadi, tantangan juadah nan ka tangah; alah kami paiyo patidokan jo nan tuo sabalah ka ujuang, baalah kato baliau – tantangan jamba nanko; ibaraik bungo lah jadi putiak – putiak lah suko jadi buah – buah lah masak ranum pulo – tenggih bak raso kadijuluak – randah bak raso kadijangkau – dijuluak bak raso ka rasan pisau – dijangkau izin nan balun. Jadi, tapaso dinanti jatuah dari tampuak mah Angku, sakian sambah di pulangkan ka bakek Angku.

2.   Pidato Pasambahan Siriah

Alek           :   Taantak puntiang ka hulu – di bawah kiliran taji – asamulo kato dahulu – tigo limbago nan tajali. Partamo sambah manyambah – kaduo baso jo basi – katigo siriah jo pinang. Sambah-manyambah dalam adaik – tali batali undang-undang. Nan tasabuik di muluik manih – nan tapakai di baso baiak. Muluik manih talempong kato – baso baiak gulo di bibia. Baatunyo kini, sikaduduak badaun mudo – kudo bagolek di jarami - datuak duduak bungkusan tibo – iyo nak mintak diparesoi. Nak tantu isi di dalam – urang balimo badunsanak – lah kok cukuik kasadonyo. Sakian Angku.

Sipangka   :   Sapanjang pituah Angku nan tu – dari ujuang sampai ka pangka – sapantun bana jo urang baalang-alang; dirawik dikarang bingkai –badan ditimpo jo karateh – bari babanang bataraju, diukia babego-bego, ukia sudah ragam ndak jadi – kok jadi banyak sansaronyo. Baa sabab mangkok baitu, jikok dilapeh kutiko bak kini – iyo ka angin nan basiru – naiak ka awan nan manjuju – bakumpa-kumpa jo kabuik, sadang di ruang-ruang mato – badan jauah babuni ampiang, dek kareh ribuik jo topan – banang putuih tarajupun lapeh – mato lah putiah mamandangi, samintaro tangan ka taraju – mananti banang ka kumparan. Sabalah Angku sakutiko.

Alek           :   Iyo, basaba kami Angku.

Sipangka   :   Tantangan pituah tadi, iyo bungkusan nan ka tangah; Lai barisi siriah jo pinang – langkok jo sadah sarato gambia, timbakau samo di dalam. Manuruik kandak Angku – yo nak mintak dipareso, kok rupo alah kami caliak – roman alah kami pandang. Tapi saketek nan marusuah; Karakok tumbuah di batu – nan mudo daunnyo lareh – mangakok kami nan ragu – namo jo gala nan ndak jaleh. Sakian Angku...

Alek           :   Manuruik pituah Angku tadi, dek kami nan sagalo alek; sahari ado sahari banamo – sahari lahia sahari bagala, tantangan namo jo galanyo; bia kami uraikan ciek-ciek; Siriah si Alai nak rang Kamang, siriahnyo udang tampak ari – tampuaknyo bagai kuku balam – babuah intan jo podi – babungo sakali balum – satahun dalam panggulungan – usahkan litak letoi tido, usahkan layua lisuik indak. Makanan anak rajo-rajo – makanan anak sutan-sutan – pamenan niniek jo mamak – di dalam luhak nan tigo – banamo alam Minangkabau. Tantangan pinang nantu; pinang si bulek koto tinggi – pinang koto dibalah ampek, tingginyo jangkau-jangkauan – baurek taguah ka bumi – bacewang sampai ka langik, tinggi nan indak tinggi bana – satahun tupai mamanjek – samusim si lodang jatuah – jatuah ka bumi manjadi ambun – banamo Ambun suri/ jantan itu namonyo pinang kami. Tantangan sadah kok dikaji; asa nan dari kulik lokan – dipanggang di lereang bukik, samusim dipanggang cino – satahun dipanggang bugih, bakipeh barambai-rambai – putiah nan bukan alang kapalang, dijalik jo jari manih – bakisa ka jari tangah – tabayang nan punyo rumah – buatan puti dari maninjau. Tantangan gambia kok dibilang; untuang buruak nan nyo tapati – baikek bakabek pulo – dirabuih dalam kuali – mati jo baji pambunuhan – buatan puti Sari lamak. Tantangan timbakau kok dikanang; di dalam luhak Limo puluah, bukik banamo bukik Guntuang; saeto panjang julainyo – pisau jo jangko manyudahi, masiak barambun tangah malam – baun nan sampai ka udaro – buatan sutan Amirullah. Baatunyo kini, nak salamaik samparono, bawuakanlah dalam pakapuran – kalek nak tingga di karongkongan – merah nak tingga pado bibia. Sakian Angku.

3.   Batagak Gala (Gala Mudo)

Sipangka   :   Disabuik musim panambai – dikana musim dahulu – maso di Pariangan Padang Panjang; Bukik banamo Maropalam – di dalam luhak Tanah Data – di galanggang nan barajok di medan nan bapaneh, di sinan lah duduak Datuak Katumanggungan – jo  Datuak Parpatih Nan Sabatang – langkok jo Basa Ampek Balai – sarato Niniek jo Mamak – Alim jo Ulama jo Tuanku. Mancari kato nan sapakaik – rundingan nan saiyo – iyo di alam Minangkabau. Bulek nak buliah digolongkan – picak nak buliah dilayangkan, jikok bulek indak basuduik – picak lah tantu indak basandiang, sasuai jo kaidah - “al adatu la yanfashilu bissyar’i, assyar^’i la yanfashilu bil ‘adati, walau kanat munfashilan kanat bathilan”. adaik indak batikai dengan syara^’ – baitu pulo sabaliaknyo – kalau ado patikaian – hukumnyo batal. Adopun adaik Minangkabau; badasarkan cupak nan duo – jo kato nan ampek. Duo kato dari Datuak Katumanggungan – duo kato lai dari Datuak Parpatih Nan Sabatang. Adopun cupak nan duo; partamo cupak usali – nan kaduo cupak buatan. Nan dikatokan cupak usali; nan sakundi-kundinyo – nan sabantiang tali bajak – kupang jo ameh langkok pulo, dibasuah baabih aia – dikikih baabih basi – indak lakang karano paneh – indak lapuak karano hujan – dibubuik ndak layua – diansak ndak mati. Nan dikatokan cupak buatan; buatan Niniak jo Mamak – sarato urang cadiak pandai – sapakaik mangkoknyo namuah – saiyo mangko manjadi – manjadi padoman di nan banyak. Nan dikatokan kato nan ampek; duo kato dari Datuak Katumangguangan; partamo kato pusako – kaduo kato hakikaik. Nan dikatokan kato pusako; nan indak dapek dianjak – indak buliah dipaliang – jikok dianjak kato nantu – ditahan lukah di banda – ditahan dibangkik-bangkik – kalau dirusak kato nan bana – ubek jadi panyakik. Ibaraiknyo, timbun batu – balimbek putiah di dalamnyo – artinyo samo jo sumpah kawi; ka ateh indak bapucuak – ka bawah indak baurek – di tangah-tangah, dimakan punguak kalamullah, di dunia kito sangsaro – di akhirat mandapek azab. Nan dikatokan kato hakikat; nan bahadist badalil – bakieh baijma^’, yaitu adaik nan basandi syara’, syara’ basandi kitabullah. Kok lai tapakai nan baitu, di dunia kito salamaik – di akhirat mandapek syafa’ah. Duo kato nan barasal dari Datuak Parpatih Nan Sabatang; partamo kato dahulu – kaduo kato kamudian. Nan dikatokan kato dahulu; kato Panghulu nan sabananyo – satitiak namuah jadi lawuik – sakapa namuah jadi gunuang – ka suri tauladan kain – ka cupak tauladan batuang – iyo di anak kamanakan, manjadi undang di Panghulu – bakato manuju bana – bajalan manuju bateh – bana di adaik jo pusako – batehnyo hadist jo dalil. Nan dikatokan kato kamudian; yaitu kato kabacari – apo nan kadicari? tantunyo rundingan nan saiyo kato nan sapakek. Batatapan nan jo itu, iyoah sapakaik pulo kami – ateh namo selang nan bapangka karajo nan bapokok – nan bak pituah rang tuo-tuo; anak itiek anak angso – dibari batali aka – jikok ketek kami bari namo – lah gadang tantu kami bari gala. Namun sungguahpun baitu, tolong barilah kami sifaik jo pituah, nak tanang pulo hati kami.

Alek           :   Lah sampai Angku...

Sipangka   :   Hinggo baitu lah sampainyo.

Alek           :   Sapanjang pituah Angku tadi; kok buni lah samo kito danga – rupo lah samo kito liaik. Tapi sungguahpun baitu, karano jalan jauah nan kaditampuah – samintaro jauah kabajalang – dakek kabasilau, tolong duduaklah Angku di rundingan – samintaro kami mancari kato nan sapakaik rundingan nan saiyo.

Sipangka   :   Basaba kami Angku.

Alek           :   Maa baliau Angku....

Sipangka   :   Manitahlah Angku...

Alek           :   Bukan di kami Cadiakpandai – namun sakadar mangambalikan kato Angku tadi – tantangan anak kaminakan kito; jikok ketek baagiah namo – gadang baagiah gala – alah manuruik pasa nan biaso. Karano itu, palalukan banalah dek Angku – buni nak samo kito danga – rupo nak samo kito liaik.

Sipangka   :   Dikatokanlah dapek kato dari Angku, lah sanang pulo hati kami. Tantangan anak kaminakan kami; di ketek banamo…, lah gadang kami bari gala…, tolong Angku baokan ka labuah nan golong – ka tapian nan rami. Sakian Angku.

4.   Pidato Pasambahan Nikah-Kawin (Kawua Sipangka)

Sipangka   :   Tumbuah sarupo iko kini, nak siang bak hari – nak tarang bak bulan, nak kami papa bagulambek. Nan disabuik alek mantaan bubua; jikok dikana asamulonyo – sasuai jo dalil nan mangato “almaaluuna wal banuuna ziinatalhayaatiddunya”. Adopun harto dan anak adolah perhiasan di ateh dunia. Kalau mandapek anak laki-laki – bak mandapek ameh jo perak, kalau mandapek anak parampuan – bak mandapek intan jo podi. Kanalah guno anak laki-laki; barek manjunjuang di kapalo – panjang manyandang ateh bahu – ringan manjinjiang pado jari – indak mangana jariah payah – indak paduli jauh ampiang – kapanjapuik bela dek nagari. Kanalah guno anak parampuan; awuih kapamintak aia – lapa kapamintak nasi – aco-aco rumah nan gadang – limpapeh korong jo kampuang – panimbang pacahan dalam nagari. Mako, tadirilah utang di mande jo bapak – di niniek jo mamak – di ateh  duo tigo pakaro. Nan partamo mangamatkan/mangazankan. Nan kaduo turun mandi; dikunyahkan kasai ditumbuakan badak – dibaok ka labuah ka tapian – cukuik baipa jo babisan – nak tau jo ereang gendeang, adaik nagari urang namokan. Nan katigo sunnah rasul – wajib hukumnyo manuruik Islam. Nan kaampek mandidik/manyarahkan ka taman pendidikan; nak tau jo alua nan tigo (tungku tigo sajarangan). Partamo aluran sarak – kaduo aluran adaik – katigo aluran  pamarintahan. Salanjuiknyo,  utang nan kalimo manikahkan. Baatunyo kini, tantangan anak kamanakan kami; kok ketek rasolah gadang – lah tibo mangkin jo patuik. Lah kami carikan rundingan nan saiyo – kato nan sapakaik. Jikok parang basiasaik – rundingan bajuru baso – lah kami amanaikkan juru baso kami – mambaokan siriah nan jo pinang – sadah jo gambie langkok pulo – caro maminang rang katokan. Dek ata takadia Allah, tantangan rundingan kami nantu; lah bak punco lakek ka hulu – bak pasang masuak muaro. Dicari jangko jo wakatu – bakawua niniak jo mamak – sumando korong jo kampuang. Ijab nikah kabua bajawaik – hukum putuih tampek bagantuang – sampai balarak jo balereang – larak lereang sapanjang jalan – alek jamuan di rumah nanko. Kami panggiakan niniak jo mamak – alim jo ulama – langkok jo urang sumando kami. Duduak lah samo sahamparan – tagak lah samo sapamatang. Mudah-mudahan anak kaminakan kami nantu; umuanyo panjang di ateh taaik – rasakinyo murah di ateh nan halal - sadanciang bak basi – saciok bak ayam – ka hilia sarangkuah dayuang – ka mudiak sarantak galah, bak anau jo saribulan – bak tangguak nan jo tangkainyo. Jikok tibo di nan manggaleh; tabalilah inyo di nan murah – tajua di nan maha, kok tumbuah di nan batani; padi manjadi – jaguang maupiah. Kok tacapai di nan pegawai; golongan naiak tiok pariode – urang kampuang dapek kalimpahan. Namun, dibaliak pambalakangan itu, sirawik ateh karambie – diambiak pancukia tulang, adaik lawuik sambia-manyambia – adaik kampuang tumpang-manumpang. Yo lah manumpang pulo kami, tantangan urang tuo-tuo nan lah tadahulu dari pado kito, mati ketek mati gadang – ataupun nan disemba binatang, nan maninggakan barih jo balabeh – adaik jo pusako, nan babaliwuang sumbiang – nan batulang pacah, nan maninggakan sawah jo ladang – sarato banda buatan, sawah batumpak di nan data – ladang babidang di nan lereang – banda baliku turuik bukik, sawah lah sudah jo ranjinyo – ladang lah sudah jo bintalak, banda lah sudah jo buatan. Kok ado di kami nan manjadi pusako ataupun sako; di baliau dapek rahmaiknyo – di kami dapek kabarkahan, tolong dibacokan ayat jo tahlil, mudah-mudahan baliau lapeh dari azab kubua jo azab narako, kami nan tingga mandapek rahmaik. Tambahan sasudah itu, taradok kami nan sarumah tango nan ko – sakorong jo sakampuang – ataupun nan sanagari, bala jauh nikmaik ampiang – saniaik sasangajo ka nan baiak. Sakian sambah dipulangkan.

5.   Pidato Pasambahan Takziah

Sipangka   :   Awalmulo rundiang disabuik, samo manyaru pado Allah nan maha kayo, dan utusannyo nabi Muhammad SAW. Kemudian dari pado itu, nan bak pituah datuak juo; mujua nan sapanjang hari – malang nan sakijok mato – lah malang tibo di kami – hari malam pulito padam – sasuai jo dalil “walikulli ummatin ajalun”, tiok-tiok umat ado ketentuan maut. Kini tantangan urang tuo kami; lah sakik badan baliau – patah bak raso kamaringkek – sakik bak raso kamambunuah. Dek kami nan sagalo karib; jikok sakik kami carikan ubek – jikok damam kami carikan limau. Namun, ubek nan indak mambaikkan – limau nan indak manyambuahkan – ubek nan saratuih ganok – panyakik saratuih aso – aso nan datang dari Allah. Lah pacah lampu barantai – pacah ditimpo dek layangnyo – sukatan panuah janjian sampai – arwah lah pulang ka nan punyo. Dek kami nan sagalo kaum; jikok iduik kami anta ka pintu taraju, tantangan kamatian baliau; kami mandikan jo aie nan janieh – kami bungkuih jo kain nan suci – sarato shalat ampek takbir, kamudian kami antakan ka rumpuik nan layua – ka tanah nan lambang – kami tanamkan di lahat nan dalam – kami kambalikan tanah ka asanyo, kami tiupkan batang padi – kami tabangkan anak balam, kami bilangkan hari – kami hituangkan malam, hinggo sahari tadi sampai samalam nanko – manampati baliau sampai saratuih hari. Tolong dibacokan ayat jo fatihah – sarato tahlil. Mudah-mudahan tuhan mambari berkah atau pahalo – lapehlah baliau dari azab kubua jo azab narako – dan arwah baliau ditarimo tuhan – sebagai arwah urang nan saleh - sakadudukanlah baliau di Yaumil Mahsyar nanti – jo nabi kito Muhammad SAW – di dalam sarugo Jannatunnaim. Baitupun keluarga baliau nan tingga; dakeklah kapado kasabaran – dan mandapek hidayah dari Allah SWT. Sakian sambah dipulangkan.

6.   Pidato Pasambahan Maulid Nabi

Sipangka   :   Adopun bulan nan dimuliakan di ateh tanah nan sakapa – di bawah awan nan sadidih, ado anam pakaro; partamo bulan Muharram – kaduo Rabiul Awal – katigo bulan Rajjab – kaampek bulan Syakban – kalimo bulan Ramadhan – kaanam bulan Zulhijjah. Tumbuah sarupo iko kini, lah tibo pulo kito di bulan Rabiul Awal – bulan kalahiran nabi Muhammad SAW, tolong dibacokan Barzanji – dari awal sampai akhir – dan  ditutik jo doa. Mudah-mudahan kito tamasuak golongan nan diinginkan nabi - “man ahabba ilayya, maiya filjannah”; siapo nan kasiah kapadoku, samo denganku masuak sarugo. Mudah-mudahan, bagi urang nan mambaco – ataupun urang nan mandanga – nan bajariah-bapayah – mandapek rahmat dari pado Allah – safaah dari pado nabi Muhammad SAW. Jikok nan laki-laki – dapeklah banawuang di bawah payuang panji nabi Muhammad – di Yaumil Mahsyar nanti, jikok nan parampuan, dapeklah banawuang di payuang panji Siti Fatimah. Hiduiklah kito di dalam salamaik dunia akhiraik. Amin Amin ya rabbal alamin.