(27) Manggoknyo CB Murai

Dek ibo ka Iben juo, kawan salapiak sakatiduran kutiko mudo, Udin jo Amir sapakaik mandirian usaho basamo. Tagaklah PT nan diagiah namo jo Guci, Direktur Utamo Udin. Sasuai jo namonyo, yoitu Guci, aratinyo tampek manyimpan sarato bajago-jago, PT Guci ko dibuek untuak bajago-jago. Tamasuak bajago-jago dari kawan nan kasusahan, sarupo Iben ko,  hehehe.

Baru-baru ko, PT Guci manang tender. Karanonyo para krupun mulai sibuk sasibuk-sibuknyo. Lah tigo hari ko, duo kapalo lapangan Iben jo Amir gilo baputa-puta survey sarato manamui sagalo pihak nan takaik hinggo nan indak takaik jo proyek. Mulai dari pejabat kecamatan, kapolisian, tokoh masyarakaik, sampai ka urang bagak. Ka sadonyo ditamui demi kalancaran pangarajoan proyek.

Malam ko, salasai manumui urang bagak. Baliau pulang baduo baboncengan jo CB murai, transportasi nan disadiokan untuak bagian lapangan. Iben mambao, Angku Amir duduak abeh di balakang.

“Jan kancang-kancang bana Ben, mato mangantuak ko mah”.

Amir baparingaik kutiko Iben mulai taraso gak kancang mamacu CB murai ko.

“Aman tu Mir” Jawek Iben sambia manguok panjang.

“Mangantuak ang Ben?”

“Indak, gaya den mah. Ma pulo ka mangantuak lai ko Mir. Asa lah di ateh CB ko, raso-raso di ateh Harley Dabuyuang wak deknyo mah” kilah Iben sangajo manjawek panjang manyuruakan kantuaknyo.

“Hahaha” galak kaduo konco palangkin ko mamacah angin malam nan manusuak tulang.

“Mir!”

“Apo?”

“Kalau lai mandapek wak di proyek nan kini ko, ganti lah CB ko lai. Sampaikanlah ka si Udin” lanjuik Iben mangamukokan idenyo.

“Talambek ang mah. Wakden iyo ka mangganti CB ko jo truk nantik” jawek Amir mananggapi ide Iben.

“Kalau CB ko baganti, sopir CB ko baa Mir?” lanjuik Iben manyalidik.

“Tantu baganti pulo” baleh Amir santai.

“Bato Mir, wakden ka mano bacampakan? Batigo di balakang ko ha” protes Iben mananyokan masa depannyo.

“Bacampakan ka ateh truk tu”.

“Hahaha”.

Kaduonyo langsuang takekeh-kekeh dek galak. Ruponyo lah sudah etongan ko dibuek Udin jo Amir ruponyo, pikia Iben di salo galaknyo.

“Kalau lah batruk, kito bali kaco reben Mir, buliah nak gagah takah filem nan wak tonton di tipi peti di rumah ang dulu tu ha” lanjuik Iben makin manjadi jo ide-idenyo.

“Tantu lah iyo, tapi usah kini disabuik-sabuik Ben” potong Amir mahambek Iben.

“Baa tu?

“CB ko lain mah, manggoknyo beko. Awak nan dianiayo nyo di pasawangan bahantu ko” jawek Amir tadanga asal-asalan.

“Hahaha, iyo yo, taibo pulo hatinyo beko ndak, hahaha”.

Galak Iben langsuang tasambua mandanga kecek konconyo ko. Sasudah tadiam sabanta, Ibenpun baliak bukak suaro.

“Tapi, antah baa lah yo Mir, lah tabayang-bayang dek wakden truk tu mah. Nampaknyo, lai ka manjadi mah Mir, patando ko mah” lanjuik Iben panuah harok.

“Wakden sabananyo iyo juo. Cuma dek takuik tadanga dek CB ko, tapaso den tahan dulu. Waang pun harus baitu, ancak haniang dulu. Kecuali, kok lai talok dek ang manulak dalam kalam ko”

“Jadihlah. Tapi, jan lalok Mir”

“Aman tu. Kok lalok den sia pulo nan ka maingaik-an waang” jawek Amir sambia manutuik muluik mahilangan suaro kuok.

“Hahaha, ndak talok jadi pembalap lai Mir, badan lah parenggo” jawek Iben sarayo galak.

CB mulai marawuang manyibak dinginnyo malam. Kaduo konco palangkin ko sibuk jo hayalan masiang-masiang. Amir nan di balakang sibuk jo hayalan tantangan proyek salanjuiknyo. Samintaro itu, Iben nan di muko pun sibuk jo hayalan sadang mambao truk baru. Kok lah dapek truk ko, partamo sakali dites di pandakian Si Tinjau Lauik, pikia Iben kutiko itu.

Iben pun akhianyo mulai malayang mambayangan mambao truk mandaki panorama satu Si Tinjau Lauik, mamacik stir sambia basiwua-siwua ketek. Tibo-tibo, pas di tikungan nan kaduo, dek baban nan talalu barek truk ko ndak bisa dikandalian.

“Mir!” Iben mamanggia sambia mangguncang bahu Amir maancubo maingaik-an.

“Manga Ben?”

“Ha? jawek Iben sarupo urang kabinguangan.

“Baa kok baranti ang Ben?”.

“Eh, lah sampai mungkin mah”.

“Kok kalam? Ha, basah pulo gai ha. Di ma wak ko Ben?” tanyo Amir balanjuik manyampaikan parasaan nan mulai lain.

“Iyo gak ragu den mah Mir, wakden basah pulo ha”

Iben tagak, lalu mulai mancari-cari senter ketek nan tasalek di saku jaketnyo. Baitu senter hiduik, Ibenpun langsuang marabo.

“Halah, yo lah cimporong CB ko mah Mir” umpek Iben sakutiko.

“Baa tu?”

“Ko lah ka dalam banda wak diantaannyo mah”

“Ha??? Tu waang lah den kecekan dari tadi”

Hanyo itu nan kalua dari muluik Amir sambia mandasah. Giginyo badariak-dariak, badannyo manggigia manahan dingin.

“Hu-uhhh”