(46) Nan Mudo Nan Manih

Media-media di Indonesia indak pernah mangijokan mato saketek alah juo dari wakia rakyaik di Sanayan Jakarta. Manyuruak mancaliak video porno, nanpak juo dek media, mancilukuih pai ka lua nagari, basobok juo jo media. Kini, isi cupak panuah ka bawah, dihoyak pulo dek media. Sabana litak jadi wakia rakyaik ko, kemerdekaan ndak ado, kesenangan baitu pulo.

Kaba tarakhir dari media, rapor DPR merah. Sayang, media indak manjalehan panyabaik merahnyo rapor baliau-baliau ko. Karano itu, Udin, Amir, Iben, si politisi kadai kopi nak mancubo manarangan. Mudah-mudah, juadah Udin cs ko bisa jadi sitawa tapo di kapalo, si dingin panyajuak di hati nurani. Paliang indak, jadi pakalang palamak ota.

Malam ko, Amir, Iben, jo Udin lah duduak bak rajo nan tigo selo di kadai Tek Siah. Diibaraikkan jo rajo tigo selo karano katigonyo datang bapangiriang, pangiriang jalan carito. Amir datang sabagai pangiriang anak-anak sakola, Udin datang sabagai pangiriang guru-guru, Iben datang sabagai pangiriang wakia rakyaik/pamarintah.

“Halah, sia nan ka dulu ko?” sapo Udin mambukak carito sambia mancaliak ka arah Amir jo Iben nan sadang sibuk jo kopinyo masiang-masiang.

Sakutiko, kaduonyo tagalenjek bak ayam tamakan kajai. Namun, indak politisi namonyo kok ndak capek bisa manguasai kaadaan. Amir, si wakia anak sakola sugiro bukak suaro.

“Hmmm, karano titiak datang dari ateh, tantu nan di ateh nan mamulai. Jadi, langsuangan bana lah Ben” tembak Amir capek mancokok mariah Iben.

“E yayai yo, awak pulo nan dtembaknyo. Indak bisa. Kini ko jaman lah demokratis. Sagalonyo mambusek dari bumi” kilah Iben manggelek jo nada nan sarupo.

Kaduonyo nanpak saliang tulak-tulakan samo-samo mailak. Mancaliak tulak-ansua kaduo urang ko, Udin akhianyo maju maminteh. Kok dipadiakan, bisa habih wakatu dek acara tulak-ansua ko mah, pikia Udin capek.

“Pado baturo-turo juo, bialah wakden nan mulai” sarangik Udin sambia manggarutu.

“Hehehe, pambangih Udin mah. Tanang Din, dipaelokan selo saketek dulu ha” potong Amir capek nan disambuik jo galak ketek dek Iben. Lalu, sasudah mampaelokan selonyo, Amirpun sugiro malanjuikkan.

“Manuruik tamuan wakden Din, anak sakola wak kini lah santiang-santiang. Hasia UN bukti sahiahnyo. Di mano dinyatokan baraso naraco luluihnyo kini lah di ateh 95%. Baa gak hati? Ndak hebaik nan wakden iriang dek ang?” papa Amir nanpak bangga bana jo hasia tamuannyo ko.

Baa ka indak, kalulusan jo angko tenggih takah iko tantu bukan pakaro murah. Makonyo, sangaik layak untuak dibanggakan, pikia Amir dalam tanang.

“Kalulusan anak-anak ko ka paguruan tinggi baa?” tanyo Udin manindak-lanjuik.

Amir nan sabanta ko takalok jo kabanggaan nanpak agak tagagik. Namun, hanyo sakutiko, inyo langsuang manimpali.

“Kok itu yo ndak jaleh dek wakden do. Indak wilayah wakden lai” jawek Amir mangamukokan alasan coki duo lokang, mambela diri sarato mambela korop.

Mandanga jawek Amir ko, Udin langsuang diam. Pado mananyo baliak, ancak nan awak sajo lah disampaikan, pikia Udin kutiko itu. Karano itu, Udin langsuang mamapakan tamuannyo.

“Nan wakden ha. Iko tantangan guru. Isunyo UKG. Hasianyo mangacewakan, randah, hanyo antara 45-48%, papa Udin singkek tapi tapek. Sabaik, indak ado gunonyo dirantang panjang. Nasi lah jadi bubua, sabalun busuak ancaklah dilulua sajo dalam-dalam.

Sasudah diam sabanta, Udin lalu maarahan pandangannyo ka Iben nan manjadi pangiriang wakia rakyaik/pamarintah. Amirpun malakukan nan sarupo. Samintaro itu, Iben nan tasadar karano diparatian sugiro manyampaikan nan didapeknyo.

“Kalau wakden iko ha. Karano ujian sarupo UN, UKG tadi atau nan samacamnyo indak balaku urang-urang nan wakden iriangi. Makonyo, data den ambiak dari hasia surfei jo laporan panyimak sajo. Hasianyo, sangaik mangecewakan, hanyo kiro-kiro 30-35%. Merah pakek rapor ko hehehe”

Iben galak tempang di ujuang pamaparannyo nan diikuti dek galak sarupo dek kaduo konconyo. Sasudah agak mulai santai, Udinpun malanjuikan.

“Jadi, kito pangaan data ko lai?” tanyo Udin mamanciang paratian Amir jo Iben.

“Usah pikiakan bana Din. Rengkiang se lah. Kan indak juo ka ado pangaruahnyo do mah” sambuik Amir sambia manguok.

“Iyo Din. Rengkiang se lah langsuang” salo Iben maningkahi.

“Kok sapakaik kawan-kawan, aa juo lai. Rengkiang satu jaleh anak sakola ko, rengkiang duo guru, rengkiang kincik wakia rakyaik/pamarintah…” lanjuik Udin manyimpuakan sambia mancoret-coret karateh di mukonyo. Pamaparan ko langsuang disambuik jo galak kaduo konconyo.

“Hahaha, nan ketek nan hebaik sabananyo mah ndak?” sambuik Amir sambia galak nan langsuang ditingkahi dek Iben jo nan sarupo.

“Jadi, sabananyo bangso kito ko makin dituokan statusnyo makin lungga pangabeknyo. Bak takok-takokan Mak Ponde di surau dulu, "Cak si kican  aro-aro kandih, nan masak nan masan, nan mudo nan manih" 

"Hahaha” galak Iben bakuai-kuai maningkahi takok-takokan Amir sabanta ko. Sangaik babeda jo Udin nan hanyo senyam-senyum. 

Lalu, Udin nan indak sato galak ko nanpak masih sibuk mainok-inokan kasimpulannyo. Tibo-tibo, Udin maangkek kaduo tangan maagiah kode supayo diam ka Amir jo Iben. Sakutiko, kaduonyo langsuang diam.

“Ado isu hebaik nan nanpak dari kasimpulan sederhana kito tadi mah”

“Apo tu?” sambuik Iben jo Amir sarantak mamburu.

“Tantangan panyabaik masalah UN, UKG, jo rapor merah pakek wakia kito ko”.

“Iyo. Apo panyabaiknyo?”

“Kalau UN, karano komprehensif, tantu panjang sarato barek baban barajanyo”.

“Kok UKG?”

“Kok guru ko ndak ka jauah dari carito Umar Bakri do. Apolai nan di ateh 40 tahun. Jaankan mambali, mamacik computer sajo mungkin baru kutiko ka UKG tu. Tantu lah satereh dulu, baa pulo ka manjawek. Jadi, abih wakatu dek mamahami teknis ujian dari pado manjawek soal”

“Kok rapor merah DPR?”

“Ha, iko yo gak ganjia saketek. Baban baraja indak sapanjang baban baraja anak sakola do, baban pitih sarato fasilitas indak pulo sabarek guru-guru UKG do. Jadi….” Udin diam sajanak sambia mancaliak kaduo konconyo ko.

“Jadi apo Din?” salo Amir mamburu.

“Jadi, kasimpulannyo rapor merah ko adolah karano DPR ko lah tajangkik sindrom Mak Erot. Nan paralu hasia, logika jo proses kudian. Sabaik, baliau-baliau ko kan nan paliang acok pai sakola ka lua nagari sarato babaka dana gadang pulo lai. Tapi hanyo sabanta-sabanta. Kok urang baraja batahun-tahun untuak bisa baproduksi. Baliau ko cukuik samingu sajo, salasai UU ko. Takah Mak Erot ndak?” tanyo Udin di ujuang pamaparannyo jo mimik muko indak badoso.

“Hahahha, batua, batua. Salamo pitihnyo ado, apo salahnyo. Apolai kok untuk tujuan mulia, baraja, mujahid ko caritonyo hahaha”