(43) Konco Talua Ayam, Kalimbangan

Udin masih takana baraso hari ko adolah hari ulang tahun Iben. Dek mangana ka patang kawan ko bamanuang, taniaik di hati Udin nak maajak Amir mahiburnyo pado hari nan basajarah ko. Apolai, Iben kini kan marando tagang, tantu cuma kawanlah nan ka mungkin mamparatian.

Karano itu, Udin jo Amirpun mulai basiasaik manyusun rencana. Malam ko, kutiko sadang duduak lamak batigo-tigo di kadai tek Siah, Udin jo Amir langsuang maarahan curito ka kisah-kisah maso SMA, maso Udin, Amir, Iben sadang jaya-jayanyo. Katigonyo ko dulu pahlawan, panjapuik bela dek sakola. Tarutamo, taradok sagalo ancaman nan datang dari pihak lua, tarutamo anak-anak lain sakola.

“Mir, lai tau waang manga pasukan barani skor wak SMA dulu bagak-bagak?” tanyo Udin mambukak carito.

“Lai lah, wakatu itu awak kan kompak sadonyo. Kanai skor surang, kabur ka sadonyo. All for one, one for all”  jawek Amir mantap nan langsuang mambuek Udin jo Iben takaka-kaka dek galak.

“Hahaha, iyo-iyo. Kalau nan lainnyo???” lanjuik Udin mamanciang karano indak iko jawaban nan sabananyo inyo inginkan.

“Kalau nan lainnyo, yo ndak abeh dek wakden do. Wakden manyabuik itu, karano all for one one for all ko kan galeh den maso itu ko”, sambuik Amir acuah mambuek Udin galigaman. Baa pulo kawan nan surang ko ko, galeh inyo sajo nan nyo pikiakan, nan urang indak paduli. Kalau biko, bisa-bisa tukang panciang nan dihelo ikan ko mah, gumam Udin dalam hati.

“Hahaha, wakden tau mah” galak Iben tibo-tibo, mambuek kapalo Amir jo Udin sarantak baputa mancaliaknyo.

“Apo?” tanyo urang baduo ko.

“Manuruik wakden ha, panyababnyo adolah falsafah nan den ajaan dulu” jawek Iben sambia manapuak dado.

“Nan ma ko?” sambuik Udin mamiciangan mato lagak urang maingaik-ingaik.

“Itu ha, falsafah nan den ajaan waktu tawuran nan partamo. Tawuran gara-gara si Rubi disuit-suitan anak SMK subalah dulu” lanjuik Iben mambao namo Rubi untuak mambukak pangana duo kawannyo ko.

Rubi adolah kawan sakelas nan "digambar" katigonyo. Hanyo sajo, karano Iben lah dulu mancurhatan, Amir jo Udin langsuang mundur taratur. Bialah Iben nan maju, hati inyo nan paliang kareh nanpaknyo. Kalau inyo sanang, tantu awak tabao rendo. Baitu pikia Amir jo Udin dulu kutiko mangundurkan diri dari parabutan hati Rubi. 

Namun, pado akhia carito, pangorbanan ko sio-sio, Iben malapehan Rubi karano gosip cewek ko dakek jo Pak Kuma, guru mudo wali kelas IPA 3A. Paneh bana hati urang baduo ko kutiko itu, karano Iben mundur tanpa maagiah kaba saketek juo.

Kini, mandanga namo Rubi disabuik Iben, antene Amir jo Udin langsuang tagak. Kaduonyo spontan bapandangan jo tatapan mato nan susah untuak diaratian. Tukak lamo bananah baliak. Dandam ka Iben manyala baliak. 

Lalu, sasudah maangguak ketek sarupo urang maagiah kode ka arah Udin, Amir mulai marespon uraian Iben di muko. 

“Hahaha, kok nan itu lai takana dek wakden mah, waang langsuang nan tagak bacaramah di ateh meja mamprovokasi takah tukang ubek dulu mah” salo Amir sakutiko mangana aksi orasi provokasi Iben nan barapi-rapi.

“Hahaha iyo” Udin akhianyo maangguak-angguak maagiah tando baraso lah tabayang dek inyo nan dimukasuikkan dek Iben tadi.

Mandangan kaduo konconyo ko lai mangingaik ajarannyo. Iben jadi lupo, lengah, indak sadar kalau kawan baduo ko sadang manyusun rencana, manjapuik dandam lamo.

“Baa bunyi falsafahnyo kok iyo?” tanyo Iben manggali makin dalam.

“Kalau bunyi falsafah nan ang ajaan tu, iyo lah lupo wakden. Antah Udin kok ka lai” jawek Amir maangkek tangan sambia mancaliak ka arah Udin.

Udinpun indak amuah kalah, maangkek tangan patando saide pulo jo Amir cako.

“Wakden iyo pulo ha” keceknyo manyarah lalu mangijokan mato ka si Amir.

“E yayai, lah bi suwak aki kalian mah” umpek Iben kecewa.

“Sori, maklum lah jo kami-kami ko. Antene ko bana nan lah manakua”, kaluah Amir masang coki duo lokang. Marandah diri guno manaiakan parasaan Iben. Lalu mancaliaknyo sarupo urang mamintak supayo diagiah tahu.

Mancaliak pandangan panuah harok Amir ko. Iben maaliahan pandangannyo ka si Udin. Namun, tetap mandapek kesan nan sarupo. Malah labiah sadiah lai gaya Udin ko, matonyo sampai tabalalak saking haroknyo manunggu katarangan Iben salanjuiknyo, mambuek Iben jadi taranyuah.

“Simak baiak-baiak yo, iko bunyinyo ha” Iben langsuang maloncek ka ateh meja mambuek ancang-ancang. Lalu, takah orator santiang, inyo mulai manunjuak ka arah duo kawannyo ko.

“Adaik Minangkabau mangatokan, salah satu alasan nan mambuliahan parik paga bagarak adolah, rando tapakiak dalam samak. Kini, cewek-cewek kito tapakiak di karamaian. Kalau kalian urang Minang, buktian kini juo, kalian harus batindak. Kalau indak, wakden malu mangaku manjadi bagian dari kalian. Bagi wakden, love your woman, respect your friends, serve your school, fight for them, serbuuuu…..” kicau Iben barapi-rapi co komandan tempur sambia maacuangan tangannyo ka ateh. 

Mancaliak tingkah Iben nan manggilo ko, Amir jo Udin manutuik muluik barusaho manahan galak. Lai ka manangguak ikan gadang kito mah. Tu lah disantuangnyo umpan habih-habih, bisiak Amir kapado Udin. Baitu Iben mancaliak, Udin langsuang manyiku Amir.

“Plak plak plak, yo masak ajaran Padri jo Trojan ko dek kawan yo” ambok Amir pura-pura maapresiasi aksi spontan kawannyo ko jo tapuak tangan.

Udinpun indak katinggalan, inyo mamandang takjub ka arah Iben sambia maacuangan ampu tangan patando salut ka aksi Iben sabanta ko.

Mancaliak tatapan panuah takjub kaduo kawannyo ko, hiduang Iben makin mangambang.

“Hehehe, biaso-biaso se lah. Malu pulo wakden ha” kecek Iben babaso-basi sambia turun dari ateh meja. Nanpak bana salah tingkahnyo.

Mandanga ko, Udin jo Amir saliang bapandangan. Sasudah maangguak ketek ka arah Udin. Amir lalu maju marespon.

“Kami takjub tu, karano waang memang pantas manarimonyo Ben. Indak balabiahan bagai do tu”

“Iyo Ben” sambuang Udin manyalo, lalu malanjuikan.

“Tapi, takana dek wakden, kalau indak salah ha, ado skandal kepentingan pribadi di dalam tawuran nan iko ko dulu mah ndak?” tanyo Udin mamasuakan galeh sambia baliak mangode Amir.

“E eh, ko sero ko, iyo tu? Manga wakden sampai indak tau?” Amir batanyo manindak-lanjuik kode Udin ko. 

Lalu, sarupo urang nan indak saba manunggu jawaban, inyo bolak-baliak mamandang Udin jo Iben bagantian. 

“E yayai, tatingga waang mah. Kok indak ado apo-aponyo, lai ka mungkin tampuo basarang randah. Manga pulo si Iben ko basumangaik bana maajak awak jadi ujuang tombak, jadi umpan paluru dek ang?”, lanjuik Udin mampajaleh masalah. 

Mandanga pamaparan Udin nan sabanta ko, muko Iben tibo-tibo sajo barubah, pucek putiah pasi. Tingkahnyo pun manjadi lain, saroman urang tapijak baro, kaca-kaca-i.

“Ondeh, yo takicuah wakden mah. Jadi, si Rubi kamek ko, incaran kawan awak ko ko?” baleh Amir langsuang manembak mancokok mariah Iben.

“Tanyo se lah surang. Tarago urangnyo lai di siko” baleh Udin capek sambia mamonyongan bibianyo ka arah Iben.

Amir langsuang galak sambia madok ka Iben maikuti saran Udin.

“Hahaha, iyo Ben?” tanyonyo jo nada bagurau. Tapi, mode pukulan Tyson di talinga Iben nan mandanga, mambuek Iben lamo takananang, indak kunjuang bisa manjawek.

Mancaliak ko, Udin langsuang mamotong.

“Diam tu patando iyo mah Mir. Mangarati se lah awak” kecek Udin jo nada manyindia.

“Tu baa, lai bajadi barang tu?” tanyo Amir makin manjadi nan langsuang disambuik Udin.

“Apo ka bajadi. Kawan wak ko kan panganuik teori cinta tu pangorbanan mah. Bagi baliau ko, bakorban sajo lah jadi mah, tamasuak jo mangorbanan kawan, indak paralu mandapekan do” urai Udin mancimeeh.

“Halah, tu sio-sio sajo darah kito nan tatumpah tu?” kaluah Amir sambia mangambangan tangan madok ka Udin.

“Indak ado lai. Kito nan mamaga, Iben nan mamanjek, urang nan mamatiak” lanjuik Udin makin manjadi.

Mandanga sindia-sindia kaduo konconyo ko, Iben jadi indak lamak hati. Talingonyo jadi mamerah, antene jadi takulai. Indak manangkok kalau dari tadi pareman baduo ko kode-mangode. Parasaannyo langsuang taibo, masih takana juo dek kawan-kawan tukak lamo ko lai, pikianyo panuah sasa.

Walau jo hati taibo, Iben barusaho mancubo mangumpuakan kabaranian. Lah lamo inyo basiap manunggu saaik-saaik takah iko. Di mano pabuatannyo akan babaliak manamui inyo. Karano inyo lah manyio-nyiokan kaniang Amir nan cungiak kanai gesper, gigi Udin nan tangga kanai tinju, pangorbanan kawan nan indak tangguang-tangguang. 

Kini, pado saaik inyo maraso maso pambalasan itu tibo, inyo tatap maraso indak siap. 

“Mir, Din, giko ha…” keceknyo binguang mamulai kecek.

“Indak ado giko-giko, langsuang sajo lah!” Potong Amir capek manskak mati, mambuek Iben indak bisa barangok. Matonyo langsuang manggabak.

“Maaf Mir, bukannyo wakden indak nio jujur. Tapi, satiok wakden nio bacarito, saaik itu pulo wakden maraso takah urang nan mancukia tukak den surang. Kalau dek kalian baduo sajo taraso sakik, apolai dek wakden, urang nan jadi palaku langsuang”, urai Iben jo mato bakaco-kaco.

Mancaliak iko, hati Amir jadi luluah

“Ohhh, mantun. Manga ndak ang kecekan dari tadi?” sambuik Amir malunak. Namun, langsuang dipotong tagak Udin.

“Eits, tunggu dulu Mir. Indak bisa takah iko se do. Sabanta ko baru inyo mambangga-banggakan filosofi kaleranyo tu, kini lah mode kuciang dibaokan lidi pulo lagaknyo. Cipokut tu mah. Urang takah paja ko, dituka pulo giginyo jo gigi palasu takah wakden ko, baru taraso deknyo darito urang nan indak bisa manikmati makan kaarupuak mah”, kicau Udin marabo indak takontrol.

Udin lalu mambukak gigi palasunyo, maadokan ka muko Iben. Iben langsuang marunduak, indak talok manantang mato Udin ko, apolai mancaliak gigi palasunyo.

“Hoi, saba Din, malu wak dicaliak urang” umbuak Amir manyabaan sambia mamacik tangan Udin. Namun, Udin marangguikan tangannyo indak sanang.

Mancaliak iko, Iben bukak suaro.

“Padia se lah Mir. Wakden lah siap kok. Kok lai ka pueh hati Udin ko, tanggapun gigi den ko ndak masalah do” keceknyo jo suaro parau manahan tangih.

Udin langsuang maambiak ancang-ancang ka maninju, Amir malengah, samintaro Iben tagak siap sambia mamiciangan mato. Baitu mato Iben tapicing, tinju Udin langsuang malayang.

“Plak, aduah!” Iben tapakiak maraso tinju Udin tibo tapek dimuncuangnyo. Inyo langsuang maraso ado cairan nan manimpo hampia saluruh mukonyo. Ondeh mande, darah den ko mah nan lah mancorek, gumamnyo masih jo mato nan tapiciang. 

Namun, tibo-tibo inyo mancium baun nan indak lamak saketek alah juo. Paruiknyo tibo-tibo jadi naiak saraso nio muntah, matonyo tabukak tapi bakunang-kunang. Tapek di mukoyo, Amir jo Udin tagak barangkulan sambia senyum-senyum.

“Happy birthday. Makan lah talua busuak tu, hahaha” galak kaduonyo sambia mundur manjauah.

Mandanga ko, Iben langsuang taduduak, lalu muntah-muntah kayak. Dalam hatinyo inyo mangato, ciek talua ayam ko ruponyo hanyo nilai pasahabatan kaduo kawan den ko, sabana busuak. Namun, sungguahpun baitu, dalam hati ketek Iben bana-bana basyukur karano masih punyo duo kawan nan salalu mamparatian dirinyo, si rando tagang ko.