(34) Guru Begana-Begono (Mangaja nan Sunaik, nan Wajik Tingga)

Sajak Iben jo Amir maurus proyek ka Jakarta, langang bana rasonyo kadai. Karano itu, taniaik dek tek Siah nak bapindah ka lain bodi. Kalau salamo ko hari nan langang dilalui jo carito si Amir boco jo Iben nan marando, kini nyo cubo maadu paruntuangan jo si Udin. 

Sanjo ko, baitu  Udon singgah ka kadai, tek Siah langsuang mahidangan kopi tanpa baso-basi. Manga pulo urang singgah ka kadai ko, kalau indak ka minum kopi, gumamnyo sambia malatakan kopi ka meja Udin. 

Dari katigo palanggan tataiknyo, Udin ko lah nan paliang bataratik kutiko balanjo. Batulak-balakang bana jo si Amir, apolai jo si Iben nan suko barutang sarato mambayia kredit. Mako, pantas sajo inyo mandapek servis nan labiah baiak, diagiah sabalun mamintak. Indak pakai lamo takah caro mahidangan kopi ka si Iben. 

Namun, alah duo jam balalu, kopi nan dibuek jo niaik baiak  sarato parasaan harok ko indak juo kunjuang usak. Mancaliak iko, tek Siah pun langsuang mangaluakan jurus barikuiknyo, yoitu manampakkan paratian.

“Aman Din?” tanyo tek Siah sambia pura-pura malap meja.

“Aman Tek” jawek Udin acuah. 

Namun, tibo-tibo sajo, sarupo urang nan baru sadar, Udin mamuta duduak baliak madok ka tek Siah.

“Baa kok bitu tanyo Etek?”

“Indak, lah dingin se kopi nanpak dek wakden” jawek tek Siah bamain ban, bak cando master karombol. Tembak sabananyo adolah mananyokan kadaan Udin, kok bamanuang sajo dari tadi.

Arih jo alamaik tembak tek Siah ko, Udin langsuang manjawek.

“Oh itu, sangajo mah tek. Wakden memang labiah katuju jo kopi nan dingin dari pado nan angek. Indak ado apo-apo do”, baleh Udin manyuruakkan kasan bakilah. Tapi, indak bisa manyuruakan aia muko nan karuah.

“Ohhh, wakden sangko kok tapaik kopi tu. Makonyo wakden caliakan muko den nan manih ko hehehe” baleh tek Siah galak sangajo mamanciang kaceriaan Udin.

Mandanga caro tek Siah ko, Udin langsuang jatuah hati. Inyo indak manyangko, walau hiduiknyo cando rang balai, masih basiso juo keibuan baliau ko ruponyo. 

Bapikia baitu, Udin taniaik nak babagi jo etek ko. Siapo tau, kalaulah indak ka bisa mambantu, mudah-mudah bisa jadi sitawa tapo di talingo, sidingin di kapalo.

“Duduaklah di siko tek ha. Dari tadi mangecek takah urang nan manunggu hutang sajo” 

“Jadih. Tapi sabanta yo, wakden pindahan galeh kumuah ko dulu ha” jawek tek Siah manyambuik ajakan Udin ko sambia maangkek tangan, lalu balalu ka balakang.

Baitu baliak, inyo langsuang duduak di muko Udin.

“Ado apo Din? Baulah pulo si Iben jo si Amir ka waang?” tanyo tek Siah sangajo mambao namo Iben jo Amir. Sabaik, satiok basamo Iben jo Amir, Udin ko pasti nanpak sanang, salalu bagalak-galak. Siapo tahu, dek mandanga namo kaduonyo, keceriaan Udin mungkin babaliak.

“Indak tek. Indak ado urusannyo jo si Amir jo Iben do. Paja baduo tu kini sadang den suruah ka Jakarta” jawek Udin tataik lusuah indak tapangaruah jo panciangan tek Siah tadi. Namun, indak tek siah namonyo kalau manyarah. Etek ko taguah malancarkan jurus nan samo, mamanuhi memori Udin ko jo si Iben biang masalah, tapi sumber gairah. 

“Usah cameh pulo lai, kok iyo bamasalah nan baduo tu, tarutamo si Iben, wakden tolong beko. Jikok paralu, wak liburkan urang minum kopi gak babarapo hari. Wak pokoki ka Jakarta tu baduo-duo mancakaunyo” umbuak tek Siah manyamangati, nan disambuik jo galak ketek dek Udin.

“Hehehe, yo amuah salero etek yo. Tapi, bak kecek den tadi tek, masalahnyo ndak ado sangkuik pawuik jo pareman tu do. Ko masalah di sakola”

“Masalah di sakola? Tawuran baliak anak-anak ang tu?” tanyo Tek Siah ndak manyangko iko masalahnyo.

“Indak Tek”

“Atau, ado nan tatangkok baliak indehoi di parak balakang?”, lanjuik Tek Siah mamburu.

 “Indak. Kini ko masalah sasamo guru. wakden kanai tegur dek Kapalo Sakola”, pinteh Udin capek ka intinyo. Sabaik kalau indak, bisa kalua sakalian dugaan-dugaan sarato urang-urang buruak dari muncuang Tek Siah nan gak kurang filter ko beko.

“Oohhh, sangko wakden waang disuruah mampatangguang jawaikan ulah murik nan babuek mesum takah dulu juo baliak” gumam Tek Siah takah mangecek jo diri surang.

“Indak”

Sasudah tadiam sajanak, tek Siah baliak baciloteh.

“Kalau jo kapalo sakola Din, iyo ndak talok dek wakden do tu. Wakden ko ndak pernah maantaan kopi ka sakola tu soalnyo do. Baa pulo ka mahadok-i kapalonyo”, sambuik tek Siah apo adonyo sambia mangapa-ngapakan tangannyo. Pikirannyo lalu manarawang.

Sadiah bana si Udin ko. Sabulan lalu lah kanai tegur dek anak program nan dipagangnyo talibaik tawuran. Lalu, duo minggu nan lalu, kanai tegur baliak dek ado anaknyo nan tatangkok sadang bacewek-cewek di parak balakang sakola. Kini, alun dingin masalah nan itu, muncua masalah baru. Baa pulo ko agaknyo? 

Mancaliak Tek Siah nan tamanuang. Udin langsuang manyapo.

“Hoi ,Tek. Panjang bana kiro-kiro mah”

“Eeh, apo kecek ang Din?” tanyo tek Siah takajuik dek suaro Udin sabanta ko.

“Hahaha ko curiga wakden mah. Sempat-sempatnyo malamun sadang maota. Takana jo mantan yo? hahaha”

“Iyo, wakden takana jo nasib waang nan tiok sabanta kanai masalah di sakola. Masalah apo pulo kini lai tu?”

“Wakden ditegur Kapalo Sakola. Keceknyo, panampilan wakden ko indak mencerminkan surang guru do” jawek Udin sambia manakua.

“Biaso sajo bantuak ang nanpak dek wakden nyo” sambuik Tek Siah capek bamukasuik mahibur.

“Kecek baliau. Guru ko harus pakai sarawa bahan, baju kemeja masuak ka dalam, langan ndak buliah diguluang, sapatu harus pantopel, tas indak buliah tas nan mode iko do, harus tas nan bajinjiang di sampiang tu ha. Ciek lai tek, wakden harus sato pulo maurus administrasi, kan ndak masuak tu ha”, urai Udin mamapakan caramah kapalo sakola kutiko managuanyo.

“Hahaha, samo lo gaya guru tu jo tukang kredit atau sales kok bitu mah yo?” baleh Tek Siah sangajo baargumen. Nak maraso lai punyo kawan si Udin ko, nak jan drop bana mentalnyo.
“itulah nan mangganggu katanangan wakden tek…” curhat Udin sambia mamacik kaniang.

“Tapi, wakden masih ragu mah Din. Maso pulo hal remeh-temeh nan ndak pantiang tu nan dipamasalahkan. Ado nan lain mungkin mah. Misalnyo, talambek datang maaja, indak mangumpuakan absensi, atau ado tugeh nan ndak ang tuntaskan pado wakatunyo mungkin mah” salidik Tek Siah mamanciang ingatan Udin.

“Indak kecek den. Malahan, kalau diparatian bana-bana, di antaro guru-guru di sakola tu, wakden nan paliang rajin mah. Tibo paliang capek, mangumpuakan absensi paliang rajin, pulang paliang kudian” kilah Udin agak mangareh.

“Ho oh, berarti yo murni itu masalahnyo manuruik ang?” tanyo Tek Siah sarupo urang maminta kapastian.

“Iyo. Soalnyo, di antaro guru-guru ko, memang wakden jo kawan-kawan nan baru-baru sajo nan panampakannyo agak santai co iko nyo”, jawek Udin yakin jo pandiriannyo. Lalu, Udin pun malanjuikan baargumen. 

“Padohal Tek, di panduan dari Diknas nan paliang tinggi, ndak tangguang jalehnyo lai do baraso eksistensi guru ko maaja, pengabdian masyarakaik, sarato penelitian”

“Ndak ang jalehan ka kapalo sakola ang tu?” respon tek Siah mananggapi.

“Baa ka manjalehan. Bagi inyo, guru nan jaleh tu nan takah-takah inyo. Guru nan baeska baru takah wakden ko samo sajo jo guru nan alun jaleh lai mah.” Kaluah Udin balanjuik.

“Ho ohhh. Kok baitu Din, Bararti eksistensi guru ko mambengkok tibo di lapangan manuruik arah pusek rajo ketek mah yo? Yo aneh mah. Binguang wakden mamahaminyo” respon Tek Siah apo adonyo.

“Hehehe jankan etek, wakden se nan guru juo, binguang dibueknyo. Nan ka den hadapi anak mudo. Tapi, nan harus wakden turuti justru salero urang tuo. Sia pulo ndak ka binguang tu ha” lanjuik Udin nan langsuang disambuik galak gadang dek tek Siah ko.

“Hahaha. Kok bitu Din, pado paniang-paniang bana, bao se lah murik-murik ang tu baraja ka siko, bia wakden nan jadi kapalo sakolanyo. Den ajaan jurus mambuek kopi Lubuak Aluang jo tatasajinyo beko. Jikok paralu, jo bakoa-bakoa sakalian den ekstrakulikulerkan. Ndak dapek pembinaan di sakola tu, bialah wakden binasakan bana di kadai ko. Nak jadi pareman kopi ka sado alahnyo” 

“Hahaha, tasarah Etek lah eh. Mendiknas tu kan adiak etek mah…” cimeeh Udin manutuik carito.