Dari Adaik Balimbago hinggo Tubuah nan Banyawo (Camin Awa Pambalajaran Adaik Minangkabau)

A.   Kato Dahulu

“Everyman dies, not everyman really lives”

Pituah di ateh barasa dari sabuah dialog dalam filem “Braveheart”. Filem ko bacarito tantangan pajuangan surang pahlawan Skotlandia, William Wallace malawan panjajahan fisik jo non fisik dari karajaan Inggris. Sabalun dihukum, William Wallace ko diagiah duo piliahan, nan partamo lapeh basyaraik sarato diagiah kadudukan, harato, jo kakuasaan, kaduo dirajam sampai mati. Dalam hal iko, William mamiliah piliahan nan kaduo. Dari dalam kubua, suaro pasan akan labiah mudah diingaik, baitu kato Tan Malaka. 
 

Ado ciek pasan mandalam nan nio disampaikan William Wallace, baraso hiduik indaknyo manusia indak diukua dari kabaradoan fisiknyo. Namun, pandangan hiduik, prinsip, karakterlah nan manantuan hiduik surang manusia. Ukuran jo bantuak tubuah, harato, jabatan, kakuasaan indaklah nan utamo. Kautamoan hiduik manusia talatak pado pandangan hiduik, sarato sikapnyo dalam mampajuangan pandangan hiduik nantun. Kutiko sikap manusia barubah dalam konteks pandangan hiduik ko, kutiko itulah sasungguahnyo inyo alah mati. Baitu suduik pandang William Wallace sahinggo mambuaiknyo hiduik abadi dalam hati masyarakaik Skotlandia hinggo musuahnyo sakalipun.

Di dalam teori ilmu budaya, pandangan manusia ko dikatokan dibantuak dek tigo pakaro. Pakaro nan partamo agamo, pakaro nan kaduo adaik, pakaro nan katigo, ranuangan. Pado tulisan nan kini ko, kajian kito pusekkan ka pakaro nan kaduo, yoitunyo pakaro adaik dalam mambantuak manusia panganuiknyo.

B.   Pokok Kaji

1.   Hakikaik Adaik jo Limbago

Dari dulu hinggo kini, di surau ataupun di sasaran, kutiko falsafah adaik diajakan, tasabuiklah duo pakaro sebagai langkah pambukak balabeh falsafah.  Yaitu; nan partamo kato adaik, kaduo kato limbago. Kato adaik disabuik nyawo (marwah), kato limbago disabuik tubuah. Baitu pituah nan tarupo, kini tasabuik-sabuik juo. Jikok diinok dikanang-kanang, dipahamkan dalam tanang, dakek ruponyo adaik nantun.

Jikok adaik adalah nyawo, limbago adolah tubuah, tantu adaik limbago adolah caminan dari manusia itu sandiri.  Kaki, tangan, mato, talingo, muluik adolah bagian dari limbago.  Samantaro raso, aka-pikiran, hati nurani adolah bagian dari adaik.  Aratinyo, sacaro individu, adaik adolah dorongan jo panyariang dari dalam nan manantukan baiak-buruaknyo corak jo laku limbago.  Sadangkan limbago adolah fisik nan malewakan atau mambudayakan adaik nantun.

Sajalan jo materi adaik ala surau di ateh, di dalam ilmu budaya, manusia nan babudaya disabuik jo "Homo Sapient" sarato “homo humanus”.  Aratinyo, manusia nan babudaya adolah manusia nan bapikia dan baparikamanusiaan. Manolah manusia nan bapikia dan baparikamanusiaan? Itulah manusia nan mangaharagoi nilai-nilai kamanusiaan, indak barajo jo badan diri, indak bataratak bakoto asiang, indak mandeen bakato surang.  Nan malakukan, rancak dek awak katuju dek urang.

Manga dek baitu? Karano, tapikia dek inyo baraso condong mato tantu ka nan rancak, tunggang salero tantu ka nan lamak. Kutiko condong mato dipacaliakkan, tunggang salero dipaturuikkan, alamaik limbago lah nan bakuaso, adaik tapasuang di dalamnyo. Itulah manusia nan ndak baradaik. Karano cuma mamikiakan diri surang, lupo baraso urang lain pun co itu. Punyo kacandaruangan nan samo, punyo pantangan nan indak jauah beda.

Samintaro itu, manusia nan baradaik, adolah manusia nan limbagonyo dituang badalia adaik. Bapareso jo aka sehaik, baraso jo hati nurani. Tau jo hiduik pasti mati, arif jo makna arati hiduik. Malewakan kebaikan ka lingkungan, maninggakan guno sebagai pusako. Karano, sagalo manusia pasti mati, tapi saketek bana nan bana-bana hiduik.  Itulah manusia sabananyo, itulah adaik mulo asanyo.

2.   Pambalajaran sabagai Limbago Adaik

Koentjaraningrat () mangatokan baraso budaya tadiri dari tigo lapih, yoitu; sistem nilai, sistem sosial, sistem karya. Jikok kajian tantangan hakikaik adaik di ateh kito sandiangkan jo pandangan Koentjaraningrat ko, dapek diambiak susunan limbago adaik barikuik:

a.    Sistem nilai samo kadudukannyo jo adaik.

b.   Sistem sosial samo kadudukannyo jo limbago adaik nan wujuiknyo barupo undang-undang, aturan, sarato lain-lainyo.

c.    Sistem karya samo kadudukannyo jo limbago adaik nan wujuiknyo barupo bangunan, alaik-alaik, sarato bantuak fisik lainnyo.

Kaik-mangaik tantangan poin-poin di ateh dapek diibarikkan jo analogi urang malakekan baju. Dek malu, urang bapikia tantangan apo nan ka dipabueknyo untuak manutuik. Ikolah nilai filosofis baju (a), disabuik jo nilai adaik. Sasudah tu, dibueklah aturan baju manuruik babagai suduik pandang, sarupo manuruik jinih kalamin, umua, hubuangan pamakai jo masyarakaik, sarato lainnyo. Ikolah nan dikatokan jo sistem sosialnyo baju (b), disabuik jo limbago sistem. Akhianyo, jadilah baju jo bantuak nan baragam (c) sabagai produk dari nilai adaik jo sistem limbago. Ikolah nan dikatokan jo sistem karya/produk, disabuik jo limbago fisik.

Jikok kajian tantangan adaik limbago ko nio kito kambangkan dalam bantuak kagiatan aja-maaja, tantunyo kito musti manilik tantangan alua aja-maaja nantun. Jikok kito bapadoman pado alua pambalajaran “mudah-susah” jo “dakek-jauah”, mako susunan di ateh mustinyo di baliak, dari angko c-b-a sasuai jo tingkek mudah-susah mamahaminyo. Singkek curito, sabuah pambalajaran adaik saancaknyo disusun sarupo barikuik:

a.    Limbago Fisik untuak Tingkek Pamulo

Kapado pamulo, tarutamo anak-anak, ajaanlah talabiah dulu tantangan nan sifaiknyo objektif nan bisa dicaliak sahinggo nan baraja mudah manguasai materi nantun. Materinyo bisa barupo bantuak-bantuak rumah gadang, pakaian, silek, pantun, sarato materi lainnyo. Bungkuih pambalajarannyo jo caro-caro nan manyanangkan, manantang sarupo bamain, banyanyi, balomba malukih, sarato caro-caro manyanangkan lainnyo.

b.   Limbago Sistem untuak Tingkek Manangah

Sasudah materi dikatahui pado tingkek pamulo. Barulah kaji ditingkekkan ka aturan-aturan nan malakek pado materi nantun. Misanyo, tantangan asa-usua/sajarah, sistem kakarabatan, sistem pakawinan, aturan mamakai pakaian adaik, sarato lain-lainnyo. Karano, pado tingkek iko, anak alah punyo dasar dan mulai batanyo-tanyo tantangan materi nan pado tingkek dasar inyo dapek.

c.    Nilai Adaik untuak Tingkek Ateh

Sasudah kaduo poin tadahulu tapanuahi, barulah kapado nan baraja dibarikan materi nilai adaik. Mulai dari nilai nan takanduang dalam pakaian, nilai nan takanduang dalam aturan anjuang rumah, nilai nan takanduang dalam pantun jo bidarai adaik, sarato nilai-nilai nan disiraik-suruakkan dalam limbago fisik maupun limbago sistem.

       

C.   Kato Kudian

Jikok nio mambantuak tanah (georafis) sarato udaro (adaik) Minangkabau, tantunyo talabiah dulu mamabantuak urang nan “batubuah” sarato “banyawo” Minangkabau. Caro nan paliang dakek tantunyo malalui pandidikan nan baalua jo bapatuik sahinggo punyo kamungkinan nan labiah baiak untuak mancapai tujuan nantun. Ukuran alua-patuik ko bisa disandikan ka susunan materi di ateh. Namun, alun akan mambarikan kamungkinan nan baiak jikok indak disandikan kapado batang nan tageh. Dalam hal iko, itulah urang nan profesional dalam bidang pandidikan itu sandiri sarato mamahami tantangan Minangkabau.