Kaidah Nan Ampek, Filosofi Hiduik Urang Minang

Surahan ko Ambo tulih kutiko takana jo pasan guru. Pasan Baliau tu barupo sabuah pituah nan babunyi, “Alua butuah pamatuik, kabanaran butuah pambandiang, sabalun kako dimungkinkan”. Aratinyo, manih jan langsuang dilulua, pahik jan langsuang dimuntahkan. Sigi dulu dari babagai suduik sabalun manantuan tampek tagak. Tarutamo kutiko mancaliak, mandanga, atau basobok jo masalah nan bahubuangan jo adaik. Sabaik adaik adolah tantangan kamanusiaan bukan tantangan masin. Masin rusak bisa dibengke, kabanaran kamanusiaan rusak bengke binaso. Ka ma badan ka batenggang?

Palajaran utamo nan marupokan inti dari adaik Minangkabau diistilahkan jo ungkapan “nan ampek”. Ado banyak istilah nan manjadi camin diri (referensi)  dari “nan ampek”, di antaronyo, “adaik nan ampek”, “kato nan ampek”, “langkah nan ampek”, “makrifaik nan ampek”, “undang-undang nan ampek”, “hukum nan ampek”, “urang nan ampek jinih”, “cupak nan ampek”, sarato lainnyo. Namun, pado kajian kini ko, ambo mamiliah tigo buah istilah nan ampek nan manuruik ambo adolah inti dari adaik Minangkabau. Tigo dari nan ampek nantun iolah; adaik nan ampek, kato nan ampek, langkah nan ampek.

1.   Adaik Nan Ampek

Sasuai jo namonyo, adaik nan ampek tadiri dari ampek buah istilah adaik, yoitu; adaik nan sabana adaik, adaik nan diadaikan, adaik nan taradaik, adaik istiadaik.

a.    Adaik Nan Sabana Adaik (ANSA)

ANSA adolah tantangan kabanaran nan hakiki/mutalak, nan indak bisa dikisa, apolai dipaliang. Ikolah kabanaran hakiki dalam urusan agamo, tapeknyo tantangan akidah, ibadah, jo sunnatullah. Nan dikatokan jo akidah adolah tantangan kayakinan taradok Tuhan Allah. Ibadah adolah tantangan kawajiban manusia taradok Tuhan/ibadah wajik. Sadangkan ibadah dalam kaidah muamalah indak tamasuak di dalam ko.

Salanjuiknyo tantangan sunnatullah. Nan dikatokan sunnatullah dalam ANSA ko adolah tantangan sagalo nan tunduak jo aturan alam, tarutamo hukum alam nan takaik jo manusia. Misanyo, kuaso nan dimakan dayo, mato nan dikabua cahayo, abuak nan didayo uban, kulit nan dikaruik maso, dan lain sabagainyo. Pendeknyo, sunnatullah dalam konteks ANSA nanko adolah kabanaran hakiki tantangan manusia jo kamanusiaan.

Hal-hal nan dipapa di ateh kadang disabuik juo jo istilah “kato nan bana”, yoitu kabanaran nan indak buliah diago-ago dek manusia jo apopun. Karano, indak ado kuaso, dayo, sarato kayo di ateh dunia ko nan bisa mambandiang ANSA ko. Jikok ado nan mandeen bakato surang, bataratak bakoto asiang dek kaahlian diri sarato ilmu nan dipunyo, tunggu sajo mudaraiknyo. Sabaik, adaik Minangkabau baparingaik mamati ANSA ko jo sabuah pantun adaik nan babunyi:

“Ditahan lukah di banda

Ditahan dibangkik-bangkik

Ditulak kato nan bana

Ubek jadi panyakik”.

b.   Adaik Nan Diadaikkan (AND)

Nan dikatokan AND adolah sagalo katantuan nan dibuek badalia kapado kajian mandalam, mandasar, manyaluruh dek pihak-pihak nan batangguangjawaik jo mamagang tampuak. Katantuan ko dibuek basandi pado gujalo nan jaleh sarato bisa batarimo dek aka pikiran. Lalu, disampaikan/dilelokan jo wujuik sarato caro nan baitu pulo. Pado maso kini ko, AND ko bisa diibaraikkan jo kabanaran ilmiah. Indah buliah diungkai, tapi buliah dibandiang jo caro/kajian nan sasuai jo aturan mainnyo. Aturan mainnyo adolah alua (sistematis), patuik (logis), mungkin (situasional).

c.    Adaik Nan Taradaik (ANT)

Ado duo wacana nan mangamuko tantangan pamahaman panganuik adaik Minang taradok ANT ko. Wacana partamo mangatokan baraso ANT adolah kako nan indak diatur dalam adaik. Namun, dipakaikan dek masyarakaik sarupo mamakaikan adaik. Aratinyo, ANT adolah katantuan nan indak dilahiakan malalui psoses saniaik sasangajo.

Wacana nan kaduo, ANT adolah  katantuan nan dibuek kutiko tajadi patamuan antaro duo/tigo pihak dalam sabuah kadaan (kasapakatan kalompok). Kadaan ko sifaiknyo bakutiko atau insidental. Umpamonyo alek pakawinan duo pihak nan babeda sacaro  geografis dan adaik, alek jamuan nan malibaikkan pihak-pihak dari lua, atau kako basamo lainnyo. ANT nanko lalu bakambang malahiakan katantuan-katantuan lainnyo sarupo “cupak jo gantang”, “batimbang tando”, dan lain-lainnyo.

Dari kaduo wacana di ateh, agaknyo wacana nan kaduo labiah batarimo. Baa ka baa, adaik adolah camin taruih dari pamikiran jo raso-raso manusia. Makonyo, dalam ilmu budaya muncua istilah “homo sapient” jo “homo humanus”. Karano itu, sabagai katantuan adaik, ANT tantu indak mungkin ado baitu sajo, pasti hasia dari pamikiran nan bajokok jo bagujalo.       

d.   Adaik Istiadaik (AI)

AI diidentikkan jo adaik rajo-rajo/sutan-sutan. Istilah rajo/sutan ko sabananyo mawakili sifaik mandeen, individualisme caro kininyo. Aratinyo, AI adolah katantuan/kabanaran nan sifaiknyo pribadi, surang-surang. Misanyo, kabiasoan adu ayam, adu balam, bakoa, dan lain sabagainyo. Kako nanko dikatokan hanyolah adaik/bana/kabiasoan nan indak salah bagi urang-urang tatantu, sabaliaknyo bagi masyarakaik lainnyo.

Dari uraian tantangan adaik nan ampek di ateh dapek disimpuakan baraso kabanaran ko satidaknyo tabagi ampek. Partamo kabanaaran nan mutalak (ANSA), kaduo kabanaran ilmiah (AND), katigo kabanaran kalompok (ANT), kaampek kabanaran individu (AI). Aratinyo, satidaknyo ado ampek macam kabanaran nan harus kito patimbangkan kutiko mancaliak suatu pakaro. Maa kabanaran nan butuah pambandiang, maa alua nan indak buliah dipatuik-patuik, dan lain sabagainyo.

Pado intinyo, dalam mamandang adaik atau kabanaran nan ampek ko, Adaik Minangkabau mambari batasan kapado kito basamo. Batasan nantun mangindikasikan baraso ANSA marupakan kabanaran hakiki nan indak buliah dibandiang. Sadangkan untuak nan lainnyo (AND, ANT, AI) buliah dibandiang manuruik kadaan, pakambangan jaman sarato malalui kajian nan sasuai, dalam hal iko alua, patuik, mungkin. Hal iko dikatokan jo pituah, “kabek buliah dibukak, namun buhua ndak buliah guyah”.

Sajalan jo uraian di ateh, di dunia pendidikan alah tajadi samacam kasapakatan umum baraso adaik adolah budaya tantangan etika nan lahia dari hasia pamikiran basamo. Dalam ilmu budaya, tasabuiklah istilah “homo humanus” jo “homo sapien”. Aratinyo, budaya adolah camin taruih dari pamikiran sarato nilai-nilai kamanusiaan. Baiak pamikiran ataupun nilai kamanusiaan nantun, barujuang kapado ciek sajo, yoitu kahidupan nan bana. Bana manuruik kaidah masyarakaik (kaidah sosial), bana manuruik agamo, bana manuruik aka, bana manuruik salero, sarato lain-lainnyo.

Karano itu, adaik nan ampek handaknyo dipahami sabagai ampek bantuak kabanaran sabagai hasia dari pamikiran sarato raso-raso kamanusiaan masyarakaik Minangkabau nan dilimbagokan di dalam adaik nan ampek. Kaampek kabanaran nantun bisa diurai sarupo nan di bawah ko.

a.     Kabanaran mutalak

Nan dikatokan kabanaran mutalak di dalam adaik Minangkabau adolah nan barado di dalam kaidah ANSA, yoitu; nan manyangkuik akidah, ibadah, jo sunnatullah. Tantangan nan iko ko, indak ado tawa-manawa dalam ibadah/akidah, indak ado bandiang-mambandiang dalam sunnatullah. Tapi, laksanakan sajo bak dalia nan mangato “lakum dinukum wa liyadin”.

Jikok basadakah ka masajik, laksanakan sajo, usah mancaliak saku-saku urang. Jikok dapek bakulik hitam atau barambuik karitiang, barasiahan sarato jago sajo nan ado tu, usah mancaliak nan di urang. Sabaik, itulah sunnatullah taradok diri, usah mandutoi diri dek karano arok nan bak urang. Cilako urang nan mandutoi diri, apolai sampai lupo diri.

Mancaliak contoh ka nan sudah, mancaliak tuah ka nan manang. Kito samo-samo bisa mancaliak. Bara banyak gadih kito nan manangguangan cacaik kulik dek mandutoi sunnatullah taradok kuliknyo? Bara banyak bujang kito nan rambuiknyo rusak dek mandutoi sunnatullah taradok rambuiknyo? Bapaso juo pakai whitening, padahal kulik dasarnyo hitam. Bapaso juo maribonding, padohal rambuik dasarnyo karitiang.

Makonyo, tapek bana rasonyo ANSA dipati dek pituah, “ditahan lukah di banda, ditahan dibangkik-bangkik, ditulak kato nan bana, ubek jadi panyakik”. Lah ubek nan jadi panyakik dek karano kito mandutoi sunnatullah, tarutamo taradok diri surang. Dek arok nan bak urang, lupo jo diri surang, badutoi parasaan.

b.   Kabanaran logika

Nan dikatokan kabanaran logika di dalam adaik Minangkabau adolah tantangan kabanaran nan barado dalam kaidah AND. Manuruik AND, kabanaran adolah hasia kajian nan sasuai jo langkah-langkah nan logis. Aratinyo, malalui prosedur nan bataratik, kajian nan mandalam, sarato bisa ditarimo dek aka pikiran masayarakaik pado jamannyo.

Untuak kabanaran nan iko, AND mangamukokan aturan main nan disabuik jo istilah, “sakali aia gadang, sakali tapi barubah”. Aratinyo, kabanaran nan iko bisa ditawa, bisa dibadiang bak pituah adaik “alua butuah pamatuik, bana butuah pambandiang, sabalun kako dimungkinkan”. Aratinyo, karano adaik adolah tantangan manusia, caliaklah kondisi manusia itu sandiri dalam proses mangakkan jo mangambangan AND ko. Ijan sampai, AND malah malukoi bahkan mambuaik masyarakaik manjauhi adaik itu sandiri. Sarupo nan banyak tajadi kini di dalam adaik pakawinan, pidato pasambahan, dan lain-lain.

c.    Kabanaran kalompok

Nan dikatokan kabanaran kalompok di dalam adaik Minangkabau adolah tantangan kabanaran nan barado dalam kaidah ANT. Manuruik ANT ko, kabanaran akan babeda manuruik tampek tagak sarupo urang nan mancaliak sabuah jalan di lereang bukik. Bagi urang nan di ateh, jalan nantun tantu turunan, sadangkan bagi urang nan di bawah, jalan nantun tantu pandakian. Dalam hal iko, ANT adolah samacam limbago adaik nan manjadi wadah baru nan diwujuikkan kutiko tajadi patamuan antaro duo buah kalompok masyarakaik nan babeda.

Adaik Minangkabau diikaik dalam kaidah “adaik nan sabatang panjang” (ANSP) dan didirikan jo “adaik salingka nagari” (ASN). ANSP adolah adaik nan ampek, sadangkan ASN adolah sagalo adaik nan bakambang dari nagari-nagari nan ado di saluruh Minangkabau. Dalam palaksanaannyo, tantu ANSP jadi acuan utamo, tarutamo kutiko tajadi patamuan antaro duo pihak/nagari nan adaiknyo babeda.

Caronyo, partamo, tilik hakikaik patamuan, jikok tantangan pakawinan, liaik hakikaik pakawinan dalam ANSP, tapeknyo hakikaik nikah-kawin dalam kaidah ANSA jo AND. Kaduo, “tagakkan cupak” atau adaik masiang-masiang. Katigo, pakaikan kaidah ANT baraso adaik masiang-masiang sifaiknyo hanyolah kalompok, nan hakiki adolah ANSA jo AND. Kaampek, isilah cupak pasangan/adaik pasangan masiang-masiang sasuai jo kamampuan. Tarakhir, nan kalimo, poin utamo manuruik ANT bukanlah tantangan isi cupak nan balanjuang/panuah ka bawah, tapi adolah raso harago-maharagoi nan diwujuikkan dalam kamauan dalam maisi cupak.

d.   Kabanaran individu

Nan dikatokan kabanaran individu di dalam adaik Minangkabau adolah tantangan kabanaran dalam kaidah AI. Manuruik AI, hal-hal nan bahubuangan jo salero, candu, pamenan, adolah adaik/kabanaran nan sifaiknyo individu. Karano itu, paralu mancaliak kondisi individu lain, tarutamo lingkungan sosial dalam pamanuhannyo.

2.   Kato Nan Ampek 

Sabalun masuak ka kaampek kato nan dimukasuik. Agaknyo paralu diduduakan dulu acuan dari istilah “kato” nanko. Istilah “kato” dalam kato nan ampek sabananyo bukanlah tantangan materi bahaso Minang. Sabaik, materi bahaso Minang indak batingkek sarupo bahaso Jawo jo Sunda. Misanyo, siapo sajo palaku akifitas makan, kato karajo nan digunokan tataik makan. Karano itu, “kato” pado kato nan ampek ko sabananyo mangacu kapado caro-caro dalam batutua kato. Istilah ilmu bahasonyo adolah “strategi tindak tutur”.

a.    Kato Mandaki

Kato mandaki adolah caro batutua nan pamiliahan materi bahasonyo mamuncuakan kasan maangkek darajaik/mamuliakan pasangan batutua atau urang nan dibicarokan. Karano itu, caro batutua kato mandaki ko sacaro materi harusnyo digunokan kapado pasangan tutua nan labiah umua, jabatan, atau status sosialnyo dari pado nan batutua.

b.   Kato Manurun

Kato manurun adolah caro batutua nan pamilihan materi bahasonyo mamuncuakan kasan maaja, malindungi, marandahan pasangan tutua atau urang dibicarokan. Karano itu, caro batutua kato manurun ko sacaro materi harusnyo digunokan kapado pasangan tutua nan umua, jabatan, atau status sosialnyo randah dari pado nan batutua.   

c.    Kato Malereang

Kato malereang adolah caro batutua nan pamiliahan materi bahasonyo indak manyabuikan langsuang hal nan dibicarokan. Aratinyo, pasan disampaikan malalui gaya bahaso/kato bakieh. Karano itu, caro batutua kato malereang ko sacaro materi harusnyo digunokan untuak mambicarokan tantangan masalah-masalah nan memang sensitif atau manuruik adaik kurang lazim jikok disabuikkan langsuang, atau kutiko batamu jo urang "baru".

d.   Kato Mandata

Kato mandata adolah caro batutua nan pamilihan materinyo manunjuakan kasan baraso pasangan tutua atau urang nan dibicarokan sapantaran/samo gadang. Ciri utamo kato mandata ko dapek diliek dari adonyo kasan santai, gurau, ciloteh lapeh nan banyak tadapek di dalam bahaso nan ka lua.

Di dalam pagaulan sahari-hari, panggunoan kato nan ampek labiah dipangaruhi dek ikatan emosional, situasi pasangan tutua, sarato topik nan dibicarokan. Sadangkan tampek jo status pasangan tutua pangaruahnyo tabilang ketek, kecuali di tampek ibadah jo acara-acara adaik. Pado kaduo tampek ko, panggunoan kato mandaki jo kato manurunlah nan dominan.

Di baliak itu, di tampek-tampek umum, bahkan di dalam pergaulan di instansi sakalipun, kato nan ampek digunokan takah indak babateh. Sabaik, bateh panggunoan akan ado tagantuang hubuangan emosional antaro pihak nan batutua jo pasangan tutua, atau jo urang nan dibicarokan. Makin dakek hubuangan emosional, makin indak ado bateh, kato nan ampek digunokan kasadonyo suko-suko kaduo pihak nan batutua jo pasangannyo.

Jadi, kutiko surang bawahan manggunokan kato mandata kapado atasannyo di kadai kopi, indak bisa dikatokan baraso bawahan nantun malangga kato nan ampek baitu sajo. Sabaik, konteks di siko manunjuakan baraso ado hubungan emosional nan baiak antaro kaduonyo sahinggo bateh komunikasi jadi bakurang. Aratinyo, kato nan ampek harusnyo dipahami sabagai ampek caro untuak manjalin hubuangan nan lapang atau indak kaku. Karano, hakikaik dari pado bahaso sabagai alaik komunikasi tantulah hubuangan, dan hubuangan nan baiak tantu hanyo bisa tajalin malalui komunikasi nan lapang, indak kaku, sarato indak takasan formal-formal bana.

Tarakhir, manfaik dari panggunoan kato nan ampek nan baiak tantu akan mandatangkan manfaaik taradok sagalo pihak takaik. Manfaaik nantun di antaronyo:

a.    Malindungi citra pihak nan batutua.

b.   Mamudahkan pasangan batutua.

c.    Maningkaikkan raso-raso dalam bahubungan.

d.   Mamudahkan sagalo urusan.

3.   Langkah Nan Ampek

Langkah nan ampek mulonyo bakambang dari dunia silek. Di dalam silek, langkah nan ampek ko manjadi formasi dasar silek Minangkabau. Babeda jo seni bela diri kabanyakan nan manjadikan kudo-kudo sabagai formasi dasarnyo. Dalam silek ko, formasi langkah nan ampek ko bahubuangan jo bantuak galembong nan nan mambatehi panjangnyo langkah sarato jo filosofi baraso indak ado kudo-kudo nan indak bisa diruntuahkan, kuncinyo talatak di geseran. Makonyo, prinsip langkah nan ampek talatak pado kamampuan mamiliah langkah jo manggesernyo sasuai kaadaan.

Kato “ampek” pado langkah nan ampek dalam silek ko bahubuangan jo jinih lawan. Ado lawan nan di ateh, ado lawan nan di bawah, ado lawan nan sabandiang, ado lawan nan indak dapek ditimbang. Kaampek jinih lawan ko mangacu kapado kamampuan sarato kondisi fisik lawan itu sandiri. Jadi, langkah nan ampek di siko baguno untuak mamiliah langkah nan tapek untuak mahadoki ampek jinih lawan ko. Sabaik, bak bamain catua, bola, badminton, katapatan dalam mamiliah langkah atau strategi sangaik manantukan proses sarato hasia lago.

Di dalam hiduik sahari-hari, pandangan langkah nan ampek ko diwujuikkan dalam bantuak palakuan kito taradok urang lain. Baa caro balaku ka “urang nan di ateh, nan di bawah, nan samo gadang, sarato urang nan baru”. Sabaik, caro-caro kitolah sabananyo nan manantukan hasia nan akan kito dapek dari urang lain. Jikok pandai kito manyambah nan di ateh, maraiah nan di bawah, bamain samo gadang, mambao urang baru, mako tapagalah diri dari parilaku-parilaku urang nan marugikan. Dari “talendo dek si gadang”, dari “tataruang dek batu ketek”, dari “tagisia dek samo gadang”, sarato dari “taota dek urang baru”.