Antaro Silek jo Cakak

Sajak suraunyo mambukak sasian, katigo kalene, Andah, Inggi, jo Adang nanpak kagilan-gilanan. Tiok sabanta dongkak-mandongkak, tioak sabanta tinju-maninju. Basobok jo karuang bareh, karuang tu disipaknyo, basobok jo batang pisang, batang pisang tu dipermaknyo.

Sore ko, katigonyo nanpak sibuk di balakang surau. Andah jo Inggi basorak-sorak sambia malonjak-lonjak bak cando pamandu sorak. Sadang si Adang nanpak basitungkin malanyau kalene anyia nan nan kuruih kariang.

Karajo katigonyo ko taranti sakutiko dek kadatangan Nggek Malin, guru mangaji sarato guru silek katigonyo. Muko Nggek Malin nanpak mamerah manahan bangih, tangannyo sakutiko mamangku si kuruih kariang, mambaonyo ka dalam surau, sarato indak lupo manyuruah Adang, Andah jo Inggi turuik maikuik di balakang.

Baitu sampai di dalam surau, Nggek Malin langsuang mauruik-uruik sarato manduduakan si kuruih di subalahnyo. Di muko baliau, lah duduak baderet, Andah, Adang, langkok jo Inggi. Sidangpun sugiro di mulai.

“Manga bacakak waang?” hariak Nggek Malin madok ka Andah

“Ndak Awak do Nggek, si Adang nan bacakak” kilah Andah capek.

“Eh sasek Wakden ha. Manga bacakak Ang Dang?” lanjuik si Tunggek sambia manggeseran ujuang rotannyo manunjuak Inggi.

“Awak Inggi Nggek, nan iko si Adang ha!”

“Tasarahlah eh. Nan jaleh, manga bacakak kalian?” hariak Nggek Malin makin kareh sambia maayun-ayunan rotan mandakek ka muko Adang.

“Dek takana jo pasan Tunggek, Nggek” jawek Adang capek jo rono indak badoso.

“Pasan den nan maa?” tanyo gaek ko jo kaniang mangaruik.

“Pasan Tunggek tiok akhia mangaji. Kecek Tunggek, mangaji ko indak ado hasianyo do jikok indak ado tindak lanjuiknyo di lapangan. Dek takana jo itu, makonyo den bae bacakak”, lanjuik Adang manpajaleh jaweknyo di muko.

“Batua tu mah. Tapi, apo hubuangannyo jo bacakak?” sambuang Nggek Malin masih jo tando tanyo.

“Awak kan baraja silek pulo mah. Jo apo mancari tahu barasia-indaknyo di lapangan kok ndak jo bacakak dek Tunggek?” sambuik Adang sasuai jo nan nyo raso.

Mandanga iko, Nggek Malin nanpak mahiruik angok dalam-dalam. Lalu, mahambuihannyo baliak lambek-lambek.

“Ee yayai yo. Itu tu untuak palajaran akidah akhlak mah Dang. Babeda jo palajaran silek” lanjuik baliau satangah mangaluah.

“Di ma latak bedanyo?” sonsong Adang capek.

“Bedanyo co iko ha. Jikok nantik Wakden ajaan Wang baranang. Gunonyo iyolah supayo Waang tanang, indak bauweh-uweh tingga di dakek lawuik. Indak untuak mambanaman urang tajun ka lawuik do, Dang”, urai Nggek Malin singkek, tapek, padek mambuek katigo muriknyo ko, tarutamo si Adang jadi tatagun. Kapalo katigonyo langsuang manakua co urang katakutan.

Mancaliak iko, Nggek Malinpun balanjuik.

“Lai mangarati waang jo kecek Den?”

“Lai Nggek” jawek katigonyo sarantak sambia taruih manakuakan kapalo, ndak talok manantang mato gaek ko.

“Kini, mintak mooh katigonyo ka kawan kalian ko” parintah Nggek Malin sambia mancaliak lakek ka muko katigo muriknyo ko ciek-ciek.

Katigonyo langsuang angkek kapalo, tagak, lalu mauluakan tangan mamintak mooh ka paja nan tadi dilanyau Adang di balakang surau.