(2) Nak Babini II

Mandanga Udin lah babini, Amir konconyo kutiko sakolah pun jadi taragak. Barang ko sabananyo lah lamo punyo niaik, tapi salalu patah di jalan. Maklum, awak si Bungsu, gaekpun lah ndak ado kaduonyo. Tantu raso ndak ka tadayuang biduak ketek ko.

Namun, dek hati lah ndak tatahankan. Dipiliahlah konco sabagai tumpuan tanyo. Baa aleknyo kapatang, baa prosesnyo, dan nan paliang utamo, tantulah tantangan pambiayaannyo.

Di baliak pambalakangan itu, sabananyo, kakak-kakak alah manyawak juo dari dulu. Tapi, manimbang kadaan kakak-kakak ko juo, raso ndak ka lamak hati Amir. Untuak kaluarga nyo sajo, lah tunggak-tanggiak inyo mancari, apolai ka untuak Awak.

Baitulah wacano nan tabantuak di kapalo Amir nan mamasonyo bausaho mancari info surang. Apolai, mangingaik umua, kok ditahan juo, lah ka raso-raso karam di tapi biduak ketek ko. Karano itu, indak babaso-basi lai, malam ko juo Amir langsuang manalepon Udin, konco palangkinnyo.

“Kring…kring…kring…Maaf, nomor yang Anda hubungi sedang berada di luar jangkauan”.

Baitu suaro nan tadanga di ujuang dariang, sabalun talepon tu mati surang. Namun, indak Amir namonyo kalau ndak ka mancubo maulang sakali lai.

Dek pintak lai ka balaku nanpaknyo, indak sio-sio usaho kali kaduo ko. Baru sajo bunyi dariang sakali tadanga, langsuang di ujuangnyo manyambuang suaro nan dituju.

“Assalamu alaikum. Huk…huk…huk” suaro salam bairiang batuak tadanga dari talepon.

“Waalaikumus salam. Bato kawan, lamo bana angkeknyo mah” Jawek Amir langsuang basarato jo umpatan.

“Hahaha, Waang takah urang nan indak mangarati sajo” galak Udin di subarang sambia mangamukokan alasan. Lalu, Udin pun malanjuikan.

“Ehyo, lupo Wakden, Waang kan alun lai, hahahaha” galak Udin makin manjadi di ujuang keceknyo. Galak ko bukan galak biaso, galak mampaolok-olokan Amir.

Tapi, sungguahpun nanpaknyo marasai jadi tumpuan olok-olok, hati di dalam Amir justru bacahayo. Lai coitu juo olok-oloknyo, aratinyo, lai ndak maraso tagaduah si Udin ko do ko, pikia Amir dalam diam.

“Hoi, kok ka haniang-haniang se, tutuik se lah talepon ko”, tadanga suaro berang dari talepon mambuek Amir tagalenjek.

”Hahaha, sori, takananang Wakden mambayangan alasan Ang cako ha”.

“E yayai, mangalamun we-e. Makonyo, pacapek lah lai bia nak fokus” lanjuik Udin baciloteh makin manjadi.

“Ha, yo itu nan ka Wakden tanyoan ka Waang”, sambuang Amir maningkahi co jahik manikam jajak.

Mandanga jawek nan iko, galak Udin langsuang baranti. Niaik baolok-oloknyo langsuang suruik. Nanpaknyo, cameh juo Udin ko, takuik olok-oloknyo lapeh kontrol sahinggo malah mambuek sumangaik kawin kawannyo ko mamudua.

Pendek carito, Udinpun langsuang manunjuakan kasungguhannyo.

“Mantap lah nyo, kok iyo lai itu. Baa caritonyo?” tanyo Udin basumangaik.

“Baiko Din ha. Wakden nio batanyo tantangan acara alek Ang patang?” baleh Amir nanpak masih babaso-basi.

“Alhamdulillah lancar” jawek Udin santai.

“Syukurlah. Baa supayo bisa lancar baitu?” buru Amir mancari tahu.

“Yo, namonyo Awak ka baralek, tantu ditamui nan patuik dituruik. Tarutamo wakia Niniak Mamak jo Wakia Rang Sumando”

“Nah,itu nan Den takuikan ha” tingkah Amir capek indak bisa manyuruakkan katakutannyo.

Mandanga iko, Udin langsuang tagalak.

“Hahaha, gadang sarawa. Apo pulo nan Ang takuikan?” tanyo Udin salanjuiknyo.

“Nan partamo, dana Den rasonyo kurang, nan kaduo, kabanyo, payah baurusan jo Niniak Mamak ko. Banyak bana cik minyaknyo”, papa Amir takah urang nan lah bapangalaman bana baurusan jo Niniak Mamak.

“E yayai, dari ma pulo Ang dapek info tu. Kalau lai ndak ado masalah Waang jo calon Ang tu, aman sajo nyo tu. Nan paralu kini, Waang tamui dulu baliau-baliau tu”, pinteh Udin capek.

Sabaik, manuruik Udin, iko adolah pamikiran nan indak baiak, harus dipatah. Maso pulo alun pai lah babaliak. Apolai iko lah muncua pulo sangko-sangko nan indak-indak.

Namun, walau lah dipinteh, Amir tataik taguah bapantang suruik.

“Soal pitih tu baa dek Ang? beko nyo suruah turuik iko turuik itu, sadiokan iko-itu mode alek gadang. Panianglah Den dikabek hutang kasudahannyo” sanggah Amir karano masih indak pueh jo pamaparan Udin. Sabaik, babeda bana carito Udin ko jo kaba nan inyo dapek.

“E yayai, alun pai lah babaliak Ang mah. Pulanglah dulu, bia nak jaleh urusan ko. Caritoan kaadaan waang ka Niniak Mamak tu apo adonyo. Kalau Waang turuik elok-elok, yakin Wakden, pasti mangarati baliau-baliau tu mah” jaleh Udin mayakinkan jo nada nan mayakinkan pulo.

“Apo iyo?” tanyo Amir antaro picayo jo indak.

“Danga yo. Kutiko Wakden manuruik Niniak Mamak kapatang ko. Banyak bana rasonyo palajaran nan bisa den ambiak. Misanyo, kutiko niaik lah Den sampaikan. Baliau langsuang batanyo, kulansiang apo alek Kito ko? Buliah nak jaleh pulo langkah-langkah nan ka Mamak ambiak salanjuiknyo, tarang baliau-baliau tu” Udin manjalehan sambia bakisah maagiah dorongan ka kawannyo nan nanpak galau dek info nan sumbang.

“Kulansiang? Apo pulo tu?” sambuik Amir binguang tapi mulai tapanciang.

“Kecek baliau. Kulansiang alek ko ado tigo; partamo kulansiang batu/hari, kaduo kulansiang bulan, katigo kulansiang matohari” lanjuik Udin sangajo manyampaikan info nan mayakinkan guno manutuiki sangko-sangko buruak Amir di muko.

Alhamdulillah, panciangannyo ko nanpaknyo lai manganai. Amir nanpak makin manjadi raso ingin tahunyo.

“Apo hubungannyo jo kaluahan Wakden tantangan biaya tadi?”

“Lah, kulansiang ko adolah jinih alek manuruik kamampuan kito. Jikok Kito bataruih tarang ka baliau-baliau ko. Baliau akan mamiliahkan sarato manyusunkan alek nan cocok untuak kadaan Kito. Kulansiang batu/hari jikok Kito hanyo nio basadakah manjamu urang sambia badoa sajo. Kulansiang bulan jikok kito nio maundang urang-urang nagari. Kulansiang matohari jikok kito nio maadoan alek gadang”, papa Udin panjang-leba.

“Oh, baitu”.

Hanyo iko jawaban nan kalua dari muluik Amir di sampiang kapalonyo nan turuik maangguak-angguak.

Maraso Amir lah mulai mandapek saketek pancarahan. Udinpun langsuang manyasakkan. Bia nak jan barubah pulo kapalo paja ko beko, pikia Udin basiasaik.

“Makonyo, pulanglah Waang dulu. Tamui Niniak Mamak jo Sumando tuo Ang. Baa ka baa, ndak ka salasai dek Awak urusan ko do ko. Apolai Awak urang kampuang. Adaik Minang kan alah baparingaik, nan Awak ko cuma ijab-qabul, nan kawin ko sabananyo baliau-baliau tu lah jo urang-urang nan samo dari pihak padusi Ang”.

“Oh, jadihlah kok baitu. Bisuak Wakden pulang. Tapi, Ang tunggu Den di kampuang ha. Taragak pulo Den nak basurah jo Waang” jawek Amir sambia mamintak dukungan ka konconyo ko.

“Ap….cek…ang...ko…ha. Ndak….leh...do...ap…ip…up…op…hahaha”, tadanga suaro-suaro aneh dari talepon. Namun, anehyo, suaro galak di akhir sangaiklah jaleh di talingo.

“Cimporong paja ko mah. Kutar” Umpek Amir manutuik talepon sambia galak-galak ketek.

Baa ka baa, lah mulai agak lapang sasak nan salamo ko nyo tampuang surang di dalam dado. Dalam hati Amir mangato, ado banyak anak-anak mudo di rantau nan bapikia sarupo Wakden tadi. Alah babaliak sabalun pai, alah manilai sabalun tau.