Komposisi dalam Tradisi Lisan Minangkabau (Pantun jo Bidarai)

Tradisi lisan di Minangkabau adolah bagian nan indak bisa dipisahkan dari budaya (salanjuiknyo baco; adaik) Minangkabau. Bahkan, sajarah Minangkabaupun diwarihkan malalui tradisi lisan nanko. Dalam hal iko, tasabuiklah tambo jo kaba, yoitu sabuah dokumen lisan sajarah nan indak punyo latar balakang tokoh jo tariakh nan jaleh. Karano itu, di dalam ilimu sajarah, tambo atau kaba Minangkabau ko disabuik jo “historiografi” bukan “history”. Jadi, rasonyo indak sumbang jikok dikatokan baraso tradisi tulih-manulih di Minangkabau tagolong lamah.

Di baliak pambalakangan itu, walaupun lamah pado bidang tulih-manulih, Minangkabau cukuik kuaik pado bidang lisan. Iko bisa dicaliak dari banyaknyo prosa liris, pantun, pribahasa, ungkapan di dalam bahasa Indonesia nan diambiak dari bahaso Minangkabau. Namun, sungguah sangaik disayangkan, tradisi ko tarancam indak akan bakambang mangingaik indak adonyo sampai kini usaho untuak mangambangkannyo.

Basabaikkan gujalo nan dipapa di ateh, ambo nak mancubo barusaho babuek.  Pado tulisan nan kini ko, ambo cubo mambaco sakalian nan didapek, khususnyo tantangan pantun jo bidarai Minangkabau. Pantun jo bidarai ko ambo piliah sabagai pusek kajian karano ikolah sabananyo induaknyo kaba, dendang, pidato pasambahan, bahkan dialog di dalam drama Minangkabau (randai).

1.   Sakileh tantangan Pantun Minangkabau jo Pantun Malayu

Ado duo jinih pantun nan bakambang di pulau Andaleh ko, yoitu; pantun Malayu jo pantun Minangkabau. Hubuangan sajarah sarato adaik nan identik mambuek campua-baua antaro kaduo jinih pantun ko taruih bajalan tanpo disadari masyarakaik adaik masiang-masiang sahinggo susah bana rasonyo untuak malacak jo mambedakan kaduonyo.

Jikok dicaliak kapado rupo jo susunannyo, pantun Minangkabau ko sarupo tapi ndak samo jo pantun Malayu. Ciri samo antaro kaduonyo talatak pado asa sampiran, aturan jumlah barih, sarato bunyi akhia barih (salanjuiknyo  baco; rima). Sampirannyo samo-samo diambiak dari alam/kagiatan masyarakaik, jumlah barihnyo samo-samo ganok (≥2), rimanyo samo-samo AB-AB jo AA-AA.

Samintaro itu, pabedaan antaro kaduonyo talatak pado aturan jumlah suku kato pado tiok barih jo kamampuan sampiran. Tiok barih pantun Minangkabau tadiri dari 8-10 dan 12-13 suku kato. Sadangkan sampiran pantun Minangkabau biasonyo bahubungan langsuang jo isi pantun. Aratinyo, sampiran bisa mawakili isi pantun. Untuak labiah jalehnyo tantangan beda pantun Minangkabau jo pantun Malayu, bisa ditilik pado tabel di bawah.

Tabel Beda Pantun Minangkabau jo Pantun Malayu

No	Minangkabau	Malayu	Beda
1	Bahaso Minang	Bahaso malayu	Kato
2	8-10/12-13 suku kato	Ndak ado aturan	Suku kato
3	Genap antaro 2,4, dst.	Samo	Barih
4	AB-AB/AA-AA	Samo	Rima
5	Dari alam, kagiatan, kanyataan alam	Samo	Sampiran
6	Mawakili isi	Indak salalu

2.   Pantun Minangkabau

a.    Pantun Biaso/Malayu-Minang

Hitomi (2009) mangatokan baraso kutiko duo buah bahaso batamu, mako akan muncua bahaso jo “caro-caro” baru. Wujuiknyo adolah bantuak bahaso/caro baru nan indak murni atau campua-bawua antaro duo/labiah bahaso. Dalam hal iko, patamuan antaro bahaso, budayo pantun Malayu jo bahaso, budayo pantun Minangkabau. Patamuan ko tajadi dan bakambang di Minangkabau manjadi pantun baru nan dinamokan jo pantun biaso. Batang tubuah pantun ko punyo wujuik jo ciri sabagai barikuik;

1)   materi kato-katonyo bisa bahaso Malayu bisa Minangkabau;

2)   diikaik aturan jumlah suku kato (8-10, 12-13/barih);

3)   diikaik aturan rima;

4)   jumlah barih ganok ≥2 barih;

5)   susunannyo sampiran jo isi;

6)   sampiran indak mancirikan isi;

7)   sampiran diambiak dari alam;

8)   isi bisa tantangan apo sajo.

Untuak labiah jalehnyo tantangan pantun biaso ko bisa diparatian pado contoh di bawah.

Dek ribuik rabahlah padi

Dicupak Datuak Tumangguang

Kok hiduik indak babudi

Duduak tagak ka mari cangguang

Pantun biaso di ateh marupokan campuran pantun Minangkabau-Malayu. Iko nanpak jaleh dari panggunoan namo “Datuak Tumangguang” (bahaso Minangkabau) jo kato “cangguang” (bahaso Malayu).

b.   Pantun Minangkabau

Nan dikatokan pantun Minangkabau adolah pantun nan murni dari bahaso Minangkabau. Sabaik, pantun ko adolah wujuik dari ekspresi pribadi, masyarakaik-budayo “masakan” asli Minangkabau. Wujuik batang tubuahnyo punyo ciri sabagai barikuik;

1)   materi kato-katonyo murni bahaso Minangkabau;

2)   diikaik aturan jumlah suku kato (8-10, 12-13/barih);

3)   diikaik aturan rima;

4)   jumlah barih ganok ≥2 barih;

5)   susunannyo sampiran jo isi;

6)   sampiran mancirikan isi malalui hubuangan sacaro struktur (tasiraik) atau makna (tasuruak);

7)   sampiran diambiak dari alam;

8)   isi bisa tantangan salain falsafah adaik.

Untuak labiah jalehnyo tantangan pantun Minangkabau ko bisa diparatian pado contoh di bawah.

Karatau madang dahulu

Babuah babungo balun

Marantau bujang dahulu

Di kampuang baguno balun

Ciri Minangkabau nan paliang nyato nan nanpak dari pantun di ateh adolah adonyo hubuangan makna nan bisa ditalusuri antaro sampiran jo isi. Aratinyo, sampiran bisa mawakili isi pantun.

c.    Pantun Adaik

Sasuai jo namonyo, pantun adaik adolah pantun nan isinyo tantangan falsafah adaik Minangkabau. Pantun ko banyak ditamukan di dalam pidato pasambahan adaik sabagai dalia kutiko batutua. Wujuik batang tubuahnyo indak jauah babeda jo pantun Minangkabau, yoitu;

1)   materi kato-katonyo murni bahaso Minangkabau;

2)   diikaik aturan jumlah suku kato (8-10, 12-13/barih);

3)   diikaik aturan rima;

4)   jumlah barih ganok ≥2 barih;

5)   susunannyo sampiran jo isi;

6)   sampiran mancirikan isi malalui hubuangan sacaro struktur (tasiraik) atau makna (tasuruak);

7)   sampiran diambiak dari alam;

8)   isi bisa tantangan falsafah adaik.

Untuak labiah jalehnyo tantangan pantun Minangkabau ko bisa diparatian pado contoh di bawah.

Ramo-ramo si Kumbang Janti

Katik Endah pulang bakudo

Patah tumbuah hilang baganti

Pusako tataik di nan punyo

3.   Bidarai

Bidarai adolah jinih prosa lirik Minangkabau nan paliang acok di danga. Disabuik acok didanga karano bidarai ko banyak ditamukan di pidato pasambahan, bakaba, dendang, bahkan di pabincangan dalam patunjukkan drama Minang sarupo Randai. Manuruik Mak Katik, prosa lirik sarupo kaba, dendang, bahkan dialog dalam pidato pasambahan musti disusun manuruik susunan bidarai. Sabaik, susunan ko sangaik bapangaruah kapado rancak indaknyo bunyi prosa lirik nantun kutiko dibacokan ataupun didendangkan.

a.    Bidarai Kato

Prosa lirik Minangkabau nan disabuik jo bidarai ko bisa dikalompokkan manjadi tigo, yoitu; bidarai kato, pantun biadarai, bidarai adaik. Nan dikatokan jo bidarai kato, batang tubuahnyo punyo ciri sabagai barikuik;

1)   suku kato 8-10/12-13, kacuali untuak dialog, bisa labiah, paliang banyak 13 suku kato;

2)   indak ado aturan jumlah barih;

3)   indak ado aturan rima;

4)   indak ado sampiran, saluruih barih adolah isi.

5)   kato paliang akhia pado satiok barih indak buliah manjadi kato partamo pado barih barikuiknyo;

6)   tiok barih bakasinambungan sarupo sabuah carito/narasi/deskripsi naratif.

7)   isinyo indak tantangan falsafah adaik.

Untuak labiah mamahami ciri bidarai kato ko, bisa diparatian/dicubokan pado contoh barikuik.

Nak kanduang si biran tulang

Ubek jariah palarai damam

Pamenan hati ayah bundo

b.   Bidarai Adaik

Di sampiang bidarai kato, ado bidarai lain disabuik jo bidarai adaik. Bidarai adaik ko adolah bidarai nan isinyo tantangan falsafah adaik Minangkabau. Batangtubuahnyo bisa disusun jo rumusan di bawah ko;

1)   suku kato 8/9;

2)   indak ado aturan jumlah barih;

3)   indak ado aturan rima;

4)   indak ado sampiran, saluruih barih adolah isi;

5)   kato paliang akhia pado satiok barih indak buliah manjadi kato partamo pado barih barikuiknyo;

6)   tiok barih bakasinambungan sarupo sabuah carito/narasi/deskripsi naratif;

7)   isinyo tantangan falsafah adaik.

Untuak labiah jalehnyo, bisa diparatian/dicubokan pado contoh bidarai adaik di bawah.

Takanak saluak palangai

Bayangan isi dalam kulik

Panjang ndak dapek kito ukua

Leba ndak dapek kito bidai

Tiok katuak baundang-undang

Tiok karuik budi marangkak

Tiok lilik aka manjala

c.    Pantun Bidarai

Pantun bidarai adolah gabuangan antaro pantun jo bidarai. Tapeknyo, bidarai kato atau bidarai adaik nan diubah jadi pantun. Bantuak batang tubuahnyo adolah;

1)   suku kato 8/9, kacuali untuak dialog, bisa labiah, paliang banyak 13 suku kato;

2)   jumlah barih ganok, paliang saketek 4 barih;

3)   ado aturan rima;

4)   indak ado sampiran, saluruih barih adolah isi;

5)   kato paliang akhia pado satiok barih indak buliah manjadi kato partamo pado barih barikuiknyo.

6)   tiok barih bakasinambungan sarupo sabuah carito/narasi/deskripsi naratif;

7)   isinyo tantangan falasafah adaik, kahidupan, kanyataan alam, dan lain-lain.

Untuak labiah jalehnyo, bisa diparatian/dicubokan pado contoh bidarai di bawah.

Badeta itam batatak

Bacawek salilik pinggang

Baserong si Bugih Lamo

Nan lai tampek mamintak

Nan kayo tampek batenggang

Nan tuo tampek batanyo

4.   Manga 8-10 suku kato?

Tarakhir, nan manggamang di kiro-kiro tantulah tantangan alasan sarato pambuktian kasahiahan aturan-aturan susunan batang tubuah pantun jo bidarai di ateh. Khususnyo tantangan aturan suku kato nan bajumlah 8-10 suku kato. Samintaro untuak aturan lainyo sarupo bunyi akhia barih sarato jumlah barih, rasonyo indak paralu dirantang panjang. Sabaik, lah biaso ditamui pado aturan pantun biaso nan diajakan di sakola-sakola.

Aturan suku kato 8-10 sabarih ko sabananyo bahubuangan jo dendang Minangkabau. Namun, sabalunnyo paralu disampaikan di siko baraso ciek dari babarapo kakhasan dendang Minangkabau tu adolah adonyo usaho mandakeki/maajak panonton/pandanga. Biasonyo diwujuikkan jo kato-kato saru sarupo; hoi, oh, o, sarato lain-lainnyo. Tujuannyo adolah untuak mahiduikan suasana jo manbantu panonton dalam manangkok pasan dendang.

Namun di baliak pambalakangan itu, kato-kato saru ko bahubuangan juo jo aturan suku kato 8-10 sabarih di ateh. Panggunoan kato saru ko biasonyo digunokan sabagai palangkok bunyi dendang nan barihnyo tadiri dari 8 suku kato. Jikok jumlah suku kato sabarih kurang/labiah dari 10, nan tajadi adolah muncuanyo sumbang bunyi. Aratinyo, jikok labiah dari 10 suku kato, nan ka tajadi, nada/irama sabarih dendang lah abih, lirik masih basiso. Sadangkan jikok kurang dari 8 suku kato, nan tajadi, lirik la abih irama/nada dendang masih basiso/gantuang. Baitu juo jo nan 12-13 suku kato. Jadi, aturan jumlah suku kato ko punyo duo fungsi, yoitu; untuak harmonisasi bunyi dendang sarato interaksi jo panonton/pandanga.