(5) Tokjer Juo Wakden Ruponyo

Baru ampek hari nan lalu datang bakunjuang, manginap, bacarito sapueh-puehnyo. Hari ko, si Amir jo bininyo Nyunyun baliak datang bakunjuang. Iko tantu mambuek hati Udin jo Mirna, pasangan Maropulai jo Anak Daro baru ko jadi batanyo-tanyo. Mancandu bana pareman baduo ko datang ka siko, indak mangarati saketek alah juo. Baitu gumam kaduonyo dalam diam nan indak mungkin takatokan.

Di sampiang itu, Udin dulu rasonyo lah pernah baparingaik baraso 3 bulan partamo Udin jo Mirna indak ka mambukaan pintu untuak tamu. Iko diagiah hati malah mintak jantuang, dibukakan sakali, inginnyo duo kali. Ee yayai yo, hati Udin mangato sambia garuik-garuik kapalo.

Namun, sungguahpun co itu, ciloteh antaro duo Maropulai jo Nak Daro baru ko tataik sajo sarupo biaso. Rami, takah pasa pabukoan nan baru bukak. Saketek di carito banyak di galak-galak. Kutiko itu, si Nyunyun nampak mangganti topik carito sambia mamasang rono muko sungguah-suangguah.

“Mirna!” saponyo kutiko itu.

“Apo Nyun?” jawek Mirna sambia mangarinyikan kaniang.

Baitu mandapek jawaban dari Mirna, Nyunyun lalu mancaliak sakileh ka arah lakinyo. Si Amir nanpak langsuang mambaleh jo maangguak takah urang nan tau bana jo isi hati nan nio dicurahkan dek bininyo ko.

Mancaliak angguak ko, Nyunyunpun malanjuikan.

“Takah iko Mirna ha. Kutiko bakunjuang ka siko kapatang ko. Sabananyo, ndak ado niaik Kami nak manginap. Namun, mancaliak badan Kau nan takucak. Raso padusisme Wakden langsuang tapanggia. Makonyo, Wakden putuihan untuak manginap agak samalam. Harok Den nak manamukan sasuatu atau mandanga carito nan barangkali manjadi panyabaik takucaknyo badan Kau tu” urai Nyunyun tageh sabalun diam sabanta untuak maambiak angok.

Samintaro itu, Udin, Mirna, jo Amir sibuk mamparatian si Nyunyun manunggu kalanjutan carito.

“Karano indak mandapek apo-apo. Di rumah, kami baduo saliang baradu kiro, maagak-agak apo nan tajadi jo Kau. Hasianyo, Kami sapakaik datang ka mari baliak sambia mambao iko” kato Nyunyun manutuik caritonyo sambia mangaluakan plastik ketek dari dalam tasnyo.

Baitu plastik ko tibo di tangannyo. Mirna langsuang takajuik, apo pulo iko, pikianyo dalam hati.

Sarupo urang nan mangarati jo nan ado di pikiran Mirna, Nyunyunpun langsuang manarangkan.

“Itu tu alaik untuak mancaliak kaduangan. Kami curiga, jaa-jaan Kau sadang maisi, hehehe” galak Si Nyunyun sambia mangode lakinyo jo suduik mato.

Mangarati kalau bininyo mintak bantuaan. Amirpun sugiro turuik bukak suaro.

“Iyo Mirna. Jadi, kami manginap baliak di siko, nio mancaliak hasia tes kajamban kau bisuak pagi, hehehe”

Udin nan dari tadi diam manyimak manih akhianyo bukak suaro maambek rancana tes ko jo babagai alasan. Sabaik, tes ko lah mulai manjurus ka nan kumuah-kumuah. Maso aia kajamban ka dites, nan indak-indak se, harus dipinteh ko, pikia Udin. Namun, dek dalianyo kalah kuaik, tapasolah Udin diam mangamek-ngamek. Dalam hati inyo bakato,

“Kok iyo, gawat mah. Alamaik ka sabanta bana Wakden jadi Maropulai baru”.

Barisuaknyo, takah urang paduan suaro sajo, kaampeknyo kuok sarantak basamo-samo. Si Nyunyun langsuang manggiriang Mirna ka kamar mandi. Samintaro Udin manunggu jo parasaan harok-harok cameh.

Tibo-tibo, tadanga suaro pakiak nan diiringi jo suaro galak si Nyunyun dari dalam kamar mandi. Satibo di lua, inyopun langsuang mancaliakkan alat tes ka Uda Amirnyo.

“Hahaha”

Baitu mancaliak, Amir langsuang galak takekeh. Kaduo laki-bini ko lalu manyalami Mirna nan nanpak masih binguang, ndak mangarati jo galak urang baduo ko.

“Salamaik Mirna. Kancang jalannyo, garihnyo jaleh pulo. Lah jaleh mah, lah barisi Kau mah” lanjuik si Nyunyun kutiko manyalami Mirna baduo lakinyo.

Mancaliak pamandangan ko, Udin hanyo garuik-garuik kapalo. Hatinyo bakacamuak antaro picayo jo indak. Karano itu, inyopun akhianyo bukak suaro.

“Ndak picayo Wakden do. Alaik tu bisa sajo salah mah” bantah Udin lapeh baitu sajo mambuek katigo urang ko sarantak mamuta kapalo mancaliak ka arah inyo.

Bak urang nan paham bana jo parasaan Udin kini ko, Amir langsuang mandakek manyalami sambia manjujai pinggang Udin.

“Salamaik bro, usah pangetek hati palapang ikua takah iko, hahaha” katonyo sambia galak jo mangijok-ngijokan mato mambuek Udin salah tingkah.

“Kalera, bukan masalah itu do Mir...” sambuik Udin tagagagik manyuruakan malu.

“Halah, tau Wakden pangana Ang mah. Karajo kareh Ang nio diharagoi kan? hahhaha” lanjuik Amir jo galak nan makin manjadi mambuek Udin panja-panja-i ndak tau jawek.

Akhianyo, dek maraso indak badayo. Udin pun pasrah sambia sato bagalak-galak, walau jo muluik tempang sarato suaro nan indak lapeh.

Namun, sungguahpun coitu, jauah di dalam hati nan badariak-dariak, Udin manyimpan rapek-rapek raso sanangnyo. Dalam hati pulo, Udin mangato sambia galak-galak surang.

“Tokjer juo wakden ruponyo, hahaha”.