(3) Takakok Kapalo Jambo

Indak lamo sasudah masaknyo juadah “Nak Babini II”, Amirpun pulang ka kampuang guno malangsuangkan nikah-kawinnyo. Hasia rundiangan jo Niniak Mamak sarato Urang Sumando, dipiliahlah alek “kulansiang matohari”. Sabaik, sagalo pihak nan ado; Niniak Mamak, Sumando, Kakak-Kakak, bahkan Kamanakan bapacu-pacu nak mauluakan tangan mambantu alek.  Maklum, Amir kan Si Bungsu, tantu dilapeh lasuang katujuahnyo. Babeda bana jo bayangan Amir nan samulo hanyo baniaik basadakah mancacah darah ayam, sarato badoa maundang “Urang-Urang Siak”.

Magarik baru sajo salasai manutuik “Larak-Lereng” sabanta ko. Amir nanpak duduak marokok batigo konconyo Udin sarato Iben nan sangajo pulang kampuang hanyo untuak mancaliak Amir jadi Maropulai. Amir jo Udin manganakkan pakaian Maropulai, Iben manganakkan pakaian Dubalang. Dari situ dapek dikatahui baraso lah bak punyo baliau batigo sajo alek ko kini. Amir Maropulai, Udin kawan pandampiang Maropulai, Iben tukang irik tungkek atau kapalo alek dalam “larak-lereang” cako. Kini, katigonyo duduak sambia manunggu Siak nan mulai badatangan.

Di kampuang katigo pandeka ko, jinih aleknyo adolah alek larak lerang, yoitu jinih aleknyo urang Luhak Tanah Data. Pado larak lereang, Maropulai jo Anak Daro diarak kaliliang kampuang untuak maagiah tahu masyarakaik baraso kaduo pasang nan diarak ko, alah manjadi laki-bini. Alek larak-lereang ko ditutuik di rumah Maropulai jo alek manjamu Siak, batagak gala mudo, sarato mamulangan Maropulai. Alek panutupan ko lah kini nan ditunggu katigonyo sambia baselo sarato marokok-rokok.

Mancaliak isi rumah nan lah mulai panuah. Tukang pidato pihak Si Pangka mulai mambukak balabeh. Mulai dari manyampaikan mukasuik mangumpuakan Siak hinggo ka niaik nan ka diwujuikkan pado malam nan samalam ko. Sasudah salasai sambah-manyambah, jambopun mulai ditatiang dek si Rajo Janang barikuik tukang-tukangnyo. Kutiko itu, Mato Amir langsuang tabalalak mancaliak nanpan ketek jo juadah sarupo main alek-alekan nan dihidangan tukang janang di mukonyo. Sangaik babeda jo nan lain nan dihidang duo sajambo.

Mancaliak iko, Amir langsuang babisiak ka Udin nan duduak di subalah suoknyo.

“Bato Din. Kok haniang se Ang Wakden dibuek sarupo iko?”

“Mukasuik Ang?” baleh Udin saketek mamuta kapalonyo.

“Awak lah jariah balarak kaliliang kampuang. Kok jo tadah main alek-alek ko dihidangan?”

“E yayai, itu nan kapalo jambo namonyo Mir” sambuik Udin sarupo urang manggarutu.

Mandanga jawek sambia manggarutu ko, Amir langsuang mahiruik angok dalam-dalam. Angannyo langsuang tabang manuju alek Si Codoik di Bukik dulu. Di sinan kapalo jambonyo barupo samba Ikan jo Ayam panggang sikua gadang. Tapi, di siko, di kampuangnyo surang, kapalo jambonyo malah takah makanan anak-anak nan sadang main alek-alekan sajo. Karano manggamang dalam pikiran, Amirpun baliak manggutiak Udin.

“Ndak sasek Ang Din? Satau Wakden, kapalo jambo tu gadang, takah nan di Bukik dulu tu ha”

“Itu tu kapalo jambo urang kalarasan Koto Piliang tu mah. Urang kalarasan Bodhi Caniago takah awak ko ndak sarupo itu do”

“Ho oh…”

Hanyo itu nan ka lua dari muluik Amir di salo kapalonyo nan maangguak-angguak mandangaan pamaparan Udin sabanta ko. Paratiannyo mulai tatuju ka tukang janang nan lah salasai mahidangkan jambo ka tangah-tangah urang banyak. Udin nan mancaliak jo suduik matonyo, dalam diam nanpak mauruik dado. Bibianyo nanpak manggarik surang sarupo urang nan sadang mambaco kulimah Alhamdulillah. Sanang bana Udin nanpaknyo lapeh dari tanyo-tanyo Amir di muko.

Tarago Udin maraso lapeh dari tanyo Amir, si Maropulai lasak. Tukang pidato Si Pangka nanpak mulai mampasilahkan alek makan malalui tukang pidato Ujuang. Tukang pidato Ujuang tadanga babaso mamintak Si Pangka nan mamulai. Ibaraik urang manabang kayu, tabeh lah dari pangka, nak kami sisik dari siko, kecek tukang pidato Ujuang babaso basi. Ujuang keceknyo langsuang disambuik Si Pangka jo “Bismillah” sarato mancabuakan tangan ka tadah aia basuah di muko masiang-masiang.

Mancaliak urang mulai makan, Amirpun babaliak manggutiak Udin.

“Din, lai buliah Den gatok bada tu gak ciek?” keceknyo sambia mangode jo suduik mato mancaliak ka arah goreang bada dalam tadah kapalo jambo.

Mandanga iko, Udin langsuang mamiciak paho Amir.

“Lai talok ka sawah dek Ang bisuak pagi?” tanyo Udin maacuahan tanyo Amir di muko.

Udin nan binguang karano dipiciak manjawek apo adonyo.

“Manga Ang piciak Den?”

Bukannyo manjawek, malah piciak ka paho yang dipakareh dek si Udin.

“Lai talok dek Ang bisuak pagi ka sawah?” lanjuik Udin maulang tanyo sambia manggatokkan garamannyo.

Dek indak kuaik lai manahan sakik, Amirpun akhianyo manuruik sajo.

“Indak” jawek Amir tadanga taujuang.

Mandanga iko, piciak Udin langsuang lapeh. Amir nan indak tahan langsuang manggusuak-gusuak pahonyo sakadar manawa raso sakik. Dalam hati Amir batanyo surang, “apo salah Den?”. Namun, sabalun tanyo tu ka lua, Udin nanpak mandakekan muluik, lalu babisiak.

“Ciek dari babarapo arati kapalo jambo tu iolah pokok galeh. Kok lah Ang kakok pokok galeh urang, tantu musti Ang sadiokan pulo pambayianyo. Lai mangarati Ang?” tanyo Udin manutuik uraiannyo.

Amir hanyo diam sambia maangguak-angguak. Agaknyo, lai tamakan kaji dari Udin sabanta ko dek inyo. Sakutiko, tabayang dek inyo tanyo Udin di muko, “lai talok ka sawah bisuak pagi?”. Mangingaik tanyo ko, Amir jadi galak-galak ketek. “Iyo ndak talok do, Din. Alun abih panek-panek nan sahari samalam ko lai do, bisuak pagi lah ka langsuang pulo ka sawah bagaluik jo Acek, yo ndak talok do, hehehe” gumam Amir dalam hati nan gali-gali sanang mambayangan galuik-galuik barikuiknyo.

Mancaliak tingkah Amir nan galak-galak ketek surang, Udin jadi tatagun. Lai ndak tasapo ko lah paja ko?, pikia Udin sakutiko. Namun, mangingaik acara makan lah salasai, juru basopun lah mangatangahkan siriah ka tukang pidato ujuang patando acara batagak gala sugiro dimulai. Udin mambuang jauah-jauah pikiran nantun. Sambia mamiriangan badan agak malakok ka arah Amir, Udin mulai babisiak.

“Busuangan dado Ang tu saketek. Gala Ang ka ditagakan lai mah”

Amir mamandang sabanta, lalu sugiro malakukan suruahan Udin. Sayuik-sayuik, tadangan tukang pidato Si Pangka manyampaikan pidato batagak gala mudo.

“Anak itiak anak angso, dibari batali aka. Kok ketek dibari namo, lah gadang dibari gala. Tantangan anak kaminakan Kami, di ketek banamo Amir Bin Amaik, lah gadang tantu Kami bari gala. Galanyo “Rajo di Langik”. Mintak dibaokan ka labuah nan golong, ka pasa nan rami”, baitu pituah tukang pidato Si Pangka malelokan gala mudo Amir.

Pidato Si Pangka ko langsuang disambuik tukang pidato ujuang jo kato-kato nan sarupo sarato manggatok siriah-pinang patando pasatujuan. Lalu, ditutuik jo pidato pasambahan baadu balam, yoitu pidato kabek-mangabek manjalang pulang.

Samintaro tukang pidato nan sadang “maadu balam” lah mulai maarahan “balam” ka sangkaknyo, patando mamintak ijin pulang, Udin nan dari tadi sungguah-sungguah manyimak, nanpak baraliah manggutiak Amir.

“Baa Rajo di langik?”

“Apo?”

“Ang tangguang tiket Garuda untuak bulan madu Den bisuak mah, hehehe”.

“Amai Ang, Wakden se lun tantu ka bulan madu lai. Waang pulo nan ka Den duluan” baleh Amir sambia mamamonyongan muncuang ka arah Siak nan mulai tagak maurak selo.

Kaduonyo langsuang tagak sambia mamasang rono muko nan paliang manih kapado saluruh Siak nan bajalan bairingan maju manyalami kaduonyo. Pas manyalami Amir, tiok nan maju mauluakan tangan sambia mamanggiakan gala.

“Salamaik Rajo Di langik! hahaha”