(7) Kandak Paja Tu Mah Da!

Udin langsuang mambuduik kutiko sanjo sapulang dari karajo manamukan bininyo masih takulai juo di ateh kasua. Tadi pagi kutiko barangkek, nyonya ko masih bakalumun di baliak salimuik. Sore ko, kutiko pulang bantuaknyo baitu juo. Yo lah gawat ko, pikia Udin dalam rusuah nan indak takatokan.

Sadar mancaliak muko lakinyo nan nanpak karuah. Mirna mancubo manjaniahkan. Sasudah mancuci muko ka balakang, inyo langsuang mambuekan kopi. Lalu, jo mamasang muko manih inyo mahidangkan ka muko Udin nan sadang sibuk mamencet remot TV. Kutiko Udin mancaliak, inyo langsuang bukak suaro.

“Kopi Da” saponyo sambia mangatangahan galeh.

“Sia nan mintak kopi?” jawek Udin sarupo urang nan indak ajan. Namun, sungguahpun coitu, tangan baliau ko diam-diam manjujuik kopi ko ka sabalah suok manjauhi posisi si Nyonya.

Mancaliak iko, Si Mirna nan sabanta ko mandapek jawek buruak jo muko buruak, indak bisa manyuruakan galaknyo.

“Manga galak Kau?” tanyo Udin baitu tau si Mirna malengah manyuruakan galak.

“Indaklah” jawek Mirna sangajo malunak sambia manahan galak.

Sakutiko, kaduo laki-bini ko diam sambia mamparatian acara TV nan indak jaleh. Sabaik, Udin nan mamacik remot, takah ABG alias Abak Baru Gaek nan mandapek HP baru sajo. Sibuk mamencet satiok tombol.

Sasudah pueh jo kalakuan aneh ko, Udin lalu bagolek sambia malatakan remot di ateh dadonyo.

“Mir! Lai aman Kau?” tanyonyo jo suaro mulai malunak.

Mirna takajuik mandanga tanyo Udin nan tibo-tibo ko. Sangkonyo Udanyo ko ka mogok mangecek, dek mukonyo masih mambuduik juo.

“Aman Da. Uda nan gak lain nanpak dek wakdennyo” jawek Mirna apo adonyo. Tapi co coki duo lokang, uweh-uweh lapeh tanyopun tajawek tapek.

Mandanga jawek baujuang ko, Udin langsuang maangkek kapalonyo saketek mamparatian Mirna.

“Tadi kutiko Wakden pai, Kau takulai di kasua. Pas pulang, baun kasua juo kau baru. Baa ndak ka takah basahan lambok bantuak Wakden jadinyo?” lanjuik Udin mamapakan kaadaannyo.

Mandanga uraian singkek Udin ko, si Mirna langsuang mausok-usok hiduangnyo. Mahindari reaksi biologis ko caritonyo. Sabaik, siapopun urangnyo, pasti akan bareaksi hiduangnyo kutiko maraso tasanjuang. Makonyo, nak jan nanpak kalau hiduangnyo mangambang, si Mirna sangajo mausok-usok hiduangnyo kutiko mandanga alasan diplomatis Udin sabanta ko.

“Hoi, haniang se kau!” Hariak Udin sambia manapuak ikua bininyo ko.

“Eh, iyo. Kapalo Den paniang, dari pagi tadi lah 4 kali muntah” jawek Mirna tagagik-gagik.

“Oh, ubek Kau lai Kau minum?” lanjuik Udin malunak.

“Lai”

“Makan?”

“Alah”

Mandanga jawaban nan tarakhir ko, Udin langsuang tagak mamareso ka balakang mancari piriang kumuah. Walaupun basobok jo barang nan inyo cari, Udin ruponyo alun pueh juo. Inyo langsuang ka dapua mambukak Magicom. Mancaliak hanyo ado ciek bekas jajak sendok makan di ateh nasi, Udin langsuang geleang-geleang kapalo.

“Amai kau. Kau kicuah Wakden yo? Kok sasendok ketek ko ndak makan namonyo do ko. Manambah cirik gigi tu mah” umpek Udin sambia bajalan ka tampek Mirna duduak.

Si Mirna nan indak manyangko baraso Udanyo ko ka SIDAG, jadi tauntok-untok mancari jawek.

“Baiko Da ha” jaweknyo tagagik-gagik.

“Apo nan baiko-baiko” potong Udin capek sambia mamonyongan muncuangnyo ka arah Mirna.

Maraso tadasak sarato ndak punyo tampek jatuah nan ampuak. Mirna akhianyo pasrah sambia manakua.

“Hoi, jaweklah!” lanjuik Udin sambia manyalai rokoknyo.

Sasudah mancaliak sabanta, si Mirna akhianyo mancubo juo maagiah jawek.

“Yo, tiok diisi muntah juo. Baa pulo caronyo?” jawek Mirna mangamukokan alasan.

“Tu ndak diisi-isi?” potong Udin sacapek kilek.

Mandanga keceknyo dibantah tagak-tagak. Jiwa emansipasi Mirna jadi bangkik. Babaka panggilan jiwa ko, Mirnapun malanjuikan.

“Uda ndak marasoan tantu iyo. Tanyo lah urang dek Uda kok indak mode iko urang manganduang!” lanjuik Mirna padek.

“Apo pulo ka Wakden tanyoan ka urang? Indak juo ka taraso dek Wakden do” sambuik Udin ndak amuah kalah.

Sadar jo kondisi ego Udin ko, Mirna akhianyo mandaceh sambia mangaluakan sanjato pamungkasnyo.

“E yayai yo. Itu nan dikecekan urang jo kandak di dalam. Kandak paja ko mah Da” lanjuik Mirna maingaikan Udin.

Namun, usahkan malunak, malah makin manjadi Da Udinnyo ko.

“Amai Kau. Alun lahia anak Den lah kau kecekan maagiah pangaruah buruak ka Kau. Sumbarang se Kau mah.

Kini, baiko se lah. Kau nan ka diagakan dek paja tu, atau Kau nan maagakan inyo?” jawek Udin maakhiri aksi berangnyo jo tanyo nan mangguncang Mirna.

Udin lalu tagak maambiak handuak manuju kamar mandi. Samintaro itu, Mirna tadiam dalam duduaknyo. Hatinyo bakato-kato, “batua juo yo? Manga pulo disabuik kandak paja kadaan Wakden nan ndak amuah makan ko? Bukankah iko reaksi normal tubuah Den dek parubahan hormon nan tajadi?”

Bapikia sarupo iko, Mirna jadi tadiam. Inyo taringaik ka bacaan nan pernah nyo baco. Katonyo, mandidik anak ko dimulai dari rahim. Kalau parihal nan indak baiak sarupo indak amuah makan, atau nio mangga nan dicilok dikecekan kandak paja. Tantunyo iko samo sajo jo mangambianghitamkan anak surang. Tantunyo pulo, kito lah mulai mandidik anak indak jo rahim (cinta), tapi jo caro-caro nan indak baiak.