(33) Gulai Tingga Kuah

Dek litak sudah karajo, Iben langsuang ka kadai Tek Siah. Kadai nasi samato wayang di daerah tampek tingganyo. Tampek inyo makan tiok siang, tampek inyo minum kopi batigo konco palangkinnyo tiok malam.

Kadai Tek Siah ko memang favorit Iben, salain lamak, bisa mautang, bisa pulo dibayia kredit.

"Goreang ka goreang se. Ndak ado nan lain ko, Tek?"

Iben langsuang mangaluah dari baliak kaco etalase mancaliak menu nan tapajang.

"Caliak lah dulu, ko ado gulai ko ha" Tek Siah manjawek garutu Iben sambia manunjuak ka lamari ketek subalah etalasenyo.

Mandanga iko, Iben pun langsuang masuak lalu mancogokan kapalo.

"Tu, gulai aa tu?" tanyo Iben baitu mancaliak duo buah baskom barisi gulai

"Gulai parancih" jawek Tek Siah sambia taruih mangipeh-ngipehan langau nan nak singgah.

"Halah, makanan kambiang bagulai, ckckckck...." daceh Iben sambia mancibia panjang.

"Kok indak ajan jo itu, cubo iko ha, gulai paku" respon Tek Siah bamukasuik bausaho mamanuhi salero Ibe ko.

"Ee yayai, sarang acek tu mah" cimeeh Iben makin manjadi.

“Nan lain lah Tek” lanjuiknyo pulo.

"Amai ang, tu gulai aa ang nan nio?" Tek Siah mulai nanpak lameh maadoki tingkah Iben ko.

"Wakden taragak gulai ayam, lai ado Tek?" jawek Iben sungguah-sungguah.

Mancaliak galagat Iben ko, parasaan Tek Siah langsuang mangontak. Lai barasaki Iben nanpaknyo mah, lumayan untuak palaris siang ko. Karano itu, Tek Siahpun baniaik mangaluakan bungo galeh nan sangajo nyo simpan di dalam.

"Lai, baruntuang waang mah, sabanta ko bana wakden baru salasai mambuek gulai ayam kandak ang tu”

“Yes…” sambuik Iben spontan sambia mangapakan tangannyo mambantuak tinju, lalu manirukan gaya urang di iklan-iklan TV nan acok inyo tonton.

“Sabanta yo, wakden ambiak ka dalam dulu" lanjuik Tek Siah sambia masuak ka dalam rumah nan pintunyo tapek di suduik kadai nasinyo ko.

Baitu baliak, jo sumangaik ampek limo inyo langsuang batanyo ka Iben.

“Bara potong dek ang ko?”

"Ehm, tolong kuahnyo se saketek Tek!" jawek Iben didahului jo suaro mandehem babarapo kali.

“Amai ang, ambiak surang” umpek Tek Siah ndak dapek manyuruakan parasaannyo nan mangka. Ancak wakden kecekan se indak ado tadi lai, gumamnyo sambia manokok-nokokan sendok panyanduak gulai ka tapi panci.