Pidato Pasambahan Takziah II

Di dalam lingkuangan karajo ataupun lingkuangan rantau, tantunyo acara takziah dilelokan jo caro nan indak samo jo di kampuang-kampuang. Biasonyo, hanyo ado samacam sapatah kato dari ahli warih jo siding takziah. Karano itu, barikuik, ambo cubo mangatangah sabuah contoh sapatah kato dari ahli warih jo sidang takziah.

Ahli Warih

"Tantangan almarhum/mah, lah sakik badan baliau. Sakik bak raso ka mambunuah, patah bak raso ka maringkek. Sakik lah kami carikan ubek, damam kami saikkan limau. Namun, bak dalia nan mangato, kullu ummatin ajalun, satiok umaik ado katantuan aja. Balakulah pituah panyakik nan saratuih ganok, ubek saratuih aso, aso nan datang dari Allah. Lah pacah lampu barantai, pacah ditimpo dek layangnyo. Sukek panuah janjian sampai, arwah lah pulang ka nan punyo. Baatu nyo kini, malalui sagalo sidang takziah kami pintokan rila jo maaf. Kok ado capek lidah nan takatokan, capek tangan nan tajangkauan, capek kaki nan talangkahan dari almarhum/mah. Kapado dunsanak sakalian, maaf ambo pintokan. Di baliak pambalangan itu, jikok ado sakironyo barek nan ndak tapikua, ringan nan ndak tajijinjiang dek almarhum/mah samaso hiduik bamasyarakaik. Malalui sagalo sidang takziah kami pintokan, mintak ahli warih diagiah tahu. Kok bisa bakandak hati, mudah-mudahan pinto lai ka buliah kandak lai ka balaku. Paliang indak, kok barek samo-samo kito pikua, ringan samo-samo kito jinjiang". Sasuai jo pituah nan tasabuik, “kalilawa di pulau rambang, anak ruso mati badabiah, kok gawa dapek ditimbang, kok doso ampun nan labiah”

Sidang Takziah

“Tantangan kami ateh namo sagalo sidang takziah, sabalum kaki dilangkahkan tangan diayunkan manuju rumah tanggo nanko.  Lah taniaik di dalam hati untuak basadakah kaji jo doa kapado almarhum/mah sarato sanak sudaro nan ditinggakan. Pinto kami kapado Allah, mudah-mudahan baliau nan alah mandahului kito, salamaik samparono sampai ka rahmatullah. Kok sulik dapeklah kamudahan, kok sampik dapeklah kalapangan. Salanjuiknyo kapado kaluarga nan ditinggakan, dibari juolah handaknyo kakuatan jo kasabaran. Dek sabab karano itu, sarantak jo ayunan tangan jo langkah kaki kami di muko, lah baluluah sagalo salah sarato gawa jo karilaan dan pamaafan.  Baitu juo sabaliaknyo, kok ado salah jo gawa dari kami ateh namo sidang takziah, kami nak mintak maaf jo karilaan pulo malalui kaluarga nan ditinggakan”.