(14) Angguak Anggak Geleang Amuah (TPR)

Dek trauma jo pangalaman manamui Pak Dadang ka patang. Pagi ko, Udin menghadap sekretaris jurusan mananyoan sarato mancari tahu tantangan panguji skripsinyo nan lain.

“Assalamualaikum”

“Waalakumussalam. Eh Udin, masuak Din!” sambuik sekjur nan nanpak sadang sibuk manandotangani babarapo buah karateh.

Mandanga sekjur fasiah manyabuikan namonyo, hati Udin sanang bukan kapalang. Jarang bana pejabat nan ingaik jo rakyaik badarai takah awak ko, baitu pikiran Udin nan mambueknyo jadi tatagun di muko pintu.

Mancaliak Udin tatagun, sekjurpun langsuang manyadarkan.

“Din, ado kaba apo?”

“Ehyo, maaf Buk. Awak nio mananyoan tantang Pak Rober, dosen penguji skripsi wak”

“Ohhh, Pak Rober. Kecek baliau ka Ibuk, baliau lai basadio. Cuman, sarancaknyo, tamui juo lah baliau”.

“Iyo itu mukasuik wak Buk. Makonyo wak tanyoan ka Ibuk tantangan baliau. Awak ndak tau jo baliau do”

Mandanga jawek Udin ko, tangan sekjur nan sadang maliwuak-liwuak mamainan pena langsuang taranti.

“Halah, maso jo dosen indak tau. Capek cari tau” lanjuik sekjur sambia malambaikan tangan sarupo urang mausia Udin ka lua ruangan.

Udin pun tapaso manuruik sajo kalua ruangan sekjur jo kapalo manakua. Sambia bajalan Udin taruih mamuta aka manamukan caro supayo tau jo pak Rober.

Antah jodoh antah rasaki, satibo di lua, Udin langsuang basarobok jo calon induak barehnyo, Mirna. Sakutiko, pangana Udin langsuang tabukak. Indak baso-basi, Udinpun langsuang mamburu polenyo ko.

“Mir!”

“Eh, Da Udin, dari ma Da?” baleh Mirna jo muko merah kapink-pink-an.

“Iko ha, baru sudah mancek dosen penguji ka sekjur”.

“Tu baa kecek sekjur?” sambuik Mirna basumangaik.

“Ha, itu masalahnyo, Uda disuruah sekjur manamui baliau”

“Sia tu?”

“Pak Rober”

“Astaga, gawat mah” kaluah Mirna maluncua baitu sajo baitu mandanga namo Pak Rober.

“Halah, baa kok bitu?” tanyo Udin jo mimik cameh.

“Ndak tau Uda jo Pak Rober do?”

“Indak, memangnyo baa bana baliau tu?” lanjuik Udin masih jo raso cameh nan nanpak jaleh di rono mukonyo.

“Baliau tu ahli Total Physycal Responce (TPR), lah internasional pulo levelnyo lai. Uda musti hati-hati jo baliau ko” papa Mirna mulai manarangan sia bana nan Pak Rober.

Mandanga katarangan sarupo iko, Udin langsuang mandaceh. Apo pulo masalahnyo jo panguji dosen santiang? Kok dosen sintiang baru masalah namonyo mah, gumam Udin dalam hati. Karano itu, Udin langsuang mambangang mambanggakan diri.

“Ancak bana lah nyo, Uda lah siap tempur ko mah”

Paham jo alamaik kato-kato Da Udin ko, Mirnapun sugiro baparingaik. Karano, nanpaknyo Udin salah tangkok tantangan poin nan nio disampaikan Mirna di muko.

“Bukan masalah sidangnyo Da, tapi manamui baliau ko ha” lanjuik Mirna maarahan.

Dasar kareh angok, Udinpun masih juo balagu.

“Salamo masih nasi juo makannyo ha, ndak ka cameh gai den do” baleh Udin makin manjadi.

Mandanga kato-kato nan tarakhir ko, Mirna langsuang mancari caro lain mangecek jo Udin ko.

“Okelah, lai talok dek Uda malawan herder?” lanjuik Mirna akhionyo langsuang manyampaikan poin nan nio inyo sampaikan sadari tadi.

“Apo pulo ko Mir ha, ka maa pulo painyo tu?” jawek Udin lagak urang nan manegur yayangnyo ko. Baa ka baa guru tu urang tuo, ndak buliah disamoan jo herder, sekalipun mirip hehehe, pikia Udin kutiko itu.

“Iko ha, rumah Apak tu dikawal dek herder. Gadangnyo baradiak kakak jo kudo. Satiok mahasiswa nan barurusan jo baliau, harus malewati herdernyo dulu” tarang Mirna tu de poin langsuang mahantak hulu jantuang Udin nan sabanta ko masih juo sok tahu.

Mandanga iko, darah Udin langsuang badasia. Dalam hati Udin mangato, iko ruponyo nan ditakuikan Mirna, patuiklah. Karano itu, Udinpun mamutuihan nan manggali info labiah dalam.

“Malewati ko manjinak-i atau baa ko?”

“Indak, tapi harus bisa bakomunikasi jo herder tu”

“Halah mati den…” umpek Udin kalua baitu sajo indak bisa ditahan.

“Usah mati dulu Da, awak baa? Kalau masalah bahasonyo gampang, beko awak aja-an. Nan penting, lai talok dek Uda mandakek-i herder tu” umbuak Mirna bausaho manggapuakkan mental Udin nan nanpak agak takucak.

“Kalau mandakek-i tu masalah geleang mah Mir. Uda kan acok pai baburu babi ko. Mulai dari Sangir sampai Palangki Sawahlunto, lah Uda rancah sadoalahnyo pai baburu tu mah. Nan Uda takuik-an ciek se nyo, baa sasudah itu? Makonyo, mambana Uda, ajailah Uda bahaso herdernyo tu ha” pintak Udin agak maibo.

“Jadih. Dangaan yo. Herder Pak Rober ko Cuma bisa marespon jo manggeleang dan maangguak. Ehyo, ciek lai manggoyang-goyangan ikuanyo” papa Mirna mamulai palajaran.

“Kalau itu samo se jo anjiang lainnyo tu mah” potong Udin indak saba.

“Babeda, ko anjiang intelek ko Da. Ndak samo jo anjiang baburu Uda do. Responnyo tu bahubuangan jo TPR, keahlian bantuak strategi pengajaran bahaso nan diampu dek majikannyo tu” lanjuik Mirna maminteh tingkah Udin nan talalu responsif ko. Namun, indak Udin namonyo kok indak ka karengkang.

“Apo pulo bedanyo tu?” sambuik Udin capek. Nanpaknyo Udin ko tasingguang dek maraso anjiang kampuangnyo dilecehkan jo kato anjiang intelek tadi.

Manyadari iko, Mirna nan memang lah paham bana jo kurenah Udin ko hanyo mauruik dado. Dalam hati, Mirna manyuruakan jauah-jauah kabodohan Udanyo nan masih juo suko maribuikan hal-hal nan indak paralu takah isu anjiang intelek ko. Babaka raso-raso juo, Mirnapun lalu malanjuikkan.

          “Fokus yo. Kalau herder tu mangeleang, itu aratinyo herder tu nio mangatokan lai/bisa/buliah/batua. Kalau maangguak, artinyo inyo nio mangatokan indak/indak bisa/indak buliah/salah.” lanjuik Mirna manarangkan mambuek paratian Udin jadi tapanciang.

“Kalau nan manggoyang-goyangan ikua tadi?” potong Udin capek.

“Ha, kalau itu patando inyo lai sanang dan indak maraso tagaduah dek kadatangan Uda do tu” jawek Mirna jo katarangan padek.

“Oh, mantun. Geleang samo jo lai/bisa/buliah/batua, angguak samo jo indak/indak bisa/indak buliah/salah, goyang ikua patando inyo lai sanang dan indak maraso tagaduah dek kadatangan awak. Berarti den harus marancang pertanyaan nan jaweknyo kiro salasai dek angguak atau geleang ko yo?” tanyo Udin sasudah maulang manyabuik palajaran singkek nan ditarangan Mirna di muko.

“Yup. Kan mantap kalau Uda lai fokus tu. Ehyo, hampia lupo awak. Uda batanyo jan jo bahaso Minang pulo, ndak mangarati nyo do, jo bahaso Indonesia!” tutuik Mirna baparingek.

“Ha, baitu bana” sambuik Udin jo kaniang mangarinyik antaro picayo jo indak.

“Tapi lah wak kecekan. Nan ka Uda adok-i ko anjiang intelek” lanjuik Mirna sambia maacuangan tunjuaknyo maingekan Udin sakali lai.

“Sip lah kok yo baitu”

Akhianyo, sore hari tu, sampailah Udin di muko rumah Pak Rober. Takah nan dicaritoan Mirna, di muko janjang, duduak manih herder nan gadangnyo baradiak kakak jo anak jawi di pasa Muaro Paneh. Jo parasaan harok-harok cameh, Udinpun langsuang mandakek ka anjiang raksasa tu;

“Ehmmmm….” Udin mandehem mamanciang respon si herder.

Herder nan sadang lalok batupang dagu langsuang maangkek saketek kapalonyo mamparatian Udin.

Baitu pandangan baradu, Udinpun mulai manyampaikan tanyo nan alah nyo susun dari kampus baduo Amir tadi.

“Permisi, Benar ini rumahnya Pak Rober?”

Herder gadang tu langsuang manggeleang marespon pertanyaan Udin.

“Ohhh, Bapaknya ada?”

Si Herder manggeleang baliak, lalu tagak sambia menggoyang-goyangan ikuanyo.

Yes, lai sadang sanang hatinyo mah, gumam Udin dalam hati. Lalu, tanyo jawabpun sugiro balanjuik.

“Apakah saya bisa bertemu beliau?”

Babeda jo nan sabalunnyo, responnyo kini maangguak, patando baraso Pak Rober ndak bisa ditamui.

Lai ndak salah anjiang ko ko? Udin batanyo dalam hati. Karano penasaran, Udinpun maulang batanyo.

“Maaf, apa saya bisa menemui beliau?”

Anjiang herder tu pun maangguak baulang-ulang saolah-olah mampatageh jawaban sabalunnyo.

Halah, mati den, iyo ndak bisa do ko. Karano panik, Udinpun lapeh kontrol, baitu juo jo pertanyaannyo.

“Emangnya bapak lagi sibuk?”

Si herder manggeleang maiyokan.

“Sibuk ngapain?” lanjuik Udin iseng mancubo bainprovisasi surang.

Mandanga pertanyaan nan asiang ko, si Herder tadiam sakutiko, Udin manunggu sambia marafal mantra langkah saribu. Indak lamo manunggu, herder ko marespon jo manjuluakan lidahnyo kalua, sarato barangok takah urang tarangah-rangah. Nampaknyo herder ko pun sadang baimprovisasi takah wakden tadi, sangko Udin sambia manakok-nakok mukasuik reaksi herder sabanta ko. Bapikia takah itu, Udinpun malanjuikan pertanyaannyo sambia senyum-senyum.

“Ibuk di rumah ya?”

Si herder langsuang manggeleang baulang-ulang maiyokan sarato manggoyang-goyangkan ikuanyo, takah urang nan sadang bausaho mayakinkan Udin.

“Gaek udi mah, sore hari baru” garutu Udin maumpek lalu baliak kanan pulang manuju tampek asa mulo datang.