Kaba Batubanyak (Asa-Usua Nagari)

Assalamu ‘alaikum wa rahmatullahi wa barakatuh.

Sabalun isi kato buah rundingan dikatangahkan, samo manyaru pado Allah. Allah taala kayo sungguah, Muhammad rasul pilihan. Mako, tadirilah kawajiban dek kito sagalo umaik, basumbahyang jo wakatu, baradaik jo kutiko. Mangarajoan syarak jo tarikaik, mamakaikan nan hakikaik.  Kok tapakai nan baitu, mudah-mudahan hiduik bamanfaaik, mati bamagfiraik.

Kutiko nagari kadihunyi, duduaklah niniak jo mamak, alim ulama cadiak pandai, parikpaga jo bundo kanduang. Maindang manampi bareh, mamiliah atah ciek-ciek, manggantuangan ka tiang tujuah. Dek lamo lambek bajalan, maso barubah musim baganti, urang batambah rami juo. Tarupolah nan batampi manjadi undang, elok jadi pakaian, jadi adaik di Minangkabau. Jadi padoman di nan banyak, siang dipatungkek, malam dipakalang, diturunkan ka anak-kamanakan.

Di baliak pambalakangan itu, ciek dari sakian banyak pakaro nan takarang manjadi undang elok jadi pakaian nantun iolah tarupo dalam pituah, “kabanaran butuah pambandiang, alua butuah pamatuik, barulah kako dimungkinkan”. Makonyo, ambo baranikan diri maadu untuang manyusun kaba nanko. Ambo pabulek alu panggali indak nan labiah dari puntuang, ambo pakuaik hati nurani indak nan labiah dari untuang. Walau ka angok-angok ikan, bogo ka nyawo-nyawo patuang. Pinto ambo, usah dicacek langkah sumbang, papahlah sajo dari sampiang.

Dari ranah Batusangka, hinggo ka Solok nan bak kini, tasabuiklah Kubuang Tigo Baleh. Namonyo Kubuang Tigo baleh, iolah urang/kaum nan tabuang, tabuang dari Batusangka. Apo sabaik mangko tabuang, dari dulu hinggo kini, sabaik gujalo nan indak jaleh. Nan tasabuik di dalam adaik, nan takarang di dalam undang, hanyolah namo nan tatingga. Adopun namo Kubuang Tigo Baleh, wujuiknyo nagari nan tigo baleh. Partamo Munggu Tanah (Salayo), kaduo Tanah Sirah, katigo nagari Gauang, kaampek nagari Kinari, kalimo Gantuang Ciri, kaanam Batubanyak, katujuah Guguak/Cupak, kalapan Solok, kasambilan Muaro Paneh, kasapuluah Sirukam, kasabaleh, Sariak, kaduobaleh Panyakalan, katigobaleh Supayang.

Tantangan nagari Batubanyak, dulu banamo Guguak malintang. Aratinyo, tanah nan malintang dari Batubanyak hinggo ka Simpang Tanjuang Nan Ampek. Kunun, pado maso saisuak, sabalun basawah jo baladang bak nan kini. Baliau nan batigo baleh bakumpua mancari kato nan sapakaik rundiangan nan saiyo di tampek banamo Munggu Tanah. Dapeklah bulek nan sagolong, picak nan salayang baraso nak mambangun koto jo nagari. Sasuai jo urang gadangnyo nan 13, mako dibangunlah sabanyak 13 nagari. Sairiang jo itu, tantu dibukak pulo sawah jo ladang, sarato banda buatan.

Dek baliau nan tigo baleh, dibagilah rombongan manjadi tigo baleh, lalu mulai bajalan mambukak lahan, mancancang jo malatiah, marimbo jo marayo. Mambukak tampek bakeh badiam, mambangun koto jo nagari. Ciek dari rombongan nan bajalan ka arah Guguak jo Cupak kini, malangkahkan kaki maayunan tangan manuju daerah nan nampak dari sinan bak guguak nan mambalintang. Daerah ko lalu dibari banamo guguak malintang.

Tantangan rombongan nan manuju guguak malintang ko, ulah dek lambek lamo bajalan, badan taraso latih juo, badan nak mintak dilayangkan. Samintaro manunggu palak tarangkek, sabalun selo ka diurak, diambiaklah mufakaik salanjuiknyo. Tarupolah kutiko itu baraso rombongan ko di bagi duo. Nan partamo lanjuik bajalan, nan kaduo mambangun pancang/tando, lalu babaliak babarito ka Munggu Tanah. Pancang nan dipasang banamo Panta, nan barati tampek bateh rombangan maanta. Kini tasabuik-sabuik juo, manjadi daerah Panta.

Dek rombongan nan balanjuik, rombongan dibagi pulo manjadi ampek. Nan partamo bajalah ka arah nagari Kinari kini, mambangun pancang/bateh nan dibari namo Batu Batingkok. Nan kaduo bajalan ka arah Dilam jo Batu Karak, mabangun bateh nan dibari namo Batu Sirisau. Nan katigo bajalan manuju arah kaki gunuang talang, mambangun bateh nan dibari namo Batu Sibeloh. Kudian, nan kaampek bajalan manuju arah Alahan Panjang, mambangun bateh nan dibari namo Batu Baamo.

Sasudah pancang ditanjakan, bateh lah nyato digarihkan, rombonganpun babaliak dikumpuakan. Kutiko itu, badatangan pulo lah rombongan-rombongan nan alun mandapek tampek, tarutamo dari daerah Guguak, Salayo, 6 suku, hinggo Tanah Garam kini. Rombongan nanko datang basamo jo rombongan nan sabalunnyo mambuek pancang banamo Panta di muko. Baitu takumpua, dimulailah mambaco adaik mangarang undang. Diindang ditampi bareh dipiliah atah ciek-ciek, digantuang ka tiang tujuah. Apokoh nan digantuangan ka tiang tujuah, itulah pusako nan sabingkah tanah, adaik salingka nagari, nagari banamo Batubanyak.  Sawah dibari baranji, ladang dibari babintalak, banda dibari babuatan. Mako, tasabuik lah Batunyak kotonyo laweh, babukik tigo balurah tigo. Baula lidih mambalik koto, bapasukuan tabagi tigo.

Adopun bukik nan tigo, iolah Bukik Gadang, Bukik Juyiang, sarato Bukik Sangkak Ayam. Sadangkan lurah nan tigo, nan partamo Lurah Kariang talatak di kaki gunuang Talang. Nan kaduo, Lurah Dalam iolah aliran sungai Badak, mulai dari bawah Batu Bajanjang hinggo Kurai. Nan katigo, Lurah Alim, talatak di sakitaran Rawang Abu. Baula lidih mambalik koto, wujuiknyo batali banda, tali banda tabagi limo. Nan partamo Banda Dama, nan kaduo Banda Tabiang, nan katigo Banda Baru, nan kaampek Banda Manggih, nan kalimo Banda Gadang.

Tantangan suku kok disabuik, Partamo, suku Malayu, kaduo, suku Chaniago, katigo, suku Tanjuang. Adopun suku Malayu, paruiknyo tabagi ampek, partamo Malayu Tangah, kaduo Malayu pintu Rayo, katigo Malayu Korong Gadang, kaampek Malayu Tapi Aia. Tantangan suku Chaniago, parauiknyopun tabagi ampek, partamo Caniago Korong Laweh, kaduo Caniago Sungai Dareh, katigo Caniago Taruak Marunggai, kaampek Caniago Sipanjang. Tantangan suku Tanjuang kok disabuik, paruiknyo tabagi duo, partamo Tanjuang Sikumbang, kaduo Tanjuang Payobada. Tiok suku baampek jinih, Panghulu bakato “kato basifaik”, bak lareh Koto Piliang. Rumah Gadang indak baanjuang, bak lareh Bodi Caniago. Jadi, tantangan alua adaik kok disabuik, Koto Piliang inyo indak, Bodi Caniago inyo tido.

Di baliak pambalakangan itu, panyabaran masyarakaik Batubanyak awanyo indaklah sarupo nan kini ko. Dulunyo, tampek badiam tapusek di 6 (anam) buah tampek. Nan partamo, Jirek Nan Tungga kabasaran Datuak Nan Dipatuan. Nan kaduo, Jirek Nan Gadang kabasaran Datuak Bagindo Bungsu jo Datuak Bagindo nan Sati. Nan katigo, Jirek Nan Bajanjang batu, Kubang Nan Batungkek Mandah, Balai Nan Baparik Rantang, kabasaran Datuak Rajo Nan Sati, Datuak Rajo Koto Panjang, Sarato Datuak Rajo Nan Gadang. Nan kaampek, Kampuang Baru kabasaran Datuak Rajo Panghulu. Nan kalimo, Koto Kaciak kabasaran Datuak Rajo Bandaro. Nan kaanam, Batu Talua kabasaran Datuak Rajo Indobumi.

Baitulah labiah kurang kaba tantangan asa-usua nagari Batubanyak. Mungkin ado nan sarupo jo nan nan Sanak danga, mungkin pulo babeda di mano-mano. Sungguahpun baitu, karano sajarah ko sifaiknyo kaba, banyak fersi itu biaso (historiografi). Usah dibandiang jo sajarah modern, karano sajarah modern tu sifaiknyo history, babeda jo historiografi. Akhianyo, jo salam, sambah ambo patikan. Assalamu alaikum wa arahmatullahi wa barakatuh.     

Sumber: Basri Malin Bunsu (Alm), Kaba Kubuang Tigo Baleh.