(20) Nan Paralu Damai

Pas malam kaduo kadatangan Udin jo Amir di kampuang.  Kampuang ko sadang mambuek alek gadang. Alek kolaborasi antaro anak mudo kampuang jo anak mudo rantau. Nan di kampuang manyadiokan tampek jo sagalo kakalangkapannyo. Rang rantau manyadiokan pandanaan, langkok jo fasilitas hiburannyo.

Takah nan biaso, acara ko maundang nagari-nagari jiran bakuliliang. Dan takah nan biaso pulo, acara hiburan ko ditutuik jo wirid tawuran. Mamakan Udin sabagai tumbal, urang nan indak tahu apo-apo.

Malam tu, Udin kalua dek takajuik mandanga suaro urang ribuik-ribuk balarian. Dek raso ingin tahu, Udin batanyo ka salah surang nan balari di mukonyo. Namun, usahkan jawek nan didapek, Udin malah nan dilanyaunyo. Badan kuruih Udin nan nanpaknyo ndak badayo, abih dipermak dek tigo urang anak mudo. Hal iko tantu marusak sagalo rancana Udin jo Amir nan hanyo di kampuang 3 hari sajo.

Hari ko, hari Minggu malam Sanayan, sasudah suasana kondusif. Kaduo balah pihak sapakaik duduak basamo-samo, barambuak untuak manyalasaikan masalah nan tajadi samalam. Pihak nan partamo adolah Udin nan didampingi dek wali nagari jo kakak mudonyo. Pihak nan kaduo adolah katigo urang tuo palaku pangaroyokan didampingi dek wali nagari sarato kakak mudonyo pulo. 

Baitu wali nagari jo kakak mudo kaduo balah pihak nan takaik salasai mambarikan wejangan. Udin salaku pihak korban sarato katigo urang tuo nan mawakili anak-anaknyo sebagai pihak palaku disuruah maju ka muko.

“Baa Din, kan lai amuah waang damai?” wali nagari nan patamo batanyo kapado Udin.

“Lai, tapi baa caritonyo jo sakik nan den tangguang ko?” baleh Udin apo adonyo.

“Kalau itu, pihak nan basalah lah manyatokan kasadioan maubek sampai cegak sarato maagiah santunan ganti rugi” sambuang kakak mudonyo manjalehan.

Uraian kakak mudo ko, disambuik jo angguak panjang dek saluruh pihak kaduo. Lalu, salah surang dari katigo bapak-bapak nan tagak di muko Udin bukak suaro.

“Maaf Din, kami batigo adolah urang tuo dari anak-anak mudo nan mangaroyok Udin samalam” salam kenal gaek ko nan diikuti jo angguak duo gaek di kiri kananyo. Udin hanyo diam mamatuang mancaliak katigo gaek ko surang-surang.

Mancaliak Udin hanyo diam, gaek ko pun malanjuikkan.

“Kami mawakili anak-anak kami. Sangajo datang ka siko mangaku salah sarato maminta maaf ka diri Udin” lanjuiknyo maminta maaf.

Mandanga kato-kato ko, Udin indak langsuang manjawek. Inyo maangguak-angguak patando paham niaik baiak katigonyo. Lalu, jo pandangan sarupo urang mamintak, inyo madok ka wali nagari sarato kakak mudonyo.

Mancaliak tingkah Udin nan agak aneh ko. Sok arif, wali nagarinyo sugiro bukak suaro.

“Baa Din?”

“Iyo, baa Din? Lai amuah ang badamai?” kakak mudonyo sato pulo batanyo maningkahi.

Mandanga ko, Udin langsuang tadiam. Ndak mangarati pak wali jo kak mudo ko do ko, pikianyo. Karano itu, Udin maaliahan pandangannyo ka gaek nan batigo tadi. Maraso ndak ka mungkin ado solusi nan lain, Udin akhianyo bukak suaro.

“Jadihlah” jawek Udin lunak ndak basumangaik.
Mandanga iko, katigo gaek tadi maju sambia mauluakan tangan ka hadapan Udin.

“Maafkan anak-anak kami yo Din” kecek katigonyo lalu bagantian manyalami Udin.

Kutiko basalaman tu, katigonyo mangaluakan amplop dari saku guntiang cinonyo, lalu manyarahkan ka tangan Udin. Uang ganti rugi ko judulnyo.

Adegan salaman di muko ko langsuang disambuik dek saluruh urang nan hadir jo tapuak tangan. Salasailah padamaian, hilanglah sagalo luko, salasailah sagalo silang sangketo. Suasana malampun baliak santai takah samulo, takah ndak pernah tajadi apo-apo. Lai ka cerah hari ka muko nanpaknyo.

Bisuak sanjo, kampuang Udin geger. Pihak nan patang datang badamai, datang baliak sambia mamasang muko garang. Tambahannyo, ado tigo urang anak mudo jo muko bangkak hijau-hijau, bak cando urang nan baru sajo disangek labah.

“Maa si Udin patang?” salah surang nan datang langsuang mambukak suaro baitu malewati pintu kantua wali nagari. Pak wali nan sadang mangopi lamak jo kakak mudo, takajuik mancaliak kadatangan urang-urang ko.

“Manga ko?” sambuik kak mudo kaheranan.

“Iko ha” jawek salah surang rombongan nan datang ko sambia manjujuik ka muko tigo anak mudo nan mukonyo bangkak-bangkak.. 

“Astagfirullahal azhiim” wali nagari jo kakak mudo sarantak mangucap takah urang nan dikomando.

Lalu, baitu mampasilahkan urang-urang ko duduak, kakak mudo ko langsuang manyuruah salah surang anak ketek nan dari tadi mancogok di dakek tingkok pai mamanggia Udin.

Kiro-kiro limo minik balalu, urang nan ditunggupun akhianyo tibo. Udin masuak sambia mamparatian saluruh urang nan duduak. Baitu matonyo tatumbuak ka tigo gaek nan badamai jo inyo patang, inyo pun langsuang mandakek mauluakan tangan, mambuek saluruh nan hadir tatagun co kanai hipnotis masal.

“Eeh, Apak mah” keceknyo manyalami laki-laki tuo nan batigo. Inyo acuah takah ndak mancaliak tigo pareman nan bangkak-bangkak di balakang.

Baitu Udin duduak, kakak mudo langsuang tasadar dari tatagun bajamaah ko. Inyopun spontan basuaro.

“Hoi Din, iyo ndak waang haragoi kami nan tuo ko do yo. Baru duo hari di kampuang, waang mambuek heboh. Baru kapatang bajanji damai, kini lah waang ungkai janji nantun. Baa sabananyo ko?” sangiknyo tanpa baso-basi.

“Wakden ka pulang patang sabananyo lai mah. Tapi, sudahlah. Sia nan maungkai janji?” baleh Udin balagak sarupo urang indak basalah.

“Sia juo lai kok ndak waang” sambuang Pak Wali sato mamberangi Udin.

“Apo buktinyo dek apak-apak wakden maungkai janji tu?” baleh Udin santai.

“Pareman nan batigo tu bukti sahiahnyo ha” baleh Wali Nagarinyo sambia manunjuak ka arah katigo pasakitan.

Acuah jo tanpa mancaliak saketek juo, Udin langsuang majawek kecek pak wali ko.

“Manga pareman batigo ko? Apo kurang jatah nan den agiah baduo Amir di pasa Morohot tadi?” tanyonyo santai sakaligus mangakui kalau memang inyolah baduo Amir nan mampermak pareman batigo ko di pasa Morohot.

Mandanga pangakuan Udin nan sangaik lantang ko, apolai mandanga namo Amir pulo. Kakak mudo langsuang basuaro sambia manggatok-gatokan garamannyo.

“Kan jaleh tu ha. Patang baru badamai, kini lah ang ungkai. Manga ang tangani inyo?” tanyo kak mudo ko berang nan langsuang direspon Udin. 

“Wakden cuma sakadar mangumbalikan kalakuan katigonyo, itupun karano mereka memang pantas manarimonyo. Di ma pulo latak salah den?” respon Udin sambia baliak batanyo.

“Baa indak ka salah. Patang ang lah bajanji damai mah” potong wali nagari capek.

“Wakden badamai jo gaek nan batigo tu ha. Indak jo pareman nan batigo ko do” baleh Udin ndak kalah capek. 

Maraso galehnyo takanai, pak walipun sigek maaleh kecek.

“Tu manga pulo waang tarimo acara damai patang? Mangeceklah kok indak pueh!” lanjuiknyo sok demokratis.

“Memangnyo wakden baagiah kesempatan mangecek? Saingaik den, wakden cuma disuruah manarimo hasia rundingan jo basalaman di akhia acara” jawek Udin santai mambuek pak walinyo ko tangango, kaca-kaca-i ndak tantu jawek.

Saluruh nan tuo nan hadir jadi bapikia maingaik-ingaik acara kapatang. Dalam diam, kasadonyo maakui kabanaran kecek Udin ko. Memang bola lah bulek nan bakatangahkan. Tapi, itu kan karano mampatimbangkan situasi nan sadang paneh.

Karano taringaik patimbangan iko pulo. Salah satu urang tuo dari katigo pasakitan angkek suaro. Nanpaknyo, inyo mulai agak paham nan diraso dek Udin ko.

“Batua kecek ang Din. Tapi, itu kan dek manimbang keadaan nan masih paneh” keceknyo manjalehan jo suaro nan taduah.

“Itu namonyo tabang piliah mah. Wakden indak batenggang, samintaro nan jaleh-jaleh salah malah batenggang” sanggah Udin jo rono muko indak pueh.

Mancaliak kakarehan hati Udin ko, pak walipun akhianyo sato malunak-i.

“Padamaian tu memang dibuek jo caro takah iko Din”

“Pambodohan dibuek jo caro iko pulo mah Pak” sanggah Udin singkek, tapek, padek.

Mandanga papatah Udin nan tarakhir ko, saluruh nan ado dalam ruangan jadi tamanuang. Indak manyangko samo sekali. Tanyato, tajam juo paja lanyah ko.
Mancaliak kondisi lawan sabalik nan tairiang, Udinpun malanjuikan. Kesempatan ko mah, pikianyo capek.

“Bapak-Bapak ko lah tuo-tuo. Pamuko masyarakaik pulo lai. Harusnyo arif, bijaksana jo bijaksini, pandai manimbang samo barek. Kalau indak, ikolah akibaiknyo. Tacucuak dek duri haluih, tataruang dek batu ketek” tutuiknyo baparingaik nan disampuik dek angguak spontan dari saluruh tuo-tuo nan hadir. 

)*Kakak Mudo = ketua pemuda