(22) Urang Bagak

Dek diamuak parasaian, Iben, surang dari babarapo konco palangkin Udin baniaik mampajauah rantau. Kalau sabalunnyo di Jakarta, kini nyo cubo marambah Banduang. Di Jakarta, susah ditangguang surang, indak ado tampek mangadu, apolai ka mahutang. Samintaro, kalau di Banduang, banyak rang kampuang nan maadu untuang. Kok taereang pariwuak ketek ko, lai ado juo rasonyo tampek ka batenggang. Ikolah nan ado dalam kapalo Iben kutiko mamutuihan pindah ka Banduang.

Hari ko hari kaduo Iben di tanah Pasundan. Sasudah samalam maminta nasihaik ka nan tuo-tuo, Iben diajak dek Codoik manggaleh ka pasa pagi. Disabuik pasa pagi, karano memang pasa ko hanyo dari jam 5 sampai jam 9 pagi. Karano itu pulo, jam satangah limo subuah, Iben jo Codoik lah tibo mawujuik langkok jo sagalo barang-barang nan diparalukan. Niaik samulo dari rumah, pagi ko, Codoik nak manyuruah Iben maisi tampek surang anak galeh, urang Jawa nan  sadang pulang kampuang pai setoran.

Baitu sampai di tampek nan dimukasuik, tanyato, tampek tu lah diisi urang baru. Lapiak lah nyo kambang, galehpun lah nyo kaka di ateh lapiak nantun. Mancaliak iko, Codoik nan alah cukuik tanamo di antaro anak-anak galeh sugiro maju mancaliakan mantaginyo. Sasudah basilek lidah babarapo patah, urang baru nan alah mambantangan lapiak ko langsuang suruik. Jo muko saketek masam, inyo langsuang mangamehan barang-barangnyo.

Sambia mamparatian urang baru nantun mulai malipekan lapiaknyo, Codoik mandakek, manapuak bahu, lalu bapasan ka diri Iben.

“Lah Ben, elok-elok manggaleh yo. Wakden induak limau urang di siko mah. Jadi, kok ado apo-apo, tamui se wakden capek. Tampek den di ujuang tu ha”, pasan Codoik sabalun maninggaan Iben.

“Tarimokasih kawan”, jawek Iben sambia mancaliak pungguang Codoik sampai mahilang diguluang karamaian.

Indak lamo balalu, Ibenpun mulai mangambangan lapiak di subalah paja tadi nan kini masih sibuk mamasuakan galehnyo ka dalam karuang.

“Alhamdulillah”, gumam Iben jo suaro lunak sambia mamulai mangakakan galehnyo di ateh lapiak.

Samintaro itu, urang baru tadi, nanpak sibuk mangabek-ngabek sambia mangecek surang jo bahaso Sunda nan indak dimangarati Iben saketek alah juo. Walau indak mangarati, talingo Iben tatek nyariang ikuik manyimak. Siapo tahu, inyo sadang manpacaruik-caruikan awak, gumam Iben dalam hati.

Sasudah salasai mangamehan barang-barang. Si anak baru nanpak tagak mamacik pinggang, lalu mancaliak ka arah Iben. Ibenpun kutiko itu sadang mancaliak ka arah inyo.

“Kang, isuk, enjing-enjiang ka dieu nya”, saponyo sambia mancaliak lakek ka arah mato Iben.

Mandanga iko, indak angin-indak hujan, darah Iben tibo-tibo langsuang manggalagak. Anjiang-anjiang busuak keceknyo? Berarti wakden baduo Codoik nan dipaanjiangannyo ko mah. Ka wakden buliah, tapi jan cubo-cubo ka Codoik, dewa panolong den, gumam Iben dalam hati. Napasu lianyo langsuang mambarontak ndak takandali, angoknyo manyasak, kakinyo langsuang malayang manyipak jo mandongkak. 

“Ciatttt, bak buk bak buk”.

Sairiang kakinyo lakek, tangannyo pun bapantang tingga, sato pulo malakekan tinju batubi-tubi. Basitungkin inyo manangani jo mangkaki si anak baru ko. Anak-anak galeh bakuliliang langsuang jadi tangango. Indak manyangko kawan nan dibao Codoik sabanta ko ka sagilo iko bana. Apo bana kok lah salah paja tu, hinggo langsuang dilanyau nyo cando itu?

Namun, dek sagan jo Codoik juo. Babarapo urang nan mancaliak langsuang mamisahkan. Sabagian lai capek balari mamanggia Iben.

Baitu situasi mulai agak tanang, Codoik nanpak tibo jo angok sasak karano balari sajo dari tampeknyo manggaleh. Inyo langsuang manyibakan urang rami, lalu mancaliak ka arah Iben nan sadang tagak pinggang disabaan urang.

“Manga Ben?” tanyonyo baitu sampai di muko Iben.

“Bacakak. Sakik hati den mancaliak paja tu ha” jawek Iben sambia manunjuak lawannyo nan taduduak diagiah minum dek babarapo urang.

“Manga kok bacakak ang?” lanjuik Codoik indak pueh jo jawek Iben sabanta ko.

“Tapi lah den kecekan. Hati den ndak sanang mancaliaknyo” baleh Iben asa ka manjawek sajo.

Mandanga jawek nan asa ko, Codoik langsuang mahiruik angok. Mangka bana hatinyo sabananyo mancaliak gaya Iben ko manjawek. Tapi, dek paham kalau Iben ko memang temperamen. Inyo tapaso manahan diri.

“Mukasuik den Ben. Baa kejadiaanyo? Buliah nak jan kanai ang beko dek patugeh pasa ko”, sambuang Codoik basiasaik mancari tahu.

Mandanga namo patugeh pasa ko, Iben langsuang tabayang jo rupo-rupo sanga patugeh nan dulu pernah manertibkan inyo kutiko manggaleh di Tanah Abang. Aruahnyo langsuang manyuruik.

“Ondeh, sampai pulo masalah ko ka patugeh ko?” respon Iben jo muko nan tibo-tibo sajo manjadi pasi.

“Kok ado nan malapor tantu iyo. Makonyo ang caritoan ka wakden kini juo baa kajadiannyo. Bia bisa den bana-an ka patugeh-patugeh tu beko”, baleh Codoik manduduakan masalah.

Mandanga iko, Iben langsuang mancaliak Codoik lakek-lakek. Lalu, inyo mulai bacarito.

“Baiko ha. Tadi pas waang pai, wakden langsuang mambantangan lapiak jo mangaka galeh. Lalu, mungkin dek maraso indak sanang karano tampek ko den pakai. Nyo bae bacaruik-caruik. Nyo paanjiang-anjiangan wakden” urai Iben mamapakan kajadian manuruik nan di inyo.

Codoik hanyo diam mandanga sambia maangguak-angguak. Indak manjawek sapatah juo. Karano itu, Ibenpun malanjuikan.

“Waang kan tau bana jo wakden Doik. Kalamahan den ko kan memang itu, pararah, murah bana paneh. Sadang mancaliak urang nan agak lain sajo gaya caliaknyo, wakden bisa sajo langsuang tasingguang, apolai kok dipacaruikan takah itu?” lanjuik Iben agak maibo, maharok Codoik mamahami kondisinyo.

Mandanga uraian agak maibo-ibo ko, Codoik masih sajo diam. Sasudah bapikia sarota manimang-nimang sabanta, barulah Codoik mangode Iben. Manyuruahnyo untuak tatap diam di tampek.

Samintaro itu, Codoik baputa maaliahan pandang manamui lawan Iben nan kini nanpak duduak di ateh karuang barang dikawani dek babarapo anak galeh lainnyo. Codoik nanpak manyalami urang-urang tu lalu mulai saliang baargumen. Sabanta-sabanta inyo malengah ka balakang mancaliak ka arah Iben. Kadang inyo malengah, mancaliak, lalu manunjuak mambuek Iben harok-harok cameh.

Sasudah kiro-kiro sapuluah minik balalu, Codoik babaliak manamui Iben nan kini nanpak duduak di ateh lapiak galehnyo. Kaki suaknyo maunjua, kaki kidanyo nyo lipekan mambantuak sagi tigo. Lutuik di ateh jadi panopang tangan nan nanpak sadang mamatiak rokok. Baitu sampai di tampek Iben duduak ko, Codoik langsuang berang-berang.

“Memangnyo apo keceknyo ka waang tadi sahinggo langsuang ang lanyau inyo?” tanyo Codoik sambia bakacak pinggang.

“Tapi lah den kecekan, dipaanjiangannyo wakden” jawek Iben jo kaniang mangaruik.

“Memangnyo lai mangarati waang jo baso Sunda tu?, paja tu se Sunda totok, keceknyo, inyo mangecek ka waang pun pakai baso Sunda” lanjuik Codoik manyasak Iben.

“Kalau sadonyo iyo indak do. Tapi kalau nan pas inyo manyabuik anjiang tu, jaleh bana dek wakden mah. Malah, ado kato busuak pulo tambahannyo kalau ndak salah mah” urai Iben mambela diri.

“Ka-lau ndak sa-lah?” sambuik Codoik capek sambia mambulalanganan matonyo.

“Tantu iyo. Wakden ndak mangarati bana jo baso Sunda do mah” baleh Iben apo adonyo.

Mancaliak ulah Iben nan masih kareh angok ko, Codoik taniaik nak maulang kato-kato nan manuruik lawan tadi adolah kato-kato nan nyo sabuikan ka Iben, sabalun inyo kanai permak.

“Apo iko keceknyo ka waang? Isuk, enjing-enjing ka dieu kang?”

“Ha, iyo itu, ndak ado bunyi anjiang jo bunyi busuaknyo dek ang tu ha” sambuik Iben capek sambia manunjuak-nunjuak sarupo urang nan manamukan sasuatu dari kato-kato Codoik sabanta ko.

“E yayai, capek lah mintak maaf ka sinan ha”, baleh Codoik sambia manyipak kaki kida Iben nan sadang manjongkek.
Iben langsuang tagalenjek dek kasaimbangannyo tagaduah. Baitu duduaknyo samparono baliak, inyo langsuang maajukan protes.

“Manga pulo kok wakden nan ka mintak maaf. Inyo nan salah mah”, kilah Iben ndak satuju jo saran Codoik ko.

“Jadi, urang nan ang tinju dek gara mangecek, “bisuak gak pagi ka siko Da”, itu nan ka den suruah minta maaf ka waang?” baleh Codoik sambia manggadangan matonyo sakali lai.

Iben langsuang tangango antaro picayo jo indak.

“Plak”, tadanga bunyi tangan manapuak kaniang. Hanyo itu reaksi nan nanpak dari diri Iben sabalun tagak.

Lalu, sambia manakua manyuruakan muko, Iben maikua di balakang Codoik sarupo jawi dicucuak hiduang.