Panghulu, Laki-Laki Minangkabau (Kajian Makna Kognitif Pituah Adaik)

A.   Kato Dahulu

Nan namonyo urang Minangkabau pasti tahu jo Panghulu. Panghulu adolah simbol pamimpin sarato simbol laki-laki di Minangkabau. Sabaik, di dalam adaik Minangkabau, satiok laki-laki dikatokan sabagai Tunganai, yoitu pamimpin sabuah rumah. Sungguahpun anak laki-laki indak lalok di rumah. Namun, pamimpin di rumah nantun, tataik barado pado tangan anak laki-laki. Karano itu, untuak manyigi laki-laki Minang, nan namonyo Panghulu musti manjadi “jalan” nan musti dituruik.

Pado Panghulu takanduang duo fungsi utamo. Nan partamo fungsi ekonomi, kaduo fungsi masyarakaik adaik atau sosial-budaya kecek rang kini. Aratinyo, Panghulu adolah pamimpin masyarakaiknyo di bidang ekonomi, juo pamimpin di bidang adaik istiadaik. Karano itu, sistem masyarakaik Minangkabau diatur jo sistem adaik. bahkan, Panghulu dituntuik untuak jadi sosok nan “labiah”, nan bisa jadi tauladan (model) masyarakaik, khususnyo laki-laki Minangkabau.

Akibaik dari tugeh “duo sapangga” ko, surang Panghulu dibari “tuah” sabagai baka jo tampek tagak dalam malelokan tugehnyo di dalam masyarakaik. Tuah nantun disiraik-suruakkan di dalam pakaian adaik, sarato babarapo pituah nan bisa ditamui dalam dalam tradisi pidato pasambahan adaik. Hubuangan tuah ko jo fungsi Panghulu ko sarupo jo hubuangan “kiramaik” jo fungsi ulama di tangah-tangah umaik. Tuah Panghulu nantun adolah “Baringin di tangah koto”, kiramaik Ulama tu adolah “waratsatul ambiyak”. Pendek kato, tuah ko bisa diistilahkan jo kadudukan ideal caro modernnyo.

B.   Pokok Kaji

Di dalam manjalankan fungsi sabagai simbol masyarakaik jo simbol adaik, Panghulu dibantu dek tigo tokoh masyarakaik, yoitu; Manti, Malin, Dubalang. Tokoh nan barampek ko di dalam sistem masyarakaik disabuik jo “urang nan ampek jinih”. Urang nan ampek jinih adolah camin taruih dari sistem pamarintah Minangkabau di tingkek kaum, satingkek di bawah nagari. Pado tingkek nagari, tokoh-tokoh ko takumpua dalam wadah limbago Karapatan Adaik Nagari (KAN) jo Limbago Karapatan Adaik Minangkabau (LKAM).

Untuak manilik baa bana urang nan disabuik jo Panghulu ko, kito bisa mangkajinyo dari babagai suduik. Di antaronyo; dari pakaian Panghulu, dari pantun/bidarai adaik dalam pidato pasambahan, dari rumah gadang, dan sabagainyo. Namun, pado karano pakakeh nan indak langkok, kajian kini ko disandakan kapado pakaian jo pantun/bidarai adaik di dalam pidato pasambahan sajo.

1.   Panghulu dalam Pakaian Adaik

Pakaian adaik surang Panghulu digambarkan di dalam pidato pasambahan adaik dalam pituah-pituah nan cukuik banyak. Ampia saluruh bagian dari pakaian Panghulu dijalehan bantuak jo nilai-nilai nan takanduang di dalamnyo. Karano itu, dalam surahan tantangan panghulu manuruik pakaian adaik ko, pokok-pokok kaji dikalompokkan manjadi tigo kalompok. Nan partamo, pakaian bagian ateh, kaduo, pakaian bagian tangah, katigo, pakaian bagian bawah.

a.    Bagian Ateh

Saluak

Saluak iolah bagian pakaian nan dikanakan di kapalo sarupo topi atau kupiah. Namun, saluak punyo fungsi nan “labiah” dari pado sakadar topi panutuik kapalo. Untuak itu, ado baiaknyo, disimak dulu pituah adaik tantangan saluak di bawah ko.

“Takanak Saluak Palangai, bayangan isi dalam kulik, panjang ndak dapek kito ukua. Leba ndak dapek kito bidai, tiok karuik aka manjala, tiok katuak budi marangkak. Dalam lilik baundang-undang, salilik lingkarang kaniang, ikek santuang di kapalo. Tampuak dek paham tiok lipek, lebanyo pandindiang kampuang, panjang pandukuang anak kamanakan. Hamparan rumah nan gadang, paraok gonjong nan ampek, payuang panji marawa basa. Tampek bataduah kahujanan, tampek balinduang kapanasan, iyo dek anak kamanakan. Nan sapayuang sapatagak, di bawah payuang di lingkuang cupak, manjala masuak nagari. Ka pai tampek batanyo, ka pulang bakeh babarito, kusuik nan kamanyalasai. Karuah nan kamanjaniahi, hukum adia katonyo bana, sapakek warih mandirian”.

Saluak Palangai tu pakaian nan dikanakan di kapalo buatan daerah Palangai di Pasisia. Disabuik saluak Palangai, kunun Palangai adolah daerah pambuek saluak tarancak dahulunyo. Sasuai jo tampeknyo di kapalo, saluak ko mansiraikkan isi kapalo surang Panghulu (bayangan isi dalam kulik). Tantangan iko, dikatokan baraso isi kapalo surang Panghulu indak bisa diukua, apolai dikiro-kiro (panjang ndak dapek kito ukua. Leba ndak dapek kito bidai). Isinyo tu di antaronyo; aturan, etika, tangguang jawaik, tarutamo nan bahubuangan jo urusan Anak-Kamanakan, masyarakaik nan dipimpin surang Panghulu (tiok karuik aka manjala, tiok katuak budi marangkak, dalam lilik baundang-undang). Anak-Kamanakan Panghulu ko ado duo jinih, yoitu; Anak-Kamanakan dalam kaum jo Anak-Kamanakan lua kaum (nan sapayuang sapatagak, di bawah payuang di lingkuang cupak, manjala masuak nagari). Pendek kato, saluak adolah simbol pangingaik bagi surang Panghulu tantangan tangguang jawaiknyo (ka pai tampek batanyo, ka pulang bakeh babarito, kusuik nan kamanyalasai. Karuah nan kamanjaniahi).

Di sampiang itu, di babarapo daerah, saluak ko kadang diganti jo deta. Ado namonyo deta bagamak/bakatuak, deta balilik, deta bakaruik. Sungguahpun coitu, fungsi utamo saluak jo deta ko samo, yoitu sabagai lambang dari isi kapalo pamakainyo sarato pangingaik baraso “isi kapalo” nan ka dikaluakan indak buliah suko-suko sajo. Tapi, badalia, baaturan, sarato baetika. Makonyo, laki-laki Minangkabau nan lah “gadang” salalu manganakan pangikaik kapalo (deta/kupiah) kutiko mahadiri acara-acara adaik (hukum adia katonyo bana, sapakek warih mandirian).     

b.   Bagian Badan

1)   Baju Hitam Gadang Langan

“Baju hitam gadang langan” ko bukanlah sabutan atau namo nan malakek pado baju surang Panghulu. Biasonyo, baju nan sarupo iko disabuik jo baju guntiang Cino. Namun, indak samo jo baju guntiang cino nan dipakai laki-laki kabanyakan. Untuak itu, ado baiaknyo, disimak dulu pituah adaik tantangan baju adaik Panghulu di bawah ko.

“Babaju hitam gadang langan, langan tasenseang ndak pambangih, pahapuih miang dalam kampuang. Pangipeh angek nak nyo dingin, siba batanti baliak balah, baturap jo banang makau. Basuji jo banang ameh, panutuik jahik pangka langan, tando mambuhua ndak mambuku. Langan balilik suok kida, basisiak makau kaamasan, gadang basalo jo nan ketek. Tando rang gadang bapangiriang, tagak baapuang jo aturan, baukua jangko jo jangkau. Unjuak baagak bahinggoan, lihienyo lapeh ndak bakatuak, babalah sahinggo dado. Rang gadang alamnyo leba, rang cadiak padangnyo lapang, indak karuah aia dek ikan. Indak rusak gunuang dek kabuik, paik manih pandai malulua. Tagangnyo bajelo-jelo, kanduanyo badantiang-dantiang”.

Ado babarapo panakanan pado bantuak tubuah baju ko. Nan partamo, langan baju musti panjang, lapang bia mudah disenseang. Langan ko manyiraikkan baraso lakek tangan atau karajo Panghulu musti bisa mahapuih miang/masalah nan ado (babaju hitam gadang langan, langan tasenseang ndak pambangih, pahapuih miang dalam kampuang, pangipeh angek nak nyo dingin). Kaduo, pado tigo pasandian sapanjang langan, yoitu pado pangka, siku, sarato galang tangan dibari hiasan banang ameh jo banang makau. Dalam ilimu bela diri, pasandian adolah bagian dari tubuah nan lamah, karano itu harus ditutuik supayo indak nanpak. Sahubuangan jo itu, makna pasandian nan ditutuik jo hiasan pado pakaian Panghulu adolah baraso surang Panghulu musti bisa manutuik aib/kalamahan kaumnyo. Walaupun musti mauleh-uleh, mambuhua-buhua, bak “make-up” minimalis caro istilah bahaso kininyo (siba batanti baliak balah, baturap jo banang makau., basuji jo banang ameh, panutuik jahik pangka langan, tando mambuhua ndak mambuku).

Nan katigo, langan baju nantun baagiah balilik jo basisiak jo banang makau kaamasan, atau babis kecek rang kini. Bis nantun musti disusun taratur basalo ketek jo gadang. Bantuak jo susun nan sarupo iki manganduang makna baraso Panghulu ko bapangiriang, bapanungkek. Aratinyo, Panghulu ko adolah urang gadang nan gadang dek diapik dek nan ketek hinggo ka nan gadang sarato dek kadudukannyo di dalam adaik (langan balilik suok kida, basisiak makau kaamasan, gadang basalo jo nan ketek. Tando rang gadang bapangiriang, tagak baapuang jo aturan, baukua jangko jo jangkau). Nan kaampek, lihia baju indak bakatuak (krah) sarato babalah sahinggo dado. Maknanyo, dado surang Panghulu mustilah panuah jo nilai-nilai raso kamanusiaan sarato lapang tantangan raso-raso nantun. Indak mudah tapanciang, baiak sacaro raso/emosional ataupun sacaro batiniah/spiritual (lihienyo lapeh ndak bakatuak, babalah sahinggo dado. Rang gadang alamnyo leba, rang cadiak padangnyo lapang, indak karuah aia dek ikan. Indak rusak gunuang dek kabuik, paik manih pandai malulua…).

  

2)   Sisampiang

Sisampiang adolah kain babantuak sagi panjang nan dililikkan malingkai pinggang. Lataknyo di bagian lua manutuik badan kiro-kiro dari pinggang hinggo ka lutuik sahinggo bagian baju jo sarawa nan satantang sisampiang ko turuik tatutuik. Tantangan caro pasang sarato maknanyo, baiaknyo disigi malalui pituah adaik di bawah ko.

“Basisampiang sahinggo lutuik, kayo jo miskin alamaiknyo, patuik dalam ndak bulieh senteang. Kok senteang ndak bulieh dalam, mungkin jo patuik ka ukuran, lakeknyo impik ka kida. Satantang jo ampu kaki, tandonyo luruih batujuan,  suduik serong manikam jajak. Langkah bak cando bapatingkek, alam satapak bakeh diam. Alum bakilek alah takalam, bulan disangko tigo puluah, alum diliek lah tapaham, lah tantu tampek bakeh tumbuah”.

Dari pituah di ateh nanpaklah baraso sisampiang indak sumbarang lakek sajo. Lakeknyo impik ka kida, ujuang ateh jo ujuang bawahnyo mambantuak suduik/posisi serong Maknanyo, kutiko malangkah malalukan tugeh, surang Panghulu musti musti tau bana talabiah dulu jo masalah nan tajadi, indak buliah pandang bulu, tarutamo manyangkuik gujalo atau isu kayo jo misikin (basisampiang sahinggo lutuik, kayo jo miskin alamaiknyo, patuik dalam ndak bulieh senteang. Kok senteang ndak bulieh dalam, mungkin jo patuik ka ukuran, lakeknyo impik ka kida. Satantang jo ampu kaki, tandonyo luruih batujuan,  suduik serong manikam jajak).

Di sampiang itu, lakek sisampiang nan malilik pinggang hinggo lutuik tantu mambateh kaki kutiko malangkah. Dalamnyo sisampiang manuruik ukuran patuik jo mungkin. Aratinyo, surang Panghulu musti bahati-hati sarato bisa mambaco gujalo (kaadaan) sabalun maayunan tangan malangkahkan kaki malalukan tugehnyo di tangah-tangah masyarakaik (langkah bak cando bapatingkek, alam satapak bakeh diam. Alum bakilek alah takalam, bulan disangko tigo puluah, alum diliek lah tapaham, lah tantu tampek bakeh tumbuah).   

3)   Karih

Karih iolah jinih sanjato ganggam nan batangnyo bakaluak-kaluak indak luruih sarupo padang/pisau. Matonyo timba baliak, indak bapungguang sarupo padang/pisau. Sadangkan caro pasang sarato maknanyo, baiaknyo disigi malalui pituah adaik di bawah ko.

“Tasisik karih di pinggang, sisiknyo tanaman tabu, lataknyo condong ka kida. Dikesoang mangko dicabuik, gambonyo tumpuan puntiang, tunangan hulu kayu kamaik. Kokohnyo indak dek ambalau, guyahnyo bapantang tangga, tagoknyo murah dicabuik. Bengkok nan tangah tigo patah, luruihnyo manahan tiliak, bantuak dimakan siku-siku. Raso nan dibao naiek, pareso nan dibao turun, alua patuik jalan batampuah. Bamato baliak batimpa, sanyawa pulo jo gambonyo, tajam nan indak mangalupang. Kok tajam indak maluko-i, jajak ditikam kanai juo. Alah bakarih samparono, pakirim rajo Majopahik, tuah basabab bakarano, pandai batenggang di nan rumik”.

Dari pituah di ateh dapek diliek baraso lakek karih Panghulu babeda jo lakek karih Dubalang. Karih Panghulu hulunyo miriang ka kida, karih Dubalang miriang ka suok. Karih Panghulu kutiko dicabuik mamanjang ka arah balakang tangan, sadangkan karih Dubalang mamanjang madok ka lua. Manuruik urang Pandeka, caro pacik nan sarupo Panghulu ko pado dasarnyo adolah caro batahan, caro Dubalang caro manyarang. Aratinyo, fungsi karih bagi Panghulu indak samo jo Dubalang. Bagi Panghulu, karih adolah simbol palinduangan, palinduang anggota kaumnyo dari sagalo bahayo. Sadangkan karih Dubalang iolah untuak manindak nan salah sarato maluruihan nan bengkok. Makonyo, dikatokan baraso tikaman karih Panghulu indak malukoi. Tapi, mangana-i, mangingaikkan, manyadarkan urang nan ditikamnyo (jajak ditikam kanai juo), sadangkan Dubalang malukoi (jajak ditikam mati juo).

Di baliak itu, sungguahpun surang Panghulu dibari bakarih. Indak bararti surang Panghulu bisa manggunokan karih tu sakahandak hatinyo sajo. Ado syaraik nan musti dipanuahi sabalun karih digunokan. Tantangan syaraik nan ko, tasiraik dari ungkapan “bengkok nan tangah tigo patah, luruihnyo manahan tiliak, bantuak dimakan siku-siku. Raso nan dibao naiak, pareso nan dibao turun, alua patuik jalan batampuah”.

  

c.    Bagian Bawah

1)   Sarawa Hitam Gadang Kaki

Srupo jo baju, “sarawa hitam gadang kaki” ko bukanlah sabutan atau namo nan malakek pado sarawa surang Panghulu. Biasonyo, sarawa nan sarupo iko disabuik jo galembong. Namun, indak samo jo galembong nan dipakai laki-laki kabanyakan, apoalai jo nan biaso dipakai dalam barandai. Satantang jo itu, ado baiaknyo kito simak talabiah dulu pituah adaik tantangan baju adaik Panghulu di bawah ko.

“Sarawa hitam gadang kaki, kapanuruik labuah nan luruih, pananpuah jalan nan pasa. Ka dalam korong jo kampuang, sampai ka koto jo nagari, langkah salangkah baliak suruik. Pado pai suruik nan labieh, langkah salasai baukuran, maagak kuku jan tataruang. Mangkok sarawa kain hitam, paham hakikaik tahan tapo, manahan sudi jo siasaik. Mananti bandiang kok tibo, kukuah bapantang kalihatan. Walau sagadang bijo bayam, jadi pantangan salamonyo”.

Pokok-pokok kaji dari pituah sarawa ko takanduang di kato-kato; a) sarawa gadang kaki, b) sarawa kain hitam. Bantuak sarawa gadang kaki (a) ko manganduang makna baraso sarawa surang Panghulu musti murah disinsiang. Sarawa indak buliah mahambek langkah, tapi musti mambuek nyaman panggunonyo kutiko malalukan tugeh nan diampu (sarawa hitam gadang kaki, kapanuruik labuah nan luruih, pananpuah jalan nan pasa. Ka dalam korong jo kampuang, sampai ka koto jo nagari).

Salanjuiknyo, sarawa ko musti bawarna hitam (b). Iko bahubuangan jo image warna hitam tu di dalam masyarakaik adaik Minangkabau. Warna hitam ko bagi urang Minang identik jo kamampuan dalam hal-hal nan manganduang mistik. Makna warna ko dalam hal iko iolah baraso surang Panghulu musti punyo kamampuan, karakter nan kuaik sahinggo tahan uji, tahan tapo, tahan taradok godaan (mangkok sarawa kain hitam, paham hakikaik tahan tapo, manahan sudi jo siasaik. Mananti bandiang kok tibo, kukuah bapantang kalihatan. Walau sagadang bijo bayam, jadi pantangan salamonyo). 

2)   Tarompa

Tarompa iolah aleh kaki. Fungsinyo untuak malinduangi kaki, mambari raso sanang kutiko bajalan. Tantangan makna nan dikanduang dek tarompa panghulu ko, baiknyo disimak baiak-baiak pituah adaik di bawah ko.

“Takanak tarompa kulik kalaf, kapananai sangsako nak nyo tagok, sako nak tatap jo enggeran. Kapanuruik labuah nan golong, panampuah jalan nan pasa, sampai ka koto jo nagari. Manuruik anak kamanakan, mancaliek parik nan tahampa, adokoh rando dapek malu. Kok jauh ka mancaliek-caliek, jikok ampiang manyilau-nyilau, jikok malam danga-danga-an. Bajalan baaleh tapak, malenggang babuah tangan, manurik adaik jo limbago”.

Tarompa surang Panghulu disabuik jo tarompa kulik kalaf. Tarompa jinih iko iolah tarompa kulik nan sangaik rancak mutunyo. Arati nan takanduang di dalamnyo iolah baraso surang Panghulu kutiko “malangkah” indak asa ka malangkah sajo. Tapi, malangkah karano punyo kamampuan atau punyo baka untuak mangatasi masalah/rintangan nan mungkin muncua sarato ditamui di tangah jalan. Tarutamo mangingaik tangguang-jawaik tugehnyo nan sangaik lueh (ka pananai sangsako jo sako, kapanuruik labuah nan golong, panampuah jalan nan pasa, sampai ka koto jo nagari. Manuruik anak kamanakan, mancaliek parik nan tahampa).

3)   Tungkek

Tungkek iolah alaik bantu tagak nan tabuaik dari kayu. Umumnyo, urang nan manggunoan tungkek duo (2) sajo, yoitu urang nan sacaro fisik kurang kuaik tagak/bajalan, sarato urang nan butuah panopang karano tingkek kasulitan medan pajalanan nan ka nyo tampuah. Lalu, baa jo tungkek Panghulu? Untuak itu, baiaknyo disigi malalui pituah adaik di bawah ko.

“Tungkeknyo dari kayu kamaik, ujuang tanduak kapalo perak, kapanupang adaik jo syarak. Kapanahan sako nak jan rabah, panueh pusako nak jan lipua, sako nak tatap jo enggeran. Ingek samantaro balum kanai, kulimek sabalum habih. Malantai sabalum lapuak, maminteh sabalum hanyuik. Gantang tatagak jo lanjuangnyo, sumpik tatagak jo isinyo, adaik tatagak jo limbago. Adaik nan batalago buek, cupak nan tarang samato, taga di sipaik nan badiri”.

Sarupo jo tarompah pado kaji sabalunnyo, tungkek pun punyo image kemegahan (kayu kamaik+tanduak kapalo perak). Hal ko bahubuangan jo fungsi nan disabuikkan jo “panahan sako nak jan rabah panueh pusako nak jan lipua”. Aratinyo, tungkek Panghulu manunjuakan baraso surang Panghulu punyo pangiriang/panungkek, satidaknyo punyo kamampuan untuak mambimbiang, manyangga masyarakaiknyo dari jurang kamiskinan, tarutamo kamiskinan moral kamanisiaan sarato kamiskinan jiwa. Jadi, bukan karano Panghulu punyo masalah fisik.

Salain itu, tungkek Panghulu pun manganduang makna sikap teliti jo hati-hati. Dalam hal iko, tungkek Panghulu adolah patando baraso “langkah” Panghulu alah didahului dek samacam langkah observasi/pangumpulan info sahinggo “langkah” tu indak langkah kosong atau langkah cubo-cubo, tapi langkah pasti sarato jaleh baalamaik/batujuan.

4)   Cawek

Cawek kadang disabuik juo jo ikek pinggang, yoitu alaik bantu nan digunokan untuak mampakuaik lilik sarawa ka pinggang. Bagi, surang Panghulu, di sampiang sabagai pangikek sarawa, cawek punyo makna lain. Tantangan makna lain nantun, ado baiaknyo disimak baiak-baiak pado pituah adaik di bawah ko.

“Caweknyo suto bajumbaian, jumbai nan tangah tigo tampok, kapalilik anak kamanakan. Kapangabek sako jo sangsako, nak kokoh lua jo dalam, guyahnyo bapantang tangga. Kokohnyo murah diungkai, kabek sabalik babuhua sentak. Rapek nagari nak maungkai, tibo nan punyo tangga sajo, rasio buhua dek Pangulu”.

Cawek adolah patando baraso surang Panghulu punyo kamampuan dalam manjago sarato malinduangi anak-kamanakan. Panjagoan Panghulu ko diwujuikkan malalui ajaran/didikan nan sifaiknyo fleksibel kecek urang kini. Indak kaku sahinggo indak kamanakan indak maraso takakang. Ibaraik mangabek, kabek Panghulu ko nampaknyo lungga, tapi indak murah dibukak.

2.   Panghulu di dalam Pidato Pasambahan Adaik

Di dalam pidato pasambahan adaik Minangkabau, Panghulu ko dimetaforakan jo babagai bidarai adaik. Pado kajian nan kini ko, ambo katangahkan ampek (4) buah contoh bidarai adaik nan barusaho manggambarkan surang Panghulu. 

a.   Urang nan gadang basa batuah; gadangnyo nan sabingkah tanah, kabasaran nan salingka aua, tuah malingkuang Minangkabau.

b.   Urang nan dihampa gadang dianjuang tenggih, kusuik nan manyalasai, karuah nan manjaniahi.

c.    Baringin di tangah koto – nan baurek limbago matan – nan babatang sandi andiko – badahan cupak jo gantang – barantiang mungkin jo patuik. Nan badaun rimbun jo adaik – babuah kato nan bana – babungo alua jo patuik.

d.   Ureknyo bakeh baselo, batangnyo bakeh basanda, dahannyo bakeh bagantuang, daunnyo bakeh bataduah.. Tampek nan mudo sanda gurau, tampek nan tuo main catua, tampek alim main kitab, tampek nan cadiak main undang, gantungan cupak nan duo.

Kaampek contoh bidarai adaik di ateh sabanyo punyo tujuan nan samo, yoitunyo manggambarkan kapasitas surang Panghulu. Nan partamo (a) mangatokan baraso Panghulu iolah urang nan gadang basa batuah. Nan kaduo (b) mangatokan baraso Panghulu iolah urang nan dihampa gadang dianjuang tenggih. Kaduonyo (a dan b) manganduang makna nan samo, yoitu baraso Panghulu iolah urang nan gadang punyo kamampuan atau skill caro kininyo. Baiak kamampuan utak/intelejensi (basa, kusuik manyalasai karuah manjaniahi), maupun kamampuan raso jo batin (batuah, dihampa gadang dianjuang tenggih).

Salanjuiknyo nan katigo (c), Panghulu dikatokan sabagai batang baringin nan saluruh batang tubuahnyo barisi lambang-lambang adaik. Aratinyo, surang Panghulu tu iolah urang nan langkok atau multi talent caro kininyo (nan baurek limbago matan – nan babatang sandi andiko – badahan cupak jo gantang – barantiang mungkin jo patuik. Nan badaun rimbun jo adaik – babuah kato nan bana – babungo alua jo patuik). Sadangkan nan kaampek (d) mangatokan baraso surang Panghulu iolah baringin nan baguno mulai dari urek hinggo ka daun-daunnyo. Aratinyo, Panghulu iolah urang nan mandatangkan banyak guno taradok urang di sakitarnyo (Ureknyo bakeh baselo, batangnyo bakeh basanda, dahannyo bakeh bagantuang, daunnyo bakeh bataduah). Kaduonyo (c dan d) pado hakikaiknyo nio manggambarkan hal nan samo, iolah baraso surang Panghulu iolah urang nan punyo kamampuan pikiran, raso-raso nan tenggih sahinggo bisa manambuih bateh umua (tampek nan mudo sanda-gurau, tampek nan tuo main catua) jo ruang (tampek nan alim main kitab, bakeh nan cadiak main undang).

C.   Kato Kudian

Dari surahan di ateh dapek dipahami baraso manjadi surang Panghulu indaklah pakaro mudah. Indak samato tantangan kakuasaan, harato, jabatan, dan lain sabagainyo. Tapi, tantangan tangguang-jawaik untuak mandidik masyarakaik ka arah nan labiah baiak. Untuak itu, surang Panghulu musti punyo kamampuan “lua-dalam”. Bahkan, musti punyo kaarifan atau kecerdasan kecek urang didik-mandidik.

Di sampiang itu, surang Panghulu musti pulo punyo sifaik jo karakter nan kuaik tapi lapang. Punyo caro pikia sarato raso-raso nan bisa mambueknyo bisa masuak ka sagalo kalangan. Baik cadiak atau kurang, baiak kayo atau misikin, baiak tuo atau mudo, dan kalangan lainnyo.