SILEK, CARO HIDUIK URANG MINANGKABAU

A.   KATO DAHULU

Partamo, bajalanlah bakuliliang kutiko pagi ataupun sanjo! Tujulah tampek-tampek nan punyo halaman nan lapang sarupo; sakola, instansi pamarintah, GOR, sarato tampek-tampek lainnyo! Barangkali, Dunsanak akan manamukan babarapo kalompok urang Minang jo saragam langkok sapatagak sadang baolah raga malatiah tubuah. Ado kalompok babaju merah babis kuniang nan sadang latihan Silek “Tapak Suci”, ado nan basaragam putiah sadang latihan “Taekwondo”, “Karate”, “Kapuera”, dan lain sabagainyo. Kasadonyo nanpak gagah langkok jo paralatan nan gagah-gagah pulo.

Kaduo, pado lain wakatu, bajalan-jalanlah Dunsanak ka babarapo sasaran tradisional Minangkabau! Dunsanak akan manamukan anak-anak jo anak mudo nan baraja Silek jo saragam ala kadarnyo, jo paralatan ala kadarnyo, bahkan jo tampek latihan ala kadarnyo pulo. Kaduonyo samo-samo kagiatan nan ancak Sanak, untuak mamanuhi kabutuahan jasmani jo rohani. Namun, kaduonyo punyo nasib nan babeda. Nan partamo hiduik dan punyo sumangaik hiduik, nan kaduo hiduik-hiduik mati. Sumangaik hiduik kareh, tapi syaraik panunjang ala kadarnyo.

Apo masalahnyo? Masalahnyo talatak pado nilai raso. Nilai raso nan mambuek urang lupo jo raso-raso. Nilai raso ko biasonyo bakabilaik ka nan namonyo modern. Akibaiknyo, urang nan “salah kicok” ko, suko bamato ka balakang, manaikkan pareso dari pado raso. Jikok disabuik tantangan “Surau”, inyo mandaceh mambaco sagalo tantangan “Mosquto” atau “Langgar”. Padohal, baraja di surau se sakali balun. Jikok diangkek tantangan “Saluang”, inyo mandehem sambia mambaco “Sexofon”. Padahal pernah se maambuih Saluang indak. Kok dilelokan pulo tantangan “Silek Minang”, inyo mamacik kaniang mambaco tantangan Taichi, Wingchun, sarato aliran-aliran kungfu Cino lainnyo.

Pado akhianyo, apresiasi sabagai bagian dari ajaran pokok dalam adaik “raso dibao naiak pareso dibao turun” sarato hakikaik dari budaya “homo humanus” mulai takikih dari “ateh”. Ambo sabuik takikih dari ateh, karano gujalo pangikisan ko bamulo dari kalangan nan lai, indak dari kalangan nan indak. Mulai dari kalangan cadiak, manjala ka kalangan di bawahnyo. Minang sarupo kahilangan cadiak pandai, takikih dek cadiak buruak. Dek karano itu, ambo mancubo bagulambek mambaco sagalo nan dapek tantangan Silek Minangkabau. Kok ado langkah nan sumbang, pinto ambo usah dicacek, apolai dicubo. Sabaik, aluran badan diri ambo, cadiak bukan pandekapun tido. Hanyo saluang ketek pahambuih baro, harok nak mangudaro juo baun Minangkabau ko.   

 

B.   POKOK KAJI

1.   HAKIKAIK SILEK

“Lahianyo malatiah badan, batinnyo mancari Tuhan”. Pituah ko biaso maluncua dari tokoh-tokoh Silek Minangkabau kutiko manyampaikan tantangan hakikaik Silek. Manuruik ilimu asa-usua kato, kato Silek ko tamasuak kato nan rumik untuak ditalusuri. Karano, kito indak punyo referensi nan jaleh tantangan asa jo arati kato Silek ko. Namun, dari babarapo tokoh Silek takamuko di Batu Sangka, Silek ko dikatokan barasa dari kato liyaik nan barati kuaik. Lalu, Mak Katik, surang tokoh adaik Minangkabau nan labiah tanamo sabagai Tuo Randai pernah juo mangatokan kapado Ambo baraso Silek ko barasa dari kato “shalat”.

Karano indak bisa ditalusuri manuruik ilimu asa-usua kato atau ilimu bahaso modern. Ambo manangkok baraso asa jo arati kato Silek nan bakambang di ateh sabananyo marupokan referensi nan paliang tapek untuak manjalehan tantangan arati Silek itu sandiri. Makonyo, itu nan ka lua dari tokoh-tokoh di ateh. Aratinyo, hakikaik Silek tu samo jo hakikaik dari kato kuaik jo kato shalat. Kato kuaik hakikaiknyo adolah punyo kamampuan untuak manjago diri, urang lain, sarato lingkungan. Sadangkan hakikaik shalat adolah untuak manjago diri dari tingkah laku nan kaji sarato mungka.

Dari uraian di ateh, garih nan bisa dihelo iyolah baraso hakikaik Silek tu samo jo manjago. Manjago diri, manjago urang lain, manjago lingkuangan, manjago agamo, manjago adaik, sarato lain-lainnyo. Aratinyo, surang Pandeka Silek musti bisa mambarikan raso aman, nyaman, bagi urang sarato sagalo nan ado di sakitar inyo. Caronyo jo taruih malatiah tubuah, pikiran, batin supayo kuaik hinggo bisa mawujuikkan hakikaik nantun. Singkeknyo, Silek indak hanyo tantangan tinju, sipak, gelek, tapi juo tantangan kato-kato, tantangan suduik pandang, sarato tantangan sikap mental.

 Hakikaik Silek nan sarupo iko sangaik sasuai jikok dihubuangkan jo pituah pambukak di ateh (…., batinnyo mancari Tuhan). Apo lai, nyatonyo, sasian tampek urang baraja Silek umumnyo bakambang di sakitaran surau. Lalu, dalam hiduik sahari-hari, kato Silek indak hanyo manjadi camin taruih dari kako Pandeka nan balatiah bela diri (balatiah Silek). Tapi, juo camin taruih dari kako Tukang Pidato nan balatiah pidato pasambahan, Tukang Kaba  nan balatiah salawek dulang, badikia, bagurau (baSilek kato). Tamasuak juo di dalamnyo, kako Tuo-Tuo nan sadang diam khusuak di ateh sajadah (Silek batin).

 

2.   JINIH JO MUARO FILOSOFI SILEK

Jikok urang lua Minangkabau mandanga tantangan Silek. Mako, referensinyo langsuang tatuju ka olah rago bela diri. Namun, kutiko Silek disabuik di Minangkabau, referensinyo ado duo, yoitu; a) Silek tubuah, b) Silek batin. Sarupo jo kalompok pangkaji olah raga mambaco tantangan olah raga, ado oleh raga fisik, ado olah raga non fisik. Lalu, khusus untuak Silek tubuah, lahia duo jinih baru, yoitu Silek tubuah jo Silek lidah. Katigo jinih Silek ko, filosofinyo bamuaro pado filosofi “Adaik Nan Ampek”. Untuak labiah jalehnyo, barikuik kito urai ciek-ciek.  

a.    Silek Tubuah

Silek tubuah ko samo jo olah raga dalam pandangan masyarakaik umum. Silek tubuah Minangkabau ko punyo banyak aliran. Manuruik Mak Katik, satidaknyo ado 12 aliran silek di Minangkabau. Di antaronyo, ado Silek Tuo, Silek Kumango, Silek Pangian, Silek Lintau, Silek Sacabiak Kain Kafan, Silek Pauah, sarato aliran-aliran lainnyo. Tiok aliran punyo ciri masiang-masiang nan nanpak dari garak/jurusnyo. Karano itu, dalam sabuah patunjukan nan mamainkan Silek sarupo Randai, urang nan tau tantangan Silek Minangkabau bisa langsuang tau daerah asanyo kutiko mancaliak garak Silek/jurus nan dimainkan.

Banyaknyo aliran Silek ko manunjuakan karagaman Silek Minangkabau. Namun, mangingaik adonyo kaik-mangaik dalam masalah filosofis nan dianuik sagalo aliran manunjuakan baraso karagaman ko adolah bagian pakambangan Silek tadahulu. Filosofi ko bamuaro ka filosofi “Langkah Nan Ampek”. “Langkah Nan Ampek” dalam Silek tubuah ko pado hakikaiknyo mangacu kapado sikap, garak, sarato jinih lawan nan tibo. Aratinyo, jinih lawan tu manuruik kamampuannyo ado ampek (labiah, kurang, saimbang, indak dikatahui). Untuak itu, surang pasilekpun musti siago jo “Langkah Nan Ampek”, yoitu langkah untuak manjago sagalo kamungkinan. Ikolah nan dimukasuik jo “barih manahan tilik, balabeh manahan cubo” di dalam konteks silek.

Di sampiang sabagai filosofi dasar, “Langkah Nan Ampek” ko dalam praktiknyo diwujuikkan sabagai jurus dasar, indak kudo-kudo sarupo jurus dasar beladiri pado umumnyo. Alasannyo, 1) indak ado kudo-kudo nan indak bisa dirabahkan, 2) kunci kakokohan talatak pado gelek langkah (geseran). Masalah gelek/geseran ko, dalam pituah adaik bahubuangan jo “langkah salangkah ganjua suruik, suruiknyo ka pangka jalan, pangkanyo adaik jo limbago”. Aratinyo, sasuaikan langkah nan ka diambiak jo hakikaik diri lahia-batin. Salanjuiknyo, “Langkah Nan Ampek” ko ditukuak jo dibilai sasuai jo kautamoan sarato rono masiang-masiang aliran. Ikolah nan dimukasuikkan dalam pituah Silek, “nanpak Silek nanpak adaiknyo”.

    

b.   Silek Lidah

Silek lidah ko mungkin agak tadanga aneh bagi urang lua. Namun, bagi urang Minang, Silek lidah ko adolah hal nan paliang banyak ditamukan dalam acara-acara adaik sarato cukuik kuaik pawarisannyo. Silek lidah ko bisa dicaliak dalam acara adaik sarupo pidato pasambahan, sarato dalam acara-acara hiburan takah salawek dulang, saluang hiduik-mati, bagurau, dan lainnyo. Silek lidah ko bisa dikatokan ciek dari ampek katarampilan dalam ilmu bahaso, yoitu; babicaro.

Silek lidah ko sabananyo baujuang pado duo cabang ilimu, yoitu pantun jo bidarai. Pantun Minang ko tabagi manjadi; pantun adaik, pantun Minang, jo pantun biaso. Sadangkan bidarai tabagi manjadi; bidarai kato, bidarai adaik, pantun bidarai. Pantun adaik ataupun bidarai adaik adolah jinih nan musti dihafakan. Karano, marupokan bagian dari adaik nan malakek pado pidato pasambahan adaik Minangkabau. Sarupo; dalam pasambahan pakaian adaik, rumah adaik, kadudukan Panghulu, dan lain sabagainyo.

Lalu, nilai filosofi nan takanduang pado Silek lidah ko adolah nan disabuik jo “Kato Nan Ampek”. “Kato Nan Ampek” mangarah teknik/strategi tindak tutua nan manjadi kunci dalam manjalin komunikasi nan baiak jo ampek jinih mitra tutua, yoitu; nan tuo (kato mandaki), nan ketek (kato manurun), nan samo gadang (kato mandata), urang baru/urang “lua” (kato malereang). Singkek curito, untuak bisa manjadi Pandeka dalam Silek lidah, surang Pandeka musti mahia manampekkan “Kato Nan Ampek” dalam sagalo bantuak jo situasi komunikasi.

c.    Silek Batin

Silek batin ko jikok didanga atau diliek sakileh mamuncuakan image nan sumbang. Namun, karano kito dibari duo talingo jo duo mato, aratinyo kito musti mandanga jo mancaliak sacaro utuah, indak buliah sakileh-sakileh. Sabaik, Silek batin bukanlah tantangan ilimu tinggam, gasiang tangkurak, sijundai, mantra-mantra, sarato lain-lainnyo. Silek batin tu kako malatiah pikiran, parasaan, hati guno mandapekkan katanangan jo kanyamanan. Pado akhianyo, bisa mangontrol, mamusekkan, mamanfaikkan aliran energi dalam tubuah sasuai jo kabutuhan.

Dalam tanggak baraja, Silek batin ko barado pado tanggo nan paliang ateh. Surang Pandeka, Tukang Pasambahan, Tukang Salawek, Tukang Dikia, jo lainnyo, biasonyo mandapek palajaran Silek batin sasudah mahia baSilek, bapidato, basalawek, atau badikia. Silek batin ko diwujuikkan jo istilah mangaji. Mangaji dalam hal iko adolah mamadukan materi nan lah didapek sabalunnyo jo ajaran-ajaran Islam tingkek tinggi, satingkek jo ajaran-ajaran tasawuf, atau paham makrifaik lainnyo.

Lalu, nilai filosofi nan takanduang pado Silek batin ko adolah filosofi “Makrifaik Nan Ampek”. “Makrifaik Nan Ampek” adolah tantangan panyatuan “syariat, tarikat, hakikat, makrifat” di dalam diri surang paSilek. Sajalan jo pasan utamo nan takanduang dalam filosofi “Adaik Nan Ampek”. Panyatuan ko gunonyo sabagai pangingaik baraso sagalo sasuatu tu batampek, baukua, bajangko, bakutiko. Sagalo sasuatunyo tu bahubuangan sarato bamuaro pado satu titik, yoitu Nan Kuaso Allah SWT.

Jadi, dari saluruh uraian di ateh, dapek dipahami baraso Silek indaklah tantangan bagak-bagakan, gagah-gagahan, apo lai tantangan mistik. Silek adolah kako nan dilelokan untuak manjago diri supayo manjadi kuaik. Kuaik sahinggo bisa manjago diri dari hal-hal nan bisa marugikan diri sandiri (badan, pikiran, hati), urang lain, sarato lingkungan. Makonyo, di dalam adaik Minangkabau, Tukang sagalo jinih Silek di ateh, disabuik sabagai “Parik Paga”. Tugehnyo dibunyikan jo pituah “rusuah agamo kok ka rusak, adaik limbago kok ka binaso, parik rantang kok ka taereang”.

C.   KATO KUDIAN

Barangkek dari uraian di ateh, dapek dibuhua sentak babarapo buah tali pasan. Mudah-mudahan, tali pasan tasabuik bisa diuleh pado maso salanjuiknyo. Tali nantun adolah:

1.   Filosofi Silek sacaro umum bamuaro pado filosofi “Adaik Nan Ampek”.

2.   Jinih Silek ado tigo, yoitu; Silek tubuah, Silek lidah, Silek batin.

3.   Filosofi Silek tubuah bamuaro pado filosofi “Langkah Ampek”.

4.   Filosofi Silek lidah bamuaro pado filosofi “Kato Nan Ampek”.

5.   Filosofi Silek batin bamuaro pado filosofi “Makrifaik Nan Ampek”.