(36) Mauji Madu

Udin, Iben, Amir kini mandapek julukan baru, yoitu politisi kadai kopi. Jadi, jikok mandanga kaba tantangan Udin jo konco-konconyo ko, ado tigo kato kunci nan wajik diingek; partama kadai, kaduo kopi, katigo politisi. Aratinyo, partamo, kaba tu pasti kabagalau, karano basisnyo di palanta kadai. Kaduo, kaba tu pasti hanyo pamanih muluik, karano nan sabananyo hanyo palamak minum kopi. Nan katigo, kaba tu pasti nan ka lamak dek paruik baliau-baliau sajo, karano baliau-baliau ko kan politisi, “si pengobral janji di meja kopi pada saat orang lain hampir mati”, kato rajo Ithaka.

Sore ko, katigonyo nanpak sibuk baturo-turo di dalam kadai. Nan jadi bahan iolah tantangan madu, buah tangan nan dibali Iben di lua sapangatahuan Amir kutiko baliak dinas dari Jakarta patang. Udin nan posisinyo indak mamihak kini maangkek kaduo tangan mancubo malarai, sarato mamintak paratian Iben jo Amir nan masih baturo-turo maribuikan kausalian madu ko.

“Hei, hei, danga lah! Manuruik carito nan wakden dapek dari Angku den nan pawang labah, untuak mauji madu nan asli atau indak, ado duo caronyo. Partamo, masuakan mesiu anak api-api ka dalamnyo, sudah tu, cubo gesekan. Kok amuah hiduik apinyo, berarti asli tu mah” papa Udin capek singkek padek.

“Oh, ” Hanyo iko bunyi nan kalua dari Iben jo Amir kutiko itu. Namun, indak lamo bana manunggu, Amir langsuang malanjuikan.

“Nan kaduo Din?”

“Nan kaduo, latakan kuniang talua ka ateh tadah galeh ko ha. Sudah tu masuakan madu tu gak sasendok. Kok masak talua deknyo, berarti asli madu ko mah” lanjuik Udin mamapaan.

Sasudah manutuik paparannyo, Udin baliak mancaliak kaduo konconyo ko. Iben nan punyo madu nanpak sarupo urang nan kabinguangan. Samintaro itu, Amir nan memang biaso jadi tukang hoyak, langsuang tagak antenenyo mandanga pamaran Udin di muko ko.

“Kalau bitu Din, artinyo madu Iben ko musti diuji dulu ko, supayo nak jaleh asli indaknyo” ambok Amir sarupo urang bamain ban karombol. Bapura-pura manembak Udin, sabananyo manembak talingo Iben.

Sasuai jo alamaiknyo, tembak kali ko nanpak tapek manganai sasaran. Sabaik, Iben langsuang marespon jo muko agak merah.

“Eits, jan salah yo. Madu ko madu Banduang mah, Mir, tantu asli manihnyo takah padusi-padusi Banduang. Baitu kecek cewek nan manjua tu ka wakden”

“Ee yayai, dari maa pun asanyo atau siapopun nan maambiak kan indak masalah. Nan jaleh, kok nak tau jo ancak bareh, tantu kalau lah dimasak manjadi nasi. Kan baitu Din?” lanjuik Amir sambia manggutiak Udin. Udin hanyo maangguak-angguak ketek sambia mancabuik jangguik jarangnyo jo pitih darai 500 rupiah.

Maraso tatantang dek madu kabanggaan nan jauah-jauah dibalinyo di Banduang dilecehkan kaduo urang ko. Iben jadi indak punyo pilihan. Iben langsuang mambukak panutuik lubang boto madu labahnyo nan tabuek dari karah.

Mancaliak iko, Amir, si tukang ambok langsuang maimbau Tek Siah.

“Tek…Tek...”

“Yooo….wakden di balakang. Manga tu?”

“Lai ado talua?”

“Lai, sabanta yo”

Di ujuang jawek ko, dari baliak pintu balakang nanpak Tek Siah masuak sambia mausok-usokan tangannyo nan basah ka celemek nan malilik di pinggangnyo. Baitu sampai di dalam, Tek Siah langsuang mananyo Amir.

“Apo dek ang? teh talua atau talua saparo masak?”

“Indak tek, bao se talua matah tu kamari”

Tek Siah nanpak mangarinyikan kaniang sabalun mamanuhi kainginan Amir ko. Sambia bajalan maambiak lalu maantaan talua ka meja Amir Tek Siah bapikia. Ka dinonoh matah-matah koh lah talua ko dek si Amir?

Baitu sampai di muko meja, Iben nan indak sanang kasahiahan madunyo diragukan kaduo konconyo ko langsuang maningkahi.

“Etek, duduak di siko dulu jadi saksi. Kami ka mauji madu ko ha” parintah Iben nan langsuang dituruik Tek Siah takah jawi kanai atua.

“Lah. Saksi lah ado ha. Uji lah sasuko kalian” lanjuik Iben sambia maangkek tangan ka arah Amir. Amir nan kanai tunjuak baliak madok ka Udin.

“Udin lah nan mauji. Ilimu uji-mauji tadi kan dari inyo” gelek Amir bakilah manembak Udin.

Mandanga iko, Udinpun langsuang mangaluakan anak api-api dari kotaknyo nan dari tadi talatak di ateh meja. Amir, Iben, Tek Siah mamparatian lakek-lakek kalakuan Udin nan kini nanpak mamasuakan ujuang mesiu ka dalam boto. Salanjuiknyo, ujuang mesiu basah inyo gosokan ka karateh panggosok. Katigonyo mamparatian sambia mambulalangan mato.

“Tessss….” baitu bunyi nan kalua diiringi jo nyalo api nan nanpak malu-malu cangok.

Iben nanpak sanang bana, hiduangnyo langsuang mangarik-ngarik patando bangga karano madunyo luluih ujian partamo. Samintaro itu, Tek Siah nanpak indak bakijok manahan raso takajuiknyo.

“Baa Mir?” tanyo Iben manyindia Amir.

“Halah, itu kan ujian partamo baru. Masih ado ciek lai, nan ka talua kan alun lai” baleh Amir sok tageh walau jo suaro agak tagagik.

Mancaliak gujalo nan bisa mamanciang karuah ko, Udin, si tukang uji sugiro maminteh.

“Baa? Ka dilanjuikan ko?” tanyonyo sangajo mambaliakan paratian kaduo konconyo ko.

“Iyo lah” potong Amir capek.

Udinpun mulai mamacahan talua ayam kampuang nan tadi dimintak dari Tek Siah. Talua tu salanjuiknyo dimasuakan ka dalam tadah bakeh latak kopi. Di ujuang karajonyo, Udin nanpak manyiraman sasendok teh madu ka ateh kuniang talua tadi.

Udin, Amir, Iben Tek Siah nanpak mambulalangi tadah ko manunggu reaksi nan tajadi akibaik patamuan madu jo talua. Saluruh mato indak bakijok kutiko lambek-lambek bagian kuniang talua nan kanai madu mulai barubah warna manjadi agak mamutiah.

Sakutiko, Iben langsuang mandorongan kapalo Amir nan tapek ado di mukonyo jo talunjuak.

“Baa? Lah wakden kecekan. Madu ko madu asli, madu Perhutani, dari Banduang pulo lai” lanjuik Iben sarupo urang nan sadang manumpahan sakik hati.

Amir hanyo galak tempang sambia maalihan caliak ka arah Tek Siah nan nanpak masih mamparatian talua di ateh tadah.

“Aa juo nan bacaliak lai tu Tek?” sapo Udin nan langsuang ditingkahi Iben.

“Padia se lah. Baliau ko kan lah lamo manjando ko, tantu lah lupo jo talua saparo masak ko hahaha” galitik Iben nan langsuang disambuik jo galak saisi kadai, tamasuak tek Siah nan digalakkan. Baitu galak taujuang, Tek Siahpun langsuang manyalo.

“Manuruik wakden, nak rang ko lah dialua Si Udin ko kasadonyo” Tek Siah mangecek sambia mancaliak Udin jo galak ketek. Udinpun mambaleh jo galak nan sarupo.

“Baa kok bitu kecek Etek?” tanyo Amir jo Iben sarantak takah dikomando.

Mancaliak pareman baduo ko penasaran, Tek Siah bukannyo manjawek, malah mancaliak baliak ka arah Udin saolah-olah mamintak restu.

“Taranganlah Tek, pado kadai Etek pulo nan disimbang urang baduo ko beko hehehe” baleh Udin samakin manyintak raso panasaran kaduonyo. Mato Amir jo Iben jadi bolak-baliak, sakali mancaliak Udin, sakali mancaliak Tek Siah. Nanpak roman panuah harok di wajah kaduonyo manunggu kalanjutan ciloteh Tek Siah. Sadar ditunggu, Tek Siahpun sugiro malanjuikan.

“Hehehe, mauji asli indaknyo madu tu murah se nyo Ben. Suruah bao pulang dek si Amir dulu, caliak reaksi bininyo sudah itu. Kok inyo hampehan pintu atau nyo pacahan piriang, barati asli madu tu mah, hahaha” galak Tek Siah di ujuang pamaparannyo nan disambuik galak tekekeh-kekeh saisi kadai. Di salo galak, tadanga kuai Tek Siah sayuik-sayuik sampai.

“Apolai madu ko madu Banduang pulo, ndak Din? hahaha”