Baralek dalam Adaik Minangkabau (Maninjau Alek Nikah-Kawin)

A.   Kato Dahulu

Malam-malam bainai yo mamak

Malam-malam bajapuik yo sayang

Sambanyo lamak yo mamak

Si Gulai paku

Dendang di ateh biaso tadanga kutiko alek nikah-kawin dilelokan di lingkuang adaik Minangkabau. Isinyo labiah kurang manjadi camin taruih dari rono sabuah alek. Ado carito tantangan malam bainai, ado carito tantangan larak-lereang, ado carito tantangan alek jamuan, ado carito tantangan cancang tandeh. Pendeknyo, alek nikah-kawin indak samato tantangan parubahan surang anak gadih/bujang manjadi surang laki/bini. Tapi, tantangan urang banyak, tarutamo tantangan kaduo balah pihak nan takaik jo anak daro-maropulai.

Nikah adolah ciek dari sakian banyak maso dalam hiduik nan paliang dimuliakan dek satiok manusia. Hal ko tasiraik langsuang dari sagalo kako jo carito nan ado pado satiok alek nikah-kawin. Sagalo pihak nan takaik nyato nanpak nio manunjuakkan dirinyo. Bahkan ado istilah “malapeh lasuang ka tujuahnyo”. Aratinyo, untuak “manggadangan” nikah-kawin, apo nan bisa dipabuek dibuek, nan indak ado diadoan. Masyarakaik mambiasokan bahkan mamasokan diri mambuek aleknyo sagadang mungkin nan tantunyo mamakan biaya nan indak saketek.

Di baliak itu, dek banyaknyo masyarakaik nan mamasokan diri untuk manggadangan alek bahabih-habih, gujalo nan ko ditangkok babarapo masyarakaik sacaro sumbang. Sumbang dek karano nan disalahkan iolah adaik. Sumbang dek karano nan ditangkok iolah masyarakaik nan mamasokan diri, indak nilai gadangnyo nan mandarahdagiang di dalam masyarakaik. Karano itu, pokok kaji nan kini ko kito niaikkan untuak maluruihkan nan sumbang-sumbang tu. 

B.   Pokok Kaji

1.   Hakikaik Nikah-Kawin

Manga kok Ambo manggunokan kato “nikah-kawin”, indak “nikah” sajo? Piliahan kato ko sangajo Ambo ambiak guno mamudahkan kajian tantangan hakikaik nikah manuruik adaik Minangkabau. Manuruik adaik Minangkabau, kato nikah indak bisa dipisahkan jo kato kawin. Untuak labiah jalehnyo, bisa disimak dari bunyi pituah adaik di bawah ko.

“…nan nikah jo parampuan, nan kawin korong jo kampuang…”

Potongan pituah di ateh mangatokan baraso hubuangan nikah-kawin indak samato tantangan duo urang laki-laki padusi. Indak samato tantangan duo pihak. Tapi, tantangan duo Korong, duo kampuang, bahkan duo nagari, nagari nan laki-laki jo nagari nan padusi. Di sampiang itu, nikah caro adaik Minang ko diaratian jo pituah di bawah ko.

“…ijab nikah kabua bajawek, hukum putuih tampek bagantuang…”

Pituah di ateh mangatokan baraso nikah-kawin ko iolah ibaraik prosesi pamindahan mandaik dari surang Bapak kapado surang Minantu. Kutiko ijab-qabul lah dilelokan, mako surang anak padusi nan dimukasuik indak lai manjadi tangguang-jawaik Bapak/Mamaknyo. Tangguang-jawaik nantun lah bapindah kapado lakinyo.

Di baliak pambalakangan itu, sarupo nan lah disabuik juo baraso alek nikah-kawin ko indak samato tantangan duo pihak sajo, tapi tantangan duo korong, kampuang, sarato nagari. Mako, alek ko malibaikkan banyak pihak. Pihak-pihak nantun iolah; niniak-mamak, sumando, ipa-bisan, andam-pasumandan, induak bako-anak pisang, juru baso, sarato lain-lainnyo. Sagalo pihak-pihak nan takaik ko punyo tangguang-jawaik masiang-masiang taradok baiak-buruaknyo acara alek nikah-kawin. Palaksanaannyo diatur manuruik adaik salingka nagari. Aratinyo, lain nagari lain pulo ruponyo.

Namun, bak pituah nan mangato, “dek banyak urang kok ragu, dek lamo urang kok lupo”. Kabasaran alek nan tacamin dari pihak-pihak nan takaik ko kini mulai dilupokan urang hakikaiknyo. Nan dikana urang, banyak tu rumik, batele-tele, maabihan hari, maabihan minyak, sarato lain-lainnyo. Urang lupo baraso bajamaah tu rahmah, lupo baraso baban kok disandang basamo-samo akan taraso ringan. Bahkan, urang lupo hakikaik nikah-kawin nan dicurai di muko.

  

2.   Sabalun Alek Nikah

Sabalun alek nikah dilelokan, ado banyak acara nan manduluinyo. Acara nantun, di antaronyo iolah; “Maresek”, “Maminang”, “Balatak Tando/Batimbang Tando/Babaluak/Basaluak Tando/Batuka Tando”, “Malam Bainai”, sarato lain-lainnyo. Namun, mangingaik aluran badan diri nan bapandapek masih singkek, surah kaji nan ka Ambo tulih hanyo nan Ambo dapek sajo, iolah; a) Maminang, b) Manukuak Hari Mancari Ukua Jangko, 3) Balatak Tando, Batuka Tando, Batimbang Tando, Babaluak/Basaluak Tando, sarato 4) Malam Bainai.

a.    Maminang

Maminang ko bisa diaratian jo kato “melamar” dalam bahaso Indonesia.  Hanyo sajo, kato maminang dalam istilah adaik Minang ko sacaro kaji “kognitif” bacamin taruih kepado “makna” jo “motivasi”.  Di dalam adaik Minangkabau, kato maminang ko mangacu kapado barang-barang nan dikatangahkan kutiko acara maminang dilangsuangkan. Barang-barang nantun dalam pidato pasambahan adaik diistilahkan jo “urang nan limo badunsanak”, yoitu; siriah, pinang, gambia, sadah, tambakau.  Barang-barang ko iolah “caro” maminang nan ka jadi paratian pihak nan dipinang. Karano itu, titah-tatiang sirih-pinang badunsanak ko musti bana-bana diparatian baiak-baiak sabalun dikatangahkan.

Sahubuangan jo “caro” nan musti diparatian ko, siriah biasonyo manjadi tumpuannyo. Siriah indak buliah dilatakan baitu sajo di dalam carano. Indak pulo buliah dibuek bagaya-gaya co urang mambungkuih kado. Siriah musti disusun balirik, himpik-mahimpik mambantuak susunan nan taratur jo bahagian tampuaknyo madok ka ateh. Susunan ko sabaiaknyo indak diikek. Kalaupun diikek supayo indak baserak kutiko dibao, ijan sampai buhua ikeknyo mati. Ikeklah jo buhua sentak, nan arek-arek lungga.

Susunan siriah sarupo nan dipapa di ateh manganduang babarapo makna. Nan partamo, siriah badunsanak iolah lambang dari mufakaik. Nan kaduo, susunan siriah manyiraikkan baraso pihak nan mambaonyo datang jo niaik sarato tujuan nan jaleh nan alah dimufakati dek sagalo pihak nan takaik. Nan katigo, tampuak siriah madok ka ateh dan indak diikek manyiraikkan baraso mufakaik nan dibao dek pihak nan datang sifaiknyo indaklah mutalak. Jikok ado nan indak sasuai dek pihak nan manyambuik, mufakaik tu bisa diubah, bahkan dicabuik untuak kabaiakan kaduo balah pihak nan ka malangsuangkan acara maminang.

Jikok siriah badunsanak untuak maminang lah disampaikan manuruik katantuan di ateh. Rundiangan antaro kaduo balah pihakpun lah bisa dimulai. Pado akhianyo, jikok rundiangan lah sampai kapado mufakaik basamo, biasonyo pihak nan manyambuik akan mangicok siriah nantun sabagai isyaraik baraso pinangan ditarimo jo hati nan suci sarato muko nan janiah.

b.   Manukuak Hari Mancari Ukua Jangko

Manukuak Hari Mancari Ukua Jangko ko sabananyo ciek dari babarapo falsafah tatuo di dalam adaik Minangkabau. Falsafah ko masih dipagang kuaik dek masyarakaik Minang karano kanduangan nilainyo nan masih sasuai jo nilai-nilai jaman kini. Falsafah nan ko asamulonyo balaku kutiko urang Minang masih “mancancang jo malatiah”, “marimba jo marayo”, atau hiduik bagantuang jo hasia bumi, tarutamo hutan. Pado maso itu, falsafah ko mandapek pangaruah nan sangaik kuaik dari mitos kutiko mambukak lahan, mamacah batu, manabang kayu, nan identik jo logika mistika kecek Tan Malaka. Namun, tanyato falsafah “manukuak hari mancari ukua jangko” ko indak lakang dek paneh indak lapuak dek hujan, masih tapakai hinggo kini ko. Hal iko dimungkinkan dek nilainyo nan sajalan jo nilai-nilai jaman kini, iolah nan diistilahkan jo “hope for the best, plan for the worst”nyo urang kini.

Wujuik falsafah “manukuak hari mancari ukua jangko” ko dalam alek nikah-kawin biasonyo dirupokan jo kako barituang-rituang/barundiang di tampek pihak padusi, indak buliah di tampek pihak laki-laki.  Dalam rundiang ko biasonyo ditataikkan wakatu (hari, bulan) alek, kamampuan kaduo pihak sarato dihituang sagalo kamungkinan baiak jo buruak takaik wakatu nan dipiliah.

Lalu, manga kok musti di tampek pihak padusi? Hal iko supayo juru rundiang jo juru baso mudah untuak mandapek masukan tantangan “kondisi” calon anak daro sacaro langsuang jo sahiah kapado nan basangkuik. “Kondisi” di siko mangacu kapado kodrat padusi nan memang punyo kutiko-kutiko indak suci. Jadi, inti dari wakatu nan dipiliah pado acara “manukuak hari” ko mustinyo mangacu kapado wakatu manuruik kaadaan jo kasiapan kaduo calon Maropulai-Anak Daro. Indak manuruik saku-saku urang tuo, niniak-mamak, ataupun pihak-pihak lainnyo.

Hal lainnyo nan diangkek dalam acara “manukuak hari mancari ukua jangko” ko, iolah tantangan jinih alek nan nio dibuek. Di siko lah sabanyo nilai ekonomi tasangkuiknyo. Kaduo balah pihak mustinyo jujur, tabukak, indak balabiah pulo ruok pado galeh. Pendeknyo, kamukokanlah kaadaan jo kamampuan nan sabananyo, barila-rilalah tantangan itu. Sabaik, hanyo jo barila-rilalah, lenan dek urang taraso suto, cupak panuah ka bawah taraso balanjuang.

c.    Balatak, Batuka, Batimbang, Babaluak/Basaluak Tando

Kasapakatan kutiko acara “manukuak hari mancari ukua jangko” di ateh biasonyo ditutuik jo adaik pamati. Adaik pamati ko babeda-beda manuruik adaik salingka nagari.  Namun, sacaro umum, adaik pamati ko bisa dikalompokkan manjadi ampek (4), iolah; 1) Balatak Tando, 2) Batuka Tando, 3) Batimbang Tando, 4) Babaluak/Basaluak Tando.

Partamo, dalam “balatak tando”, kasapakatan dipati jo sabuah barang panando pati dari pihak nan datang. Pihak nan manyambuik hanyo manarimo barang nantun. Kaduo, dalam “batuka tando”, pati kasapakatan dirupokan jo saliang batuka barang tando pati. Rupo sarato mutu barang patando pati “balatak tando” jo “batuka tando ko” diatur manuruik adaik salingka nagari, ataupun manuruik adaik nan taradaik, yoitu kasapakatan kaduo balah pihak.

Katigo, dalam “batimbang tando”, kaduo balah pihak mamati kasapakatan nan lah dibuek jo batuka barang nan rupo sarato mutunyo samo. Biasonyo diwujuikkan barupo cincin. Lalu, nan kaampek, dalam “babaluak/basaluak tando”, pihak laki-laki mamati kasapakatan jo panyarahan karih kapado pihak padusi. Sadangkan pihak padusi manyarahan kain songket. Di sampiang sabagai panando kasapakatan atau mufakaik, kaampek bantuak tando pati ko manganduang makna baraso kaduo balah pihak akan manjalankan buah mufakaik sabaiak-baianyo. Jikok ado pihak nan mungkia dari mufakaik, sadio untuak manarimo apopun kaputusan adaik nan akan ditimpokan.

     

d.   Malam Bainai

Saketek babeda jo adaik Malayu Palembang, nan bainai dalam nikah-kawin adaik Minangkabau hanyolah kaum padusi. Acara bainai ko biasonyo dilakukan sahari sabalun nikah (ijab-qabul). Acaranyo dimulai dari sanjo hari sabalun wakatu magarik masuak. Partamo-tamo, calon anak daro dimandian dek bako-bakonyo nan tuo, iolah bako nan alah indak “manarimo tamu bulanan” lai (monopous). Lalu, sasudah mandi sarato shalat magarik, barulah bako-bako ko malanjuikkan kajonyo mamasangkan inai.

Manga nan mamandian sarato mamasangan inai anak daro musti bako-bakonyo nan alah “tuo”? Manuruik Mak Katik, malam bainai ko sabananyo menganduang makna panyucian.  Tujuannyo supayo anak daro bana-bana suci sabalun nikah (ijab-qabul) dilangsuangkan. Namonyo panyucian, tantunyo pihak nan mansucikanpun mustinyo suci pulo. Karano itulah, pihak nan mansucikan nantun dipiliah dari bako nan alah tuo-tuo. Labiah tapeknyo, bako nan indak lai mandapek tamu bulanan, atau menstruasi kecek rang kini.

Lalu, tantangan pamiliahan inai sabagai hiasan kuku. Dari sagi zat, inai iolah jinih tumbuhan nan indak punyo masalah jo hukum Islam ataupun hukum adaik. Sungguahpun rono inai ko manjalinok, zatnyo indak mahalangi aia manganai kulik hinggo aia wuduak indak tahalang. Di sampiang itu, manururuik babarapo “urang pandai”, inai ko iolah jinih tumbuhan indak disukoi dek makhluk-makhluk gaib, sihir, dan hal-hal “aluih” nan buruak lainnyo.    

3.   Sasudah Alek Nikah

a.    Baralek

Manuruik adaik Minangkabau nan sabatang panjang, alek ko dibagi manuruik duo (2) katantuan utamo. Nan partamo manuruik kaadaan jo kamampuan, nan kaduo manuruik wilayah adaik (luhak). Manuruik kadaan jo kamampuan, alek ko dibagi manjadi; alek kulansiang batu, alek kulansiang bulan, sarato alek kulansiang matohari.  Sadangkan manuruik wilayah adaik (luhak), alek dibagi manjadi; alek larak lereang, alek jamuan, sarato alek cancan tandeh.

Nan dikatokan alek larang lereang iolah aleknyo urang Batu Sangka. Ciri utamonyo iolah balarak bairiang-iriang sarupo urang bapawai. Nan dikatokan alek jamuan iolah aleknyo urang Agam. Ciri utamonyo iolah alek jamuan makan bajambo. Sadangkan nan dikatokan jo alek cancang tandeh iolah aleknyo urang limo puluah koto. Ciri utamonyo iolah baabih-abih manggadangan alek nan dirupokan jo maisi si suduik, sarah-sarahan sarato lain-lainnyo. 

Salanjuiknyo, nan disabuik jo alek kulansiang batu iolah alek nan dilelokan jikok pihak nan baralek kaadaannyo sacaro ekonomi sadang kurang. Aratinya, alek kulansiang batu ko ketek sacaro ekonomi, dan hanyo malibaikkan pihak-pihak nan “paralu-paralu” sajo.  Nan dikatokan alek kulansiang bulan iolah alek nan sacaro ekonomi gadangnyo manangah sarato maundang urang dalam nagari sajo.  Sadangkan nan dikatokan jo alek kulansiang matohari iolah jinih alek nan sacaro ekonomi sangaik gadang sarato malibaikkan baragam undangan.

Pokok kaji dari surah tantangan alek di ateh iolah baraso alek musti disasuaikan jo kaadaan sarato adaik nan dibiasokan di nagari kito. Alek indak untuak parang tadiang mancaliakan kuku ka urang banyak. Alek iolah wujuik dari kasungguahan kito dalam manyayangi sarato mandidik anak-kamanakan.

b.   Batagak Gala

Ado babarapo jinih acara batagak gala. Nan partamo batagak gala pusako, kaduo batagak gala sangsako, sarato katigo  batagak gala mudo. Batagak galam dalam alek nikah-kawin iolah batagak gala mudo. Aratinyo, batagak gala untuak mangukuahkan parubahan status surang laki-laki bujang manjadi laki-laki “gadang” sacaro adaik Minangkabau.

Hal nan musti diingaik dari pambarian gala mudo ko iolah baraso si panarimo gala alah diakui sabagai laki-laki “gadang” sacaro adaik. Untuak itu, samanjak gala dilelokan, si panarimo gala musti balaku layaknyo surang laki-laki nan baradaik Minangkabau, indak anak-anak lai. Baitu juo jo masyarakaik sakitar, musti maharagoi sarato malibaikkan panarimo gala mudo ko dalam acara-acara tarutamo na bahubuangan jo adaik nan dipakaikan.

C.   Kato Kudian

Nikah-kawin manuruik adaik Minangkabau punyo nilai nan sangaik tinggi. Indak samato tantangan anak adaro-maropulai, indak samato tantangan duo buah pihak, tapi tantangan duo kaum, duo Korong, duo nagari nan babeda. Pendeknyo, alek di Minangkabau nampak gadang iolah karano banyaknyo pihak nan manggadangan alek nantun. Indak untuak manunjuakan kuku, indak untuak maajan tuah, apo lai sakadar malagak-lagak. Karano itu, ado babarapo pokok kaji nan musti dipahami tantangan alek nikah-kawin ko:

1.   Hakikaik nikah-kawin dalam adaik Minangkabau iolah kako pamindahan mandaik dari surang Bapak kapado Minantunyo, dari Mamak sabuah kaum ka Mamak kaum lainnyo.

2.   Alek nikah-kawin indaklah kako malagak-lagak, tapi wujuik karajo-samo, tolong-manolong nan panuah jo raso-raso kakaluargaan nan tenggih.

  

D.  Referensi

Dahrizal, Musra Kt. Jo. Mangkuto. (Wawancara).

Zalman, Hendri. 2010. "Kumpulan Pidato Pasambahan Adaik Nagari Batu Banyak" (tidak diterbitkan).