(16) Spiderman Titit

Udin berang-berang mancaliak bininyo nan ndak amuah mambao anak ka pasa mambali baju rayo. Alasan Udin sederhana sajo, sakali satahun jatah mambali rayo ndak lo babao anak. Namun, alasan sederhana iko pulo nan mambuek bininyo ko indak berkutik. Udin acuah dan indak ajan jo sagalo alasan, takah urang nan labiah tahu pulo payah baranak pado bininyo ko.

Kutiko bininyo mangamukokan alasan susah, Udin manjawek, kalau ndak nio susah, usah baranak. Kutiko bininyo mangamukokan alasan baraso anak ko mada, jawek Udinpun sederhana, buah ndak ka jauah jatuah dari batangnyo, turunan tu mah, turunan dari amaknyo. Cubo takah abaknyo ko, pasti elok laku hehehehe.

Pendeknyo, anak harus basamo awak, apopun nan tajadi. Masalah susah pasti bisa diatasi. Itu gunonyo kito basamo, manuruik Udin. Akhianyo, barangkek juolah jadinyo batigo-tigo, Mirna, Ambun, Udin ka pasa mambali baju rayo.

Tibo di pasa, namonyo paja ketek, tantu tiok nan nampak nan tacelak tiok itu pulo inyo mamintak, marengek-rengek jikok indak dipanuhi.

“Bak, balon….” rengek Ambun haluih sayuik-sayuik sampai.

“Balon maa?....” baleh Udin co urang o-on.

“Itu, nan merah tu ha….” lanjuik paja ko tambah marengek sambia manunjuak balon nan malayang-layang bakabek jo tali. Udinpun mandakek sambia masih manggendong Ambun.

“Da, iko ciek” Udin langsuang mamintak balon ka laki-laki kuruih nan manjua.

“1500 da” jawek si tukang balon sambia senyum manih maunpan pitih Udin.

“Saitu ny. Yo lah, agieh ciek…” jawek Udin sambia langsuang mauluakan pitih mambayia cash and carry. Masak untuak anak surang ka diago-ago bana lo.

Baitu baliak ka tampek samulo, si Mirna langsuang baciloteh

“Ba a, lamak kan baranak?”.

“Biaso se nyo” jawek Udin acuah karano paluahnyo lah mulai mancicik kabarek-an manggendong Ambun.

Baru bajalan 10 meter, Nampak pulo urang manggaleh durian, mulai pulo lah marengek paja ko.

“Bak, durian…” rengeknyo takah cako.

Samulo Udin nio mambalian, tapi takana dek nyo baraso kini ko bukan musim durian, pasti manggilo harago durian ko mah. Mangana iko, Udinpun sugiro puta haluan maakai anak bujangnyo ko.

“Beko se wak bali ka Mak Ponde, labiah lamak, labiah banyak. Jikok paralu, jo parak-paraknyo sakali kito bali” umbuak Udin sakutiko.

“Indak. Den nio nan iko juo” baleh Ambun marengek agak kareh mamanciang pandangan urang bakuliliang.

Dek malu dicaliak urang, Udin tapaso bajalan juo ka dakek durian. Mancaliak tukang durian nan sadang mambalah durian, aka Udin langsuang bajalan. Inyo mambaliak capek takah urang takuik.

“Astaga. Sia tu Mbun?” keceknyo babisiak ka talingo Ambun.

Ambun mancaliak Udin ka heran-heranan.

“Caliak dek ang tu, bapisau nyo haaa…” kicau Udin sambia mamuta kapalo Ambun ka arah tukang durian.

“Hiii, lai ndak urang karek kapalo tu. Abak takuik Mbun, ha” lanjuik Udin manggoyangan badannyo purak-purak manggigia.

Mancaliak Udin manggigia jo mancaliak pisau tukang durian, puceklah muko paja ko.

“Pai wak yo?”

“Iiyoo…” jawek anak ko nampak katakutan.

Mancaliak iko, si Mirna, bini Udin hanyo geleng-geleang kapalo sambia manggumam dalam hati, tu baru pemanasan mah, caliaklah sabanta lai.

Sapuluah meter manjalang toko pakaian anak, Nampak pulo urang manggaleh oto-oto. Sakalian oto ado di sinan, mulai dari nan ketek hinggo nan gadang, mulai dari nan murah hinggo nan maha. Alun manga-manga, Ambun lah langsuang barontak mambuek karuik kaniang Udin jadi batambah. Mancaliak kaniang Udin mangaruik, Mirna pun langsuang maatur siasaik.

“Da, uda ijan baranti-ranti, luruih se taruih ka toko pakaian” parintah si bini sambia mairiang dari balakang.

“Beko wak bali oto Mbun, wak bali oto gadang untuak parang langkok jo badia-badianyo. Buliah di rumah beko bisa parang jo Abak. Kini tanang se dulu nak jan panek abak manggendong, jadi talok dek nyo parang beko tibo di rumah” umbuak Mirna sambia manjujai paja ko dari balakang.

Udin mancibia mandanga bahaso bininyo marayu Ambun. Namun, dalam hati inyo baharok, mudah-mudahan paja ko haniang.

Akhia carito, sampai juolah jadinyo ka toko pakaian. Mancalaliak spiderman, batman, saun de sip baderet di etalase, sananglah hati anak ko. Matonyo langsuang bakaco-kaco, muluiknyo tangango sakutiko.

“Horayyy……spidermannnn” tibo-tibo paja ko langsuang basorak kagirangan.

“Nio baju spiderman?” tanyo Udin sambai galak.

“Iyooooo…….” si Ambun manjawek sambia malonjak-lonjak.

Sasudah maambiak baju, Udin mambao anak samato kaki ko ka ruang pas. Namun, baitu pakaian tabukak, si Ambun balari langsuang ka lua sambia mambao baju spidermannyo.

“Ee yayai, paja kapunduang ko mah. Awas ang tibo di rumah, kok ndak den permak”, rutuak Udin maumpek surang, lalu kalua dari kamar pas mancari kama si Ambun lari.

Baitu kalua dari kamar pas, di suduik nampak babarapo urang pegawai laki-laki sadang mambujuak Ambun nan kini tangah tagak dakek patuang-patuang pajangan baju spiderman dalam etalase toko. Inyo bagaya ala spiderman bugil, indak amuah disuruah kalua.

“Hoiii! kalua ang!” hariak Udin sambia manggatok-gatok-an garamannyo.

“Eh, anaknya, Pak? lucu ya” tanyo salah surang pegawai sambia galak ketek.

“Amai ang, malawak den nanpak dek ang!” jawek Udin langsuang marabo mambuek pegawai ko tasuruik sambia manakua.

“Maaf….” si pegawai pun langsuang mundur. Ngari bana inyo nanpaknyo mancaliak muko Udin nan lah mamerah manahan malu jo berang.

Apolai kini lah ado pulo urang lain nan sato mancaliak. Berang Udin langsuang ka ubun-ubun.

“Mbun, kalua ang indak. Kok indak Abak tinggaan” ancam Udin mambaliak mancubo mamanciang paratian Ambun.

Namun, Ambun acuah sambia taruih bagaya ala spiderman. Udin nanpak gawuik kapalo mancubo bapikia mancari aka. Lalu, tibo-tibo bukak suaro.

“Ambun….” sapo Udin jo suaro agak panjang.

Baitu Ambun mancaliak, Udinpun manambahan.

“Wueee, ndak malu, spiderman aa pulo tu? spiderman asli se ndak ado titit do, wueeee...” cimeeh Udin sambia manjuluakan lidah ka arah Ambun.

Mandanga iko, Ambun langsuang malengah mancaliak patuang spiderman di sabalahnyo.  Dek ndak nanpak titit spiderman ko, paja ko langsuang manangih manutuik mato.

Akhianyo, drama spiderman batitit salasai juo. (Ide: carito kawan)