(48) Apo Adonyo? Apo Ado?

"Kuruihanlah badan kau tu saketek", lanjuik Udin capek kalua baitu sajo. Niaik nasihaik-manasihati kini barubah jo parang urek kaniang di lua kasadaran kaduonyo.

"Baa Uda ko ko. Iko lah bini Uda. Tarimo inyo apo adonyo", sambuik Mirna ndak kalah capek sambia mangacak pinggang.

Mandanga jawaban sarato caro manjawek ko, darah Udin langsuang naiak ka ubun-ubun. Sakutiko, sumpah-sarapahnyo sugiro bakarajo.

"Amai kau. Ndak bisa dikecekan kau do yo?"

“Yo Uda tu main pisik tantu lah iyo”

“Jadi main apo nan ka lamak dek kau?”

“Yo elok-elok lah lah mangecek. Uda tu Imam, pandai-pandai lah mambuhua, elok-eloklah mauleh”

Mandanga jawek Mirna nan tarakhia ko, Udin nanpak agak takajuik. Sakutiko, Udin ingaik jo posisinyo sabagai kapalo rumah tango, Imam dari padusi ko. Bak urang nan talanjua bajalan, Udin sugiro mangganjua langkah, suruik salangkah untuak maju babarapo.

“Jadihlah kok bitu. Kau lai mandi tiok pagi?” tanyo Udin tibo-tibo mambuek kaniang Mirna mangaruik, antaro picayo jo indak picayo.

“Halah, ko kama pulo painyo ko Da?” tanyo Mirna maluncua baitu sajo.

“Jawek sajo lah. Usah mambantah” potong Udin sugiro maminteh mahambek tanyo-tanyo bininyo ko.

“Yo tanyo Uda tu aneh”

“Ee yayai. Wakden ko sadang barusaho manjalehan ka kau. Tanyo-tanyo ko lah caronyo. Makonyo, kau jawek sajo dulu” lanjuik Udin mayakinkan.

“Ohhh, bitu. Mandi lah. Rutin den mandi 2 kali sahari mah”

“Sudah tu lai bakaco kau?”

“Kadang lai kadang indak”

“Kok bitu. Kini mari kito bakaco” sonsong Udin sambia mambimbiang bininyo ka dalam kamar. Kaduonyo lalu tagak mahadok kaco gadang nan malakek arek ka pintu lamari.

“Ko apo ko?” tanyo Udin sambia manunjuak titiak hitam dakek hiduang bininyo ko.

“Itulah Da ha. Ndak amuah hilang nyo do. Malu wakden kutiko mambali sayua deknyo. Dikecekan ibuk kadai wakden ko sadang puber baliak, bajirawek, keceknyo, hehehe”

“Ohhh”

Hanyo itu nan ka lua dari muluik Udin. Lalu, tangannyo kini mamapah elok-elok induak bareh ko hinggo posisi kaduonyo kini manyampiang dari kaco.

“Kok nan iko, baa ko?” lanjuik Udin sambia mamacik paruik jo pinggang nan lah mangambang babarapo lipek.

"Hehehe. Makonyo, wakden ndak nio diajak buko basamo jo kawan-kawan ka patang" jawek mirna capek.

Pikiran Mirna langsuang taringaik jo acara buko basamo kawan-awan SMAnyo babarapo bulan nan lalu, nan indak bisa inyo hadiri dek indak “pede”.

Mancaliak iko, Udin sugiro balanjuik mancari tahu.

“Baa kok bitu?”

“Beko digalak-galakan kawan. Dikecekannyo wakden amak-amak nan mambao saruang ka mano-mano” jawek Mirna jo rono muko kamerah-merahan.

“Kau kan iyo lah jadi Amak urang mah” sonsong Udin capek bamukasuik baparingaik

“Justru dek itu. Makonyo wakden ndak nio digalakan. Malu pulo lah anak den kok tau amaknyo digalakan urang”

Mandanga iko, Udin langsuang maangguak-angguak sarupo urang nan mandapek ilham. Bak suaro urang babisiak, tadanga kato-kato barikuik dari muluiknyo.

“Berarti iyo anak wakden si Ambun ko mah”

Darah Mirna langsuang tasirok. Talingonyo mamerah, muluiknyopun sugiro bakarajo.

“Mukasuik Uda?”

"Jikok kau sajo susah manarimo. Anak kau mungkin bisa malu. Baa kok bisa kau mengecek “tarimolah Adiak apo adonyo”, ka Uda?" sambuik Udin singkek, tapek, padek. Namun, cukuik untuak manggarakan saluruh pasandian di tubuah Mirna.

Kutiko itu, Udin nanpak malangkah santai ka lua kamar sambia basiwua-siwua. Samintaro itu, Mirna nampak baliak madok ka kaco sambia maama-ama lamak di saputaran pinggangnyo nan mulai lipek-malipek.

Pikirannyo bakacamuak, inyo gampang bana mamintak urang-urang nan nyo sayangi manarimonyo apo adonyo. Nyatonyo, inyo sandiri kadang indak bisa manarimo. Bahkan, acok marutuaki kaadaan diri nan apo adonyo nantun. Indak koh manusia tu update? dinamis? Indak statis bak cando Syetan jo Malaikaik.