Hakikaik Adaik Minangkabau

Sabalun isi kato buah rundingan dikatangahkan, samo manyaru pado Allah. Allah taala kayo sungguah, Muhammad rasul pilihan. Mako, tadirilah kawajiban dek kito sagalo umaik, basumbahyang jo wakatu, baradaik jo kutiko. Mangarajoan syarak jo tarikaik, mamakaikan nan hakikaik.  Kok tapakai nan baitu, mudah-mudahan hiduik bamanfaaik, mati bamagfiraik.

Kutiko nagari kadihunyi, duduaklah niniak jo mamak, alim ulama cadiak pandai, parikpaga jo bundo kanduang. Maindang manampi tareh, mamiliah atah ciek-ciek, manggantuangan ka tiang tuo. Dek lamo lambek bajalan, maso barubah musim baganti, urang batambah rami juo. Tarupolah nan batampi manjadi undang, elok jadi pakaian, jadi adaik di Minangkabau. Jadi padoman di nan banyak, siang dipatungkek, malam dipakalang, diturunkan ka anak-kamanakan. Tantu langkok jo sagalo pamasalahannyo, tarutamo tantangan masalah pawarisan.

Pawarisan adaik Minangkabau sangaiklah rumik sahinggo acok mamanciang kontroversi di kalangan urang Minang itu sandiri.  Salah satu panyababnyo iyolah buruaknyo system pawarisan adaik.  Adaik Minangkabau diturunkan dari generasi ka generasi hanyo malalui sastra liris tanpa didukuang jo fakta sejarah nan otentik.  Adopun sumber tulih tantangan adaik hanyolah barupo kaba jo tambo. 

Samintaro itu, di dalam ilmu sejarah modern, tambo disajarkan jo babad, sumber sejarah ala urang Jawa.  Di dalam ilmu sejarah modern nantun, tambo jo babat ko, sarato sumber sejarah sejenisnyo dikatokan sebagai bagian dari historiografi nan hanyo manganduang kabanaran sejarah 2%, salabiahnyo adolah nilai-nilai adaik nan masih butuh pangkajian sarato panjabaran nan panjang. 

Pangkajian mandalam di siko sangaik dibutuhkan disababkan karakter bahaso di dalam tanbo maupun kaba nan tabilang sangaiklah rumik. Sangaik susah untuak dipahami, apolai dek generasi mudo nan lah mulai jarang mandanga sarato manggunokan bahaso nan bak nantun.  Tapi samantangpun baitu, rumik itulah nan mamuncuakan asumsi baraso di dalamnyo takanduang “harato adaik” nan barangkali indak ado bandiangan nilainyo.  Bak pituah urang tuo-tuo, “indak mungkin tampuo basarang randah”.  Pendek kato, urang indak akan mamasang parangkok, jikok ndak ado nan barago nan musti dilindungi.

Di dalam pembelajaran adaik Minangkabau sacaro tradisional, balabeh adaik dibukak jo duo kato kunci. Kato kunci nantun iyolah “adaik” jo “limbago”.  Kato adaik dianalogikan sabagai nyawo/ marwah, kato limbago dianalogikan sabagai batang tubuah.  Singkeknyo, mangaji adaik adolah mangaji tubuah kecek urang tuo-tuo, mangaji tantangan manusia istilah budaya modernnyo. Mulai dari manusia sabagai makhluk individu (kaji diri) hinggo manusia sabagai makhluk sosial (bamasyarakaik).

Sabagai individu, manusia tadiri dari unsur fisik jo non fisik (adaik).  Organ-organ fisik nan mambantuak batang tubuah manusia adolah unsur fisik (limbago), organ-organ nan mambuek manusia hiduik sarato mambuek hiduik jadi labiah hiduik adolah unsur non fisik.  Singkek carito, jikok kito hubuangkan jo metafora kaji adaik adolah kaji tantangan manusia di ateh. Mako, tangan, kaki, mato, muluik, talingo, dan lainnyo adolah bagian dari limbago. Samintaro itu, nyawo, aka-pikiran, parasaan, hati nurani adolah hakikaik dari adaik.

Baiak organ fisik maupun non fisik manusia, mampunyai kacandarungan sifaik manusiawinyo masiang-masiang.  Sifaik manusiawi nantun, baujuang pado duo arah, baik jo buruak.  Misanyo, sarupo organ fisik muluik nan bisa digunokan untuak mambaco pujian sekaligus bisa digunokan mambaco makian.  Mako, baitu juo ruponyo jo organ non fisik, parasaan pasti ingin nan sanang-sanang, pikiran nio nan tanang-tanang, hati pun indak ka babeda.  Pendek kato, itulah wujuik dari ungkapan “condong mato ka nan rancak, tunggang salero ka nan lamak”.  Itulah sifaik sarato kabutuhan kodrati, baka pambarian Tuhan taradok manusia.

Namun, di baliak pambalakangan itu, sabagai makhluk sosial, manusia mambutuahkan urang lain dalam hiduiknyo. Karano, sifaik-sifaik manusiawi di ateh mambutuhkan manusia lain untuak proses pamanuhannyo.  Karano itu pulo,  kabutuhan sabagai makhluk sosial ko mamuncuakan potensi tajadinyo banturan di dalam proses pamanuhan kabutuhan kodrati manusiawi sabagai individu di ateh.

Misalnyo, sungguahpun sagalo manusia mangatahui baraso condong mato ka nan rancak tunggang salero ka nan lamak adolah sifaik nan manusiawi, tapi indak surangpun nan nio urang lain mamatuik-matuik bininyo nan rancak ataupun maminteh hak milik punyonyo.  Dek sabab karano itu, dibutuahkan samacam aturan nan bisa malindungi hak-hak kamanusiaan sarato sanksi bagi nan manggaduah hak manusia lainnyo.  Dari latar sarupo ikolah, limbago adaik muncua di dalam kahidupan manusia Minangkabau. Mulai dari adaik nan sabatang panjang sabagai acuan hinggo kapado adaik salingka nagari sabagai palaksanaan.

Jikok kito hubuangkan hakikaik adaik Minangkabau di ateh jo teori umum tentang hakikaik budaya, iyolah lah bak cincin lakek ka di jari, bak ukia lakek di papan.  Di dalam teori ilmu budaya modern, manuasia budaya dinamokan jo istilah homo sapient sarato homo humanus.  Homo sapient barati makhluk nan bapikia, homo humanus mangacu kapado makhluk nan mamiliki nilai-nilai kamanusiaan.  Pendek kato, budaya adolah cerminan dari pikiran dan raso-raso kamanusiaan nan diwujuikkan malalui system sosial jo system karya ala Koentjaraningrat.

Jadi, sangaik aneh jikok ado urang nan mangatokan adaik mampasulik manusia apolai nan mangatokan adaik indak lai dibutuhkan.  Nan ado iyolah, kesalahan dalam mamahami hakikaik adaik, suduik pandang, sarato motif dalam usaho menjabarkannyo.  Sarupo nan dikukuahkan di dalam sumpah sati bukik Maropalam, Al adatu la yanfashilu bisy syar’i wasy syar’i la yanfashilu bil adati, walau ka nat munfashilan ka nat bathilan.  Aratinyo, adaik Minangkabau indak batantangan jo syarak, baitu pulo sabaliaknyo, jikok tajadi patantangan atau nan mampatantang-tantangan, itulah kabathilan.

Untuak itu, kalau sasek di tangah jalan, babaliaklah ka pangka jalan, kumbalikan puntiang ka hulunyo, palajari adaik sacaro utuah, indak satangah-satangah.  Jikok indak, hilanglah rono dek panyakik, abihlah tuah dek misikin. Hilang sinoru nanpak pagai, hilang dilamun-lamun ombak, hilanglah hulu karano sansai, hilang di tangah urang banyak. Lakanglah adaik karano paneh, lapuaklah adaik karano hujan.