(19) Nak Podo Main Ko

Dek maingaik hari rayo lah dakek. Udin jo Amir baniaik nak pulang kampuang gak duo tigo hari. Barila-rila jo urang kampuang, tarutamo jo guru sarato Mamaknyo, Mak Ponde si biran tulang. Sore ko, sasudah sumbahyang Ashar, kaduonyo babonceangan pulang maracak Honda. Kaluarga ditingga, sabaik pandeka bungsu Amir, si Boby agak mandamam.

Baitu sampai sarato duduak maota-ota di rumah adiak di kampuang, tadanga suaro abang Magarik dari surau. Kaduonyo langsuang manuju asa suaro guno Magarik bajamaah. Sasudah itu, sasuai jo mufakaik awa, Udin jo Amir langsuang bagageh manuju rumah Mak Ponde.

Sapuluah meter sabalun pintu. Kaduonyo lah mulai batuak-batuak ketek, maagiah tando ka urang rumah baraso ado tamu nan ka masuak.

Baitu sampai di pintu, tadanga pulo suaro batuak dari dalam mambuek kaduo urang ko indak jadi manokok pintu. Karano, baitu bunyi batuak baranti, pintu rumah langsuang tabukak. Di mukonyo tagak mak Ponde batopang jo tungkek batang paraweh.

“Waang Din?” tanyo mak Ponde sambia mamatuik-matuik.

“Iyo Mak, wakden mah, baduo jo si Amir ha” jawek Udin sambia maju baduo Amir manyalami gaek ko.

Sasudah basalaman, Mak ponde langsuang mamapah kaduo tamunyo ko ka dalam. Mampasilahan duduak, lalu balalu ka balakang maambiak aia.

“Yo aia putiah se nyo nak rang ha. Wakden ndak mangopi lai do. Dilarang angku dotor”

“Halah, sakik Mak tu?” tanyo Udin taparangah.

“Iyo, kecek Angku Dotor tu, wakden harus baranti mangopi dulu”, jawek mak Ponde sambia mancucuakan aia ka dalam galeh.

“Hohhh, memangnyo sakik apo mamak tu?” salo Amir sato pulo mancari tahu.

“Ha, itu nan aneh. Dotor tu indak pulo tau do”, jawek mak Ponde santai sambia mampaelokan selonyo.

“Halah, tu manga pulo nyo larang mak mangopi?” buru Amir nanpak indak pueh jo katarangan mak Ponde cako.

“Keceknyo, urang tuo takah wakden ko, panyabab sakiknyo biasonyo tigo sajo nyo. Makanan, rokok, kopi. Tapi, anehnyo wakden nyo suruah baranti mngopi jo marokok se nyo, kok makan lai indak do” urai mak Ponde panjang leba manarangan keadaannyo.

“Hehehe, kok makan nyo tagahan pulo, mati wak nyo Mak” potong Udin nan disambuik Mak Ponde jo Amir jo galak gadang.

“Hahaha”

Baitu galak taranti, mak Ponde pun mulai malanjuikan kisahnyo.

“Hei, tau nak rang ndak?”, tanyo mak Ponde jo suaro lunak sarupo urang nan takuik ado urang lain nan mandanga.

“Apo tu mak?” sambuik pareman baduo ko sarantak kaheranan.

“Dari sagalo amanaik dotor tu, nan wakden turuikan cieknyo, mangopi ko. Kok rokok, tetap den hajar taruih”

“Baa kok bitu?” tanyo Udin mangarinyikan kaniang.

“Maso pulo kecek angku dotor tu sajo nan ka den turuikan, samintaro salero den, wakden cakiak. Nah, bia nak podo main ko. Ciek den turuik, ciek indak. Aratinyo, ciek dek inyo, ciek dek wakden” lanjuik Mak Ponde mambuek galak kaduo pareman ko tasambua baliak.

Sasudah pueh bagalak-galak. Amir maambiak inisiatif, mancubo mambukak carito nan sabananyo.

“Tapi, manuruik wakden Mak ha…”, keceknyo sangajo manggantuang guno mamanciang paratian Mak Ponde.

“Tapi apo Mir?”, baleh Mak Ponde sambia mamuta caliaknyo ka muko Amir.

“Nan rokok tu Mak, sabananyo iyo harus mak hantian mah. Karano, mamak lah batuak-batuak pulo tadanga dek wakden tadi” lanjuik Amir agak tagugu. Gagik inyo mancaliak mato gaek ko.

“E yayai, kambiang den kanai batuak pulo kini mah ha. Ndak ado sikua juo nan marokok do tu”, baleh Mak Ponde santai mambuek Amir indak bakutik.

Mancaliak Amir nan mati kutu, Udin langsuang mangode jo lambaian tangan. Jo mak Ponde ko usah serius-serius bana, baitu kiro-kiro pasannyo. Sabaik, kok serius, duo sajo nan ka tajadi; partamo, baliau batuak tiok sabanta, kaduo kuok tiok sabanta. Sia nan ka basalero bacarito jo sambutan takah itu?

Makonyo, pado karuik pulo kaniang mamikiakan baliau. Elok kito bagalak-galak sajo. Siapo tau, dek hati gadang, sumangaik baliau jadi tinggi, panyakik pun untuang-untuang jadi sagan maronggohi.