Manilik Adaik Basandi Syarak, Syarak Basandi Kitabullah

Kecek Pak Hasan, salah surang ahli ilmu sastra Universitas Negeri Padang, salah satu panyabaik banyaknyo kontroversi tantangan maso lalu Minangkabau adolah kuaiknyo tradisi lisan. Sagalonyo di Minang ko diwarihkan sacaro lisan sahinggo susah malacak kabanarannyo. Akibaiknyo, sajarah Minangkabaupun bisa banyak sakali fersinyo. Tarutamo tantangan sajarah nan malibaikkan banyak pihak palaku sajarah.

Ciek dari babarapo sajarah Minangkabau tu adolah sajarah muncuanyo falsafah “Adaik Basandi Syarak, Syarak Basandi Kitabullah” (salanjuiknyo baco: ABS SBK). Hal-hal nan hinggo kini masih indak jaleh pado ABS SBK ko adolah tantangan; 1) gujalo, 2) sipangka-alek, 3) isi. Tantu kurang rasonyo jikok indak ado bahan panimbang untuak mambandiang katigo poin nan “galok”. Karano itu, kajian ambo tutuik jo poin kaampek (4), nan ambo bari judul jo “pokok kaji”.

1.   Gujalo

Nan dikatokan gujalo di siko adolah carito atau kajadian nan malatarbalakangi sabuah sajarah. Dalam hal iko, satidaknyo, ado tigo gujalo nan bakambang di dalam masyarakaik tantangan sajarah ABS SBK.

a.    Asamulo Panyabaran Islam

Nan partamo, tasabuik baraso ABS SBK muncua karano panyabaran Islam di Minangkabau. Dalam hal iko, dikatokan baraso Syaikh Burhanuddin Ulakan mangadokan patamuan di Bukik Maropalam jo pihak Pagaruyuang sabagai patinggi pamarintahan adaik Minangkabau untuak manyiakan Islam di Minangkabau. Pendeknyo, isi pajanjian Bukik Maropalam fersi iko adolah ijin sarato pola penyebaran Islam di Minangkabau.

b.   Puncak Patikaian Pihak Adaik jo Pihak Agamo

Nan kaduo, dikatokan baraso alah tajadi sabuah maso galok di bumi Minangkabau. Di mano, tajadi patikaian bakapanjangan antaro pihak adaik jo pihak agamo. Pihak agamo diwakili dek ulama-ulama tarutamo took-tokoh nan bagala agamo “Tuanku” nan tagabuang dalam kalompok “harimau nan salapan”. Sadangkan pihak adaik diwakili dek parangkaik adaik, tarutamo Panghulu-Panghulu. Di siko, pihak Pagaruyuang dikatokan sabagai panangah patikaian nantun.

c.    Panyatuan Visi dalam Malawan Panjajah 

Nan katigo, dikatokan baraso akibaik panjajajahan Balando, pihak agamo nan diwakili dek ulama-ulama jo pihak adaik nan didukuang dek pihak Pagaruyuang sapakaik manyudahi patikaian. Di sampiang itu, kaduonyopun sapakaik manggalang kakuatan basamo untuak mausia panjajah dari ranah Minang. Pado fersi nan katigo ko, tasabuiklah namo pahlawan nasional Indonesia nan bagala Tuanku Imam Bonjo.

2.   Sipangka-Alek

Mukasuik “sipangka-alek” pado sub judul ko mangacu kapado pihak nan malelokan sarato nan mawujuik mahadiri acara patamuan bukik Maropalam. Sipangka adolah pihak nan malelokan, alek adolah pihak nan datang/didatangkan. Namun, kaduo pihak punyo kadudukan dan kaitan nan samo karano iko tantangan Minangkabau, bukan acara ciek pihak. Pendeknyo, istilah ko indak mangurangi kadudukan pihak tantantu, tapi mampajaleh tampek tagak dalam konteks patamuan ko sajo.

Untuak gujalo atau motif panyabaran agamo sarupo nan lah dipapa pado sub bab “gujalo” (nomor 1 poin a) di ateh, jalehlah baraso patamuan dirancang dek Syaikh Burhanuddin Ulakan. Manuruik sabuah tulisan ateh namo Buya Mas’ud Abidin dinyatokan baraso Syaikh Burhanudin mamintak bantuan kawan sapaguruannyo di Aceh nan dakek jo pihak Pagaruyuang untuak batamu di Bukik Maropalam jo pihak Pagaruyuang. Isinyo adolah sosialisasi ajaran Islam nan baliau bao sarato ijin untuak mangambangkan ajaran natun di Minangkabau.

Lalu, untuak gujalo nan kaduo, yoitu “puncak patikaian antaro pihak agamo jo adaik”, banyak opini nan bakambang baraso sipangka adolah pihak Pagaruyuang ateh pamintaan pihak adaik nan mulai risau dek sipak-sintuang tokoh-tokoh “Tuanku” dalam kalompok “Harimau nan Salapan” dari pihak agamo. Sabagai catatan, kalompok “harimau nan salapan” ko manggunokan sistem yang kareh dalam mangambangkan ajaran Islam ka dalam lingkungan masyarakaik jo lingkuangan adaik sahinggo banyak mabuaik tokoh adaik nan kuatir, bahkan takuik.

Barikuiknyo, untuak gujalo nan katigo, yoitu “panyatuan visi dalam malawan panjajah”, babarapo opini mangatokan baraso nan malelokan patamuan ko adolah pahlawan nasional asa Bonjo, Tuanku Imam Bonjo. Dalam hal iko, Tuanku Imam Bonjo dipicayo sabagai tokoh nan manyatukan pihak agamo jo pihak adaik atau pihak Pagaruyuang untuak basamo-samo mausia balando dari ranah Minangkabau.   

3.   Isi

Saluruh pihak, pihak agamo jo pihak adaik pado patamuan di bukik Maropalam sapakaik baraso pokok kaji nan tacapai kuitko itu adolah falasafah “Adaik Basandi Syarak, Syarak Basandi Kitabullah” (ABS-SBK). Namun, baa aturan main ataupun barih jo balabehnyo indaklah jaleh sahinggo mamuncuakan babagai panafsiran. Panafsiran tasabuik adolah; a) kitabullah=Alquran, a) kitabullah=tamasuak kitab agamo lain.

a.    Kitabullah=Alquran

Bagi pihak-pihak nan mamahami kitabullah pado ABS SBK adolah alquran, sagalo kabiasaan adaik harus ado di dalam alquran. Untuak nan indak diatur di dalam Alquran hukumnyo bata. Aratinyo, jikok kabiasaan nantun lah manjadi adaik, mako adaik tu dipandang batantangan jo ajaran Islam. Indak buliah dituruik, bahkan harus dihilangkan dari limbago adaik Minangkabau. Pamahaman nanko disandikan pulo jo ajaran pituah “syarak mangato adaik mamakai”.

Barangkek dari pamahaman sarupo di ateh, lahialah kalompok-kalompok nan nio mahilangan babarapo tradisi Minangkabau. Tradisi-tradisi nantun, yoitu; balimau manyambuik bulan puaso, malam bainai sabalun nikah, badoa pakai kumayan, sarato lain-lainnyo. Pamikiran ko disandikan pulo kapado pituah adaik “syarak batilanjang, adaik basisampiang”.

b.   Kitabullah=Alquran+Kitab Hindu jo Budha

Bagi pihak-pihak nan mangatokan baraso kitabullah dalam ABS SBK mangacu kapado Alquran, Kitab Hindu, sarato Budha, indak sagalo kabiasoan adaik harus ado di dalam Alquran. Sabaiknyo, ado babarapo tradisi sabalun Islam nan barasa dari tradisi agamo lain tapi indak batantangan jo ajaran Islam. Bahkan, manjadi tradisi Adaik Minang nan Islami. Pihak iko mamahami pituah “syarak mangato adaik mamakai” sabagai ajaran untuak manyasuaikan adaik jo Islam, bukan mahilangan. Pandangan ko didukuang dek pidato pasambahan tantangan bukik Maropalam nan babunyi;

“disabuik maso dahulu, takana musim panambai, maso di Pariangan Padangpanjang. Bukik banamo Maropalam, di dalam luhak Tanah Data, di galanggang nan barajok, di medan nan bapaneh. Di sinan lah duduak Datuak Katumanggungan jo Datuak Parpatiah Nan Sabatang, Niniak Mamak jo Cadiak Pandai, langkok jo Basa Ampek Balai. Alim Ulama jo Tuanku, Pakiah Pukahak samo di dalam. Mancari kato nan sapakaik rundiangan saiyo, iyo di alam Minangkabau. Bulek lah buliah digolongkan, picak lah buliah dilayangkan. Jikok bulek indak basuduik, picak indak basandiang. Nan dikatokan jo adaik basandi syarak, syarak basandi kitabullah, kaidahnyo mangatokan, “al adatu la yanfashilu bis syar’i, was syar’i la yanfashilu bil ‘adati, walau ka nat munfashilan, ka nat bathilan”. Adaik indak batikai jo syarak, baitu juo sabaliaknyo. Jikok tajadi patikaian, hukumnyo bata.

Barangkek dari pandangan nan kaduo ko, lahialah kalompok-kalompok nan barusaho maangkek baliak sagalo tradisi lamo. Lalu, mangkaji nilai-nilai kamanusiaan, pandidikan, kamajuan, sarato lain-lainnyo nyo nan takanduang di dalam tradisi-tradisi Minangkabau. Pihak nan punyo pandangan sarupo iko mamami pituah “syarak batilanjang adaik basisampiang” sabagai ajaran tantang karakter baagamo, tarutamo tantangan akidah jo ibadah. Untuak masalah adaik, karano sifaiknyo muamalah, pituah nan dipakai harusnyo “raso dibao naiak pareso dibao turun”.

   

4.   Pokok kaji

a.    Palaku Sajarah

Ado tigo pandangan nan bakambang tantangan palaku sajarah lahianyo ABS SBK di Bukik Maropalam. Nan partamo (1), palakunyo adolah pihak agamo nan diwakili dek Syaikh Burhanuddin Ulakan jo pihak adaik nan diwakili Pagaruyuang. Nan kaduo (2), palakunyo adolah pihak agamo nan diwakili dek alim ulama jo harimau nan salapan, pihak adaik diwakili dek niniak mamak (tokoh adaik) jo parik paga (cadiak pandai, mudo nan bakakak). Pihak Pagaruyuang manuruik pandangan nan kaduo ko adolah pihak nan maurai kusuik sarato manjaniahi karuah sasuai jo kadudukannyo di dalam tungku nan tigo sajarangan.

Pandangan nan katigo (3), mangatokan baraso palaku sajarah patamuan bukik Maropalam adolah harimau nan salapan jo pihak Pagaruyuang. Dalam hal iko, patamuan bukik maropalam dipicayo diusuang dek Tuanku Imam Bonjo (pahlawan nasional). Tujuannyo adolah untuak manyalasaikan patikaian badunsanak antaro pihak adaik jo pihak agamo, sarato untuak marapekkan barisan malawan panjajahan Balando.

Katigo pandangan nan alah dipapa di ateh punyo kakurangan masiang-masiang. Pandangan partamo lamah dari sagi gujalo jo pandukuang. Dari sagi gujalo dakwah Islam, patamuan Syaikh burhanudin jo pihak Pagaruyuang tabilang indak lazim. Sabaik, pendekatan dakwah Syaikh Burhanuddin indak sarupo itu. Apolai, pado maso itu Islam masih baru di Minangkabau, tantu alun banyak umaik nan bisa dikamukokan, alun ado pondasi tampek tagak nan kuaik. Dari sagi pandukuang, indak banyak pihak nan tau karano info nan iko jarang mangamuko di dalam diskusi-diskusi adaik.

Pandangan nan kaduo, punyo kalamahan nan sakaligus bisa manjadi kakuatan. Kalamahan nantun talatak pado kurangnyo pandukuang karano kurangnyo pangatahuan masyarakaik tantangan harimau nan salapan. Kutiko namo harimau nan salapan disabuik, masyarakaik umum biasonyo langsuang maidentikkan jo Tuanku Imam Bonjo pahlawan nasional. Padohal, jikok dicaliak ranji Syattariah, katahuan baraso kabanyakan tokoh harimau nan salapan adolah ciek-duo generasi di ateh Tuanku Imam Bonjo pahlawan nasional nantun. Katuanyo Tuanku Nan Renceh adolah ciek generasi di ateh sakaligus guru dek Tuanku Imam Bonjo. Apolai Tuanku Haji Miskin jo Tuanku Pamansiangan, satidaknyo ado duo generasi di ateh, angkatan guru dek guru Tuanku Imam Bonjo pahlawan nasional.

Sarupo jo pandangan nan kaduo, pandangan nan katigo punyo kalabiahan jo kakurangan pado aspek harimau nan salapan. Bedanyo, kalamahan masyarakaik pandudukuang pado pandangan kaduo justru jadi kakuatan dek pandangan katigo ko. Samintaro itu, fakta dalam ranji syattariah nan jadi kakuatan pado pandangan kaduo, justru jadi kalamahan dek pandangan nan katigo ko. Aratinyo, kuaik sacaro massa, lamah sacaro data.   

b.   Isi Patamuan Bukik Maropalam

Dari uraian tantangan isi pado sub kajian tigo (3), ado duo isi nan mangamuko, yoitu isi nan bamuaro pado Kitabullah=Alquran jo isi nan bamuaro pado Kitabullah=Alquran jo Kitab Hindu Budha. Jikok dikaji silang jo palaku sub kajian sabalunnyo, gujalo (1) jo sipangka-alek (2), mako, gugualah gujalo sub kajian gujalo poin “a” jo “c”. Untuak sub kajian sipangka-alek, gugualah sipangka alek nan partamo jo nan katigo.

Gujalo poin “a,c” jo sipangka-alek nan partamo jo katigo gugua karano indak sasuai jo isi ABS SBK. Wakatu atau momentumnyo sangaiklah indak sasuai jo ABS SBK. Indak masuak aka rasonyo, ABS SBK langsuang diaminan baitu sajo dek pihak Pagaruyuang di awa pakambangan Islam di Minangkabau. Baitu juo, indak masuak aka rasonyo ABS SBK dipamolah kutiko sagalo pihak sadang sibuk mamarangi panjajahan Balando.

Asumsi ambo, nan paliang dakek manuruik logika adolah poin nan ka duo, baiak pado sub kajian gujalo, maupun sub kajian sipangka-alek. Karano, gujalo jo sipangka alek nan kaduo ko labiah bisa ditarimo aka untuak disandiangkan jo ABS SBK. Pendeknyo, labiah batarimo dek aka sihaik momentumnyo.