(42) Jo Senyum Pagi Tu Disonsong Kawan

Mancaliak Iben nan duduak bamanuang surang di kadai kopi. Udin galak-galak rusuah. Ndak bacito-cito hiduik paja ko, maso iyo pagi basambuik jo manuang, tenggang juo lah parasaan kopi jo goreang pisang tu. Atau, masih tarumuak dek tongek-tongek samalam?, gumam Udin dalam hati.

Dek karano itu, baitu masuak, Udin langsuang manskakmatian Iben kontan-kontan.

“Halah, pagi baru, lah bantuak basahan lambok se, makonyo mandi sabalun ka kadai, Ben” sapo Udin baramah-tamah.

Sambia malengah saketek mancaliak Udin, Iben langsuang mambaleh ndak kalah ramahnyo.

“Jan mangecek ang Din, kumua-kumua lah dulu”

“Hahaha, darah mangalagak pulo tu”

“Sukoti den”

Sambia manyalai rokok, Udin duduak tapek di muko Iben. Kopi Iben nan talatak abeh di ateh meja langsuang disembanyo sabalun baliak baciloteh.

“Jo senyum mamulai hari tu kawan, bia nak bersahabat dunia ko jo awak” tarangnyo sok mantap.

“Hahaha, gaya ang lai” respon Iben galak tapi jo kasan tapaso.

Mancaliak respon Iben nan masih takah urang kurang darah ko, Udin pun sangajo bapura-pura basumangaik. Siapo tau, sumangaik jo energi positif wakden ko bisa manular ka paja ko, pikia Udin kutiko itu. Babaka pikia nan baitu, Udinpun balanjuik mampatageh kato-katonyo di muko.

“Ndak gaya wakden sajo do tu, hukum alam tu mah Ben”

“Cubolah buktian kok inyo” sonsoang Iben capek, namun masih jo aia muko baso-basi.

“Lah, manyonsong hari ko, sabananyo samo jo manyonsong urang mah. Kalau senyum wak, inyo senyum pulo, kalau mancibia wak, inyo mancibia pulo, kalau masam gaya wak, mungkin inyo akan labiah masam pulo” tarang Udin politis.

“Itu kan kecek waang, maa buktinyo?” sanggah Iben mamatahan.

Mandanga bantahan Iben nan taruih juo ndak bersahabat ko, darah tukang caramah Udin jadi manggalagak.

“Awak sabanta ko bukti sahiahnyo. Dek wakden sonsong waang jo cibia, kan ang cibiaan pulo wakden mah”

“Hehehe, iyo juo yo. Tapi, ndak ado hubungannyo jo kadaan wakden kini ko do” baleh Iben santai Nampak mulai manikmati ciloteh pagi ko.

“Baa lo ka indak ko ha. Iko ko kan tantangan urang nan mancaliak. Tanyo lah ka urang kini ko ha, kok ndak bantuak basahan lambok lagak ang keceknyo” tantang Udin mamatahan gelek Iben ko.

Mandanga sabutan basahan lambok ko, darah Iben langsuang naiak. Kawan kalera mah, pagi baru lah duo kali awak dikecekannyo bantuak basahan lambok.

“Amai ang, cimporong anguih. Ko senyum den untuak ang ha” caruik Amir sambuang-manyambuang sambia mamacik kapalo Udin. Muncuangnyo langsuang mangango maojokkan gigi nan nanpak manguniang. Lalu, mahambuih angok lakek-lakek ka muko Udin.

“Hahaha, kalera, ado juo siso jariang samalam lai. Alun bacuci potok kawan lai yo? Baranjak lah, baun ha” jawek Udin mambana sambia bausaho mahalangi muluik Iben nan masih taruih mahambuihan angok ka mukonyo.

“Tapi, waang nio senyum. Ko den agiah bana, hah” ambuih Iben taruih tapek ka muko Udin.

“Hahaha, ampunnnn”