Nan Gadang di Rumah Gadang

Sabalun malalukan kato tantangan rumah gadang, agaknyo paralu rasonyo manduduakan rumah apo nan kito mukasuikkan. Apokoh rumah gadang nan dimukasuik sabagai lambang kabasaran adaik Minangkabau (Adaik Sabatang Panjang), rumah gadang sabagai lambang kabasaran Luhak jo sistem adaik/kalarasan nan dianuik (Adaik Sapanjang Jalan), atau rumah gadang sabagai lambang kabasaran sabuah kaum (Adaik Salingka Nagari). Kabaradoan suduik pandang ko haruslah dipahami dek satiok urang nan nio manilik sabuah rumah gadang.

Sabagai lambang kabasaran adaik Minangkabau, rumah gadang diwakili dek Ustano Pagaruyuang. Sabagai lambang kabasaran Luhak jo Kalarasan, rumah gadang dikalompokkan manjadi tigo (3) daerah, Tanah Data (Gajah Maharam), Limo Puluah Koto (Surambi Papek), Luhak Agam (Rajo Babandiang), langkok jo sistem adaik/kalarasan nan dianuiknyo. Tarakhir, sabagai lambang kabasaran kaum, rumah gadang akan labiah ditantukan dek “Adaik Salingka Nagari’.

    

A.   Rumah Adaik Minangkabau (Adaik Sabatang Panjang)

1.   Bantuak Bangun Rumah adaik

Rumah adaik Minangkabau, bangunannyo punyo bantuak nan tabilang unik. Kunun, bantuak ko barasa dari bantuak bangun kapa. Sacaro umum, struktur bangun rumah gadang bisa dikalompokkan manjadi tigo bagian. Partamo bagian ateh (atok), kaduo bagian tangah (badan), katigo bagian bawah (kandang).

a.    Bagian Ateh (Atok)

Manganai bantuak atok rumah adaik, ado duo suduik pandang nan mangamuko. Nan partamo mangatokan baraso atok tasabuik babantuak tanduak. Nan kaduo atok tasabuik babantuak bangun kapa. Manuruik pihak nan mangatokan bantuak atok sarupo tanduak, pandapek ko disandikan ka tambo adu kabau jo prosesi mandabiah kabau kutiko malewakan surang pimpinan adaik, yoitu Pangulu. Sadangkan manuruik pihak nan mangatokan bantuak atok ko adolah bantuak bangun kapa, manyandikan pandapeknyo kapado fungsi atok tasabuik sabagai bagian dari sabuah rumah.

Atok rumah adaik satidaknyo punyo ampek (4) fungsi utamo, partamo (1) sabagai palinduang isi rumah dari paneh jo hujan, kaduo (2) sabagai panjago suhu dalam rumah, katigo (3) sabagai panyaimbang kutiko badai, dan nan kaampek (4) sabagai fungsi sosial. Fungsi nan patamo adolah fungsi umum samo jo fungsi atok rumah biaso. Fungsi kaduo bahubuangan jo materi ijuak nan digunokan sabagai atok, di mano masyarakaik Minangkabau picayo baraso ijuak bisa manjago suhu indak talalu paneh pado siang hari dan indak talalu dingin pado malam hari.

Salanjuiknyo, fungsi katigo bahubuangan jo bantuak bangun atok itu sandiri. Tarutamo tantangan suduik kamiriangan suduik kiri-kanannyo sarato bagian ateh nan mangetek/mangarucuik. Bantuak mangarucuik/marunciang batujuan untuak mamacah angin,  struktur miriang batujuan untuak mangalirkan angin gadang nan manimpo bangunan ka bagian bawah/kandang rumah adaik. Sadangkan fungsi nan kaampek, bahubuangan jo adaik salingka nagari. Di mano, biasonyo, jumlah “gonjoang”, bagian ujuang runciang atok bahubungan jo jumlah suku nan ado di dalam sabuah nagari. Duo (2) sukunyo 2 pulo gonjoangnyo suok-kida, 3 sukunyo 4 gonjoangnyo, 4 sukunyo 6 gonjoangnyo.

Di sampiang atok nan mamanjang dari suok ka kida di ateh, rumah gadang punyo pulo duo buah atok nan madok ka muko. Nan partamo, atok nan malakek sarupo mambalah atok nan mamanjang dari suok ka kida. Panjangnyo indak malabihi dari leba atok suok-kida, bahkan kurang dari itu. Atok ko sabananyo adolah atok sabuah ruangan ketek nan disabuik jo “Bubuangan”, yoitu sabuah ruangan untuak mancaliak kaadaan bakuliliang, tarutamo manyangkuik kaadaan nan mambahayokan. Sadangkan nan kaduo adolah, atok janjang jo surambi (jikok ado surambi).

b.   Bagian Tangah (Badan)

Bagian tangah rumah adaik babantuak pasagi panjang. Namun, panjang garih bagian ateh indak samo jo bagian bawah. Karano itu, bantuaknyo sarupo badan kapa. Kamiriangan suduik badan ko sajalan jo kamiriangan suduik atok di ateh. Fungsinyo untuak mangalirkan angin nan manimpo ka bawah kandang. Khusus rumah adaik tradisional, bagian dindiang di suok-kida biasonyo tabuek dari anyaman batuang.

Bagian dindiang rumah adaik ko biasonyo sangaik manarik paratian urang nan mancaliak. Sabaik, bagian dindiang ko banyak dihieh jo ukiran-ukiran khas Minangkabau. Tamasuak jo dindiang tingkok (jendela), pintu utamo, bahkan surambi. Ukiran sacaro umum, punyo tigo fungsi; nan partamo fungsi kaindahan, kaduo fungsi social, sarato nan katigo adolah fungsi adaik (budaya).

Fungsi kaindahan talatak pado seni sarato teknik ukiran. Fungsi social talatak pado sistem social nan takanduang dalam makna satiok ukiran. Sadangkan fungsi adaik talatak pado makna sarato hakikaik dari ukiran rumah adaik nan marupokan bagian dari wujuik pituah adaik “raso dibaok naiak, pareso dibaok turun”. Aratinyo, utamokanlah kasan baiak daripado sangko-sangko kapado urang nan datang/mancaliak.

Kamudian, pado bagian badan ko, tasabuik pulo ruang sarato tonggak. Ruang ko jumlahnyo sambilan (9) nan bahubungan juo ajaran tasawuf baraso bagian dari tubuah tadiri dari 4 unsur dari ayah, 4 dari ibu, 1 dari Tuhan. Sadangkan tonggak tadiri dari 7 buah di lua 4 tonggak tapi. Katujuahnyo dibari namo, Maharajo Basa, Datuak Katumanggungan, Datuak Parpatiah Nan Sabatang, Datuak Suri Dirajo, Rajo Adaik, Rajo Ibadaik, Datuak Bandaro kayo. Ruang jo tonggak ko lah nan dikatokan sabagai wujuik dari ajaran “Adaik Basandi Syarak Syarak Basandi Kitabullah”.       

c.    Bagian Bawah (Kandang)

Bagian bawah rumah adaik disabuik juo jo istilah kandang. Karano, bagian bawah ko biasonyo digunokan sabagai tampek untuk mangabekan hewan taranak sarupo jawi, kabau, ayam, itiak di malam hari. Sandangkan pado siang hari, taranak tasabuik digubalokan dek anak-anak di daerah pasawahan. Khusus untuk ayam, dibiakan lapeh di pakarangan rumah. Karano itu, kandang ko indak didindiang samo sakali layaknyo badan rumah. Kalaupun ado, hanyo dibari jarajak/ anyaman batuang/kayu nan disusun jaran-jarang.

Bantuak dindiang kandang di ateh bahubuangan juo jo fungsinyo untuak mangalirkan angin nan manimpo sarato mangalir turun dari bagian miriang atok jo badan rumah sarupo nan alah diurai sabalunnyo. Di sampiang itu, tiang-tiang nan ado di bagian kandang ko, di aleh jo batu picak khusus nan banamo batu minyak. Hal iko punyo duo tujuan utamo, yoitu untuak manjago supayo tiang indak mudah lapuak, kaduo supayo tiang ko bisa bageser kutiko ado guncangan sarupo gampo bumi, sarato mangurangi efek buruak gampo taradok bangunan.

2.   Komponen Rumah adaik

Pado sub kajian di ateh alah dipapa bagian umum dari bangunan rumah adaik. Pado sub kajian nan kini ko, akan diurai bagian-bagian nan sifaiknyo khusus (detail).

a.    Bagian Ateh (Atok)

          1)   Gonjong

Gonjong adolah bagian ujuang dari kapalo atok di suok-kida nan bantuaknyo mangarucuik. Ujuang gonjong ko dibaluik jo timah sarato dihiasi jo antiang-antiang bawarna putiah perak nan mangkilek. Di dalam pidato adaik, gonjong ko digambarkan sabagai barikuik;

“gonjongnyo rabuang mambacuik, banamo rabuang sahari, mambacuik paham tiok hari, usah ka usak rintiah tido”.

Pidato adaik tantangan gonjong di ateh manggunokan “rabuang mambacuik” sabagai materi pangieh gonjong. Maknanyo manunjuakan baraso rumah gadang adolah tampek mambacuiknyo pikiran-pikiran, ide-ide, gagasan-gagasan nan mambangun.  

          2)   Bubuangan

Bubuangan adolah bagian atok nan dibukak sarupo tingkok. Biasonyo bubuangan ko dibuek di tangah-tangah mambalah atok nan mamanjang dari suok ka kida. Bahkan, bubuangan ko punyo atok tasandiri dan madok ka muko. Tinggi badan atoknyo manyasuaikan jo tinggi badan atok nan mamanjang suok-kida, sadangkan panjang jo tinggi ujuang atoknyo biasonyo sakadarnyo sajo, sasuai jo kabutuhan. Bubuangan ko dalam pidato adaik dikatokan;

“bubuangan burak ka tabang, paninjau dagang lalu linteh. Pancaliak musuah kok tibo, panjagoi lawan kok datang. Baiak ka lawuik jo ka darek, nak tampak parik nan tahampa, nak jaleh paga nan lah lapuak.”

Dari pidato adaik di ateh dapek dikatahui tantangan kagunoan dari bubuangan ko. Gunonyo adolah sabagai tampek bajago-jago. Baiak untuak mancaliak nan datang dari lua nagari, ataupun mancaliak nan di dalam nagari. Sarupo mancaliak musuah kutiko bajago, ataupun mancaliak kadaan nagari kutiko tanang.

          3)   Tuturan

Tuturan adolah bagian sisi atok sabalah ka bawah, nan mangaliaan aia ka palimbahan. Di dalam pidato adaik, tuturan ko digambarkan sabagai barikuik;

“tuturan labah mangirok, mandidik anak kamanakan. Bakutiko mangko mangecek, sayang nan indak kabalain, jauah jo dakek samo sajo”.

Dari pidato adaik di ateh dikatahui baraso tuturanpun manganduang makna tatantu. Maknanyo adolah rumah gadang harus mandidik anak kamanakan jo caro nan samo dan indak mambeda-bedakan. Ibaraiknyo, jikok baragiah, agiah lah tabu nan manih ka sadonyo sarupo labah nan salalu mambarikan madu di manopun inyo barado. 

          4)   Lae

Lae adolah kayu nan lataknyo tapek dibawah ijuak atok. Fungsinyo adolah sabagai tampek malakeknyo ijuak. Di dalam pituah adaik, lae ko digambarkan sabagai barikuik;

“laenyo suko mananti, mananti atok nan ka tibo, elok lalu buruak kok singgah. Panyuko jo tamu datang, pangasiah jo dagang lalu”.

Dari pidato adaik di ateh dikatahui baraso lae manganduang makna sabagai karakter nan harus dibangun/dikamukokan di dalam rumah gadang. Karakter nantun adolah sifaik pangasiah, panyayang, manarimo urang apo adonyo. Hal iko sajalan jo pituah adaik “raso dibaok naiak, pareso dibaok turun”.

          5)   Kasau

Kasau adolah kayu nan dipasang di bawah lae. Fungsinyo adolah untuak manyangga lae bia ndak langsuang baradu jo paran nan barupo reng balok kayu. Kasau ko biasonyo punyo ukuran tatantu nan indak bisa dilabiah-labiahkan ataupun dikurang-kurangi. Di dalam pidato adaik, kasau ko digambarkan sarupo barikuik;

“kasaunyo hubuangan lidah, pauleh suri nan tagantuang, lidah naraco dek Pangulu".

Dari pidato adaik di ateh dikatahui baraso kasau manganduang makna panyasuai, panyaimbang layaknyo pimpinan karano diidentikkan jo “lidah naraco dek Pangulu”. Hal iko sajalan jo fungsi materinyo nan memang manantukan fungsi komponen lain, yoitu lae.

          6)   Paran

Paran adolah balok kayu nan bafungsi sabagai reng. Dipasangkan di bawah kasau, mambatehi kasau jo bagian badan rumah. Di dalam pidato adaik, paran ko digambarkan sabagai barikuik;

“parannyo gamba ula ngiang, sipaeknyo putuih ba uleh, banamo sambutan kato, bapikia mangko barundiang”.

Dari pidato adaik di ateh dikatahui baraso paran manganduang makna kahati-hatian. Aratinyo, rumah gadang harus mandidik pahuninyo untuak bapikia sabalun bakato, bagulambek dalam manyampaikan sasuatu. Indak buliah langsuang-langsuang, apolai mode urang takaja-kaja.

          7)   Atok

Kutiko kasaluruh komponen-komponen di ateh manyatu, jadilah atok. Di dalam pidato adaik, atok ko digambarkan sarupo barikuik;

“atoknyo payuang sakaki, susunan niniak jo mamak. Pananti bandiang kok tibo, panahan sudi jo siasek”.

Dari pidato adaik di ateh dikatahui baraso atok manganduang makna sabagai palinduang, sarupo payuang kutiko paneh jo hujan. Bahkan labiah dari itu, tamasuak palinduang sacaro batin. Karano, atok marupokan gabuangan dari babarapo komponen nan maknanyo mangacu kapado sifaik/karakter dari urang-urang nan dituokan, yoitu niniak mamak.

b.   Bagian Tangah (Badan)

1)      Dindiang

Dindiang adolah bagian dari rumah gadang nan bafungsi sabagai panutuik isi rumah dari sampiang. Ado duo jinih materi dindiang ko, partamo papan kaduo anyaman batuang. Namun, khusus anyaman batuang biasonyo hanyo digunokan untuak malapisi dindiang sabalah suok jo kida. Sadangkan bagian dindiang nan madok ka muko, biasonyo dipanuhi jo ukiran-ukiran khas Minangkabau. Di dalam pidato adaik, bagian dindiang ko digambarkan sarupo barikuik;

“dindiangnyo pamaga alam, sandaran niniak jo mamak, panutuik malu dalam kaum. Pamaga diri kalinduangan, di batin alam batang tubuah, jan tumbuah cacek binaso”.

Dari pidato adaik di ateh dikatahui baraso dindiang rumah gadang manganduang makna social jo makna adaik. Makna sosialnyo mangatokan baraso dindiang ko adolah tampek basandanyo niniak mamak. Aratinyo, bagian tampek duduak di sapanjang sisi dindiang adolah tampek duduaknyo niniak mamak. Makna adaiknyo baraso niniak mamak tu adolah urang nan ka manutuik malu dalam rumah gadang.

2)      Gadiang-Gadiang

Gadiang-gadian adolah bagian kayu babantuak balok nan bafungsi manyangga dindiang. Di dalam pidato adaik, gadiang-gadiang ko digambarkan sarupo barikuik;

“gadiang-gadiangnyo manahan ulak - pandai manahan angek dingin”.

Dari pidato adaiknyo dikatahui baraso gadiang-gadiang ko manganduang makna nan sarupo jo makna dindiang. Hanyo sajo, karano posisi jo fungsinyo, maknanyo labiah mangarah sabagai panguaik dindiang dalam malaksanakan fungsi mambarikan palinduangan. Aratinyo, gadiang-gadiang ko adolah lambang anak-kamanakan nan memang batugeh manyangga niniak mamaknyo.

3)      Tingkok

Tingkok ko bahaso Indonesianyo adolah jendela, yoitu bagian dindiang nan tabukak sabagai tampek untuak mancaliak ka lua rumah. Di dalam pidato adaik, tingkok ko digambarkan sarupo barikuik;

“tingkoknyo banamo kasandaran, kasandaran urang sumando, nak lapeh pandang kalua. Nan tingga kok ka dijapuik, nan indak ka diadoan, nan kurang patuik di tukuak, nan senteang mungkin dibilai”.

Dari pidato adaik di ateh dikatahui baraso tingkok manganduang duo makna, social jo adaik. Makna sosialnyo adolah baraso tampek duduaknyo Urang Sumando adolah madok ka arah tingkok. Makna adaiknyo, tingkok adolah tampek untuak mampalueh pandangan pahuni rumah gadang sahinggo bisa mancaliak dunia luweh. Sadar jo kakurangan diri nan mungkin salamo ko indak disadari. 

4)      Pintu Gadang

Rumah gadang punyo pintu duo lapih. Pintu lapih lua disabuik pintu gadang, pintu bagian dalam disabuik pintu ketek. Pintu gadang di dalam pidato adaik digambarkan sarupo barikuik;

“pintu gadang kato barulang, sifaiknyo Manti di nagari. Panyampaian titah dek Pangulu, pambao pasan anak nagari. Turun dari tango nan di ateh, naiak dari janjang nan partamo”.

Dari pidato adaik di ateh dikatahui baraso pintu gadang manganduang makna sabagai Manti. Manti adolah anggota urang nan 4 jinih nan tugehnyo adolah sabagai panyambuang lidah dek Pangulu sarato pambaok pasan dek anak nagari. Aratinyo, pahuni rumah gadang harus bisa manjadi pintu nan manyatukan pamimpin jo masyarakaik.

5)      Pintu Ketek

Pintu ketek adolah pintu bagian dalam rumah gadang. Di dalam pidato adaik, pintu ketek ko digambarkan sarupo barikuik;

“ketek dalia kiasan, rumah bapintu duo lapih. Pintu dalam bacamin taruih, banamo bulan kasiangan”.

Dari pidato adaik di ateh dikatahui baraso pintu ketek manganduang makna sabagai tampek untuak bahubuangan jo bagian dalam dari diri sandiri. Aratinyo, satiok diri harus mancaliak juo ka dirinyo, di sampiang mancaliak ka lua diri.

6)      Lantai

Lantai rumah gadang jinihnyo ado duo. Nan partamo lantai nan punyo anjuang, nan kaduo lantai nan data. Lantai baanjuang adolah lantai rumah gadang di bawah pangaruah kalarasan Koto Piliang. Sadangkan lantai data adolah pangaruah kalarasan Bodi Caniago. Di dalam pidato adaik, lantai ko digambarkan sarupo barikuik;

“lantainyo hamparan duduak, tampek baretoang patang pagi, bakeh basurah Niniak Mamak”.

Dari pidato di ateh dikatahui baraso makna nan takanduang pado lantai rumah gadang adolah sabagai tampek untuak bamusyawarah bagi Niniak Mamak sarato tampek untuak mandidik anak kamanakan.

7)      Ruang

Ruang adolah panamoan untuak pambagian ruangan rumah gadang sacaro manyaluruh. Dalam pidato adaik, indak ditamukan pituah nan labiah langkok tantangan ruang ko.

“rumah gadang sambilan ruang, salanja kudo balari, sakuaik kualang tabang, sapakiak Bundo maimbau”

Dari pituah di ateh dikatahui baraso ruang di rumah gadang dibagi manjadi sambilan (9). Dalam hal iko, pidato adaik di ateh hanyo manyiraikkan makna sambilan ruang sabagai luehnyo fungsi batin bukan fungsi lahia bangunan/ruang rumah gadang. Hal iko nanpak jaleh dari panggunoan kato “salanja kudo balari, sakuaik kualang tabang, sapakiak bundo maimbau”. Namun, uraian ko tantunyo indak manjawek tantangan bilangan sambilan nan barangkali manjadi pusek paratian kito nan manyimak.

Sahubuangan jo itu, babarapo tokoh adaik Minangkabau, di antaronyo; Basri Malin Bungsu (alm) jo Mak Katik mangatokan baraso “ruang sambilan” ko bahubuangan jo ajaran tasawuf manganai tubuah manusia. Manuruik ajaran tasawuf, sambilan ruang di tubuah manusia tu adolah ampek (4) zat dari Ayah, ampek (4) zat dari Ibu, ciek (1) zat dari Tuhan. Ikolah sabananyo wujuik dari falsafah “Adaik Basandi Syarak, Syarak Basandi Kitabullah” di dalam rumah gadang Minangkabau.

8)      Tonggak

Tonggak adolah tiang-tiang nan manopang rumah gadang. Tonggak ko dikalompokkan manjadi duo, yoitu tonggak utamo tujuah (7) batang, tonggak panopang suduik rumah gadang ampek (4) batang. Di dalam pidato adaik, tonggak ko digambarkan sarupo barikuik;

“tonggak tuo rajo batuah - bagala suri dirajo - tonggak pangapik tonggak tuo – di bari banamo kasadonyo - ( 2 ) di suok katumangguangan - ( 3 ) di kida parpatiah nan sabatang - ( 4 ) tonggak panjang rajo ibadaek - barisi kato hakikaek - ( 5 ) tonggak tangah banamo rajo adaek - mamacik bungka jo taraju - ( 6 ) tonggak tapi sabalah suok - banamo bandaro kayo - ( 7 ) tonggak tapi sabalah kida - banamo maharajo basa - ampek tonggak mangunci suduik - banamo basa ampek balai”.

Dari pidato adaik di ateh dikatahui baraso makna nan takanduang pado tonggak adolah sabagai pamuncak hukum adaik Minangkabau. Dalam hal iko, ado 7 tokoh utamo nan dibantu dek 4 tokoh panguaik dalam manjalankan hukum adaik Minangkabau. Tokoh-tokoh tasabuik tadiri dari pihak Pagaruyuang, pihak adaik, jo pihak agamo. Barangkali, ikolah wujuik tungku nan tigo sajarangan di dalam rumah gadang. 

9)      Bandua

Sacaro lahia, bandua sabananyo barupo kayu nan mamanjang dari pangka ka ujuang. Lataknyo sapanjang sisi tampek batamunyo lantai jo dindiang kamar/dindiang nan madok ka arah tingkok. Sadangkan sacaro batin, bandua ko dijadikan sabagai namo untuak barih tampek duduak di ateh rumah nan mamanjang dari pangka ka ujuang, sarupo; bandua tapi jo bandua tangah. Di dalam pidato adaik, bandua ko digambarkan sarupo barikuik;

“banduanyo buayo lalok - bakeh malangkah patang pagi”.

Dari pidato adaik di ateh dikatahui baraso bandua ko indak punyo makna nan khusus. Bandua hanyolah komponen biaso nan indak punyo kadudukan khusus dalam rumah gadang. Makna nan dikanduangnyo hanyolah makna kaindahan samato.

10)   Palanca/Jariau

Palanca adolah kayu balok nan mambujua manuruik panjang rumah. Lataknyo di bawah lantai. Fungsinyo adolah sabagai panopang lantai. Di dalam pidato adaik, palanca ko digambarkan sarupo barikuik;

“palanca pandai mambilang, mambilang sajak dari asa. Marasok sapanjang tangan, mahawai sahabih sauang, pandai baretoang sampai sudah”

Dari pidato adaik di ateh tasiraik baraso palanca manganduang makna sabagai sagalo nan tahampa di rumah gadang. Aratinyo, saluruh pihak nan takaik jo rumah gadang handaknyo jan bagantuang ka rumah gudang, tapi harus bisa manupang untuak kakohan rumah gadang sarato sagalo kahidupan nan ado di dalamnyo.

11)   Rasuak

Rasuak adolah kayu nan malintang manuruik leba rumah. Rasuak ko talatak di bawah sabagai panyangga palanca. Di dalam pidato adaik, palanca ko digambarkan sarupo barikuik;

“rasuaknyo bajawek salam, antaro sumando manyumando, ipa bisan jo mamak rumah, walaupun mamak jo kamanakan, mikipun ayah jo bundo, antaro koroang jo kampuang, sampai ka koto jo nagari”.

Manuruik pidato adaik di ateh disiraikkan baraso makna rasuak ko adolah samacam jambatan silaturrahim antaro pihak-pihak nan takaik jo rumah gadang. Tarutamo pihak nan statusnyo “basubarangan”. Sabaik dari sagi tampek duduakpun, Niniak Mamak  salaku pihak rumah memang duduaknyo basubarangan jo Urang Sumando ataupun jo Anak Kamanakan mudo. Niniak Mamak duduak di sisi muko manyanda ka dinding tingkok, Sumando duduak di sisi balawanan madok ka Niniak Mamak, Urang Mudo (Anak Kamanakan) duduak di antaro kaduonyo, madok ka arah Niniak Mamak.

c.    Bagian Bawah jo Halaman

          1)   Janjang

Janjang di dalam bahaso Indonesia disabuik jo tangga, yoitu jambatan kayu tampek untuak lalu masuak-ka lua rumah. Di dalam pidato adaik, janjang ko digambarkan sarupo barikuik;

“janjang bakelok di halaman, batu tapakan bakeh basitumpu, banamo paninjau jarak, nak jan talampau maningadah, lupo di bumi ka dipijak”.

Manuruik pidato adaik dikatokan baraso sasudah janjang nan paliang bawah, tadapek sabuah batu picak. Maknanyo adolah sabagai tampek badiam sajanak sabalun malangkah guno mangana dari maa asa, ka maa arah nan ka dituju. Aratinyo, satiok nan turun ataupun nan ka naik ka rumah gadang, haruslah ingaik jo asa muasanyo sarato arah nan ditujunyo. Karano, “janjang” bisa mabuek urang naiak sakaligus jatuah.

          2)   Surambi

Surambi adolah bagian dari rumah gadang nan mahubuangkan antaro ruangan utamo jo janjang. Surambi hanyo ado di babarapo rumah gadang kalarasan Koto Piliang. Makna kabaradoan Surambi ko bahubuangan jo pola komunikasi antaro pamimpin adaik (Pangulu) Koto Piliang jo masyarakaik. Pola komunikasi ko disabuik jo istilah “kato basifaik”. Aratinyo Panghulu hanyo turun sampai surambi, indak langsuang turun ka halaman manyalasaikan urusan masyarakaik. Mantilah nan langsuang turun ka tangah-tangah masyarakaik lalu baurusan jo Pangulu.

Hal iko batulak-balakang jo sistem Bodi Caniago. Kalau di Bodi Caniago, rumah indak basurambi, dan pola hubuangannyo diikaik jo “kato manyalasai”. Aratinyo, Panghulu Bodi Caniago langsuang turun ka tangah-tangah masyarakaik dalam manyalasaikan urusan masyarakaik. Sayangnyo, hinggo kini ko, balun ditamukan pidato adaik nan mamapakan tantangan surambi ko sacaro khusus.

          3)   Batu Minyak

Batu minyak adolah sajinih batu picak nan dijadikan sabagai landasan tonggak bia nak jan langsuang basantuahan jo tanah. Di dalam pidato adaik, batu minyak ko digambarkan sarupo barikuik;

“tiok tonggak basandi batu, basandi bakeh nan ado, sandi banamo alua adaik”.

Dari pidato adaik di ateh bisa dipahami makna nan takanduang pado batu minyak adolah, baraso satiok manusia tarutamo pamimpin nan diibaraikkan jo tonggak rumah harus punyo pamahaman adaik nan kuaik. Sabaik, jikok indak baitu, lapuaklah tonggak dek hawo tanah. Ujuang-ujuangnyo, rumah gadang jo isinyo nan taniayo.  

          4)   Kandang

Kandang adolah saluruh ruangan di bagian bawah rumah gadang. Kandang ko biasonyo dibiakan tabukak indak badindiang. Kalaupun diagiah dindiang, biasonyo dindiangnyo jarang-jarang sasuai kabutuhan. Di dalam pidato adaik, dindiang ko digambarkan sarupo barikuik;

”bakandang pautan bantiang, ka tampek itiak jo ayam”.

Manuruik pidato adaik di ateh dikatahui baraso kandang manganduang makna supayo bisa mamanfaikkan sagalo nan ado untuak mandatangkan manfaaik.

          5)   Halaman

Di halaman rumah gadang, tadapek babarapo barang, baiak nan banyawo ataupun nan indak. Di dalam pidato adaik, halaman ko digambarkan sarupo barikuik;

“halamannyo carano bancah, kasiaknyo lumuik ditintiang. Qamar-qamar namo rumpuiknyo, walilam namo kasiaknyo, balinggam namo tanahnyo. Cubadak buayan baruak, kamuniang pautan kuda, lansano batangguah dahan. Di suduik balasuang batu, balasuang batu balariak. Limau manih sandaran alu, alu kamuniang joloang sudah. Ayam mamupua joloang turun, gadih manumbuak joloang gadang. Halaman bapaga hiduik, tujuah jinih lampih pugaran, basalo jo linjuang sirah. Bapaga pudiang aia ameh, pudiang geni barumpun-rumpun, pudiang hitam babatang batang. Raso ka tinggi rang pangkasi, raso ka randah rang anjuangan. Bungo bungo tapi halaman, bungo susun di ateh pintu. Panyusun luhak nan tigo, panyonsoang rajo alek datang”.

Manuruik pidato adaik di ateh bisa dipahami baraso halaman punyo kadudukan tasandiri dalam rumah gadang. Dalam hal iko kadudukannyo adolah sabagai tampek “gadih manumuak jolong gadang, panyusun luhak nan tigo, panyonsoang rajo alek datang”. Aratinyo, halaman adolah tampek anak kamanakan mulo baraja tantangan hiduik, tampek batamunyo sagalo jinih masyarakaik, sarato tampek nan paliang manantukan dalam panyambutan alek. Karano itu, halaman harus manganduang nilai-nilai kaamanan, ekonomi, kabarasiahan, sarato kaindahan.

B.   Rumah Gadang Luhak jo Kalarasan (Adaik Sapanjang Jalan)

1.   Luhak Tanah Data

Rumah gadang kabasaran Luhak Tanah Data ko dibari namo “Gajah Maharam”. Namo ko bahubuangan jo bantuaknyo nan gadang dari pado rumah gadang luhak lainnyo. Sadangkan dari sagi bantuak, rumah ko samo bana jo bantuak Ustano Pagaruyuang nan memang sacaro geografis badiri di daerah Luhak Tanah Data ko.Sistem adaik/kalarasan nan takanduang di dalam rumah gadang ko adolah sistem Koto Piliang, nan barasa dari Datuak Katumanggungan.

Sistem masyarakaik adaik ko diwujuikkan pado bantuak lantainyo nan punyo anjuang (bagian lantai nan labiah tinggi dari nan lain) sarato surambi nan mambateh rumah utamo jo janjang. Lantai baanjuang jo surambi ko manunjuakkan sistem masyarakaik jo sistem adaik di dalam rumah gadang nan manunjuakkan kasakralan posisi pamimpin adaik sahinggo babeda jo masyarakaik. Hal iko bahubuangan langsuang jo sistem masyarakaik jo sistem adaik nan dikatokan jo istilah “Kato Pangulu kato Basifaik”. Aratinyo, Panghulu indak langsuang baurusan jo masyarakaik umum, sagalo urusan malalui Manti.     

2.   Luhak Limo Puluah Koto

Rumah gadang kabasaran Luhak Limo Puluah Koto banamo Surambi Papek. Sasuai namonyo, rumah gadang ko indak punyo surambi. Lantainyopun data indak baranjuang. Dari struktur bangunan ko tasiraik baraso rumah ko mandapek pangaruah dominan dari kalarasan Bodi Caniago, kabasaran Datuak parpatiah Nan Sabatang. Sistem masyarakaik jo sistem adaiknyo diistilahkan jo “Kato pangulu Kato Manyalasai”. Aratinyo, Pangulu langsuang turun manyalasaikan masalah masyarakaiknyo.

3.   Luhak Agam

Rumah gadang kabasaran Luhak Agam banamo Rajo Babandiang. Bantuak umumnyo samo jo rumah adaik Pagaruyuang, baanjuang tapi indak basurambi. Dari iko pulo dapek ditangkok sabuah pasan tasurek, yoitu rumah gadang ko adolah rumah gadang nan mandapek pangaruah dari kaduo kalaraasan nan ado. Adonyo anjuang manunjuaakan pangaruah Koto Piliang, indak adonyo surambi/barando manunjuakkan adonyo pangaruah Bodi Caniago.

 

C.   Rumah Gadang Kaum/Suku (Adaik Salingka Nagari)

Rumah gadang kaum adolah rumah gadang nan marupokan lambang kabasaran dari sabuah kaum. Namun, pado kanyataan kini ko, rumah gadang kaum ko indak lai ditamukan. Nan bakambang adolah rumah gadang “Paruik”, yoitu satuan masyarakaik di bawah suku. Karano itu, di dalam sabuah suku sajo kito akan manamukan babarapo buah rumah gadang, sasuai jo pituah adaik, “anggarih mangarek kuku, pangarek pisau sirawuik, takarek pangga tuonyo, tuonyo elok ka lantai. Nagari bari basuku, dalam suku babuah paruik, kampuang dibari ba nan tuo, rumah dibari batunganai”.

Dari sagi bantuak bangunan, biasonyo nan khas dari rumah gadang kaum/paruik ko diatur dalam kaidah “adaik salingka nagari”. Tantunyo, manyasuaikan jo konsep utamo nan diatur pado adaik “sabatang panjang”. Ciri khas dari rumah gadang kaum ko adolah:

1.   Jumlah gonjong biasonyo manunjuakkan jumlah kaum nan ado di dalam nagari takaik. Gonjong 2 manunjuakan 2 suku, gonjong 4 manunjuakan 3 suku, gonjong 6 manunjuakan 4 suku.

2.   Lantai jo surambi sasuai jo kalarasan nan dianuik.

3.   Ruangan jo tonggak disasuaikan jo kabutuhan bangunan.

Di sampiang itu, dalam palaksaan acara-acara baradaik di dalam sabuah rumah gadang. Biasonyo, tampek duduakpun di atur. Tampek duduak tasabuik adolah:

1.   Kato pintu; tampek duduak tunganai tuo/nan alah manikah

2.   Langgam pasambahan;  alim ulama, cadiak pandai

3.   Bandua tapi; sumando

4.   Bandua tangah; urang mudo, urang nan indak manatap/tamu

Pambagian tampek duduak di ateh dapek digambarkan jo gambaran barikuik:

3	4
			2
	5
3		2	1

Keterangan:

1 = pintu

2 = kato pintu

3 = langgam pasambahan

4 = bandua tapi

5 = bandua tangah

  

Sumber data: Basri Malin Bungsu/ Sari Bolai (Eks. Manti Adaik Nagari Batubanyak), Musra Dahrizal Kt. Jo Mangkuto/Mak Katik (tuo randai Sumbar)