(23) Bakuah Maajan Tuah

Nanpaknyo Iben ka manatek di kampuang lai. Samanjak bakasus malanyau urang di pasa pagi Banduang, aruah marantau Iben sabana pudua. Baliau langsuang mancilukuih pulang kampuang. Maninggakan masalah nan antah baa kini panyalasaiannyo.

Kini, dek lah samingu tingga di kampuang, Iben mulai nio malebakan sayok mananpakan gunonyo. Lah muak inyo mancaliak parangai anak-kamanakan di kampuang nan makin lamo makin manjadi.

Masalah ko pasti duo sajo panyabaiknyo, pandidikan nan randah sarato paminpin nan lamah. Kalau Iben nan baru sajo pulang dari rantau bisa mancaliak, indak koh basarok mato pamuko-pamuko masyarakaik ko mancaliak kaadaan nanko, pikia Iben mangkritisi kapamimpinan adaik nan manuruiknyo harus batangguang jawaik ateh sagalo nan tajadi.

Badalia kaprihatinan sarato niaik nan suci untuak mampaelokan kampuang ko, Iben barancana nak mangatuak pintu hati anak-anak mudo nan ado. Caronyo, dibueklah patamuan di surau, dibukak carito di situ, dikaka galeh di sinan. Maklum, awak kan pernah marantau, tantu maraso labiah dari urang-urang kampuang ko. Jadi, apopun galeh nan ka dikaka, pasti ka rami urang mambali, apolai nan ka manolong manjojoan.

Akhianyo, tibo juolah kutiko nan dinanti-nanti Iben. Hari Kamih malam Jumaik, sasudah Magarik, ramilah urang-urang datang ka surau mamanuhi himbauan Iben. Sasaklah surau ketek ko, bak padati saraik dek muatan.

Mancaliak kapa lah panuah dek panumpang, tampa baso-basi, Iben langsuang mambukak balabeh.

“Assalamu alaikum”.

“Waalaikumussalam”.

Bak paduan suaro, urang nan hadir sarantak manjawek salam sambia mamuta kapalo ka arah datangnyo salam. Sadar urang banyak mancaliak, Ibenpun langsuang senyum-senyum ketek bakuliang sarayo maangguak-angguak ka tiok panjuru sarupo urang mamintak ijin. Lalu, sugiro mambukak carito jo baso-basi.

“Ehm, Dunsanak-Dunsanak sakalian. Tarimo kasih ateh kadatangannyo mamanuhi himbauan ambo. Mukasuik ambo mangumpuakan Dunsanak di surau kito ko adolah karano ado rundingan nan ka ambo katangahkan”.

Kutiko Iben maambiak angok untuak malanjuikkan caritonyo, tibo-tibo dari suduik kida ado suaro manyalo. Si Amaik ruponyo nan mangecek.

“Maaf Da, nan biasonyo ha, barundiang ko sudah makan, paliang indak minum kopi lah” keceknyo manyalo.

Ujuang suaro ko langsuang disambuik dek angguak sarantak bakuliliang. Malah ado pulo nan manambahkan jo gurau lapau. Tapi, suaronyo sajo nan tadanga, urangnyo indak jaleh.

“Kok ka maota-ota kariang sajo ancak lah di rumah jo bini surang-surang lai”, baitu bunyinyo kiro-kiro mambuek saluruh nan hadir indak dapek manahan galak.

Walaupun bisa manyuruakan muko merah manahan diri, namun Iben indak bisa mahilangan talingo nan tibo-tibo sajo taraso angek. Maklum, awak kan urang nan lah baliak dari lawuik nan sati sarato rantau nan batuah, ndak biaso jo garah parewa-parewa kampuang cando kini ko.

Akhianyo, Iben tapaso mangaruak saku, manyuruah babarapo anak surau nan ditugehan jadi panitia mambali sarato mambuek kopi.

Baitu kopi tahidang, nanpak mulai gak tanang urang-urang nan hadir ko.  Lalu, si Gamaik, salah surang nan nanpak labiah tuo dari Iben langsuang bukak suaro.

“Ben. Laluan banalah rundingan nan ka Angku sabuik di muko. Bia nak samo-samo kito caliak ruponyo, samo-samo kito danga bunyinyo. Tarago angin lai tanang, tarago angku Amaik lai sadang saulah ko, hehehe”.

Mandanga namonyo disabuik. Amaikpun langsuang mancaliakan tinju ka arah Gamaik. Lalu, inyopun bukak suaro.

“Dek lah sajalan alua jo patuiknyo, yo lah bisa dimungkinkah mah Da Ben. Lahiakan bana lah lai” sambuang Amaik sambia mangambangan tangan suoknyo ka arah Iben patando mampasilahkan.

Mandanga iko, Ibenpun langsuang manyampaikan sagalo nan tapikia nan alah inyo susun di kitab ketek basampul kulik hitam mangkilek nan salalu nyo bao ka manopun pai. Isinyo umumnyo adolah curhat sarato kagalauan Iben sabagai mantan urang rantauan mancaliak kaadaan generasi mudo nagarinyo nan lah jauah dari nilai-nilai. Mulai dari nilai moral sopan santun hinggo ka nilai moral susila.

Indak tangguang-tangguang, pandapek angku Iben kopun langkok didukuang jo teori dari ahli-ahli dari sagalo panjuru dunia. Yo bana-bana padek atok kato Iben ko sahinggo ndak ka ado rasonyo pandapek nan ka bisa manirihkan. Apolai dek kato Gamaik, Pakiah kampuang, sarato Amaik politisi kadai kopi.

Pado bagian akhia uraiannyo, Ibenpun mamapakan ubek nan lah inyo sugirokan. Ubek ko tadiri dari duo sajo; nan partamo ubek sapu jagat, kaduo ubek sapu lidi. Ubek sapu jagat adolah ubek untuak marombak saluruh tatanan kamasyarakatan, khususnyo AMPEK JINIH, KAN, SURAU nan manuruik Iben indak lai sapangkek jo jaman nan alah maju. Sadangkan nan kaduo, ubek sapu lidi adolah ubek nan dilakukan jo sumpah sati ateh namo ALQURAN untuk manjalankan norma adaik nan alah disasuaikan Iben jo nilai-nilai kamajuan jaman modern.

Mandanga rundingan nan dikatangahkan Iben ko. Tamanuanglah saluruh nan hadir bak kanai sihir. Maklum, Iben ko kan urang panggaleh, tantu caro panyampaian katonyo baduduak bak orator. Kato cintonyo mambaco Shakespear, kato bancinyo mambaco Hitler, kato jiwanyo mambaco Dewey, filosofinyo mambaco Hegel, Marx, Kant, Russeau, sarato lain-lainnyo. Sia nan ka talok mambantah? Pudualah panji-panji urang nan hadir. Ruangan jadi haniang sarupo jauah bana dari suaro.

Tibo-tibo, Angku Gamaik nan marupokan salah satu tokoh agamo mambaranikan diri angkek suaro.

“Ambek saketek angku Iben” katonyo sambia maangkek tangan.

“Apo tu Gamaik?” sambuik Iben mampasilahkan.

“Manuruik ambo, lai ndak talalu jauah bana rundingan nan angku katangahkan tadi tu?” lanjuik Gamaik jo bahaso nan hilang-hilang timbua.

Mandanga iko, Iben indak langsuang maagiah jawaban. Talabiah dulu inyo mamuta kapalo mancaliak bakuliliang. Sasudah itu, baru suaronyo kalua.

“Manuruik ambo, itulah pasa nan biaso mah Gamaik. Indak koh sakali aia gadang sakali tapian barubah. Lah tibo masonyo kito marubah caro-caro adaik nan lah indak sasuai jo kadaan kini. Wakden lah pai marantau ka mano-mano, ka daerah-daerah nan maju, nan ka kito lakukan ko alah manuruik pasa nan biaso mah. Jikok kito lai nio maju” jawek Iben mantap langkok jo siasaik manutuik pintu masuak bia ndak ado paluang untuak masuaknyo bantahan pambandiang.

Mandanga Pakiahnyo dikabek jo salemo takah iko, Amaikpun bukak suaro.

“Bari Ijin ambo mangecek Angku Iben”.

Iben hanyo mauluakan tangan patando ijin tampa mangaluakan suaro. Amaikpun sugiro malanjuikkan.

“Bukannyo wakden balagak cadiak-pandai, apolai kapado angku Iben, urang nan lah baliak dari rantau nan batuah. Wakden hanyo sakadar maningkahi, nak basilang kayu di tungku, nan hiduik juo api rundiangan ko”

“Silahkan angku Amaik, usah cangguang-cangguang” sambuik Iben capek. Kanai bana hatinyo jo caro Udin mangecek.

“Giko angku Ben ha. Kok manuruik wakden, masalah nan tajadi pado generasi mudo kito ko adolah karano rono lah hilang dek panyakik, tuah lah hilang dek misikin mah”, lanjuik Amaik apo adonyo, sasuai jo nan inyo tamui sahari-hari.

“Mukasuiknyo?” sonsong Iben jo kaniang mangaruik.

“Daun baringin koto ko indak lai labek cando saisuak. Usahkan ka mamayungi nan di bawah payuang di lingka cupak, nan sapayuang sapatagak sajo lah tunggang tanggiak managakkannyo. Apolai, lurah di kampuang ko lah banyak nan indak babatu. Baa ka managah aia hilia?”.

Mandanga pamaparan iko. Baputa-puta raso kapalo Iben. Indak Baraka paja ko, pikia Iben. Maso di forum manggunokan bahaso nan ndak layak coiko. Namun, Iben tatek bausaho mamahami sarato manunjuakan ciri kreatif rantaunyo.

“Makonyo Din, dari kini, kito adoan sarato tata-ulang batu lurah tu. Kito tagakan baliak baringin koto tu” jawek Iben santai nan langsuang disambuik jo galak urang bakuliliang.

Awanyo, Ibenpun sato galak. Namun, dek ado nan galak co urang bakuai-kuai sarato mancaliak ka arahnyo, Iben jadi salah tingkah. Apo nan den sabuik tadi? Pikianyo mancubo mangingaik-ngingaik, kok ado nan lawak dari kato-katonyo.

Mancaliak Iben nanpak kabinguangan, Amaikpun langsuang bukak suaro.

“Angku Iben, dek Angku lai sadang badaun rimbun. Tolong-tolong lah manaduhi nan di Koto Pili, ndak ado Tunganai di sinan surang juo do tu. Jando-jando mudo lai banyak pulo nan butuah daun tampek bataduah mah” ciloteh Amaik nan langsuang disambuik dek urang bakuliliang jo galak bakuai-kuai.

Taraso jo kacarobohannyo, muko Iben langsuang mamerah manahan malu. Niaik maajan tuah, ruponyo cirik nan tasumbua.