Pidato Rumah Gadang

Tantangan rumah nan Gadang, rumah gadang si tinjau lauik, banamo sambilan ruang. Salanja kudo balari, sakuaik kualang tabang, sapakiak bundo ma imbau. Sapuluah jo padapuran, sabaleh jo anjuang tinggi, tukang nan sangaik biopari. Warih nyo tukang siak ole, pandai manarah manilantang, manyangko dibulan kalam, marapek sambia balari. Putuih nan indak buang kayu, rumah sudah tukang dibunuah, tak buliah ditiru lai. Nan tingga jadi pandapatan, sampai kini bapakai juo, tak ado kayu nan tabuang. Saheto ka camin-camin, nan taba ka ampang singka, nan bungkuak ka tali bajak. Sajangka ka pasak baliang baliang, satampok ka papan tuai, sajari ka mato sikek. Panarahan ka unggun unggun, pangataman ka untuak pupuak.

Takalo rumah ka dibuek, aluran diri urang tukang, lalu bakameh hanyo lai. Dicukuikan alaik jo pakakeh, dicari hari nan baiak, dihituang kutiko elok. Dicaliak kutiko limo, galah salapan mangatoan, lalu dimulai bakarajo. Dimulai bacacak paek, satokok pahek babunyi, sudah pahatan kasadonyo. Duo-tigo katam ditulak, lah data rasuak jo jariau. Manggaratiah bunyi panokok, tando lah sudah atok lakek. Mangko lah tagak rumah nan gadang, tujuah tonggak nyo sajajaran. ( 1 ) Tonggak tuo Rajo Batuah, bagala Suri Dirajo. Tonggak pangapik tonggak tu, di bari banamo kasadonyo. ( 2 ) Di suok Katumangguangan, ( 3 ) di kida Parpatiah Nan Sabatang. ( 4 ) Tonggak panjang Rajo Ibadaik, barisi kato hakikaik. ( 5 ) Tonggak tangah banamo Rajo Adaik, mamacik bungka jo taraju. ( 6 ) Tonggak tapi sabalah suok, banamo Bandaro Kayo. ( 7 ) Tonggak tapi sabalah kida, banamo Maharajo Basa. Ampek tonggak mangunci suduik, banamo basa ampek balai, nak tagok bapasak kungkuang. Itulah sipaik Tuan Gadang, Tuan Gadang di Batipuah, Harimau Campo Koto Pili. Tiok tonggak basandi batu, basandi bakeh nan ado, sandi banamo alua adaik. Atok ijuak dindiang baukia, baukia bamego mego. Pucuak paku galuang-galuangan, aka cino jangkau-jangkauan, di bawah itiak pulang patang. Bairiang jo bada mudiak, pucuak rabuang mangunci suduik, adang bacampua ramo ramo. Saik wajik ndak buliah tingga, kuliriak di muko pintu. Tonggak janjang baukia pulo, baukia jo matohari, di tangah bungo kiambang. Cacak pahek ukia di bawah, banamo tonggak gantuangan, gantuangan paham nan jahek. Gonjongnyo rabuang mambacuik, banamo rabuang sahari, mambacuik paham tiok hari. Usah ka usak rintiah tido, timah mamutiah di ateh nyo. Antiang-antiang perak baukia, sarupo bintang bakilatan, tarali gadiang balariak. Bubuangan burak ka tabang, paninjau dagang lalu linteh , pancaliak musuah kok tibo. Panjagoi lawan kok datang, baiak ka lawuik jo ka darek. Nak tampak parik nan tahampa, nak jaleh paga nan lah lapuak. Tuturan labah mangirok, mandidik anak kamanakan, bakutiko mangko mangecek. Sayang nan indak kabalain, jauah jo dakek samo sajo. Kasaunyo hubuangan lidah, pauleh suri nan tagantuang, lidah naraco dek Pangulu. Parannyo gamba Ula Ngiang, sipaiknyo putuih bauleh, banamo sambutan kato, bapikia mangko barundiang. Laenyo suko mananti, mananti atok nan ka tibo, elok lalu buruak kok singgah. Panyuko jo tamu datang, pangasiah jo dagang lalu. Atoknyo Payuang Sakaki, susunan Niniak jo Mamak. Pananti bandiang kok tibo, panahan sudi jo siasek.

Tingkok banamo ka sandaran, ka sandaran Urang Sumando, nak lapeh pandang kalua. Nan tingga kok ka dijapuik, nan indak ka diadoan, nan kurang patuik ditukuak. Dindiangnyo pamaga alam, sandaran Niniak jo Mamak, panutuik malu dalam kaum. Pamaga diri kalinduangan, di batin alam batang tubuah, jan tumbuah cacek binaso. Pintu gadangnyo kato barulang, sipaiknyo Manti di nagari, panyampaian titah dek Pangulu. Pambao pasan anak nagari, turun di tango dari ateh, naiak dari janjang nan partamo. Pintu ketek dalia kiasan, rumah bapintu duo lampih. Pintu lua badindiang hari, pintu dalam bacamin taruih, banamo Bulan Kasiangan. Banduanyo buayo lalok, bakeh malangkah patang-pagi. Gadiang-gadiang manahan ulak, pandai manahan angek-dingin. Rasuaknyo bajawek salam, antaro Sumando-manyumando, Ipa-Bisan jo Mamak Rumah. Walaupun Mamak jo Kamanakan, mikipun Ayah jo Bundokanduang. Antaro Koroang jo Kampuang, sampai ka Koto jo Nagari. Palanca pandai mambilang, mambilang sajak dari aso. Marasok sapanjang tangan, mahawai sahabih sauang, pandai baretoang sampai sudah. Lantainyo hamparan duduak, tampek baretoang patang-pagi, bakeh basurah Niniak Mamak.

Bakandang pautan bantiang, ka tampek itiak jo ayam. Janjang bakelok di halaman, batu tapakan bakeh basitumpu, banamo paninjau jarak. Nak jan talampau maningadah, lupo di bumi ka dipijak. Halaman carano bancah, kasiaknyo lumuik ditintiang. Qamar-qamar namo rumpuiknyo, Walilam namo kasiaknyo, Balinggam namo tanahnyo. Cubadak buayan baruak, kamuniang pautan kudo, lansano batangguah dahan. Di suduik balasuang batu, balasuang batu balariak, limau manih sandaran alu. Alu kamuniang joloang sudah, ayam mamupua joloang turun, gadih manumbuak joloang gadang. Halaman bapaga hiduik, tujuah jinih lampih pagaran, basalo jo Linjuang Siriah. Bapaga Pudiang Aia Ameh, Pudiang Geni barumpun-rumpun, pudiang hitam babatang-batang. Raso ka tinggi rang pangkasi, raso ka randah rang anjuangan, bungo bungo tapi halaman. Bungo susun di ateh pintu, panyusun Luhak Nan Tigo, panyonsoang Rajo Alek datang.

Sumber: Busra Dahrizal Katik Jo Mangkuto (Mak Katik)