(25) Salah Cokok

Sasudah kapatang pueh bacarito di kampuang. Rindu Udin ka mak Pondenyo buliah dikatokan lah tabayia. Namun, ado juo uweh-uweh nan mambuncah dalam dirinyo. Udin ingin bana banostalgia jo konco-konco sapanjuangannyo kutiko sakola. Mancaliak aia gilo, sarato mangunjungi tampek-tampek nan kabanyo rusak parah dek karano gampo.

Dari kampuang, Udin mamiliah barangkek jo travel ka kota Padang. Bialah sore, nan penting sakali oto sampai ka alamaik. Indak co angkutan biaso, sudah lah basambuang-sambuang, manunggu panuah indak tangguang pulo lamonyo. Samintaro, awak lah ndak saba nak maota-ota jo konco-konco sapajuangan lai.

Sasampai di kota Padang, Udin langsuang mahubungi Amir, surang dari babarapo konco sapajuangannyo. Amir ko lah babini surang, dan kabanyo lah baranak pulo surang. Duo tahun nan lalu, kutiko ditinggakan, bini kawannyo ko sadang hamil. Kini pas ka basobok baliak, bini paja ko kabanyo hamil baliak. Yo tokjer si Amir ko.

Mangana iko, hasrat Udin nak basobok jo Amir makin manjadi-jadi. Siapo tahu pangananyo sadang tabukak, tantu kandak lai ka buliah pintak lai ka balaku. Untuang-untuang, inyo basuko hati mambagi ilmu, gumam Udin dalam hati sambia senyum-senyum surang.

Kini, Udin sadang duduak di laman musajik Taqwa Muhammadiyah. Manuruik janji, di sikolah si Amir ka manyinggahinyo sapulang karajo. Sasudah labiah kurang 10 minik manunggu, tibolah Amir sambia maracak motor. Udin langsuang malambaikan tangan manyambuik jo hati sanang.

“Hahaha….baa kok batambah langsing sajo ang ko Din?” galak Amir baitu baranti tapek di muko Udin.

“Hahaha…waang nan tambah gapuak nanpak dek den nyo” baleh Udin sambia mancaliak paruik konconyo ko.

“Hahaha…iyo juo yo…” galak Amir spontan mamacik paruiknyo nan memang lah mulai maju.

“Kasus awak ko kan samo jo kasus blackboard jo whiteboard ko Mir. Waang makin gapuak makin gagah, wakden makin kuruih makin manih hehehe” lanjuik Udin manggaduah kalakuan Amir nan tibo-tibo sajo sibuk mamatuik-matuik paruiknyo.

Mandanga iko, Amir langsuang tagalak. Paratiannyo langsuang baraliah.

“Hahaha….masih seperti yang dulu juo ang yo. Banyak gaya…” galak Amir nan langsuang ditingkahi Udin jo galak nan sarupo.

Sasudah tadiam dari galak, Amir langsuang maajak Udin.

“Naiak lah…” keceknyo sambia mangode jo kapalo manyuruah Udin naiak ka balakang.

“Helm maa?” tanyo Udin mamintak helm.

“Itu lah ha. Biasonyo lai duo helm den mah. Tapi, tadi lupo mambaonyo…” urai Amir nan langsuang dipotong Udin sambia mangaruikan kaniang.

“Ang kecekan lah kareh kapalo den?”

“E-eh, jang mangecek bitu Din, dilaluan hantu beko. Doa nan ka dibaco sabalun bajalan ko, indak nan itu do…” kilah Udin mamatahan tanyo Udin sabanta ko.

“Hehehe….iyo juo yo. Tapi, kok razia urang beko baa?”

“Maa pulo ado urang razia jam sagiko ko. Lah malam hari mah” kilah Amir mahapuih kakuatiran Udin.

“Ho-ohh…” gumam Udin sambia naik mambonceng ka balakang.

Motor ko langsuang diarahan Udin manuju arah Ulak Karang. Ka ma lai, kalau bukan ka kadai ketek di tapi jalan S. Parman, di muko bofet Kubang nan tanamo tu. Kadai ketek ko dulunyo adolah tampek nongkrong Udin and de gank. Di situ ado manjua kopi Aceh, langkok jo mie sarato nasi goreang ala tanah rencong.

Namun, alun lai tibo di tujuan, kutiko sadang lamak maota-ota di ateh motor. Tibo-tibo, dari baliak angkot nan sadang manurunan panumpang di mukonyo, nanpak polisi mahambuih pupuik sarato malambaikan tangan manyuruah Amir manapi.

Baitu sampai di dakeknyo, polisi ko langsuang manunjuak ka arah kapalo Udin sambia batanyo.

“Ko baa ndak pakai helm ko?” tanyo polisi ko jo suaro barek.

Maraso memang babuek salah, Amir jo Udin langsuang turun sarato mamintak maaf mamohon kamurahan hati pak polisi ko.

“Ondeh…maaf Pak. Ambo tadi takaja-kaja, jadi lupo mambao helm ciek lai. Kok damai sakali kini baa nyo Pak?” aku Amir mamintak pangartian polisi ko.

Mandanga pangakuan jo pamohonan Amir ko. Pak Pol ko langsuang maraso di ateh angin. Ehem…dagiang ampuak ko mah, pikianyo. Karano itu, bukannyo manunjuakan belas kasihan, si Pak Pol justru mamasang muko nan labiah garang.

“Indak ado carito damai. Bacaro dulu nyo” jawek Pak Pol ko baujuang mangamukokan KUHP, alias Kasih Uang Habis Perkara.

“Ondehhh….mambana wak sakali ko Pak ha. Ko kawan wak mah dari kampuang. Ibolah wak, maso pulo baru tibo di kota lah langsuang kanai tangkok” curhat Amir makin maibo.

“Indak ado carito. Wakden ko patugeh, indak ado main parasaan dalam tugeh. Kini, turuikan wakden ka pos…” parintah Pak Pol ko sambia mamacik bahu Udin, manjujuiknyo manyubarang manuju pos mambuek Amir tangango ndak badayo.

Sambia bajalan, Udin mancaliak ka balakang mangode Amir jo kijok mato, lalu manunjuak ka arah kadai nasi nan ndak jauh dari tampek tu.

Manangkok mukasuik isyaraik Udin ko, Amir langsuang manggas motornyo lambek-lambek manuju kadai nasi nan dimukasuik. Samintaro Udin taruih manyubarang baduo jo Pak Pol, sarupo duo konco lamo nan baru basobok

Baitu sampai di pos, Pak Pol ko langsuang malapehan tangannyo dari bahu Udin, lalu mancaliak ka balakang. Dek indak mananpak Amir jo motornyo, Pak Pol ko langsuang takajuik.

“Maa kawan ang tadi?”

“Lah pulang Pak” jawek Udin polos.

“Ha….? bilo se tu? Tanyonyo indak bisa manyuruakan muko nan mamerah manahan berang.

“Tarago awak manyubarang tadi Pak” lanjuik Udin sambia manunjuak ka arah jalan tampek inyo tadi jo polisi ko manyubarang.

“Cimporong, sia nan manyuruahnyo pulang? Wakden manyuruah ka siko” caruik si Pak Pol sambia bajalan ka tapi jalan mancigok-cigok, harok kok lai ka mananpak juo si Amir tadi.

Dek Amir indak nanpak lai, Pak Pol ko babaliak ka pos, manamui Udin nan tagak sambia marokok.

“Pak, kecek Pak tadi kasalahan kami kan talatak dek helm. Nan ndak pakai helm kan wakden, makonyo inyo den suruah pulang” sambuik Udin baitu Pak Pol ko sampai di muko pos.

“Ang haniang…” hariak polisi ko sambia mancaliakan tinju ka arah Udin.

Mancaliak ko, Udin manakua pura-pura takuik. Lalu, sambia manakua inyo mangecek.

“Maaf Pak, baa lai ko. Kawan den tadi lah talanjua hilang. Tapi, wakden basadio batangguang jawek. Kok wakden sajo Apak bawo untuak diproses baa nyo?”

“Mande ang. Untuak aa waang dek den ko. Nan paralu motor tu. Kalau indak, waang harus mambayia dando 200 ribu…” sangik Pak Pol makin manjadi sambia manunjuak-nunjuak tapek di muko Udin.

“Kalau 200, yo ndak ado do pak. Pitih den saiko nyo ha” jawek Udin mangaruak sakunyo, mangaluakan pitih karateh saribu 8 lembar, siso baliak pitih travel dari kampuang tadi.

“Ang ago-ago wakden yo? Ko samo sajo ang jo maago hukum ko mah” kicau Pak Pol makin manjadi. Mangka bana hatinyo mancaliak pitih karateh nan lusuah-lusuah ko.

“Maa pulo wakden maago Apak. Cash and carry den agiahan ko ha. Kok kurang, yo ndak dapek dek aka den lai tu” kilah Udin mambuek Pak Pol ko tambah paneh.

“Cimporong…Pai lah ang lah, basarok mato den mancaliak ang mah” tutuik Pak Pol jo muko merah sambia manyakuan pitih karateh Udin nan 8 ribu tadi.

Inyo lalu bajalan ka sampiang pos, maracak motornyo nan memang taparkir di sinan. Gas motor ko langsuang nyo ambok-ambok, lalu tabang co uwia-uwia. Tinggalah Udin marokok sambia galak-galak ketek.