Congkaknyo Hiduang si Andah (Main Congkak)

“Aduah…hesssss….”

Pakiak bairiang jo bunyi mandasia panjang kalua baitu sajo dari muluik Andah. Kaduo tangannyo langsuang bagarak manutuik hiduang jo sabagian muko  nan tibo-tibo sajo mamerah. Samintaro itu, tapek di muko kaduo tangan nantun, nanpak tangan kida konconyo, Si Adang sadang manggantuang. Indak sumbarang manggantuang, tapi manggantuang jo posisi siap manjantiak.

“Eits, tangan jan sato-sato. Ciek baru, masih tingga duo lai!” hariak Adang baparingaik.

“Iyo Ndah. Kok ndak, jan main” sambuang Inggi nan duduak di sabalah Adang sato maningkahi.

Maraso tasuduik, Andah tapaso mambukak kaduo tangannyo. Puncak hiduangnyo nanpak barubah warna manjadi merah kahitam-hitaman. Samintaro itu, dari matonyo nanpak aia mangganang co talago diriak paneh patang. Manggumpa walau indak sampai jatuah.

Kiro-kiro sajam nan lalu, katigo urang konco palangkin ko sapakaik nak marintang hari manjapuik patang jo bamain congkak di halaman surau. Congkak ko tabuaik dari papan nan bantuaknyo sagi panjang runciang sarupo bangun kapa. Di kaduo ujuang nan marunciang, masiang-masiang ado sabuah lubang sagadang tinju. Lubang ko disabuik jo lubang induak. Samintaro itu, di sapanjang kaduo sisi leba, masiang-masiang ado 7 buah lubang sajajar, nan ukurannyo labiah ketek dari lubang induak. Lubang ko disabuik jo lubang anak atau lubang baka. Lubang-lubang ko lah nan nantik diisi jo kuciang-kuciang atau batu kareke sabalun mulai bamain.

Main congkak ko samo jo lago jantan. Karano itu, pamainnyo ado duo urang, ciek lawan ciek. Sabalun bamain, kaduonyo musti duduak bahadapan sarato maisi 7 lubang anak di muko masiang-masiang, ciek lubang 7 batu. Itulah baka untuak kaduo pamain. Prinsip mainnyo mudah sajo, yoitu mangumpuakan batu sabanyak-banyaknyo ka lubang induak subalah kida. Indak buliah maisi lubang induak lawan atau lubang induak sabalah suok. Jikok batu abih di lubang anak nan kosong indak babatu, artinyo indak buliah malanjuikkan main sabalun lawan tasuo masalah nan samo.

Caro mainnyo, kaduo pamain sarantak maambiak saluruh batu salah satu lubang bakanyo, lalu bajalan kakida maisi tiok lubang nan dilalui jo sabuah batu, takacuali lubang induak lawan. Di lubang nan ma batu abih, mako isi lubang tu dikawuik untuak baka malanjuikkan jalan, takacuali di lubang induak jo lubang kosong. Jikok abih di lubang induak, pemain malanjuikkan jalan jo mamiliah manggunokan salah satu dari 7 lubang bakanyo sarupo awa mulo main. Namun, jikok abih di lubang kosong, pamain dianggap mati dan indak buliah malanjuikkan main sabalun lawan mangalami masalah nan samo. Jikok mati di lubang baka surang, mako, batu nan ado di dalam lubang baka lawan nan sajajaran jadi hak milik, dan dimasuakkan kasadonyo ka lubang induak. Mati nan sarupo iko ko disabuik jo istilah manembak.        

Ado duo jinih main congkak. Nan partamo main lubang 7, nan kaduo, main masak padi. Nan baru sajo dimainkan dek Adang, Inggi, jo Andah di muko adolah jinih lubang 7. Samulo, karano awak ado batigo, katigonyo sapakaik manjalanan aturan sia kalah jadi wasit pananagak aturan. Namun, dek ulah angek-maangek, ambok-maambok, aturan ko jadi barubah. Nan kalah, sabalun jadi wasit, kanai hukum 2 kali jantiak hiduang. Aturan ko lah kini nan sadang dijalankan katigonyo.

“Baa Ndah? Masih ado ciek lai ha…” suaro Inggi, si wasit panagak aturan tadanga baparingaik.

Mandanga ko, Andah langsuang maangkek kapalo mangumpuakan sagalo katabahan. Lalu, mancaliak lakek-lakek ka arah Adang nan nanpak mangapa-ngapakan jarinyo bak tukang asek Ulando sangkek nanbai. Sakutiko, matonyopun baleh mancaliak sambia mangato.

“Alah Ndah?”

“Alah” jawek Andah kareh manantang.

Mandanga iko, si Adang langsuang manggarik-garikan jarinyo siap untuak manjantiak tapek di muko hiduang Adang. Jari ampu jo tangah manakuak, jari lain nanpak managang satagang rono muko Andah mananti hukuman. Sambia malengah saketek mangijok Inggi nan duduak di sampiang, jari Adang langsuang bakarajo.

“plekkk…aduaahhhh….”

Bunyi jantiak bairiang jo pakiak Andah baliak tadanga. Kaduo tangannyo langsuang manutuik muko sarato manggamak-gamak hiduang nan samakin mamerah. Bahkan, hiduang tu kini nanpak mangaluakan aia jalang dari lubangnyo. Samintaro itu, matonyo nanpak mamiciang bausaho manahan aia mato nak jan sampai kalua pulo. Malu lah, baa pulo modenyo pandeka manangih kanai jantiak, pikia Andah mandutoi diri sambia manangkuik manahan sakik nan manggigik-gigik.

Mancaliak Andah nan manangkuik sibuk manggamak-gamak hiduang, Adang jo Inggi nanpak saliang batuka caliak. Kaduonyo sarantak tagak lambek-lambek. Lalu, sambia manutuik muluik bausaho manahan galak, kaduonyo mancilukuih ijok dalam haniang. Namun, baru 10 meter malangkah…

“Hoi cimporong, ka ma ang? Wakden kalah ang pai. Ndak ado carito” tadanga hariak Andah dari balakang mambuek kaduonyo sarantak puta kapalo.

Mancaliak Andah tagak jo muko mamerah, kaduonyo langsuang balari sakancang-kancangnyo.

“Plakkkk…” congkak jo kareke di dalamnyo tacampak baserak dilajang kaki Andah. Sakutiko, laman surau ko barubah jadi galanggang kaja-kajaran jo kuai katigonyo putuih basambuang.