(47) Mampolitikan Dangdut, Mandangdutan Politik

Amir jo Udin adolah duo urang panggilo dangdut. Mulai dari dangdut India, dangdut Indonesia, sampai ka dangdut campua sari, indak ado nan talewaik dari buku harian kaduonyo, tarutamo Udin. Karano itu, kutiko ado isu sarato wacana PKB nan ka malewakan Bang Romanyo jadi calon presiden, Amir jo Udin langsung girang indak kapalang.

Malam ko, kaduonyo lah duduak baduo di kadai tek Siah. Kadai nan lah jadi basis politisi kadai kopi ko. Tujuannyo tantu lah indak ka jauah-jauah dari isu di muko, mamasyarakaikan pancalonan Bang Roma jadi calon urang nomor satu di Indonesia. Samintaro itu, untuak mampalancar acara ko, kaduonyo indak lupo maundang Iben. Urang nan salalu mancimeeh kaduonyo sarato Bang Roma idolanyo.

“Tau ndak kalian motif bang Roma kalian tu mancalon?” tanyo Iben mambukak balabeh mamanciang paratian kaduo konconyo ko. Alhamdulillah, panciangannyo ko manyangkuik. Kaduonyo langsuang marespon sarantak sarupo urang paduan suaro sajo.

“Tantu lah la-i”

“Apo kok iyo?” lanjuik Iben capek manyonsong.

Mandanga iko, Udin mamuta kapalo madok ka Amir. Indak ancak sasamo tim sukses saliang mandahului, pikianyo. Jadi, madok ka Amir ko adolah samacam code baraso Udinlah nan ka manjawek tanyo nan iko.

“Giko Ben. Misi bang Rhoma ko sangaik filosofis. Di antaronyo; mahilangan sagalo kabiasaan-kabiasaan buruak nan mambuaik masyarakaik saroman waang ko indak lai disabuik sarok balai alias sampah masyarakaik. Kok bang Roma naiak, mulai dari nan suko judi, mira santika, sampai ka nan suko bagadang, habih kanai rapun ka sado alahnyo mah” papa Udin sambia mancaliak mato Iben sarupo urang nan barusaho untuak mayakinkan.

Namun, usahkan angguak balam patando kasapahaman nan didapek. Udin malah mandapek galak cimeeh dari Iben.

“Hahaha, cipokut tu mah. Memangnyo negara ko republik dangdut. Nan nyato-nyato lah”

Mandanga jawaban Iben nan sangaik malecehkan ko. Darah kopi dangdut Udin jadi manggalagak. Namun, sabalun inyo manjawek, Amir lah manyorong mandahului.

“Indak manyimak paja ko do Din” sonsong Amir maminteh Udin. Sambia manyalai rokok nan gak tapuntuang, Amirpun malanjuikan.

“Ndak ang danga kutiko bang Roma manjalehan baraso visi misinyo lah lamo inyo sebarkan Ben?

“Lai lah. Kok indak, maa pulo ka talok dek wakden malawan kalian baduo nan nyato-nyato Rhomakers ko” sambuik Iben saketek retoris.

“Nah, Bang Rhoma ko kan dai nan badakwah malalui nyanyi. Berarti, referensi paparan baliau tantangan visi misi nan alah disebarkan tu tantulah isi dari lagu-lagu nantun. Waang sajo nan indak manangkok” sangik Amir manutuik pamaparannyo.

“Jadilah kok yo bitu. Tapi, bagi wakden, nan sabananyo ndak mungkin nan itu do” sambuik Iben balagak malunak.

“Nan ma juo lai, kalau  ndak itu?” sonsong Udin capek sambia mangode Amir jo suduik mato. Tantunyo kode ko indak sapangatahuan Iben.

“Manuruik wakden, visi misi nan sabananyo bang Rhoma kalian ko adolah mancabuik baleh ka SBY” jawek Iben jo suaro lunak namun bak patuih tungga di talingo kaduo konconyo ko. Kaduonyo, Udin jo Amir jadi saliang pandang sarupo tukang panciang tamakan umpan. Niaik nak manjarek urang, ruponyo awak nan tacakiak.

“Halah...baa kok ka SBY pulo painyo?” kaluah Amir talompek baitu sajo indak bisa ditahan.

Mandanga iko, Iben langsuang galak senggeang sambia mamuta kapalo madok ka arah Udin.  Mancaliak Udin nan mancaliak pulo jo muluik tangango, Iben maraso indak punyo pilihan.

“Giko lah. Visi misi sabananyo adolah karano SBY lah marabuik ANI dari inyo. Lupo koh kalian baduo baraso bang Roma pernah mangecek, “ini semua aku lakukan demi cintaku kepadamu AAANNNNIIII, cinta yang suci”. Hahaha, galak Iben manutuik jaweknyo.

Kaduo konconyo nan dari tadi mamparatian jo muluik tangango, tasambua pulo indak bisa manahan galak.

“Hahaha, iyo juo yo. Iyo baluik kawan ko, sabana licin, hahaha”.