(39) Aa Guno Baraja Ko Pak?

Ado duo masalah utamo nan mambuek Munyeng ko dikatokan aneh. Nan partamo palawan ka gaek, nan kaduo pambangkang ka guru. Kok diajak dek gaeknyo manyabik, rumpuik gaek ko dikumpuakannyo dari balakang. Rajuiknyo panuah inyo pulang. Tinggalah gaek ko jo rajuik kosong.

Ka guru baitu juo. Ndak ado guru nan sanang maaja inyo. Karano memang ndak pernah nyo padiakan sanang. Takah pagi tu, kutiko urang baraja agamo jo Udin. Inyo gilo mangarapiak panja se, tiok sabanta mamintak ijin, tiok sabanta maminjam pena.

“Hoi, Nyeng!” hariak Udin.

“Yap, apo kaba Pak?” jawek Munyeng sambia mamasang mimik indak badoso.

“Apo nan Angku cari?, manggarapiak panja se dari tadi. Lah co buruang celuk dalam sangkak nanpak dek Apak” lanjuik Udin barusaho santai.

“Iko Pak ha….” jawek Munyeng agak tagagik.

“Apo?” dasak Udin sambia bajalan mandakek.

Mancaliak Udin mandasak, Munyeng pun nekat mangecek apo adonyo.

“Baiko Pak ha. Wakden sadang mancari guno wak baraja agamo ko, ndak mangarati wakden do Pak…” jawek Munyeng malapehkan uweh-uwehnyo.

Mandanga iko, Udin agak takajuik. Lain pulo paja ko. Lah 10 tahun maaja, iko pulo baru wakden nan mandapek tanyo saroman iko, gumam Udin dalam hati. Namun, sabagai guru nan baiak, inyo tantu harus manjawek sacaro baiak-baiak.

“Jadi, waang nio tau guno wak baraja agamo ko, baitu?” baleh Udin sangajo maulang tanyo Munyeng di muko.

“Iyo Pak, sakalian referensi nyatonyo” sambuik Munyeng tageh.

“Jadih. Dangaan yo! Agamo ko paralu untuak komunikasi sosial kito, Nyeng. Kalau ndak ado agamo, mustahil kito bisa manjalin komunikasi nan baiak jo jiran bakuliliang” jawek Udin mamulai panarangan.

“Ohhh. Tapi, Pak…” respon Munyeng sambia manggantuang keceknyo.

“Tapi apo Nyeng?” sambuik Udin capek.

“Abak Den Pak, ijan kan baraja agamo di sakola, SD se indak tamaik do. Ancak juo hubungannyo jo urang sakaliliangnyo Pak. Malahan, sakecamatan ko, ndak ado urang nan ndak kenal jo Abak den do” lanjuk Munyeng maningkahi langkok jo barcotnyo.

Mandanga jawek nan iko ko, Udinpun malanjuikan.

“Agamo ko Nyeng, samo jo pagangan hiduik. Kok indak dek agamo ko, lotong-lotongi urang ko kasadonyo mah. Takah baluik buto nan paniang mancari lubang sarangnyo” lanjuik Udin sambia mambatuakan latak kaco matonyo.

“Kok itu lai ado wakden mandanga dari garin di surau mah Pak. Tapi Pak, lai ndak baa kalau wakden agiah contoh ciek lai ko?” tanyo Munyeng babaso basi sabalun lanjuik.

“Tantu buliah. Kini jaman demokrasi Nyeng” sambuik Udin ramah.

Mandanga iko, Munyengpun sugiro malanjuikan.

“Pak etek den Pak, mainjak sakola se ndak pernah do. Surau baitu juo. Pagangan hiduiknyo sabana ndak ado nan jaleh, tarutamo kutiko mambaco mantra. Hantu masuak, setan masuak, arwah syaikh-syaikh masuak, bismillah ndak pernah tingga. Tapi hiduik juo nyo Pak.

Bahkan, banyak pasiennyo nan mangecek baraso pak etek den ko, Dokter nan paliang canggih ilmunyo. Indak manga-manga jo Dokter-dokter di rumah sakik do. Mambayia bisa pulo kredit lai” papa Munyeng panjang leba mangatangahkan contoh Pak Eteknyo. Samakin dakek contoh kasusnyo tantu samakin mudah dipahami, baitu manuruik Munyeng.

Mandanga urain Munyeng nan co manembak tupai bacokok mariah, alias to de poin ko, Udin mulai mamuta aka. Harus dipapah elok-elok paja ko ko, pikia Udin. Karano itu, Udin mulai manata ulang strategi manarangannyo.

“Munyeng nio jawaban nan mode apo kini ko?” sapo Udin sangajo mangambangan strategi batanyo supayo bisa manggiriang pambicaraan.

“Bukan nan wakden nio Pak. Tapi manuruik nan seharusnyo” kilah munyeng manggelek co baluik licin.

“Mukasuiknyo?” sambuang Udin mamanciang.

“Palajaran tantu akan bisa batarimo jiko ado referensinyo di lapangan nan bisa ditamukan. Jadi, wakden nio Apak maagiah contoh apo guno kito baraja agamo jo maagiahan contohnyo di lapangan” jawek Munyeng sungguah-sungguah.

“Ohhh, mantun. Jadihlah, cubolah ang sampaikan tantangan materi nan mano kini ko?” sambuik Udin sambia maangguak-angguak patando lai mangarati jo mukasuik Munyeng sabanta ko.

“Iko Pak ha, Minggu patang kito baraja, materinyo “akhlak nan mulia”. Isinyo; jujur, adil, tangguang jawab, dan lain-lain. Kecek Apak manyampaikan inti kaji, supayo sukses manjadi urang, kami harus mengamalkan nan baiko. Kan baitu Pak?”

“Batua, lai santiang ang mah” puji Udin maagiah apresiasi ka anak didiknyo nan tanamo mada ko.

“Ijan dipuji dulu Pak. Kambang pulo lubang hiduang wakden beko ha” baleh Munyeng nan disambuik jo galak takekeh dek Udin.

Mancaliak Pak gurunyo ko lai galak, Munyengpun manyorongan pokok galehnyo.

“Manuruik wakden Pak, ndak batua ajaran Apak ko do ko”

Mandanga ujuangnyo ko, muko Udin nan tadi pink dek galak, kini baganti jo merah lado, mahitam.

“Apo dasarnyo waang mangecek baitu?” salidik Udin manggigik giginyo bausaho manahan emosi.

“Kan bisa kito caliak referensinyo di lapangan tu Pak” jawek Munyeng santai, pura-pura ndak manangkok kalau amper Udin lah mulai naiak.

“Referensi nan mano?” sambuik Udin bausaho manahan fokus supayo ndak malenceang dari strategi nan lah dirancang di muko tadi.

“Kecek Apak, akhlak mulia ko paralu bia kito bisa manjadi urang nan sukses dan mulia. Barangkek dari sinan, tantu wakden maambiak referensi dari urang-urang sukses dan mulia itu sandiri. Mulai dari nan mulia di Pamarintahan, nan mulia di DPR, nan mulia di kalangan Artis. Pendeknyo, sakalian nan mulia nan manjadi publik figur lah” papa Munyeng panjang-leba manarangan.

“Jadihlah. Tapi, ambek sabanta yo. Sia nan manyuruah ang maambiak referensi ka situ?” tanyo Udin mancubo manggaduah fokus Munyeng.

“Tapi kecek Apak, mancaliak contoh ka nan sudah mancaliak tuah ka nan manang” baleh Munyeng sarupo mangaluah.

“Iyo. Lalu, apo hubungannyo jo kecek waang, tantangan nan ndak batua dari materi akhlak mulia nan Apak ajakan? Jan salah ang yo Nyeng. Iko ko bagian dari program pendidikan karakter nan dirancang susah payah dek para nan mulia tadi tu mah. Khususnyo nan mulia dari Pamarintah jo DPR” lanjuik Pak Udin mulai mamainkan strategi scary version untuak mambandiang kabaranian Munyeng ko.

Mandanga iko, Munyeng hanyo galak tempang sabanta. Cadiak juo pak Udin ko, baitu pikirannyo. Sadar akan iko ko, inyo lalu mangaluakan reaksi nan di lua dugaan Pak Udin. Bukan takuik, tapi malah galak-galak ketek.

“Hehehe, akhianyo kalua juo nan sabananyo” kecek Munyeng di akhia galaknyo sarupo urang nan baru mandapek sasuatu.

“Mukasuik ang?” tanyo Udin mamandang heran jo kaniang mangaruik.

Yo babayo pulo paja ko. Bukannyo takuik, malah makin barani inyo, gumam Udin sambia taruih mamandang Munyeng lakek-lakek. Munyengpun nanpak mambaleh pandangan pak gurunyo ko. Lalu, sugiro mulai manarangan mukasuik galaknyo.

“lah Pak. Manuruik Apak, nan dibudayakan dek urang-urang sukses sarato mulia tu, apo iyo akhlak mulia nan takah Pak ajaan ka kami tu?” tanyo Munyeng mauji kakukuhan Udin.

“Tantu lah iyo, kok indak, ka mungkin nan mulia sabutannyo. Kok indak, ka mungkin jadi public figure urang-urang tu Dinnn” jawek Udin sambia senyum-senyum ketek.

“Hahaha, di siko kanai Pak. Apak ndak manonton TV do yo?” potong Munyeng capek.

“Hehehe, tapi TV Apak nan dulu hanguih ditembak patuih. Padahal kreditnyo lun lunas lai tu Nyeng” jawek Udin sangajo mambengkok. Tujuannyo tantulah untuak manggeser fokus Munyeng nan makin superior. Sayangnyo nan tajadi justru sabaliaknyo.

“Tau Apak Ndak? Samintaro Apak disuruahnyo maajakan sarato mambudayakan pendidikan karakter jo akhlak nan mulia ka kami-kami ko. Baliau-baliau para nan mulia di ateh tu malah membudayakan karakter nan sabaliaknyo mah” lanjuik Munyeng barapi-rapi.

“E-eh, ang sumbarang se Nyeng. Mano contoh jo buktinyo? Sambuik Udin bamukasuik baparingek.

“Pamarintah jo DPR jadi sarang koruptor. Lembaga hukum jadi sarang pakang. Dunia hiburan jadi sarang pagaulan bebas. Apo sasuai jo akhlak mulia dek Apak tu?” lanjuik Munyeng manutuik jo tanyo baliak.

“Eits, tunggu sabanta” ambek Udin maminteh.

“Aa Pak?” jawek Munyeng agak tagalenjek. Indak manyangko panjalasannyo di ateh akan diambek.

“Kok itu nan ang tonton?”

“Karano itulah contoh nyato urang sukses di Negara ko Pak” jawek Munyeng mangalia co aia hilia.

“Mukasuik Apak, kan ado nan lain bagai tu” lanjuik Udin.

“Cubolah kamukokan lah dek Apak contoh urang sukses sarato mulia nan mambudayakan akhlak mulia tu” jawek Munyeng santai maraso di ateh angin.

          “Iko nan di muko waang ko, Udin bin Pakiah, bini surang, anak surang, sukses hiduik mambangun kaluarga sakinah, mawaddah, warohmah jo palajaran agamo ko. Satiok hari mandidik anak-anak mudo mada sarupo waang ko supayo bakarakter nan baiak jo akhlak nan mulia. Ndak mulia dek waang tu?” jawek Udin mantap bausaho maredam pambarontakan batin anak didiknyo ko.

“Hahaha, kok Apak jo guru-guru ko referensinyo ha, anti lah, ampun kami. Bia lah ndak jadi urang sukses apaolai jadi urang mulia Pak eh” baleh Munyeng sarupo urang mancimeeh. Tapi maklum jo niaik elok guru nan samato manyabakan inyo.

“Nan paralu hiduik kito ateh nan halal Nyeng, mati pun insyaallah coitu. Di dunia manjadi pahlawan tanpo tando jaso, di akhiraik manjadi pahuni sarugo. Baa kiro-kiro?” tutuik Udin ringan tapi diplomatis.

“Hahaha, jadihlah. Apak kareh angok!” umpek Munyeng di ujuang galak sarato kaprihatinannyo mancaliak gurunyo ko.

“Waang nan kareh angok, indak manarimo kabanaran” baleh Udin pura-pura berang, tapi jo muluik mangulum senyum.

“Kabanaran Apak tingga taruih di ateh buku. Itu kok maleh wakden manarimo. Ancak kalua den lai, pado di dalam mahabih-habihan wakatu” lanjuik Munyeng sambia malangkah kalua ruangan.

“Cubolah malangkah salangkah lai, nak permanen stempel surian ko di kaniang ang” baleh Udin sambia maambuang-ambuang pahapuih papan tulih.

“Manga Apak ko? Tu ndak demokratis namonyo do tu. Ndak sasuai jo pendidikan karakter nan Pak kecekan tadi do” garutu Munyeng manyada-nyada sambia manyilangan tangan malindungi kapalonyo.

“Mati se lah eh, pado heboh pulo baliak urang gaek ang ka sakola ko. Wakden pulo nan kanai tegur dek diknas. Indak bisa” lanjuik Udin sambia tatap maacuangan pahapuih papan nan balem-an ka balok ketek.

“Jadi, poinnyo, nan dipelajari di kelas ndak paralu dicari referensinyo do, baitu yo Pak?” kecek Munyeng sambia marunguik-runguik.

“Tasarah , nan jaleh duduak baliak”.