Surau AIA Manangkabau

Surau AIA ko bukanlah namo surau sabananyo. AIA barasa dari huruf awa tigo urang anak kalene tangguang, yoitu Adang, Inggi, jo Andah. Katigo kalene ko adolah guru bantu sabuah surau nan talatak di kampuang di pandakian manuju kaki gunuang Talang. Guru gadang surau ko biaso dipanggia masyarakaik jo Angku Malin. Samanjak Angku Malin pai ka kota Padang mancaliak cucunyo nan baru lahia, tugeh-tugeh baliau disalasaikan dek tigo guru bantu ko.

Katigonyo babagi tugeh sasuai jo pasan Angku Malin sarato kalabiahan masiang-masiang. Adang nan punyo suaro gadang biasonyo batugeh sabagai Pakiah, tukang abang satiok wakatu ka surau, yoitu Subuah, Magarik jo Isya. Andah nan basuaro randah tapi taduah batugeh sabagai Kari, yoitu tukang mangaji. Sadangkan Inggi nan balimu tinggi dipicayo sabagai Katik, yoitu tukang surah sakalian tukang curito untuak mahibur kalene-kalene nan baraja di surau tu.

Malam ko adolah malam minggu. Malam di mano biasonyo sasudah sumbahyang Isya bajamaah murik surau bakumpua mandanga curito dari Tuanku. Untuak kini ko, karano Tuanku indak ado, lidahnyo disambuang dek Katik Inggi. Kutiko itu, Andah jo Adang biasonyo batugeh maatur duduak adiak-adiak sapaguruannyo, bia nak jan bacampua sajo laki-laki jo padusi. Sabaik, kok lah mulai acara curito, adiak-adiak sapaguruan ko biasonyo langsuang baduru mamiliah duduak paliang di muko.

Karano itu, Andah biasonyo duduak di muko saf padusi  sarupo surang Imam. Sadangkan Adang duduak di balakang saf anak laki-laki nan disuruah baputa duduak hinggo bahadok-hadokan jo anak-anak padusi. Kaduonyo batugeh sabagai bateh untuak mambari ruang tukang curito nan duduak di tangah-tangah.

Inggi nan lah duduak di tangah-tangah nanpak mamuta kapalo bakuliliang.

“Adiak-adiak, malam ko curito kito tantangan asa-usua namo Minangkabau. Ado nan tahu asa namo Minangkabau?” sapo Inggi mambukak curito jo tanyo panciangan sarayo mamuta kapalo mamparatian kok ado nan maangkek tangan maajuan diri untuak manjawek. Namun, karano ndak kunjuang ado nan mawujuik, Inggipun malanjuikan curitonyo.

“Jaman saisuak. Bundo rajo kito Bundo Kanduang didatangi dek tamu jauah dari karajaan Majopahik. Tamu ko datang mambaok kabau nan indak samo jo kabau-kabau kito di ranah Minang” papa Inggi mamulai curito sabalun haniang sabanta untuak maambiak angok.

Namun, sabalun Inggi malanjuikkan, tibo-tibo ado surang kalene nan maangkek tangan.

“Babeda baa mukasuiknyo Nggi?” tanyonyo manyalo curito Inggi.

Mandanga tanyo ko, Inggi langsuang madok ka arah Andah sambia galak manih.

“Kok tantangan kabau tu, iyo ka Andah ancaknyo kito tanyo nak rang. Andah kan anak toke kabau ko hehehe”

Galak Inggi ko langsuang disambuik dek kalene-kalene ko jo galak nan sarupo.

“hehehe”

Samintaro itu, Andah nan takajuik ditembak tagak, hanyo bisa galak ketek. Sasudah ruangan babaliak haniang, Andahpun langsuang manyambuang.

“Bedanyo, kabau dari Majopahik ko badannyo gadang-gadang. Kiro-kiro, duo kali lipeklah dari gadang kabau awak” urai Andah nan disambuik angguak jo paduan suaro “ohhh” patando maklum dari saluruh kalene nan ado.

Salanjuiknyo, salah surang kalene nan duduak paliang mukopun bukak suaro.

“Untuak apo kabau-kabau gadang tu Nggi?” tanyonyo apo adonyo.

Sakutiko, paratianpun babaliak tapusek ka arah Inggi.

“Jadi, tamu dari Jawa ko maajak rajo kito batandiang adu kabau. Makonyo, nyo bao kabau nan gadang-gadang”

“Kok mode tu, lah ka jaleh se kalah kabau urang awak mah” sada salah surang kalene nan duduak di saf balakang.

Mandanga ko, Adang nan dari tadi diam sato maningkahi.

“Iyo juo tu mah. Tapi, nak jaleh, eloklah kito tanyo bana kalanjutannyo ka Inggi” sambuik Adang manyambuang sakalian mamanciang raso panasaran nan lain.

“Bana tu Ndah. Jadi, baa salanjuiknyo Nggi?” baleh surang kalene lai.

Maraso mandapek dukuangan dari Adang jo Andah. Inggipun jadi makin basumangaik bacurito.

“Mancaliak kabau lawan nan gadang-gadang. Rajo kito bukannyo mancarian lawan nan samo gadang. Tapi, malah maadunyo jo anak kabau”

“Ha? barangin Bundokanduang mah” tibo-tibo sajo ado suaro manyorong nan langsuang mambuek isi ruangan bagalau jo suaro-suaro nan indak jaleh.

 “Eits….jan salah yo. Anak kabau tu nan manang di akhia curito mah. Makonyo, ado namo Minangkabau, aratinyo manang kabau” potong Inggi capek maminteh suaro-suaro bagalau sabanta ko.

Sakutiko, saisi ruangan babaliak tanang takah samulo. Paratian nan lainpun baliak mamusek ka arah Inggi.

“Maso iyo Nggi? Baa pulo curitonyo kok sampai manang?” tanyo Adang sangajo maarahan curito Inggi.

“Iyo Nggi, baa kok bisa manang?” sambuang kalene nan tadi manecekan Bundokanduang barangin.

Mandanga iko, Inggipun mampaeloki selonyo sabalun manjawek raso panasaran adiak-adiak tingkeknyo ko.

“Jadi, maajuan anak kabau ko bukanlah sumbarangan sajo. Tapi, siasaik nan sangajo disusun dek Datuak Suri Dirajo. Dek Datuak Suri Dirajo, babarapo hari sabalun hari adu kabau dimulai, anak kabau nan sadang manyusu ko dipisahkan dari induaknyo. Lalu, kutiko batandiang dipasangan tanduak palasu di kapalonyo” urai Inggi panjang leba, tapi indak kunjuang ditangkok mukasuiknyo dek kalene-kalene bakuliliang.

Manyadari iko, Andah nan turuik manyimak langsuang maningkahi.

“Tu caro manangnyo baa Nggi?” tanyo Andah nan langsuang disambuik jo suaro-suaro “iyo” patando satuju dari kalene banyak nan ado.

“Hahaha, iyo yo” baleh Inggi sambia galak ketek manyadari kacarobohannyo. Lalu, sugiro malanjuikkan ujuang curitonyo nan tadi kurang batarimo.

“Namonyo anak kabau nan lah babarapo hari indak manyusu, tantu kalaparan. Jadi, kutiko mancaliak kabau gadang, langsuang disaruduaknyo sarupo anak manyusu ka induaknyo. Sakutiko, tanduak palasu di kapalonyo bakarajo manabuak-nabuak paruik hinggo kabau gadang tu lari malanguah-languah katakutan. Samintaro itu, si anak kabau nan kalaparan taruih mamburunyo sampai kabau gadang tu rabah indak badayo” urai Inggi manutuik pamaparannyo.

Sagalo kalene-kalene adiak tingkek Inggi langsuang maangguak-angguak patando mangarati. Namun, sabalun bubar, Inggi batanyo kapado salah surang kalene nan dari awa inyo paratian sambia bacurito sangaik khusuak manyimak.

“Jadi, apo pokok kaji kito malam ko Diak?” tanyo Inggi sambia manunjuak kalene nan nyo tuju.

“Namo Minangkabau barasa dari namo manang kabau Nggi” jawek kalene ko capek.

“Ado nan lain?” tanyo Inggi balanjuik.

Karano indak ado nan maangkek tangan, apolai manjawek. Adangpun bukak suaro mambuek paratian saluruh kalene adiak tingkeknyo tapanciang.

“Ado Nggi”

“Apo Dang?”

“Indak buliah takabua, apolai manilai urang dari bantuaknyo. Kalau indak, bisa-bisa malu surang, bahkan cilako takah kabau gadang tadi” jawek Adang mambuek saluruh nan ado, tamasuak Inggi jo Andah jadi tadiam sarupo urang baru mandapek kasanangan nan indak takatokan.