(18) Babab Jaek Ko

Amir jo Udin nanpak santai mangalai-ngalai sambia mamparatian 2 pandeka Amir nan sadang bamain Power Rangers. Nan gadang bahiduang pesek banamo Bobi, umua 3 tahun. Nan ketek barambuik karitiang banamo Aneh, umua 2 tahun. Kaduonyo nanpak sibuk manonton sambia manyusun boneka-boneka Power Rangersnyo.

“Mir, yo sabana gagah pandeka ang yo?”

“Iyo gagah. Sayang dek pesek jo karitiang se nyo” sasa Amir jo rono muko agak kaheran-heranan.

“Manga pulo heran ang? Wakden se indak do. Makonyo, den kecekan Pandeka waang” baleh Udin bakieh mangingaikan Udin.

“Mukasuik ang?”

“Pesek jo karitiang tu kan turunan dari waang tu, hahaha”

“Ha? Iyo pulo yo, hahaha”

Kaduonyo langsuang galak bakuaik-kuai co konco lamo nan sadang banostalgila. 

“uwaaaauwaaaaa….”

Tibo-tibo, galak kaduonyo taranti mandanga suaro anak manangih. Di muko meja TV, si Aneh nanpak taduduak manangih sambia manggusuak-gusuak kaniang. Paja ko mungkin talantuang ka meja TV kutiko barusaho manjangkau-jangkau layar manolong Power Rangers nan sadang bacakak.

Mancaliak iko, Amir jo Udin langsuang mandakek.

“Ondeh Nak, apo nan sakik?” tanyonyo sambia manggusuak-gusuak kapalo paja ko.

“Uwaaaauwaaaa…”

Bukannyo jawek nan didapek, malah tangih nan manjadi. Samintaro itu, Udin nanpak mangguncang-guncang giriang-giriang barusaho maaliahan paratian Yohanes ko. Namun, ijankan ka baranti manangih, mancaliak sajo indak paja kaciak anyia ko. Indak kahilangan aka, Amir langsuang malanjuikkan tanyo.

“Sia jaek, Nak?” tanyo Amir jo suaro babuek-buek maumbuak sabisanyo. Sakutiko, paja ko langsuang manunjuakan tangannyo ka arah meja TV.

“Iko?” lanjuik Amir sambia mamacik meja tu nan langsuang disambuik Aneh jo angguak panjang baurai aia mato. Sakutiko…

“Plak...meja jaek. Ang pangaan anak bujang den? Awas, den babab ang, plak..” Amir manapuak meja lalu mangecek sambia mamonyong-monyongan bibia sarupo urang mamberangan urang jaek.

Mancaliak iko, si kaciak Aneh langsuang galak takekeh-kekeh. Pueh bana hatinyo mancaliak belanyo dicabuikan si Bapak. Udin nan mamparatian jadi takananang, indak manyangko saketek juo. Tanyato, santiang juo si Amir pesek ko maumbuak anak-anak.

Kaduonyo baliak duduak ka tampek samulo. Hanyo sajo, kini jo Aneh di pangkua Amir. Baru sajo ikua kaduonyo tacacah di ateh kurisi, tadanga pulo bunyi karah jatuah. Baitu dicaliak, tanyato si suluang Bobi nan kini baulah. Robot-robot Power Rangers nanpak baserak badarai-darai di ateh lantai dipijak-pijakannyo maniru adegan nan kini nanpak di layar TV.

Mancaliak iko, sabalun Amir mangecek, Udin langsuang bukak suaro mandului.

“Eeeiiiii, Bi! Ndak buliah bitu do, tu jaek awak namonyo mah. Samo pulo jo panjaek di TV tu” umbuak Udin sambia manunjuak ka arah TV.

Mandanga iko, Bobi mancaliak sakileh ka arah Udin jo Amir, sakileh ka arah TV, lalu duduak mangamehan Power Rangers nan indak lai bakapalo sarupo urang nan mangarati bana jo pituah Udin sabanta ko.

“Hahaha, santiang pulo ang yo, Din” sonsong Amir galak sambia manurunan si Aneh dari pangkuannyo. Udin hanyo galak ketek sambia mamparatian Aneh nan nanpak malangkah tatatah-tatah ka arah Abang Bobinyo tadi. Lalu, puta kapalo maalihan pandangannyo ka arah Amir, manyambuik pujian nan masih angek-angek kuku ko.

“Kalau si Mirna balanjo, kan wakden pulo nan mangasuah si Ambun di rumah mah. Ciek lai, mungkin dek bagawua jo ang juo mah Mir. Tabao santiang den deknyo, hahaha” baleh Udin nan langsuang disambuik Amir jo galak manyarengeh.

Kaduanyo lalu galak-galak ketek sambia manyalai rokok masiang-masiang. Namun, baru sajo rokok tahisok, lah tadanga pulo rengek ciek lai. Kini ko, dari muluik si suluang Bobi nan tadi nanpak gagah barani manangani Power Rangers.

Saliang mancaliak sabanta, kaduonyo langsuang mamatian rokok, lalu mandakek mancari tahu apo nan tajadi. Amir mamacikan Bobi nan manangih, Udin mamacikan Aneh nan mancaliak tingkah abangnyo ko dalam diam.

“Manga Nak?” tanyo Amir sambia malap aia mato pandeka suluangnyo ko.

“Dedek” Jawek paja ko diiriangi jo tangih nan maibo-ibo.

Mandanga iko, Amir jo Udin langsuang tagalenjek mancaliak si kaciak. Udin nan mamangku langsuang batanyo.

“Bapangaan Abang Neh?” tanyo Udin lambek-lambek.

“Tadi tecek om Din, abang jaek. Dedek babab…” jawek Bobi jo caliak mato bacahayo sarupo urang nan baru sajo salasai malalukan tugeh nan mulia.

“Plak…”

Sarantak, Udin jo Amir langsuang manapuak kaniang mandanga curito sarato rono indak badoso Aneh ko. Dalam hati kaduonyo bakato, kadang, urang tuo mudah sajo mancari kambiang hitam dalam manyalasaikan masalah anak-anak. Dikiro maajaan nan baiak, tanyato malah sabaliaknyo.