DILEMA GALA MINANGKABAU (PUSAKO, SAKO, SANGSAKO)

Katigo pokok kaji di bagian judul di ateh biaso tadanga jikok kito mangaji tantangan gala. Gala iolah identitas sosial khas Minangkabau nan diwujuikkan jo pambarian namo/panggilan tatantu. Identitas sosial di siko satidaknyo punyo tigo makna utamo. Partamo, sabagai pangakuan status taradok surang laki-laki dari mudo mantah manjadi mudo matang. Kaduo, sabagai pangukuhan kakuasaan politik surang anggota kaum di dalam kaumnyo. Katigo, sabagai bantuak pasambahan jo kapadulian sosial taradok pihak lua kaum.

Pado maso kini ko, panurunan gala sako, pusako, sangsako ko acok indak sasuai jo maknanyo sahinggo mamuncuakan patantangan di tangah-tangah masyarakaik. Di kalangan “ateh”, banyak pambarian gala nan dijadian ajang politik sarato bisnis. Samintaro itu, di kalangan “bawah”, banyak pulo tajadi parabutan gala bak anak ketek mampacakakan topeng Spiderman.

Karano itu, pado tulisan nan kini ko, ambo cubo maadu untuang. Ambo cubo bagulambek mangaji tantangan gala nan ko sabanyak nan ambo dapek. Mudah-mudahan, lai taukia satantang garih, lai tacupak di nan data. Amin.

1.   Gala Mudo (Identitas Pribadi)

Gala mudo adolah gala pribadi sabagai pangakuan masyarakaik taradok kamatangan surang individu. Gala mudo ko dilewakan kutiko surang laki-laki malangsuakan alek pakawinan. Aratinyo, pakawinan adolah patando parubahan status surang laki-laki dari anak-anak manjadi laki-laki sautuahnyo, yoitu laki-laki nan lah punyo tangguangan lahia-batin nan musti inyo patangguangjawaikakan lahia-batin pulo.

Dalam palaksanaannyo, pambarian gala mudo ko bisa dikategorikan manjadi tigo (3) jinih, yoitu; a) gala mudo murni, b) gala mudo pusako, c) gala mudo sangsako. Gala mudo murni (a) adolah gala mudo nan kabaradoan sarato pawarisannyo alun sampai ampek (4) generasi sampai ka tangan nan ka Mamakaikan. Gala mudo pusako (b) adolah gala mudo nan panurunannyo lah sampai ampek (4) generasi atau labiah. Jadi, gala mudo murni nan lah diturunkan sampai ampek generasi atau labiah barubah manjadi gala mudo pusako.

Nan katigo (c) adolah gala mudo sangsako. Gala mudo sangsako adolah gala nan dibarikan kapado laki-laki lua Minangkabau/indak punyo latar gala nan malangsuangkan pakawinan jo parampuan Minangkabau. Biasonyo, pambarian gala iko malalui limbago adaik malakok. Aratinyo, pihak laki-laki malalui bantuan pihak parampuan akan mamintak kasadioan sabuah kaum untuak manarimonyo sabagai anggota kaum, sarato mambarinyo sabuah gala ka gala mudonyo untuak malangsuangkan pakawinan.

Untuak pambarian gala nanko, gala nan dibari biasonyo adolah gala mudo murni, indak gala mudo nan lah dipusakokan dek kaum. Sabaik, jikok gala nan dibarikan adolah gala mudo pusako, pihak pambari gala harus manilik alua jo patuik taradok badan diri nan ka diagiah gala malalui musyawarah kaum. Indak cukuik sampai di situ sajo, gala tasabuik pun harus diubah. Misanyo; peto lelo (asli) manjadi peto, magek sati (asli) manjadi magek sutan, dan lain sabagainyo.

Jadi, gala sangsako nan acok didanga balakangan ko handaknyo baraso dari gala mudo nan ko. Jikok wadahnyo hanyo untuak kapantiangan pakawinan, barilah gala mudo murni. Jikok untuak kapantiangan nan labiah tinggi sarupo nan tajadi di dalam dunia politik, barilah gala mudo pusako malalui proses mufakaik kaum. Sabaik, baa ka baa, gala mudo pusako tantunyo marupokan gala nan punyo tampek mulia di hati anggota kaum.

2.   Gala Pusako (Identitas Kaum)

Nan dikatokan gala pusako adolah gala urang nan ampek jinih, yoitu Panghulu, Manti, Malin, Dubalang. Urang nan ampek jinih adolah urang nan didahulukan salangkah ditinggikan sarantiang kadudukan sarato kakuasaannyo di dalam kaum. Baliau-baliau ko adolah kapanjangan tangan langsuang dari pamarintahan nagari. Karano itu, gala pusako pado hakikaiknyo adolah gala nan bahubungan langsuang jo kadudukan sarato kakuasaan surang anggota kaum di dalam kaumnyo sarato di dalam pamarintahan nagari.

Gala pusako ko disabuik juo jo gala adaik. Hal iko disabaikkan dek karano sistem pamarintahan nagari sarato kadudukan jo fungsi urang nan manyandang gala ko diatur dalam undang-undang adaik. Karano itu, panyandang gala pusako ko harus punyo kamampuan nan labiah tarutamo dari sagi adaik jo agamo dari pado masyarakaik umum. Di dalam adaik kamampuan nantun disabuik jo istilah “rang gadang padangnyo lapang, rang gadang alamnyo luweh”. Sasuai jo tugehnyo “kusuik nan ka manyalasai, karuah nan ka manjaniahi”.

Dari uraian di ateh dapek dipahami baraso sumbang bana rasonyo jikok ado gala pusako nan dibarikan kapado pihak lua Minangkabau. Kalaupun ado pambarian nan sarupo itu karano tuntutan kaadaan, handaknyo nan dibarikan adolah gala mudo pusako malalui proses mufakaik manilik alua jo patuik. Jadi, tuntutan lapeh adaik indak tacemo. Bak pituah adaik, “anak buliah Kamanakan ndak kurang”.

Di sampiang itu, pado babarapo nagari, gala pusako ko dikalompokkan manjadi duo. Partamo, gala “pusako tenggih”, yoitu gala urang nan ampek jinih nan di siko kito sabuik sabagai “gala pusako”. Kaduo, gala “pusako randah”, yoitu gala nan dipusakokan karano alah turun-tamurun dilelokan hinggo ampek generasi/labiah, nan pado tulisan ko kito sabuik sabagai gala “mudo pusako” (tilik sub bab (1) gala mudo).

 

3.   Gala Sangsako (Identitas Malakok)

Sarupo nan alah disingguang juo pado sub kajian di ateh, gala sangsako adolah gala nan dibarikan kapado pihak lua sabagai bagian dari wujuik adaik malakok. Malakok adolah limbago adaik untuak manjambatani status surang manusia nan indak punyo kaum/suku sahinggo bisa mampunyoi kaum. Alasan malakok ko ado babarapo, yoitu; alasan ekonomi, alasan pakawinan, alasan politis, dan lain-lain.

Malakok karano alasan ekonomi hanyo tajadi pado jaman saisuak. Pado jaman di mano ekonomi masyarakaik Minangkabau sangaik matang, alun tajadi masalah-masalah sarupo gadai-manggadai nan acok tajadi pado jaman kini ko. Sadangkan untuak alasan pakawinan jo alasan politis, panggunoan limbago adaik malakok acok tajadi di jaman kini. Karano alasan maso ko, pangkajian sangsako ko kito pusekan ka kaitannyo jo limbago adaik malakok karano alasan pakawinan jo alasan politis.

Untuak alasan pakawinan jo alasan politis, gala sangsako nan dibarikan handaknyo adolah gala mudo murni, yoitu gala mudo nan alun manjadi pusako bagi kaum pandukuangnyo. Patimbangannyo adolah supayo indak manyakiki hati anggota kaum kutiko urang nan dibari gala tanyato indak bisa mambaokan diri. Tapi, samantang baitu, gala mudo pusako bisa juo dijadikan gala sangsako. Jikok saandainyo ado kapantiangan nan labiah di balakang hari. Misanyo, kaum punyo harapan tatantu kapado nan dibari gala karano kapasitas/kamampuannyo nan labiah hinggo dipicayo mampu mambaokan diri sarato maangkek namo kaum, minimal maangkek karakter nan takanduang dari gala sangsako takaik.

4.   Aturan Panurunan Gala

Katigo jinih gala nan lah dipapa ciek-ciek pado sub kajian tadahulu punyo aturan panurunan masiang-masiang. Dari situ pulo kito katahui baraso gala sangsako sabananyo indak punyo asa jo wujuik. Asa gala sangsako nantun sabananyo dari gala mudo murni jo gala mudo nan dipusakoan/gala mudo pusako. Sadangkan wujuiknyo adolah modifikasi dari gala mudo tasabuik, bukan gala mudo utuh. Karano itu, pado sub “Panurunan Gala” ko, kajian dipusekkan pado gala mudo jo gala pusako sajo.

a.    Panurunan Gala Mudo

Panurunan gala mudo indaklah sarumik/sadisiplin panurunan gala pusako jo sangsako. Baiak tantangan namo galanyo, tantangan urang nan ka diagiah gala, ataupun tantangan prosesi panurunannyo. Hal iko bahubuangan jo kadudukan gala nan indak bahubungan jo sistem pamarintahan nagari atau sistem pamarintahan adaik, hanyo sabateh pangakuan taradok identitas pribadi dalam kahidupan bamasayarakaik. Mako dari itu, aturan panurunan gala mudo ko dibari kalapangan, disarahkan sapanuahnyo dalam kaidah adaik salingka nagari. Aratinyo, wujuik, aturan panurunan, prosesi panurunan gala mudo ko akan babeda-beda tagantuang nagarinyo.

Gala ko bisa diturunkan dari Mamak ka Kamanakan, bisa juo dari Bapak ka Anak. Sadangkan untuak wujuik galanyo, indak ado modifikasi. Sarupo apo mulonyo, sarupo itu juo salanjuiknyo, Sutan mulonyo Sutan juo salanjuiknyo. Sadangkan untuak prosesinyo, biasonyo disambiakan dalam alek nikah kawin. Ado juo ciek-ciek dalam acara alek jamuan, tarutamo untuak gala mudo nan jadi sangsako karano dibarikan kapado pihak lua sarupo nan acok bakambang balakangan kini ko.

b.   Panurunan Gala Pusako

Sangaik babeda jo gala mudo, gala pusako punyo aturan khusus dalam proses panurunannyo. Panurunannyo harus dari Mamak ka Kamanakan, prosesinyo malalui acara khusus, yoitu prosesi “malapah/mancacah darah”. Bisa diwujuikkan dalam alek jamuan, kadang bisa juo disambiakan dalam alek nikah kawin. Sadangkan untuak wujuiknyo, sabutan gala ko diturunkan sacaro panuah, ndak ado modifikasi. Di dalam adaik, aturan panurunan gala pusako disiraikkan jo duo ungkapan, yoitu; 1) “mati batungkek budi”, 2) “hiduik bakarilaan”.

Namonyo “mati batungkek budi”, mako prosesi panurunan gala ko biasonyo dilakukan sasudah pamagang gala takaik maningga. Aturan ko lazim di daerah nan barado di bawah pangaruah kalarasan Koto Piliang, kabasaran Datuak Katumanggungan. Sadangkan “hiduik bakarilaan” biaso bakambang di daerah di bawah pangaruah kalarasan Bodi Caniago, kabasaran Datuak Parpatiah Nan Sabatang. Prosesi panurunan gala ko biasonyo indak harus manunggu pamagang gala takaik maningga. Tapi, bilo sajo, sarila pamagang gala.

Karano gala pusako ko bahubuangan jo kadudukan pamagang gala di dalam pamarintahan adaik jo nagari. Makonyo, pamagang gala pusako ko biasonyo punyo “Panungkek”. Panungkek ko adolah sabutan untuak Kamanakan nan disiagokan untuak mamagang kadududukan sarato malanjuikkan fungsi nan takanduang dalam gala pusako ko. Bisa diumpamokan jo kader pado jaman-jaman kini ko.

Pado akhianyo, mangingaik jaman nan alah samakin maju. Pamikiran manusia tantu baitu pulo. Sangaik susah untuak mampatahankan tradisi sasupo aturan gala ko di dalam kahidupan masyarakaik adaik. Tarutamo tantangan gala pusako/gala adaik nan bahubungan langsuang jo urusan kadudukan sarato fungsi pamagangnyo di dalam adaik. Kok buliah balaku nan di hati, handaknyo panurunan gala ko mangutamokan azas “rang gadang padangnyo lapang, rang gadang alamnyo lueh” dari pado “dari Mamak turun ka Kamanakan” samato.

Sabaik, dogma sarato kiramaik turun-tamurun indak lai mangkuih. Kompleksitas masalah social kini labiah mambutuahkan pamimpin nan bahati lapang, bapangatahuan luweh, sarato nan bapamandangan jauah ka muko. Kamanakan jaman kini sagan kapado Mamak umumnyo bukan karano factor biologis. Tapi labiah karano kamampuan Mamak tasabuik dalam mambimbiang Kamanakan nan mambuek si Kamanakan maraso punyo Mamak. Hal iko handaknyo indak dipahami sabagai panurunan moral, tapi labiah sabagai tuntutan pakambangan jaman. Indak koh tugeh pamimpin adaik jo agamo adolah mamaliharo pakambangan jaman nantun?