(31) Sayang Baganti jo Banci

Siwua Udin nan manuruik ukuran parasaannyo bak buluah parindu langsuang taranti kutiko maliek Iben duduak surang batupang dagu di kadai Tek Siah. Indak lamak basiwua-siwua di ateh seso kawan, baitu moto gaul anutan Udin. Pado siwua dipanyariang, elok lah kawan ko dikawanan. Barangkali, kawan ko masih paniang mamikiakan kaputusan nan ka diambiak tantangan urang rumahnyo kapatang.

“Halah, kok lah bantuak basahan lambok se ko, Ben?” sapo Udin pura-pura ndak bisa mambaco kaadaan.

“Baa ka indak, wakden lah carai jo si bini den” jawek Iben barusaho santai sambia maaliakan raso galaunyo jo maaru-aru kopi nan lah dingin.

Mandangan kaba ko, tadarah sirok Udin, antaro picayo jo indak. Sabaik, lah dari dulu, Iben ko lah talalu sayang ka bininyo ko. Apopun ulah bininyo pasti inyo bela, walaupun salah. Memang indak bisa disalahi nan kini tajadi. Sabaik, bini Iben ko adolah idola di sakola. Apo bilo kaum laki-laki bacarito di sakola, pasti bini Iben ko nan dicaritoannyo. Pendeknyo, bini Iben ko adolah sagalo-galonyo impian laki-laki tantangan padusi. Barangkali, iko pulolah nan mambuek batino ko makin manggata walau lah jadi bini Iben.

Batulak-balakang bana jo Iben nan sagalo alakadarnyo. Di sakola indak pernah dapek rangkiang, di surau pun kajinyo indak labiah dari juz amma nan baujo, di kampuangpun indak pernah punyo prestasi apo-apo. Singkeknyo, Iben ko sabana bodoh lua dalam, baiak ilimunyo, baitu juo parasaannyo. Makonyo, kutiko dulu Iben mangecek bapole, bahkan nak babini jo si Labiah, Udin jo Amir baparingaik sahabih-habih aka Bak urang basiang bahabih hari, bamalam bahabih minyak hinggo masaknyo juadah “pangana sapanjang rambuik”.

Kini, mandanga Iben carai jo si Labiah.  Hati Udin sadiah-sadiah sanang. Sanang karano Iben lah lapeh dari padusi layang-layang ko, sadiah karano kawannyo kini lah jadi rando. Namun, sabagai kawan, Udin kini tantu hanyo bisa sabateh mangawani sarato maagiah sumangaik.

“Yo lah Ben. Nan paralu ang yakin baraso langkah nan ang ambiak ko nan tabaiak”. Udin mangaluakan suaro maagiah tanggapan sakadarnyo.

“Ndak tau wakden do. Nan jaleh, judulnyo kini lah baganti. “Sayang baganti jo banci” lagu den kini lai, hehehe” baleh Iben bairiang galak tempang manyuruakan raso gundahnyo.

Mandanga kato-kato panuah duto taradok diri sarato gaya nan bakuaik-kuaikan ko, Udin jadi batambah taranyuah. Sakutiko, pikiran lianyo bakarajo mancari ide. Ide untuak mamanciang galak, sakadar maalihan sajanak sasak di dado Iben.

“Serius tu Ben?, “sayang baganti jo banci” judulnyo kini? tanyo Udin mamulai basiasaik mamasang parangkok.

“Iyo kecek den. Indak manyimak paja ko” umpek Iben karano manyangko Udin masih indak picayo ka kato-katonyo.

“Astaga, dek aa ang, Ben? Kok coitu bana?” respon Udin capek sambia manapuak kaniang.

Tantu sajo kalakuan Udin ko mambuek Iben malongo taheran-heran. Sakutiko, Iben malangkah mandakek, lalu mamacik kaniang Udin bak dukun nan sadang mamareso kondisi kesehatan pasiennyo.

“Hoi, dek apo ang? Apo ndak pernah mancaliak laki-bini bacarai?” tanyo Iben jo tangan nan masih marasok kaniang Udin.

Udin sakutiko manapuak tangan Iben ko. Baitu tangan tu lapeh dari kaniangnyo, Udin manjauah sambia mambari jawek.

“Pernah lah, tapi nan judulnyo langsuang batuka, yo iko baru. Apolai kok judul baru tu “sayang baganti jo banci” jawek Udin sambia manyeka kaniangnyo jo sapu tangan sarupo urang manyeka abu mamanciang emosi Iben.

Namun, bukannyo emosi nan tapanciang, karuik kaniang nan didapek. Mato Iben nanpak manyipik mancaliak Udin sarupo urang nan sadang barusaho manilik sampai ka baliak kulik.

 “Mukasuik ang?” tanyo Iben maluncua baitu sajo.

“Baru kapatang mangecek ndak bisa lapeh. Sabanta ko mangecek carai. Eh, kini lah ado se panggantinyo, ckckck” jawek Udin mandaceh sambia manggeleang-geleangan kapalo.

Mandanga kato sarato gaya panyampaian Udin ko, Iben langsuang tabik suga.

“Indak manyimak paja ko. Kalau lah dapek gantinyo, manga pulo wakden ka bamanuang dek ang?”

“Halah, manga pulo berang ang? Kok batua bana lah baganti, kan ancak juo tu, bia capek lupo. Nan den sayangan, baa kok jo banci baganti?” gelek Udin mamulangan tanyo sambia malangkah agak manjauah.

Ha? mandanga iko, kaniang Iben langsuang mangarinyik maingaik-ingaik. Bilo wakden mangecek itu?, gumam Iben dalam hati. Namun, tibo-tibo inyo tasadar. 

“Cimporong anguih, ka siko ang!”

Sakutiko, Iben bacaruik pungkang sambia marunduak maambiak tarompanyo. Namun, baitu inyo tagak, Udin nan nyo cari alah hilang antah ka ma.