(21) Takuruang Nak Tahimpik Nak

Sasudah mamandian "Parik Paga" kampuang kapatang malam. Malam ko, Udin mamutuihan nak manamui mamak samato wayangnyo nan paliang nyinyia, Mak Ponde. Tujuan utamo iolah mamintak ijin baliak ka Padang.

Udin sanang bana jo mamak nan surang ko. Karano, baliau ko adolah mamak kapalo warih nyinyia, nyinyia baliau ko pun sarupo bana jo kicauan balam mahu. Kadang takasan asa ka malantuang se, tapi cukuik ampuah untuak manganduakan saraf-saraf nan managang. Kadang sangaik filosofis, manganduang banyak nilai-nilai.

Malam ko, sasudah Magarik, Udin langsuang maoncong-oncong ka rumah baliau. Kalau indak capek, pasti lah ado tamu nan tibo, gumam Udin sambia bajalan. Sabaik, banyak bana pareman nan suko batandang mangunjungi mak Ponde ko. Walau ndak ado nan ka dijapuik, indak ado nan ka dianta, walau hanyo sakiro mota-ota kariang.

Baitu tibo di muko pintu, Udin langsuang mamanggia mambaco salam.

“Assalamu alaikum. Mak!”

Karano indak kunjuang mandapek jawaban, Udinpun mulai manokok-nokok pintu jo cincin mantiko kaniangnyo.

“Assalamu alaikum” ulang Udin jo suaro nan labiah kareh.

“Waalaikumus salam…huk…huk…” tadanga jawek salam bairiang jo batuak ketek dari dalam.

Sakutiko, pintupun tabukak mangaluakan suaro marengek bak suaro ngangek panggiriak kayu. Tanpaklah sosok Mak Ponde tagak di muko pintu sambia malatakkan tangannyo di dakek kaniang, sarupo urang nan sadang mamasang badan horomaik ka bendera.

Mancaliak iko, Udin langsuang pulo maangkek tangannyo manirukan gaya nan sarupo.

“Lapor komandan, ambo ko, Udin nan datang” lanjuik Udin jo suaro nan dibuek-buek co komando upacara.

“Hahaha, waang Din, masuaklah. Mato den lah gak bakurang wattnyo ha” sambuik mak Ponde sambia marangkuah bahu Udin, lalu manjujuik mambao ka dalam rumah.

Sabalun duduak, Udin mamuta kapalonyo sabanta manyigi kadaan rumah mamaknyo ko. Langang dari barang-barang, tapi cukuik barasiah untuak ukuran laki-laki gaek nan lah mambujang.

“Baa carito patang Din?” suaro mak Ponde nan barek mangajuikan Udin nan sadang sibuk manyigi-nyigi.

“Lah salasai Mak. Lah den mandian basah-basah takah nan Mamak sampaian tu” baleh Udin sambia mahampehan ikuanyo ka ateh lapiak pandan, tapek di muko mamaknyo nan sadang manyanda ka tonggak tangah.

Mak Ponde mancaliak sabanta. Malam ko Udin datang surang, indak baduo jo si Amir. Aratinyo, mungkin ado etongan atau urusan surang nan nio nyo surah baduo jo wakden sajo. Bapikia baitu, Mak Pondepun mamutuihan mamulai tanyo. Mudah-mudahan lapeh juo sagalo uweh-uweh Panakannyo ko.

“Syukurlah. Kini baa? Lai masih kareh juo dabua ombak tu?” lanjuik mak Ponde pragmatis abis.

“Hahaha, lai mak. Wakden pulang dek taragak jo Mamak se nyo. Alun ka mahampeh ka pusako lai, hahahaha” baleh Udin sambia galak, nan disambuik jo galak takekeh-kekeh dek mamak kasayangannyo ko.

Mak Ponde memang urang lamo nan cukuik humoris. Bahasonyopun coitu, salalu manggunokan bahaso nan tasuruak. Saroman sabanta ko, baliau manggunokan kiasan ombak untuak mananyokan gairah karajo Udin. Sabaik, urang Minang lamo tabiaso mangibaratkan rantau ko sabagai lawuik.

Manuruik mak Ponde, sumangaik urang rantau musti sarupo ombak nan baguluang-guluang, sambuik-manyambuik mahantam karang supayo laju biduak ndak tahalang. Ikolah kaji nan salalu dipagang Udin, pusako usang dari mamaknyo nan masih cocok jo nilai-nilai kamajuan.

Kini, taragak bana rasonyo Udin mandangaan pituah-pituah tu baliak. Mandanga suaronyo nan barek, mandanga pituahnyo nan punyo power luar biaso.

“Mamak baa Mak? Lai segeh-segeh se?”

“Alhamdulillah Din, wakden ko manusia segeh sapanjang maso” jawek mak Ponde sambia malipekan siku mampalagakan otot bisepnyo nan lah mangandua.

“Hahaha, langan sagadang paho ayam tu bapalagakan pulo. Tapi, sungguah ko mak, kuruih bana mamak nanpak dek wakden ha….” sapo Udin agak bauweh-uweh.

“Ee yayai, baa kok lah marantau pulo kok tambah lamah antene ang ko?” baleh mak Ponde takasan indak manyambuang.

“Ha? Ka ma pulo pai nyo tu mak?” tanyo Udin nan memang sabana-bana binguang, ndak mangarati jo jawek mamaknyo ko.

“Urang kampuang ko Din, babeda jo urang kota. Indak bisa ang samokan sajo do” kecek mak Ponde mamulai kato.

“Di ma pulo latak indak samonyo dek mamak?” sambuik Udin capek.

“Kalau urang kota, apolai nan lah gaek, iyo paralu dicamehkan kok takucak badannyo. Kok urang kampuang takah wakden ko, indak paralu do Din” lanjuik mak Ponde maagiah panarangan.

“Baa kok bitu? Kuruih ko kan samo-samo dek kurang makan mah” sanggah Udin indak pueh.

“Hahaha, di siko nanpak lamah ang” sambuik mak Ponde galak sambia maintai jo suduik matonyo.

“Itu kan kilah mamak sajo” baleh Udin ndak amuah kalah.

“Lah, danga yo. Tau ang ndak, wakden ko kuruih karano karajo den jalan taruih. Aratinyo, jasmani den kuaik, rohani den sihaik. Kok indak, maa pulo ka taayunan pangkua cap buayo tu dek wakden” urai mak Ponde manyampaikan dalianyo sambia manunjuak pangkua nan tasanda di baliak pintu..

“Hohoho, bitu pulo yo. Baa kalau mamak gapuak?” sambuang Udin batanyo dek penasaran jo kalanjutan kicauan mamaknyo ko.

“Kalau wakden gapuak, kutiko itu lah tibo masonyo waang mancamehan wakden mah” jawek mak Ponde tageh.

“Baa pulo kok bitu?”

“Berarti wakden lah banyak bamanuang-manuang. Bisa jadi sadang rusuah dek takana jo maniangko mintuo ang, hehehe” galak mak Ponde manutuik paparannyo.

Hanyo sajo, galak nan tarakhia ko taraso agak bapasoan, karano ujuangnyo agak manggantuang, indak lapeh cando nan biaso.

Mandanga galak nan agak tapaso ko, Udin akhianyo mangalah, mancubo manggeser jalan carito.

“Ohhhhh, jadilah kok bitu. Tapi, tu nan sabananyo kan mak?” tanyo Udin sambia mamandang lakek ka mato mamaknyo ko.

“Iyo, mungkin pulo waang ka den pagarahan. Ndak ukurannyo do” jawek mak Ponde sangajo maangek-angekan Udin.

“Hahaha, iyo…iyo. Mantang-mantang mamak kapalo warih yo. Langsuang bakukuak di katinggian” galak Udin maningkahi “minyak” mamaknyo ko.

Untuak babarapo saaik, kaduo mamak-kamanakan ko laruik dalam kagadangan hati bagalak-galak. Hilang kasan baraso kaduonyo ko mamak-kamanakan, labiah manyarupoi kawan sapamainan. Ikolah nan mambuek Udin sagan barek ka gaek ko, pandai bana bamain budi, dalam aia badan ndak basah.

“Mak!” sapo Udin sasudah pueh bagalak-galak.

“Apo nakan”

“Iko ha, wakden masih gak binguang jo pasan mamak dulu” panciang Udin manyampaikan mukasuiknyo.

“Pasan nan mano?” sambuik mak Ponde sambia mangarinyikan kaniang.

“Itu ha, nan "tahimpik nak di ateh takuruang nak di lua" tu ha…” lanjuik Udin bausaho maingaikan.

“Oh, nan itu. Apo pulo nan mambinguangan waang?” buru mak Ponde mancari tau.

“Karano, banyak cadiak pandai di rantau nan mangecek, iko ko pola pikia nan sumbang, salah latak bak pakalang. Mungkin mauntuangan untuak sasaaik, tapi indak manuruik alua nan bana” urai Udin manjalehan dilema nan nyo hadoki.

“Halah, manga pulo kok sampai baitu jadinyo? Sambuik mak Ponde antaro picayo jo indak.

“Baiko Mak. Logikanyo ndak ado do mak. Maso pulo tahimpik nak di ateh, takuruang nak di lua. mustinyo tantu ndak mode itu. Tarimolah tampek wak, dan bakarajolah sasuai jo tampek nantun.”

Mandanga panjabaran Udin nan baru ko, mak Ponde langsuang maangguak-angguak patando mangarati. Baliau langsuang maheruik angok, lalu galak-galak ketek mangaluakan suaro aneh.

“Hohoho, lai tabayang dek wakden mah. Tapi, rasonyo tangguang tu mah Din. Manga ndak baganti se pituah tu jadi "takuruang nak baduo, tahimpik nan mangalicik?” baleh mak Ponde mananggapi opini Udin di ateh jo pituah olok-olok. Nampak bana baliau indak ajan.

“Mukasuik mamak?” tanyo Udin jo kaniang mangaruik.

Kini ko, Udin nan dibuek binguang dek sambutan angek mamak kapalo warihnyo ko.

Mancaliak iko, mak Pondepun malanjuikan jo batanyo.

“Kalian kan maambiak kasimpulan manuruik nan kalian liek kan?”

“Iyo lah. Tantu kito bapadoman kapado nan tajadi di lapangan mak” jawek Udin tageh.

“Silahkan, ancak tu mah. Memang coitu kalau baraja” lanjuik mak Ponde mambuek Udin samakin binguang.

Halah, baa pulo ko? Tadi baliau manjawek sarupo urang nan indak ajan jo pituah olok-olok. Kini kok mangecekan ancak? Udin manggawuik kapalonyo nan tibo-tibo sajo taraso gata.

Dek ndak tahan jo raso gata nan aneh ko, Udinpun kalapasan.

“Tapi, pituah olok-olok nan mak sampaikan tadi tu, ndak mangarati wakden hubungannyo do ha” kaluah Udin malapehan unek-uneknyo.

“Oh itu. Mukasuik wakden biko ha. Jikok memang pituah tu salah manuruik kalian. Usah dipakai, ganti sajo jo pituah nan sasuai jo kenyataan kalian tu. Takah nan den contohan tadi. Kan cocok bana jo kenyataan hiduik urang-urang cadiak pandai di rantau tu. Korupsi bajamaah, kumpua kabau, mamanciang dalam balango, sarato lain-lainnyo” urai mak Ponde santai bana.

“Hohhh…” Udin manggumam jo aia muko nan karuah. Lipek kaniangnyo jaleh mancaritoan kagalauannyo.

Mancaliak kondisi ko, mak Ponde mampaeloki duduaknyo. Kok tadi manyanda ka tonggak sambia maunjua, kini baliau baselo duduak mantap.

“Lah, waang pernah ndak salah makan ubek?” tanyo mak Ponde mamoleh carito.

“Halah, bana-bana lah ko mak ha…” sanggah Udin maraso mamaknyo ko bagarah di wakatu nan indak tapek.

“Kecek sia wakden bagarah?” baleh mak Ponde jo rono muko sungguah-sungguah.

“Tabayang dek wakden ujuangnyo mah. Mak nio mangggalakan wakden salah minum ubek kan?” lanjuik Udin manarangan motif inyo manyanggah.

“Ee yayai, siago tu musti, tapi jan buruak sangko nan dikamukokan yuang. Raso dibao naiak pareso dibao turun. Danga dulu…” olah mak Ponde manjinakan.

“Jadihlah, jadi aa mukasuik mak tantangan ubek tu?” akhianyo Udin mangalah.

“Ubek tu siasaik wakden untuak mancari panarangan nan tapek, nan mudah dimangarati” jawek mak Ponde mamulai katarangannyo.

“Jadihlah kok bitu. Apo tu?” tanyo Udin baliak.

“Jaweklah dulu tanyo den tadi. Pernah ang salah minum ubek ndak?” mak Ponde maingaikan tanyonyo nan tadi indak dijawek.

“Pernah” jawek Udin spontan.

“Kutiko itu, apo bisa disalahan ubek tu, atau urang nan manjua, atau urang nan mambuek dek ang?” tanyo mak Ponde masih balanjuik.

“Tantu indak mungkin. Kasusnyo kan ndak malpraktek do…” Udin manjawek apo adonyo.

“Baa kajadiannyo?” sambuik mak Ponde takah urang nan sadang baburu.

“Kutiko itu, wakden sakik kapalo jo paruik gambuang. Den sangko, barek kapalo sarato paruik gambuang den ko dek karano masuak angin kutiko batanggang. Lalu, den minumlah antangin. Tapi, baitu angin tacabuik, pasandian den langsuang lamah, marapuang raso darah den. Ruponyo, bukan antanginnyo nan salah, tapi lambuang den nan bamasalah” urai Udin manjalehan kronologi kutiko inyo salah minum ubek.

Mandanga iko, mak Ponde langsuang senyum-senyum.

          “Nah, apo pulo bedanyo diagnosa tentang panyakik ko jo opini cadiak pandai ang tentang pituah "takuruang nak di lua tahimpik nak di ateh" tadi?” tanyo mak Ponde mamapah pandapek Udin.

“Halah, plak….iyo juo yo” Udin tagalenjek sakutiko sambia manapuak kaniangnyo.

Pikirannyo spontan babaliak manikam jajak manalusuri duo buah suduik pandangnyo nan mulai taraso salah. Partamo, salah suduik pandang dalam mamahami pituah adaik nan barujuang kapado pambunuahan karakter pituah nantun. Kaduo, salah suduik pandang dalam mamahami kondisi badan nan barujuang kapado kasus salah ubek. Ujuangnyo, saroman urang selon, gilo manyalahan urang.

Mancaliak Udin nan sibuk jo pikirannyo, mak Ponde malanjuikan manarangan nan dapek dek baliau. Mamandikan urang ko harus basah-basah, sabun ndak buliah tingga. Bia barasiah sarato tarangkek pikiran-pikiran kumuahnyo. Baitu prinsip mak Ponde dalam bakarajo. Karano itu, baliaupun sugiro malanjuikan.

“Din, pituah ko samo jo ubek. Indak bisa sumbarang lakek se do” sapo mak Ponde jo suaro bareknyo nan parau.

“Iyo mak” sambuik Udin maangguak patando paham.

“Satiok pituah, tamasuak pituah "takuruang nak di lua tahimpik nak di ateh" tu, ado motif, konteks atau asbabun nuzulnyo Din. Dalam adaik diikaik jo pituah "sumbahyang bawakatu, adaik bakutiko"” lanjuik mak Ponde maagiah pancerahan.

“Mukasuik mamak?” sambuik Udin mamintak tambuah.

“Urang marantau ko samo jo urang nan mamulai hiduik. Namonyo mamulai, tantu dari awa. Ibaraik mangaji dari alih, waang tantu akan jadi anak buah urang. Dayo atau potensi waang akan takuruang atau tahimpik dek status anak buah ko. Karano itu, dan karano wakden indak punyo dayo atau pitih untuak mambantu waang, makonyo jo pituah "tahimpik nak di ateh takuruang nak di lua" tu lah waang wakden lapeh. Poinnyo, fisik, ruang garak, laku ang buliah takuruang ataupun tahimpik dek status ko. Namun, fikiran waang musti di ateh himpitan atau di lua kurungan nantun” urai mak Ponde panjang leba.

“Kalau bitu, lai indak ka bapangaruah ka fokus wak kutiko karajo tu Mak?” tanyo Udin alun paham bana.

“Indak lah. Waang musti manyadari baraso himpitan jo kurungan status ko sabananyo adolah tampek nan paliang ancak untuak waang baraja sahinggo tahu jo "karikia-karikia" ketek nan mungkin indak dipahami dek para induak samang. Pokok kaji nan musti waang ambiak, hakikaik manusia tu barubah, indak takah-takah itu sajo. Status di bawah adolah janjang untuak naiak sahinggo waang nantik manjadi urang ateh nan paham jo karajo sarato parasaian urang-urang nan di bawah” urai mak Ponde manutuik panjabarannyo.

“Ondehhh, iyo juo yo. Masuak tu mak. Mangarati wakden mah” sambuik Udin basumangaik. Sarupo urang nan baru sajo manamukan mainan nan lah lamo dicarinyo.

“Syukurlah kalau bitu. Ciek lai, bapasan bana mamak ka waang. Mambaco teori tentang  hiduik di buku tu paralu untuak baraja, poinnyo untuak mamanciang pakambangan utak Din, bukan malah mambalanggunyo sahinggo takuruang di dalam buku” lanjuik mak Ponde sambia mamasang muko serius, lalu maambiak tukiak untuak manyalai rokoknyo.

“Iyo iyo. Tapi, baa caronyo mambantah pandapek nan lah bakambang ko yo mak?” tanyo Udin tibo-tibo maraso indak lamak.

“Halah, itu pulo nan ang pikiakan. Urang tu se jaleh-jaleh hanyo mamikiakan alua surang kutiko mamatahan pituah tu mah. Suruah se lah urang-urang tu mancek baliak ubek-ubek nan nyo minum” jawek mak Ponde asa-asalan karano kesal rokoknyo alun juo jadi tasalai.

“Ndak mungkin tu mak. Urang-urang tu urang-urang gadang mah, ijau-ijau wakden kasudahannyo beko” sambuik Udin indak pueh jo usulan mamaknyo ko.

“Kalau bitu, suruah sajo baliau-baliau tu malewakan pituah "takuruang nak baduo, tahimpik nak mangalicik" tadi. Siapo tau, bisa manjadi sumbangan ateh namo baliau-baliau untuak maso jo generasi kini. Paliang indak, kan bisa masuak buku laporan, kan prestasi hebat tu” lanjuik mak Ponde sambia maangguakan kapalo ka Udin mamintak usua nan tarakhir ko ditarimo.

Sasudah maangguak-angguak maagiah kode patando satuju ka mamaknyo, Udin manjangkau timbakau nan tagalatak di ateh lantai. Timbakau tu lalu nyo guluang jo daun nipah mambantuak rokok lisong. Kecek Mak Ponde, namo rokok ko sabananyo rokok “amsterdam”. Aratinyo, kok ndak dihisok apinyo padam, kok dihisok muko tabam, hehehe, galak Udin dalam lamunan nan kalam.

“Din, lai ka di kampuang ang gak babarapo hari ko?”

Tibo-tibo tadanga suaro Mak Ponde batanyo. Lamunan Udin langsuang pacah. Matonyo mancari-cari asa suaro. Ruponyo, kutiko Udin mangguluang nipah sambia malamun, baliau ka biliak mambukak kaduik, tampek manyimpan timbakau barikuik siriah. Baitu Mak Ponde mawujuik dari baliak pintu, Udin sugiro manyonsoang jo jawek tanyo.

“Baiko Mak, den ndak bisa lamo-lamo do. Rancana, bisuak pagi den ka Padang. Jadi, sabananyo, di sampiang mamintak pituah, wakden sakalian mintak ijin mah ka mari”

“Oh, kok baitu, jadihlah. Ehyo, kabanyo, konco ang si Iben ka pulang abih dari rantau lai. Ang tolong-tolong juo lah nantik baduo jo Amir. Ibo wak dek inyo. Wakden ndak ado ciek alah juo nan ka bisa diagiahan ka kalian do. Nan jaleh, pasan den ciek sajo, pandai-pandai mambaok diri. Karano ang hiduik di rantau, jadilah ombak, jadilah aia. Kan lai mangarati ang mukasuik den kan?”

Mandanga iko, Udin langsuang tagak, maangguak, manyalami, lalu mamaluak badan kuruih mamaknyo ko. Antah dek apo, tibo-tibo sajo hati Udin maraso langang, matonyo langsuang mangganang. Baitu paluaknyo lapeh, Udin langsuang mambaliak ka arah pintu, lalu pulang maninggakan Mak Ponde nan tagak mamatuang maninjau jarak.