Falsafah Adaik Minang Kabau dalam Parubahan Jaman (Sakali Aia Gadang Sakali Tapian Barubah)

Ado tigo falsafah nan paling tanamo di dalam masyarakaik adaik Minangkabau.  Partamo, “alam takambang jadi guru”, kaduo, “adaik basandi alua”, katigo, “adaik basandi syara’, syara’ basandi kitabullah”.  Jikok dicaliak di dalam masyarakaik Minangkabau, katigo falsafah ko masih mandarah dagiang hinggo kini ko.  Barangkali, sacaro langkok ado nan jarang dipakai, tapi indak bisa dipungkiri kalau katigonyo lah ibaraik minum manjadi darah, makanan manjadi dagiang, di dalam kahidupan masyarakaik Minangkabau.  Dari kalene hinggo nan tuo, dari nan kurang hinggo nan labiah, dari nan bodoh hinggo nan cadiak, ndak ado nan ndak tau jo istilah “alam tambang jadi guru”, ataupun istilah “alua”, “patuik”, “ABS-SBK” ko. Dek sabab karano itu, dari suduik pandang iko, katigo falsafah ko, iyolah sarupo jo tali tigo sapilin, tungku nan tigo sajarangan, ataupun rajo nan tigo selo, “three in one” kecek urang kini.

1.   Alam takambang jadi guru

Di dalam Madilog, Tan Malaka bacarito baraso pado hakikaiknyo,  manusia hiduik sasuai jo nan ado dipikirannyo, pikiran nan dibantuak dek pengetahuan.  Sabalun manusia mangana ilmu, pengetahuan diambiak dari pangalaman, pangalaman didapek dari interaksi jo alam lingkungan.  Mako, balakulah kutiko itu, nan ketek dibao lalu, nan gadang diaguangkan, nan lamah ndak dianggap, nan kuaik didewakan.  Sabab baitulah hukum alam.  Batu gadang jadi sambahan, kayu gadang jadi pujaan, matohari jadi patinggi alam.

Kutiko maso barubah musim baganti, batu gadang lapuak dititiak hujan, kayu gadang pun rabah dihambuih angin.  Hari barangkek manjadi sanjo, matohari pun raduik baganti jo bulan. Kaagungan pujaan mulai maragukan, kasatiaan umaik manusiapun mulai tagoyahkan.  Pado akhianyo, didapek sabuah kasimpulan, baraso alam sifaiknyo fana. Baguru kapado alam intinyo adolah, indak buliah fanatik, sarupo jo matohari, ado masonyo marandah kutiko pagi, ado masonyo maninggi kutiko siang, dan ado pulo masonyo manurun kutiko sanjo.  Itulah hakikaik baguru kapado alam.

Di baliak pambalakangan itu, di dalam tradisi lisan Minangkabau, indak basobok istilah langsuang dari “alam takambang jadi guru” ko. Namun, satidaknyo ado tigo (3) falsafah nan identik. Nan partamo, falsafah “ukua jangko”, nan kaduo, falsafah “basiang di nan tukmbuah”, nan katigo, falsafah “lambek lago ka nan manang”.

Ukua jangko adolah falsafah nan musti ditilik sabalun malakukan apo sajo sacaro umum, malakukan kako baradaik sacaro khusus. Dalam konteks kako baradaik, manuruik Mak Katik, ukua jo jangko ko barasa dari falsafah “basiang di nan tumbuah” jo “lambek lago lai ka manang”, yoitu pandangan hiduik nan tabantuak dari didikan alam geografis taradok manusia.

Aratinyo, “lambek lago lai ka manang” adolah falsafahnyo masyarakaik nan hiduik di daerah darek nan hiduik dari hasia tanah jo nan tumbuah di atehnyo. Samintaro itu, falsafah “basiang di nan tumbuah” adolah falsafahnyo masyarakaik nan tingga daerah rantau nan hiduik dari hasia lawuik jo dagang. Makonyo, urang darek punyo sistem “bagulambek”, urang rantau “tembak tupai”. Ikolah sabananyo poin dari “alam takambang jadi guru”. “Lain lubuak lain ikannyo, lain nagari lain adaiknyo, kapalo nan samo itam, pandapek babeda-beda”.

2.   Adaik Basandi Alua

Kutiko guno basamo mulai taraso, mulailah manusia mancancang jo malatiah, marimbo jo marayo, mambuka sawah jo ladang, mambuek pamukiman basamo. Sudah lataknyo manjadi taratak, kato sapakek jadilah koto, sudah susunannyo manjadi dusun, lalu bakambang jadi nagari.  Mako, duduaklah pamuncak basamo-samo, maindang manampi tareh, mamiliah atah ciek-ciek, manggantuangan ka tiang tuo.  Manyusun sawah jo ranjinyo, maatur ladang jo lantaknyo, mambagi banda jo buatan.  Tujuannyo, indak basisiah jo babateh, masyarakaik salamaik kasadonyo.  Itulah “adaik basandi alua”.  Aturan nan marunuik kapado kabanaran nan sifaiknyo umum.

Alua adolah kabanaran, kabanaran nan basifaik umum.  Ibaraiknyo, bak bakato jujur di adaik muluik, bajalan luruih di adaik parilaku.  Makonyo, adaik nan baiko tunduak kapado parubahan maso, apolai parubahan situasi jo kondisi.  Manuruik Adaik basandi alua, pantangan padusi malawan ka laki-laki, pantangan nan ketek mambantah nan gadang.  Sahinggo kutiko, ado padusi nan manulak parintah mamaknyo, kadang diarak kaliliang kampuang, diureh jo limau tawa, lah kanai paja ko mungkin.  Baitu adaik basandi alua, kadang lai cocok, kadang indak sasuai jo tampek dan masonyo.

3.   Adaik Basandi Syara’, Syara’ Basandi Kitabullah (ABS-SBK)

Adaik Basandi Syara’, Syara’ Basandi Kitabullah (salanjuiknyo ABS-SBK) adolah hasil dari masuaknyo pangaruah babarapo ajaran agamo ka dalam kahidupan masyarakaik Minangkabau, khususnyo Hindu-Budha jo Islam.  Falsafah adaik ko dilewakan di Bukik Maropalam, di daerah Batusangka.  Hanyo sajo, karano, parwakilan dari tokoh agamo nan takumpua dalam limbago “parik paga” kutiko itu, didominasi dek tokoh Islam,  ABS-SBK jadi identik jo agamo Islam.  Jikok ndak baitu, mano ka mungkin, sasudah deklarasi tu hinggo kini, limbago Hindu-Budha sarupo; malam bainai, balimau, panggang kumayan, masih tapakai hinggo kini ko.  Apolai anggota “parik paga” samaso itu didominasi dek “harimau nan salapan”, rombongan ulama nan tanamo kareh.

ABS-SBK ko indak maeliminasi adaik basandi alua, tapi marekonstruksinyo manjadi adaik basandi alua jo patuik.  Barangkali, ikolah pengaruh dari halalan toyyiban dalam Islam.  Halal adolah  alua, kabanaran umum, toyyib adolah patuik,  kabanaran nan labiah khusus, disasuaikan jo kadaan diri.  Nan halal di muluik adolah jujur, itulah aluanyo.  Namun, kutiko mangancam kamanusiaan, aplikasi halal tadi harus baganti jo nan toyyib, alua baganti jo nan patuik, itulah “alua patuik”, “halalan toyyiban” caro Islamnyo.  Di dalam pituah dikatokan, “alua tahan patuik, bana tahan bandiang, luruih tahan tilik, balabeh tahan cubo”.