(8) Sayang Anak, Sayang Lah Baranak

Udin dikunjuangi baliak dek konco palangkinnyo, Amir. Judulnyo, kunjuangan kenegaraan. Disabuik kunjungan kenegaraan, sabaik kunjungan ko adolah untuak mampakuaik hubungan bilateral antaro duo tampek tumpah darah, yoitu Padang jo Lubuak Linggau. Maklum, bini kaduonyo adolah padusi Lubuak Linggau. Tantu raso sanasib sapajuangan baliau ko, samo-samo jauah pandakian Lintas Sumatra ko rasonyo, hehehe.

Pado kunjuangan nan sudah-sudah, lah masak duo juadah. Partamo “Tokjer juo Wakden Ruponyo”, kaduo “Kandak Paja”. Mudah-mudahan, pado kunjungan nan kini ko, masak juolah juadah baru. Walau indak takatokan, sungguah itulah pinto Udin dalam hati, manggantuang dalam pikiran.

Lain misi Udin lain pulo nan di bininyo. Si Mirna dari tadi nanpak sibuk surang di balakang. Nanpak bana indak saba nak manjamu urang kampuangnyo, si Nyunyun. Karano itu, walau urangnyo alun tibo, juadah lah dilirikan Mirna di ruang tangah sarupo urang nan ka maadoan alek jamuan. Udin hanyo bisa geleang-geleang kapalo mancaliak ulah bininyo ko.

“Tit…tit…tit”

Sakutiko, kasibukan Laki bini ko dikajuikan dek suaro klakson Honda nan tadanga cukuik lakek di talingo. Kaduonyo langsuang mambukak pintu. Di muko paga nanpak si Nyunyun susah payah maabehan paruik ganduiknyo kutiko turun. Sadangkan lakinyo si Amir nanpak sadang mambukak paga supayo hondanyo bisa masuak.

Baitu sampai di muko pintu, Udin jo Mirna langsuang mampasilahkan kaduo tamunyo ko masuak sarato manduduakan di muko juadah nan lah tahidang.

“Cubo lah Da, Nyun. Wakden nan mamasak mah” baso-basi Mirna sambia mambukak tutuik saluruh hidangan. Sakutiko, ruangan langsuang disakaki dek baun harum nasi bareh “sokan”.

Namun, usahkan mulai manyanduak nasi, Amir malah manapuak tangan Nyunyun nan lah singgah di ikua bada.

“Eits, tunggu dulu. Kok hanyo mancubo, usah lah yo. Kok mahabihan, amuah Den. Paruik dek lapa ko ha” lanjuik Amir diiringi jo galak gadang sambia indak lupo maminjek sarato manggatok bada nan tadi dikakok dek bininyo.

Mancaliak galak Amir sarato aia muko Nyunyun nan tangango ndak picayo jo ulah lakinyo sabanta ko, Udin jo Mirna indak bisa manahan diri untuak sato pulo bagalak-galak.

“Hahaha….”

Sasudah “pamanasan” sabanta jo bagalak-galak, kaduo pasangan mudo ko langsuang sibuk jo hidangan sarato capak masiang-masiang. Kapalo jambo “tribol main bola” langsuang licin jo wadah-wadahnyo. Maklum, Amir jo Udin adolah panggilo menu nan ciek ko.

Samintaro itu, Mirna jo Nyunyun nanpak bagulambek meminjek goreang ayam saketek-saketek. Kaduo padusi ko nanpaknyo tamakan bana jo pituah Udin minggu lalu. Kecek Udin, padusi hamil harus bagulambek kalau makan bia nak jan prematur lahia anak beko. Sabaik, jikok amaknyo panggageh, anaknyo tantu baitu juo, “becik ke titik olo ke toro” kecek urang Jawo, “aia tuturan jatuahnyo ka palimbangan juo” kecek urang Minang, papa Udin sok filosofis kutiko itu.

Sasudah salasai acara makan-mamakan. Si Nyunyun jo si Mirna nanpak sibuk mamacik paruik masiang-masiang sambia bacarito.

“Mirna, anak Den ko laki-laki nanpaknyo mah” kato Nyunyun mamulai curhat sambia mausok-usok paruik ganduiknyo.

“Baa kok bitu?” jawek Mirna mamaratian tingkah Nyunyun lakek-lakek.

“Lincah bana. Acok bana manendang-nendang. Takah pamain bola ko ha” lanjuik nyunyun makin basumangaik mamapakan tingkah calon anaknyo.

“Oh, berarti anak Wakden cewek mah yo? Soalnyo, saulah ko bana ha. Garaknyo lunak barirama, takah urang manari” baleh Mirna ndak namuah kalah sambia mausok-usok paruik ganduiknyo pulo.

Mandanga ciloteh duo urang padusi nan baru mancubo hamil ko, Udin langsuang takekeh-kekeh malapehan galak.

“Hehehe, caliak lah Mir. Lah bi santiang Ibu-Ibu hamil ko banujum” salo Udin nan disambuik Amir jo galak sarupo.

Maraso tasindia dek galak kaduo laki-laki ko, jiwa emansipasi Mirna jo Nyunyun langsuang manggalagak.

“Halah, digalakannyo awak Nyun!” ambok Mirna sambia madok ka Nyunyun sarupo urang mamintak bantuan. Si Nyunyunpun langsuang bukak suaro.

“Awas yo! kalian Bapak-Bapak ko kalau lah lahia anak ko nantik…” ancam Nyunyun sangajo manggantuang kato.

“Awas apo?” sonsong Amir jo suaro manggaretek karano barusaho manahan galak.

“Kalau lah lahia anak ko nantik. Ndak ka kami hidangan makan takah kini ko lai do” lanjuik Nyunyun manjalehan nan disambuik jo angguak tando pasatujuan dek si Mirna.

Mandapek jawek sadis dari duo padusi ko, Amir langsuang tadiam ndak bakutik co rajo nan kanai skak mati. Amirpun akhianyo mamutuihan maaliahan pandangan mamanciang bantuan Udin. Namun, usah bantuan nan didapek, urang bamanuang malah nan diharoknyo.

“Hoi, tolonglah ha. Awak kanai karoyok, nyo haniang se” hariak Amir purak-purak bangih sambia manapuak paho Udin nan nanpak sibuk mahisok rokoknyo.

Baa pulo si Udin ko, inyo nan mamulai cakak, awak nan nyo suruah maju manyalasaikan, garutu Amir dalam hati nan langsuang direspon Udin jo galak ketek.

“Hehehe. Sori Mir. Iko ha, ado tanyo nan mangganggu pikiran Den”

Mandanga iko, katigo urang nan sadang baturo-turo ketek ko langsuang tadiam. Sagalo paratian langsuang tatuju ka arah Udin.

“Apo nan tapikia dek Uda?” sonsong Mirna capek ndak bisa manyuruakan raso panasaran.

“Iyo Din” salo Amir jo Nyunyun manimpali.     

“Iko ha. Mandanga garah kudo kalian tadi, langsuang timbua tando tanyo dalam kapalo den” mulai Udin jo aia muko sungguah-sungguah.

Mirna nan memang paliang ndak bisa saba, langsuang manyonsong mamintak kalanjutannyo.

“Apo?”

“Kalau lah baranak bisuak, maa nan labiah sayang awak ka bini/laki dari pado ka anak?” lanjuik Udin sarupo urang nan batanyo ka diri surang.

Mandanga tanyo ko, Amir, Nyunyun, sarato Mirna langsuang manguok manumpahan raso kecewa.

“E yayai, kecek wak kok apo pulo” daceh Mirna sarupo urang nan patah sumangaik.

Samintaro itu, Amir jo Nyunyun takekeh-kekeh indak dapek manahan galak. Maso pulo tanyo murah takah itu sajo ka mangganggu kapalo pulo, gumam Amir dalam hati. Tapi, bia nak lamak suasana ko, Amir akhianyo marespon juo.

“Tantu lah labiah sayang ka anak lai Din” Jawek Amir jo suaro panjang nan diiriangi jo angguak kaduo padusi nan ado dalam ruangan.

“Nah, dek lah mangiro jawek kalian ko, makonyo wakden jadi tagamang” sambuik Udin capek baliak mamanciang paratian katigo urang ko.

“Baa kok bitu kecek Uda?” tanyo Mirna sakutiko.

“Iyo Din, baa kok bitu kecek ang?” salo Amir jo Nyunyun sato pulo maningkahi.

“Lah, ko khusus ka Ibuk-Ibuk sajo dulu. Kalian jawek tanyo Den jujur-jujur yo, ndak buliah protes do” lanjuik Udin co guru nan maagiah patunjuak manjawek kutiko ujian.

Mirna jo Nyunyun langsuang maangguak patando satuju. Samintaro Amir hanyo gawuik-gawuik kapalo tanpa protes, walau indak dibao sato.

“Kok lah lahia anak ko bisuak. Lai buliah cewek sabalah tu manggendong anak kalian?” tanyo Udin sambia manunjuakan tangannyo ka sabalah.

“Tanyo apo pulo ko” kaluah Mirna di ujuang tanyo Udin.

“Eits, jawek sajo lah, ingaik janji di muko” sapo Udin baparingaik.

“Tantu lah la-i” jaweh Mirna jo Nyunyun sarantak tapi satangah hati.

“Mamaluak?”

“La-i”

“Manyium?”

“La-i”

Mandanga jawek nan tarakhir ko, Udin langsuang basorak sarupo urang kagirangan. “Yes”. Mirna, Nyunyun, jo Amir langsuang mangarinyikan kaniang karano kabinguangan maliek tingkah Udin ko. Namun, kabinguangan ko lai sabanta, karano Udin langsuang malanjuikan jo ungkapan nan labiah mambinguangkan.

“Mantap ko mah Da. Kalua juo SIM ko” lanjuik Udin sambia mangijokan mato ka arah Amir.

“Mukasuik ang Din?” baleh Amir apo adonyo karano memang indak mangarati jo mukasuik Udin.

“Jadi, kalau lah baranak bisuak, awak buliah manggaduah tetangga Uda nan manih-manih tu nantik mah” papa Udin manjalehan nan langsuang disambuik Amir jo galak takekeh-kekeh.

“Hahaha, iyo, iyo”

Kaduo laki-laki ko sakutiko sibuk mamacik paruik manahan galak sambia saliang maacuangan tunjuak sarupo urang main tembak-tembakan. Samintaro itu, kaduo Ibuk hamil langsuang manyalo karano indak mangarati jo galak kaduo laki-laki ko.

“Eits, ambek sabanta. Kok bisa ka situ larinyo?” potong Nyunyun manahan galak Da Amirnyo.

“Lah. Kecek kalian tadi, kalau lah baranak, pasti labiah sayang ka anak pado ka kami. Nah kalau urang nan labiah disayangi sajo buliah dipaluak jo dicium urang lain, tantu nan kurang disayangi takah kami-kami ko buliah pulo dipaluak jo dicium dek cewek sabalah tu hahaha” galak Amir nan lansuang disambuik jo piciak sarato galak nan sarupo dari bininyo.

Kaduo pasang laki bini ko langsuang laruik jo galak sambuang manyambuang. Indak taraso, lah Magarik pulo hari. Kaampeknyo langsuang antri manuju kamar mandi, bawuduak lalu manunaikan sumbahyang Magarik. Carito buliah ka maa-maa, nan wajik jan sampai tingga.