(44) Manjua Kawan

Baitu duduak di kadai tek Siah, Iben langsuang mambukak tas mangaluakan kitab sucinyo, buku motifasi nan batopik persahabatan. Sasudah 10 minik mambaco, Iben nanpak mulai maangguak-angguak. Mungkin dek mangantuak, mungkin pulo dek maraso mandapek sasuatu dari buku nan sadang dibaconyo ko. Antah siapo nan ka tahu.

Dek talampau khusuak mambaco, Iben sampai indak tau kalau Amir jo Udin lah tibo. Kaduonyo langsuang malangkah lambek-lambek ka balakang Iben duduak.

“Bar!” hariak kaduonyo tibo-tibo mambuek Iben tagalenjek.

“Iblis laknat ku candak ku banting kau jadi cacing…” Iben manyaracau indak takontrol. Latah baliau ko ruponyo.

Mancaliak Iben nan kalang kabuik dek latahnyo, Amir langsuang tasambua dihondo galak nan tibo co aia bah. Udin labiah parah lai,  langsuang taduduak sambia mamacik paruiknyo nan mamilin dikocok galak.

Baitu galak kaduonyo taranti, Amir langsuang batanyo malapehan uweh-uwehnyo.

“Di ma manuntuik Ben? Lah babayo reflex kini nanpak dek wakden…” tanyo Amir manyindia di salo galak Udin nan masih juo manyambua-nyambua.

Alun sampai Iben manjawek, Udin lah dulu pulo sato maningkahi.

“Sadang ado proyek sinetron pulo mungkin mah Mir. Atau mungkin bacewek jo Mpok Atik. Sajak marando ko, tangguak baliau ko kan rapek ko, hahaha” potong Udin nan langsuang ditingkah dek galak Amir di ujuangnyo.

“Amai ang”

Hanyo iko nan ka lua dari muluik Iben mananggapi tongek kaduo konconyo ko. Iben nanpak lotong-lotongi ndak tantu jawek.

“Eeh, berangnyo” jujai Amir sambia madok ka Udin.

“Dek den kecekan bacewek jo Mpok Atik mah, cubo kalau jo Agnes, hahaha” sambuang Udin galak di ujuang cilotehnyo nan disambuik Amir jo galak nan sarupo.

Sadar kalau dirinyo dikaroyok, Iben akhianyo mambuang muko acuah ndak acuah. Buang energi ko mah, malawan surang se lun tantu ka manang lai, apolai iko dikaroyok, pikia Iben mamuta duduak sambia mangambang buku nan tadi nyo baco.

Maraso kanai cuekan, Amir jo Udinpun sugiro mahantikan galaknyo. Maa pulo sero manggalakan urang, kalau urangnyo ndak tapangaruah. Karano itu, urang baduo ko langsuang baranjak mandakek-i Iben.

“Apo nan babaco ko?” tanyo Udin sambia manyemba buku dari tangan Iben.

“Persahabatan dalam Pandangan Ekonomi, hahaha. Barek bacaan kawan ko kini Mir” lanjuiknyo mambacokan judul buku nan tatulih gadang di laman muko.

Mode urang nan dirabuik mainannyo, Iben langsuang tagak baniaik marabuik baliak bukunyo dari tangan Udin. Namun, alun sempat tacapai, buku ko lah bapindah pulo ka tangan Amir.
Baitu tapacik buku Iben ko, Amir langsuang mancaliak laman mukonyo.

“Sajak bilo pulo ang mambaco Ben?” tanyonyo sambia mamasang mimik heran.

Iben ko memang bukan tipe urang nan sanang bagawua jo buku. Kutiko sakola dulu sajo. Sakalian buku, mulai dari buku tulih hinggo ka buku pegangan wajib, tandeh ndak basiso si tangannyo. Kalau indak ka jadi mainan kapa tabang, pasti jadi laying-layang.

Mandanga tanyo Amir nan labiah kadangaran sarupo urang mancimeeh ko, Iben langsuang bareaksi.

“Nan namonyo manusia ko pasti ingin maju Mir. Indak waang se do, wakdenpun coitu. Kini wakden lah mulai mambaco untuak mancari padoman dalam hiduik” baleh Iben tadanga sok student abih.

“Tapi, baa kok buku ko nan ang baco?” sambuik Udin nan dari tadi labiah banyak baolok-olok, kini mulai tadanga batanyo sungguah-sungguah.

“Dek karano bagawua jo waang baduo” jawek Iben kadangaran apo adonyo sajo.

“Ohhh, mantun” gumam Amir antaro picayo jo indak ditingkahi dek Udin jo kapalo maangguak-angguak balam.

Tarago pareman baduo ko tadiam, Ibenpun langsuang mamuta aka. Ijan sampai pareman ko batanyo baliak, wakden harus mandominasi. Kalau indak, bisa-bisa dikaroyok baliak ko kajadiaanyo.

Dek bapikia takah iko, Iben pun langsuang mamiliah malanjuikan cilotehnyo.

“Kecek buku ko Din, Mir, persahabatan ko sabana maha. Indak bisa dinilai jo apopun juo”.

“Itu kan kecek buku. Lun tantu dalam kenyataanyo lai” sambuik Amir nan langsuang disanggah dek Udin.

“Batua mah Mir. Wakden pernah manamukan nan baitu mah. Bedanyo, kalau nan di buku tu keceknyo persahabatan ko ndak bisa dinilai. Kok nan wakden tamukan, bisa dinilai”

“Bisa dinilai jo apo Ben?” sonsong Iben capek panuah sumangaik. Sanang bana raso hatinyo mandanga Udin mambela bacaannyo.

“Jo pitih lah, maso pulo jo gulo-gulo” sambuik Udin asa-asalan.

“Jo pi-tih?” salo Amir sambia mangaruikkan kaniangnyo.

“Lah, caritonyo co iko ha. Wakden pernah bagawua jo sopir hoyak oto ka kampus subalah salamo satahun. Manuruik wakden, paja ko adolah urang nan paliang sukses nan pernah den tamui dalam maso sasingkek itu”

“Halah, apo pulo hubungannyo jo isi buku tu?” potong Amir manyanggah maraso Udin kalua dari konteks.

“Danga lah dulu Mir, usah dipotong-potong takah tu”, sapo Iben manegur Amir.

Mandanga teguran ko, Amir langsuang maangkek tangan mamintak maaf. Inyo jadi ingaik, Udin ko adolah urang nan sanang manyasak, tapi pamanggok kalau disasak-sasak-an.

Mancaliak situasi lai tanang, Udinpun mulai malanjuikan cilotehnyo.

“Jadi, manuruik carito si sopir hoyak ko. Filosofi pasahabatan nan maha ko lah nan mailhami inyo mampalueh jaringan pagaulan jo mahasiswi-mahasiswi” lanjuik Udin sambia mancaliak reaksi ka duo konconyo ko.

“Jo mahasiswi sajo?” panciang Iben batanyo.

“Iyo. Katonyo, bakawan jo mahasiswi ko lah nan paliang capek mambuek kayo” jawek Udin apo adonyo.

Dek minaik kuaik, namun alun manangkok arah ciloteh Udin ko. Amir capek mamburu cando urang nan takuik kahilangan jajak.

“Memangnyo mahasiswi-mahasiswi nan nyo pakawani ko urang-urang kayo se ka sadonyo?”tanyonyo polos.

“Indak paralu kayo. Nan penting barasiah”

“Baa pulo kok harus barasiah?” tanyo Amir jadi samakin ingin tahu.

Mandanga tanyo nan antusias ko, Udin langsuang mamparatian wajah kaduo kawannyo ko sabalun maagiah jawaban. Mancaliak kaduonyo nanpak serius mamparatian. Inyopun malanjuikan.

“Barasiah tu syarat mutlak. Sabaik, mahasiswi-mahasiswi ko lah nan digalehannyo” jawek Udin singkek padek sarupo urang nan manguasai materi bana.

Dek indak pueh jo jawaban Udin nan jauah bana dari harapannyo ko, sarato dek indak bisa babuek banyak, Amir akhirnyo tadanga mangaluah.

“Ee yayai, tu germo namonyo mah” umpek Amir nanpak kecewa bana.

Babeda jo Amir nan kecewa, Iben malah cuek-cuek sajo. Inyo malah nanpak galak-galak ketek mandanga akhia ciloteh Udin di muko. Sarupo urang mangecek jo diri surang, dari muncuangnyo kalua suaro.

“Murahan” keceknyo mambuek Amir jo Udin sarantak takajuik.

Udin nan maraso kecek sabanta ko adolah ungkapan kekecewaan taradok inyo, manjadi nan patamo bareaksi.

“Apo mukasuik ang tu Ben? Mangecekan wakden murahan?” sangik Udin pura-pura berang.

“Mukasuik wakden, wakden nan mambaco sajo indak satuju jo ungkapan persahabatan tu maha do. Makonyo ciloteh ang tu den kecekan murahan”, jawek Iben santai apo adonyo.

“Manuruik waang baa pulo?” tanyo Amir mamotong capek manaruah harapan.

“Manuruik wakden, persahabatan tu susah-susah murah” sambuang Iben jo suaro mantap.

“Mukasuiknyo?” tanyo Udin nanpak makin tapanciang.

“Kok manjalehan mukasuiknyo, iyo gak tarumik den mah. Baa kok langsuang contoh se wakden agiah” gadele Iben sambia mamparatian kaduo kawannyo ko.

Dek Indak ado reaksi apolai nan mamprotes. Ibenpun lalu malanjuikan.

“Contohnyo baiko ha. Satiok wakden basobok jo kalian, wakden pasti kanai karajoan taruih. Ndak susah persahabatan tu ha” urai Iben singkek tapi padek.

Mandanga iko, Amir jo Iben saliang bapandangan sabanta. Lalu, sarupo urang nan dikomandokan, kaduonyo sarantak batanyo.

“Kalau nan murahnyo baa pulo?”

“Kalau nan murahnyo. Dek bakawan jo kalian, wakden lah mandapek banyak kamurahan. Takah barutang murah sarato mambayia jo kredit murah pulo, hehehe” jawek Iben diplomatis nan langsuang disambuik jo galak dek duo konconyo ko.

“Hahahaha” sambuik Amir galak di ujuang pamaparan Iben ko. Sadangkan Udin langsuang maningkahi di salo galak Amir jo Iben nan tingkah-batingkah.

"Untuang keceknyo persahabatan ko murah. Kok maha, langsuang wakden kiloan si rando tagang ko mah, hahaha" galak Iben maningkahi sambia manunjuak ka muko Iben.