(10) Ka Lua, Baliakan Anak Sarawa!

Hari ko, hari Minggu tanggal 17 Maret pukua satu siang, Mirna bini Udin baru sajo malahiakan anak nan partamo. Alhmadulillah, anak lahia sacaro normal. Kondisi Mirna sihaik, anakpun baitu pulo. Indak nan kurang ciek alah juo. Baitu uraian Udin maagiah laporan ka Amaknyo malalui HP.

“Apo paja? Bara bareknyo? Sia namonyo?” buru Amak dari subarang co urang mangaja oto.

“Bato Mak. Ciek-cieklah batanyo ko ha. Paniang lah wakden manjawek kok sarupo iko” baleh Udin balagak binguang. Sabananyo sangajo mamanciang emosi Amaknyo ko.

“Jawek se lah Din. Den lado juo ang kasudahannyo beko”, lanjuik Amak jo suaro gadang sarupo urang nan berang gadang pulo.

Mandanga iko, Udin langsuang takekeh. Ikolah sabananyo nan nyo tunggu. Manyangkuik ruponyo panciangan di muko.

“Hehehe, jan marabo-rabo Mak. Cucu lah batambah ko ha”, sapo Udin sok baparingaik.

“Baa pulo ka indak, urang batanyo, indak ang jawek” sambuang Amak tadanga agak malunak.

“Jadihlah. Barek 32, panjang 48. Namonyo Ambun. Lah koh sanang hati Amak?”

Mandanga katarangan nan iko, Amak nanpak tadiam sambia mangarinyikan kaniang. Lalu, Amak sugiro lanjuik batanyo.

“E eh, Ambun ko rajo di ateh daun ko?”

“Iyo, sasuai jo pasan Amak dulu baraso anak ko “kurrata a’kyun”, mako den agiah namo paja ko Ambun Rajo”. Baa gak hati dek Amak?”

“Hahaha, padek lahnyo. Ehyo Din, wakden ka pasa sabanta. baliak dari pasa lah den ka sinan yo”, baleh Amak langsuang manutuik carito.

“Usah Mak. Ka rumah se lah. Kecek Dokter, sakitar jam 4 ko si Mirna lah buliah pulang”.

“Jadihlah. Beko langsuang se den ka rumah ang”

Sasudah maagiah kaba ka Amak, Udin lalu mancaliak sabanta ka arah pandekanyo, Ambun nan dilalokkan di sampiang Mirna. Sasudah mausok kapalo sarato mangijok Amak paja ko, Udinpun balalu ka lua manyalasaikan sagalo urusan administrasi. Baitu sagalo urusan salasai, Udin baranak bini pulang dianta jo oto Dokter. Ikolah servis khusus jikok lahia di siko, kato patugeh di bagian administrasi kutiko manta Udin ka ateh oto.

Sasampai di rumah, Udin takajuik mancaliak sagalo sanak sudaro nan lah bakumpua. Baiak pihak Udin, maupun pihak Mirna. Rami ruponyo nan manyambuik kadatangan Ambun ko. Indak katinggalan, di antaronyo hadir pulo Amir, konco palangkinnyo. Kasadonyo langsuang bakarumun mamanuhi kamar, baitu Ambun jo Mirna sampai di dalam.

Mancaliak iko, Udin mamiliah duduak di lua baduo jo Amir. Hituang-hituang maagiah wakatu ka nan lain mancaliak kondisi anak bininyo, pikia Udin kutiko itu.

“Salamaik yo Din, hehehe”

“Mokasih Mir. Ehyo, batua kecek ang tu. Ndak tangguang cameh den manungguinyo tadi do”

“Hahaha, ka salah pulo wakden mangecek ka waang. Senior ang den ko mah, hehehe”

“Hahaha, iyo, iyo”.

Kutiko Udin jo Amir bacarito sambia galak-galak ketek, nanpaklah Amak bajalan madakek ka arah kaduonyo.

“Duduak Mak” sapo Amir baitu Amak sampai di dakeknyo. Baitu ikua gaek ko tacacah di ateh bangku. Amirpun lanjuik batanyo.

“Baa Mak? Lai gagah panakan den tu?”

“Hahaha, lai lah. Cuma ang aja-ajailah konco ang ko dari kini Mir” jawek Amak sambia mamonyongan muncuangnyo ka arah Udin.

Mandanga iko, Udin langsuang bukak suaro.

“Maso pulo si Amir ko nan Amak suruah maajaan wakden. Samo se Amak maasah bilah jo basi tu mah. Wakden sakelas SD jo Amir ko dek inyo 2 kali tingga kelas ko mah” sonsong Udin mamatahan parintah Amak, mambuek talingo Amir jadi tagak.

“Tu modenyo mah Mak. Aka singkek pangana kurang. Tapi, ongeh indak juo bakurang” baleh Amir maningkahi.

“Hoi Din. Ko serius ko mah. Jan batele-tele juo waang. Kana anak tu ha”

Akhianyo, Amak mangaluakan jurus pamungkas untuak manutuik muluik babiso Udin ko.

Mandanga iko, Udinpun manggalah.

“Jadihlah, apo mukasuik Amak sabananyo?”

“Mukasuik den tantangan anak. Baa ka baa, Amir ko labiah bapangalaman. Makonyo den suruah maajai waang”

“Ohhh”

Hanyo itu nan ka lua dari muluik Udin sabagai jawek patando lai mangarati jo kato-kato Amak. Amak lalu malanjuikkan.

“Waang lai punyo guntiang, basi barani, jariangau, sarato dasun tungga?” tanyo Amak mambuek Udin takajuik.

“Ha? Untuak aa tu Mak?”

“Panangka palasik. Lai ado atau indak?”

Mandanga jawek baraso barang-barang nan disabuikan Amak tu bahubuangan jo masalah anaknyo, Udin nan samulo nio mambantah, jadi tagigik lidah.

“Kok guntiang jo basi barani lai ado Mak, tapi kok jariangau jo dasun tungga, yo ndak ado do”.

“Musti ang adoan kini juo” sonsong Amak capek manskak matian Udin.

Udin nan memang baru iko mancubo baranak tapaso maangguak-angguak sajo. Namun, di salo angguak tu, inyo mangijok Amir mancubo mamintak bantuan.

“Manga ang kijok den?” baleh Amir sarupo urang nan indak manangkok mukasuik kode Udin sakalian maangek-angekan pasaran. Akibaiknyo, Amak langsuang mamburansang mandanga info kode-mangode ko. 

“Mambangkang juo waang yo? Pakai mangode-ngode Amir pulo bagai. Cari kini juo, kecek den” hariak Amak indak bisa ditahankan. Udin tapaso langsuang angkek kaki. Namun, baru duo ayun kaki talangkahkan. Tadanga suaro Amak dari balakang.

“Ehyo, waang lah manggendong-gendong si Ambun tadi kan?”

Udin mamuta badan lalu maangguak maagiah jawek.

“Kok bitu. Baliakan anak sarawa ang tu sabalun ka lua. Malalui waang bisa juo tacium dek palasik baun si Ambun tu mah”. Lanjuik Amak jo muko sungguah-sungguah. Amir nan mandanga langsuang manyambuik usua Amak ko jo maangguak-angguakan kapalo patando pasatujuan.

Mancaliak iko, Udin hanyo bisa malangkah masuak kamar mandi. Walau sambia marutuak-rutuak dalam hati, Udin tataik sajo malakukan sasuai jo nan diingaikkan Amak jo Amir di muko. Dek untuak anak, cubo kok indak, runguik Udin dalam hati nan indak mungkin takatokan.

Baitu ka lua kamar mandi, jo angguak ketek Udin mamintak ijin ka Amak jo Amir. Lalu, sugiro malangkahan kaki ka lua guno mancari barang-barang pasanan Amak di muko.

Samintaro itu, baitu pungguang Udin mahilang dari baliak pintu, Amir mamuta kapalo madok ka Amak.

“Mak, nan mambaliakan sarawa dalam tadi, iyo tu?” tanyo Amir sambia mangarinyikan kaniang.

Sabaik, manuruik pangalaman Amir samanjak bininyo manganduang hinggo anaknyo lah lahia sarato nasihaik dari nan tuo-tuo. Kok nan manganduang atau Amak paja ko nan ka pasa, iyo babaliakan anak sarawa mode itu. Tapi, Kok si Bapak, indak paralu pulo takah itu do. Baitu saingaik Amir di antaro lamunan jo manunggu jawek dari Amak.

“Khusus untuak urang sok tau, iyo baitu. Nak taraso dek inyo saketek, hehehe” baleh Amak sambia takekeh mampalagakan giginyo nan lah sirah dek gatah timbakau sugi.

Galak Amir langsuang manyambua mandanga jawek Amak konconyo ko.

“Hahaha”

Tanyato, pareman juo gaek ko, gumam Amir di salo galaknyo nan indak kunjuang bisa diambek.