(4) Rok Pendek Aka Singkek

Udin geleang-geleang kapalo mamparatian Mirna nan sadang khusuak manonton masih manggunoan talakuang nan nyo pakai kutiko Isya bajamaah sabanta ko. Di tangan induak bareh ko tapacik sapu tangan hitam. Kadang sapu tangan ko naiak manyapu aia mato nan manitiak. Kadang pulo, sapu tangan ko singah di hiduang mausok salemo nan maleleh. Untuang sapu tangan tu hitam, cubo kok putiah, gumam Udin sambia mulai bajalan mandakek.

Baitu sampai di balakang Mirna, Udin langsuang manyacahan ikua duduak lambek-lambek. Babarapo datiak, tapikia dek Udin nak manggaduah. Namun, dek takana jo janji kutiko mambali TV, Udin langsuang mangalatiakan niaik tu jauah-jauah. Isi janji, Udin buliah manonton bola sampai pukua barapo sajo, jikok Mirna dibulihkan pulo manonton acara nan nyo suko. Karano itu, Udin akhianyo bukak suaro, manyapo elok-elok.

“Lamo lai ko Mirna?”

“Apo?”

Mirna manjawek sambia mamuta kapalo ka balakang. Mancaliak lakinyo duduak manyanda ka dindiang tapek di balakang inyo, Mirna langsuang barinsuik sato pulo duduak manyanda.

Baitu Mirna duduak di sampiangnyo, Udin baru malanjuikan tanyo di muko.

“Nan Kau tonton?”

“Oh, “Ayat-Ayat Cinta”. Alah Da” jawek Mirna sambia mahapuih siso-siso aia mato nan masih lakek di mukonyo.

“Kok masih manangih juo Kau?”

“Nan iko ko babeda jo sinetron nan biaso Den tonton ko Da. Latarnyo rancak, panokohannyo padek, alua caritonyo apo lai. Jawuah kiro-kiro manontonnyo”, urai Mirna bak tukang sigi dunia filem-mamilem.

“Oh”

Hanyo itu nan ka lua dari muluik Udin manyambuik jawek padek Mirna ko. Babeda jo biasonyo nan salalu mancimeeh. Alasannyo, di sampiang indak suko, pangana Udinpun lah panuah dek bola jo kaba. Indak ado lai ruang untuak tontonan nan lain, apo lai sinetron atau filem-filem nan sarupo tapi ndak samo.

Mancaliak reaksi Udin nan indak biaso ko, Mirna akhianyo batanyo, mancubo manyilau-nyilau.

“Manga tu Da? Ado bola kini?”

“Indak. Tapi, Wakden nio mancaliak kaba ha”

“Oh, mantun”

Sakutiko, tangan Mirna manjangkau maraiah remot. Jarinyo langsuang manakan-nakan mancari siaran kaba. Baitu basobok jo nan dicari, tangannyo langsuang malatakan remot sambia manyimak tukang kaba babarito. Kutiko itu, si tukang kaba nampak sadang mamandu duo urang nara sumber guno mananggapi kasus parkosaan nan kini acok tajadi di angkot-angkot di Jakarta.

“Di ma lah utak pareman-pareman tu yo Da?” tanyo Mirna maluncua baitu sajo dek jiwa emansipasinyo tapanggia mandanga kaba nanko.

“Di ikua” jawek Udin santai.

Mandanga jawek singkek sarato gaya santai Udin ko. Mirna langsuang salah paham. Sambia manahan raso berang nan mulai manjala ka ubun-ubun, Mirna lanjuik batanyo.

“Mukasuik Uda?”

“Kok ndak ka ikua pangananyo, ndak ka mamarkosa nyo do tu. Kajadiannyo di ateh angkot mah. Padusi-padusi nan jadi korban tu panumpang pulo lai. Kan pitih masuak ka pareman-pareman tu sabananyo tu” lanjuik Udin manarangan apo adonyo.

Mandanga uraian Udin ko, amper paneh Mirna langsuang suruik. Alhamdulillah, untuang Da Udin ko lai ndak manangkok baraso Wakden paneh sabanta ko, Mirna mangato di dalam hati manyasali kiro-kironyo nan lah bagurila talalu lia. Sakutiko, Mirna baniaik untuak indak maulang lai sarato mancubo bagulambek mamapah diri. 

“Da!” sapo Mirna sayuik-sayuik sampai.

“Apo?” jawek Udin singkek. Matonyo indak baranjak dari layar TV saketek alah juo.

“Manuruik Uda, pandapek kaduo nara sumber tu baa?”

Mandanga tanyo nanko, Udin langsuang puta kapalo mancaliak Mirna lakek-lakek. Lalu, sambia baliak maaliahan pandangan ka arah TV, Udin bukak suaro manjawek.

“Uda satuju jo nan di kida, indak jo nan di suok”

“Baa kok baitu?”

“Nan di kida tu, walau kareh, jaleh tampek bakeh tagaknyo. Kok nan di suok, walau sajuak mandanga uraiannyo, posisinyo abu-abu”, urai Udin mamapakan simpulannyo.

“Mukasuik Uda?” sonsong Mirna mamburu mancari tahu.

“Nan di kida tu jaleh, inyo sangaik malinduangi korban sarato indak manoleransi saketek alah juo karajo palaku”

“Kok nan di suok?”

“Kecek nan di suok tu, nan laki-laki jaleh salah dek karajonyo. Namun, di sampiang itu, inyopun baparingaik baraso padusi sabaiaknyo indak manggunokan pakaian nan bisa mamanciang napasu laki-laki” lanjuik Udin manambahkan.

“Iyo juo mah. Tadi pagi Wakden mancaliak barito TV pulo. Di Afrika, kini banyak laki-laki nan kanai parkosa dek padusi. Lalu, ado pulo di daerah Sumatra, induak-induak mudo mamparkosa anak-anak mudo tangguang jo caro nan agak haluih. Mungkin ndak manyimak nan di suok ko mah Da”, sambuik Mirna basumangaik nan langsuang ditimpali dek Udin jo sumangaik nan sanyalo.

“Yo itu mukasuik Den. Aratinyo, kasus ko bukan tantangan caro bapakaian, tapi tantangan utak atau caro mamandang. Ibaraiknyo, kok sapakaik kito kini manyuruah padusi mangganti rok pendek supayo isi di baliak roknyo aman ndak digaduah urang. Mako, kitopun musti bamufakaik bisuak manyuruah laki-laki, tarutamo pareman-pareman tu mangganti “kacomato” kutiko mamandang, supayo mato nan ado di baliak kaconyo tu aman pulo ndak dicukia urang. Baa gak hati Kau?”, tanyo Udin di akhia uraiannyo.

“Cocok lah nyo” baleh Mirna sambia mamatian TV mambuek Udin nan sadang manonton takajuik.

“Ha? Manga kau matian TV tu?”

“Lah malam hari mah. Awak alun sumbahyang Isya lai. Lagi pulo, dari pado pareman-pareman badasi abu-abu tu nan dicaliak, ancak lah Wakden lai, si cantik ayu ko, hehehe” baleh Mirna mangijok Udin sambia malangkah ka arah kamar.

Samintaro itu, Udin nampak mangarinyiakan kaniang mainok-inoki kato-kato bininyo ko. Tibo-tibo, Udin langsuang tagalenjek sambia galak-galak ketek sarupo urang nan baru sajo dapek ilham. Di salo galak Udin manggumam.

“Hehehe, runtuah surang durian kamek ko”